Akileraaruserinermik ingerlatsineq pillugu Inatsisartut inatsisaat nr. 11, 2. november 2006-imeersumi, Inatsisartut inatsisaanni nr. 22, 28. november 2018-imeersumi allanngortinneqartumi § 36 b, imm. 2 naapertorlugu aalajangersarneqarput:

  § 1.  Nalunaarummi pineqarput akileraartussaatitaasut, isertitanik akileraaruserneqartussaatitaasunik imaluunniit agguaanneqartussaatitaasunik naatsorsuinermi suleqataasunut attuumassuteqartunut niuernikkut imaluunniit aningaasaqarnikkut ingerlatitsinernut akigititanik atugassarititaasunillu atuisussaapput (ingerlatitsinerit nakkutigisaasut), ingerlatitsinerit illuatungeriit imminnut attuumassuteqanngitsut akornanni naammassineqarsimasuuppata anguneqarsinnaasussanut naapertuuttunik, takuuk aningaasarsianit akileraarutit pillugit Inatsisartut inatsisaat § 36 a, imm. 1, aammalu ingerlatitsinernut nakkutigisaasunut taakkununnga akigititat atugassarititaasullu qanoq aalajangersarneqarsimanerannut allaganngorlugu uppernarsaatinik suliaqartussaallutik uninngasuuteqartussaallutillu, takuuk aningaasarsianit akileraarutit pillugit Inatsisartut inatsisaat § 36 b, imm. 2.
  Imm. 2.  Aningaasarsianit akileraarutit pillugit Inatsisartut inatsisaat § 36 b, imm. 4-imi allassimavoq, akileraartussaatitaasut annertussusissanut killissaliussat ataanniittut, ingerlatitsinernut nakkutigisaasunut aalajangersimasunut uppernarsaatinik taamaallaat suliaqassasut.

  § 2.  Uppernarsaat marlunnik immikkoortoqartoq, suliffissuaq tamakkerlugu ataatsimoortumik uppernarsaat aammalu suliffissuarmi akileraartussaatitaasunut tamaginnut immikkut uppernarsaat nunamut tunngasoq, nassuiaatinik misissueqqissaarnernillu il.il ataatsimoortumik uppernarsaat pillugu § 4-imi nassuiarneqartunik aammalu uppernarsaat nunamut tunngasoq pillugu § 5-imi nassuiarneqartunik, imaqassaaq aammalu akigititat atugassarititaasullu ingerlatitsinerit illuatungeriit imminnut attuumassuteqanngitsut akornanni naammassineqarsimasuuppata anguneqarsinnaasussanut naapertuuttumik aalajangersarneqarsimanersut nalilersuinermut tunngavissaliisinnaassallutik.
  Imm. 2.  Nassuiaanerit, misissueqqissaarnerit il.il. §§ 4-imi aamma 5-imi taaneqartut annertussusaannut, suliffissuup, akileraartussaatitaasup aammalu ingerlatitsinerit nakkutigisaasut taakkua annertussusaat pisariussusaallu apeqqutaassaaq.
  Imm. 3.  Uppernarsaat kalaallisut, danskisut, norskisut, svenskisut imaluunniit tuluttut suliarineqarsinnaavoq.
  Imm. 4.  Uppernarsaat piumasarineqarnerani akileraartarnermut ingerlatsivimmut ullut 60-it qaangiutsinnagit nassiunneqassaaq.

  § 3.  Ingerlatitsinernut nakkutigisaasunut pingaaruteqanngitsunut § 5 naapertorlugu nassuiaanernut misissueqqissaarnernullu tunngatillugu, ingerlatitsinerit, akileraartussaatitaasup pingaaruteqanngitsutut naliliiffigisai, taamaallaat allanneqassapput.
  Imm. 2.  Ingerlatitsinerit aningaasaqarnikkut annikitsuinnarmik annertussusillit ataasiaannarluni pisut pineqarpata, ingerlatitsinerit § 5-ip ataaniittut pingaaruteqanngitsutut isigineqassapput.

  § 4.  Ataatsimoortumik uppernarsaat suliffissuarmut diagrammimik imaqassaaq, suliffissuup inatsisitigut aaqqissuussaanikkullu ilusaanik takutitsisumik, ilanngullugit nunap suleqataasut attuumassuteqartut ataasiakkaat suliaqarfigisai allallugit.
  Imm. 2.  Ataatsimoortumik uppernarsaat suliffissuup ingerlatsinermini suliaannik ataatsimut isigalugu nassuiaammik imaqassaaq, ilanngullugit makkua:
1)  Suliffissuarmi tunngavigisat annertuumik aningaasarsiorfiusut (drivers of business profit).
2)  Tunisassianut aamma/imaluunniit sullissinernut tallimanut annerpaanut kaaviiaartitanut uuttukkamik suliffissuup pilersuiffiinut (supply chain) kiisalu tunisassianut aamma/imaluunniit sullissinernut tamaginnut, suliffissuup patajaallisakkamik kaaviiaartitaasa 5 procentianit annertunerusunut nassuiaat. Nassuiaat diagrammimi takussutissiarineqarsinnaavoq.
3)  Suliffissuarmi suleqatigiit imminnut atassuteqartut akornanni sullissinissamut isumaqatigiissutinik annertuunik naatsumik nassuiaalluni allattukkat, tassani ilaanatik ilisimatusarnermut ineriartortitsinermullu sullissinissamut isumaqatigiissutit, kiisalu sullissinernut annertuunut, suliffissuarmi sullissiviit qullersaqarfiini isumagineqartunut imaluunniit isumagineqarsinnaasunut aammalu sullissinermut aningaasartuutinik atugassiinermut nuussinermut akinik aalajangersaasarnermut politikkinut atorneqartunut aammalu suliffissuup iluani sullissinernut akiliinernut akigititanik aalajangersaanermut, nassuiaatit.
4)  Nunami sumiiffimmi tunisassianut sullissinernullu kaaviiaartitani uuttorlugu niuerfiit annersaannut nassuiaat, takuuk nr. 2.
5)  Atuuffinnut misissueqqissaarneq naatsoq, suliffissuarmi ataatsimoortumik aningaasarsiortitsinermut pingaarnertut iluaqutaasunik nassuiaaviusoq, suliffissuarmi suleqatigiit imminnut attuumassuteqartut ataasiakkaat sorliit, atuuffinnut annertuunut, annaasaqarsinnaanernut kiisalu pigisanut nalilinnut tunngatillugu tamatumunnga iluaqutaanersut pillugu paasissutissartaqartoq.
6)  Annertuunik aaqqissuussaanikkut allanngortiterinernut, pisinernut tunisinernullu ukiup isertitaqarfiusup ingerlanerani pisunut nassuiaat.
  Imm. 3.  Suliffissuup pigisaannut tigussaanngitsunut (OECD-p Transfer Pricing Guidelinesiani kapitel VI-imi nassuiarneqartutut) ataatsimoortumik uppernarsaat makkuninnga imaqassaaq:
1)  Suliffissuup pigisanik tigussaanngitsunik ineriartortitsinermut, piginnittuunermut aammalu atuinermut pingaarnertigut periusissiaannik ataatsimut isigalugu nassuiaaneq, ilanngullugit suliffissuup pingaarnertigut ilisimatusarnikkut ineriartortitsinikkullu atortuisa nunami sumiiffimmi inissisimanerat kiisalu ingerlatat taakkua suminngaanit aqunneqarnersut allallugu.
2)  Suliffissuarmi pigisat tigussaanngitsut imaluunniit pigisat tigussaanngitsut ataatsimoortukkaat, suleqatigiit imminnut attuumassuteqartut akornanni ingerlatitsinernut pingaaruteqartut allassimaffiat, aammalu suliffissuarmi immikkoortortat sorliit pigisanik tigussaanngitsunik taakkuninnga inatsisitigut piginnittuunersut allallugu.
3)  Pigisat tigussaanngitsut pillugit suleqatigiit imminnut attuumassuteqartut akornanni isumaqatigiissutit annertuut allassimaffiat, ilanngullugit pingaarnerit CCA-mi isumaqatigiissutit (Cost Contribution Arrangements), ilisimatusarnermik ineriartortitsinermillu sullissinissamut isumaqatigiissutit kiisalu pisinnaatitsissutinut aamma royaltynut isumaqatigiissutit.
4)  Suliffissuup ilisimatusarnermik ineriartortitsinermillu ingerlataannut kiisalu pigisanut tigussaanngitsunut tunngatillugu nuussinernut akinik aalajangersaasarnermut politikkiinut pingaarnernut ataatsimut isigalugu nassuiaatit.
5)  Ukiup isertitaqarfiusup ingerlanerani pigisanut tigussaanngitsunut pisinnaatitaaffinnik suleqatigiit imminnut attuumassuteqartut akornanni nuussinernut annertuunut tamaginnut ataatsimut isigalugu nassuiaat, immikkoortortat aamma nunat sorliit nuussinerni akuunersut, kiisalu tamatumunnga atatillugu akiliinerit allallugit ilanngunneqassallutik.
  Imm. 4.  Suliffissuup aningaasaqarnikkut ingerlataannut tunngatillugu ataatsimoortumik uppernarsaat makkuninnga imaqassaaq:
1)  Suliffissuaq qanoq aningaasalersorneqarnersoq ataatsimut isigalugu nassuiaat, ilanngullugu taarsigassarsititsisunut arlaannaannulluunniit attuumassuteqanngitsunut aningaasalersuinikkut aaqqissuussinerit qitiunerpaat nassuiarneqarnerat.
2)  Suleqatigiit imminnut attuumassuteqartut tamarmik, suliffissuarmut tunngatillugu qitiusumi aningaasalersuinermut atuuffeqartut, kinaassusaat, ilanngullugu nunat immikkoortortat taakkua aaqqissuussaanerminni najugaat, kiisalu sumiiffik immikkoortortat aqunneqarfiat, allallugit.
3)  Suleqatigiit imminnut attuumassuteqartut akornanni aningaasaqarnikkut aaqqissuussinernut tunngatillugu, suliffissuup nuussinernut akigititanik aalajangersaasarnermut politikkiinik ataatsimut isigalugu nassuiaaneq.
  Imm. 5.  Suliffissuup naatsorsuutitigut akileraarutitigullu inissisimanera pillugu ataatsimoortumik uppernarsaat makkuninnga imaqassaaq:
1)  Ukiumut suliffissuup naatsorsuutai patajaallisakkat, taakkua naatsorsuutinik saqqummiinissamut, suliffiup iluani aqutsinermut, akileraarutinik naatsorsuinermut atugassatut suliarineqarsimappata imaluunniit allamut atatillugu suliarineqarsimappata.
2)  Suliffissuup APA-nut (Advanced Pricing Agreement) aalajangersimasunut tunngasunut, akileraartarnermut isumaqatigiissutaannut aalajangiinernullu atuuttunut, nunat akornanni isertitat agguarsimanerat pillugu siunissami atuuttussanut allattuiffik aamma nassuiaat naatsoq.

  § 5.  Akileraartussaatitaasoq pillugu nunamut tunngasoq uppernarsaat makkuninnga imaqassaaq:
1)  Akileraartussaatitaasup aqutsinerata ilusiligaaneranut nassuiaat, najukkami aaqqissuussaanermut diagram aammalu ataasiakkaanut najukkami aqutsisut nalunaarusiorfigisartagaannut nassuiaat, kiisalu nunat sorliit ataasiakkaat taakkua nalinginnaasumik allaffeqarfimminni najugarineraat allallugu.
2)  Suliffeqarfiup aammalu ingerlatsinermut periusissiap akileraartussaatitaasumit malersorneqartup sukumiisumik nassuiaataat, kiisalu akileraartussaatitaasoq ukiumi isertitaqarfiusumi kiisalu ukioq isertitaqarfiusoq atuuttoq sioqqullugu aaqqissuussaanerup allanngortiterneqarnerani imaluunniit pigisanik tigussaanngitsunik nuussinermi akuusimanersoq imaluunniit sunnerneqarsimanersoq allallugu, aammalu akileraartussaatitaasumut qanoq sunniinersut imaluunniit sunniisimanersut nassuiarlugu.
3)  Akileraartussaatitaasup unammillertai pingaarnerit allallugit.
 Imm. 2.  Nunamut tunngasumi uppernarsaammi ingerlatitsinerit nakkutigisaasut, akileraartussaatitaasup akuuffigisaasa suussusaanni tamaginni makkuninnga paasissutissiisoqassaaq:
1)  Ingerlatitsinernut nakkutigisaasunut nassuiaat (assersuutigalugu pisiniarneq, tunisassiorneq, tuniniaaneq, pilersuineq imaluunniit sullinneqarneq, taarsigassarsiat, qularnaveeqqusiinerit, pigisanik tigussaanngitsunik pisineq tunisinerlu, royaltynik akiliineq il.il.) kiisalu ingerlatitsinerit nakkutigisaasut ingerlanneqarsimaneranni ataqatigiinnernut nassuiaat.
2)  Ingerlatitsinerit nakkutigisaasut akileraartussaatitaasup akuuffigisimasaasa suussusaanni tamaginni ataatsimut katillugu iluminni akiliinerit aningaasartai allallugit (assersuutigalugu tunisassianut, sullissinernut, royaltynut, ernianut il.il. akiliinerit), akileraartarnermi inatsiseqarfiusuni akiliinerit ingerlanneqarfigisaannut immikkoortiterlugit.
3)  Suleqatigiit imminnut attuumassuteqartut, akileraartussaatitaasoq peqatigalugu ingerlatitsinerni nakkutigisaasuni tamaginni immikkut akuusut kikkuunerat, kiisalu suleqatinut taakkununnga tamanut immikkut atassuteqarneq naatsumik nassuiarlugu.
4)  Isumaqatigiissutit nakkutigisaasut pingaaruteqartut, akileraartussaatitaasup ilaaffigisaasa tamarmik assilinerat.
5)  Akileraartussaatitaasumik kiisalu suleqatigiinnik imminnut atasunut attuumassuteqartunut ingerlatitsinerit nakkutigisaasut immikkoortuinut tamaginnut tunngatillugu sukumiisumik sanilliussilluni misissueqqissaarneq aamma atuuffinnut misissueqqissaarneq, ilanngullugu ukiunut siusinnerusumiittunut tunngatillugu allannguutinut tamaginnut nassuiaat.
6)  Ingerlatitsinerit suussusaannut tamaginnut tunngatillugu nuussinernut akinik aalajangersaanermi periaatsip naleqqunnerpaap allanneqarnera aammalu periaatsimik toqqaanermut tunngavilersuut.
7)  Nuussinernut akigititanik aalajangersaanermut periaatsimut tunngatillugu naleqquppat, nuussinermi peqataasut arlaat misileraavigineqartussatut toqqarneqarsimanersoq paasissutissiissutigineqassaaq, aammalu toqqaaneq tunngavilersorneqassaaq.
8)  Nuussinernut akigititanik aalajangersaanermut periaatsip atorneqarnerani tunngavigisat ilimagisallu tunngavigineqartut nassuiarneqarnerat.
9)  Ukiunut arlalinnut misissueqqissaarnermik suliaqartoqarsimappat, taamatut aallaaveqarneq tunngavilersorneqassaaq.
10)  Ingerlatitsinerit (suliffiup iluani aamma avataani) sanilliunneqarsinnaasut toqqakkat allassimaffiat aammalu nassuiaatitaat kiisalu suliffeqarfinnut arlaannaannulluunniit attuumassuteqanngitsunut nuussinernut akigititanik aalajangersaanermut misissueqqissaarnermi atorneqartunut aningaasaqarnikkut toqqammaviusut pillugit paasissutissat, ilanngullugit toqqaaniarnerup ingerlaneranut aammalu paasissutissanut atorneqartunut najoqqutarisanut nassuiaat.
11)  Sanilliukkuminassusaannut iluarsiineruinnartunut aammalu misileraavigineqartumi paasisani, ingerlatsinerni sanilliunneqarsinnaasuni imaluunniit taakkunani tamaginni iluarsiisoqarsimanersoq, nassuiaat.
12)  Ingerlatitsinerit attuumassuteqartut, nuussinernut akigititanik aalajangersaanermut periaatsip toqqarneqartup atorneqarneratigut naalakkersuinermut attuumassuteqanngitsumik aalajangiinissamut tunngaviusumut naapertuuttumik akeqartinneqartut, sooq inerniliisoqarsinnaaneranut nassuiaat.
13)  Aningaasaqarnermut paasissutissat/naatsorsuutini paasissutissat nuussinernut akigititanik aalajangersaanermut periaatsip atorneqarnerani atorneqartut allallugit takussutissiaq.
14)  Ataasiakkaani, marluk akornanni aammalu tamat akornanni APA-t atuuttut kiisalu akileraartarnermut isumaqatigiissutit aalajangiinerillu allat siunissamut atuuttussat akileraartussaatitaasup suleqataaffiginngisaasa, kisianni ingerlatitsinernut nakkutigisaasunut tunngatillugu attuumassuteqartut, assilinerat.
  Imm. 3.  Nunamut tunngasumi uppernarsaammi aningaasaqarnermut, aningaasalersuinermut naatsorsuutinullu paasissutissat pillugit najoqqutassat makkua ilanngunneqassapput:
1)  Ukiumut isertitaqarfiusumut akileraartussaatitaasumut ukiumoortumik naatsorsuutinik kukkunersiugaasunik peqarpat, taakkua ilanngunneqassapput, taamaanngippallu naatsorsuutit kukkunersiugaanngitsut tamatumunnga taarsiullugu ilanngunneqassapput.
2)  Paasissutissat aamma atugassiinermut immersugassaq, naatsorsuutini paasissutissat nuussinernut akigititanik aalajangersaanermut periaatsimi atorneqartut qanoq akileraartussaatitaasumut ukiumoortumik naatsorsuutit qanoq naligiissarneqarsinnaanersut takutitsisut.
3)  Takussutissiat aamma immersukkat, ingerlatitsinernut arlaannaannulluunniit attuumassuteqanngitsunut, nuussinernut akigititanik aalajangersaanermut misissueqqissaarnermi atorneqartunut sanilliunneqarsinnaasunut aningaasaqarnermut, aningaasalersuinermut aamma/imaluunniit naatsorsuutinut paasissutissanik attuumassuteqartunik takutitsisut, kiisalu paasissutissanut taakkununnga najoqqutarisat allallugit.

  § 6.  Akileraartarnermut ingerlatsivik akileraarutinik misissuinerup ingerlanerani paasissutissanik najoqqutassanillu annertunerusunik piumasinnaavoq, ilanngullugu najoqqutassanik tapertaasussanik suliaqartoqassasoq. Paasissutissat najoqqutassallu, naalakkersuinermut attuumassuteqanngitsumik nalilersuinermut naleqquttutut isigineqartariaqartut, piumaneqarsinnaapput, ilanngullugit nassuiaanernut §§ 4-imi aamma 5-imi taaneqartunik itisiliinerit misissuinerillu, misissueqqissaarnerit il.il. § 2, imm. 3, taamaaqataanik atuutissaaq.

  § 7.  Akileraartarnermut ingerlatsiviup akileraartussaatitaasoq ingerlatitsinernut nakkutigisaasunut ataatsimut arlalinnulluunniit qarasaasiami paasissutissaasivimmut misissuinermik suliaqarnissaanik qinnuigisinnaavaa. Qarasaasiami paasissutissaasivimmut misissuinermik suliaqarnissaq pillugu qinnuiginninneq taamaallaat akileraarutinik misissuinerup nalaani saqqummiunneqarsinnaavoq.
  Imm. 2.  Qarasaasiami paasissutissaasivimmut misissuineq paasineqassaaq tassaasoq sanilliussinermut tunngaviusut malillugit ujaasineq, akigititanik aalajangersaanermut kiisalu ingerlatitsinernut nakkutigisaasunut akigititanik aalajangersaanerup naalakkersuinermut attuumassuteqanngitsumik atugassaqartitsilluni pisimanersoq nalilersuinermut atugassatut atorneqarsinnaasoq. Ujaasineq qarasaasiakkut paasissutissaasivinni tamanit pissarsiarineqarsinnaasuni pissaaq, ilanngullugu akiliilluni pisinnaalluni.
  Imm. 3.  Qarasaasiami paasissutissaasivimmut misissuineq makkuninnga imaqassaaq:
1)  Ingerlatitsinernik, misilerarneqartunik aammalu akigititanik aalajangersaanermut periaatsimik atorneqartumik suussusersiineq.
2)  Toqqaaniarnerup ingerlaneranut nassuiaat, ilanngullugu toqqaaniassamut annertussutsinut pitsaassutsinullu tunngavissarititaasunut tunngavilersuutit.
3)  Iluarsiinernik akuttoqatigiissitsinernillu atuinermut nassuiaatit.
4)  Qarasaasiami paasissutissaasivinnit uppernarsaatinut najoqqutassat aammalu allatigut paasissutissanik atuineq.
  Imm. 4.  Akileraartarnermut ingerlatsiviup qarasaasiami paasissutissaasivimmut misissuinermik suliaqarnissamut akileraartussaatitaasoq ullut 60-it aamma 90-it akornanni piffissalissavaa.

  § 8.  Nalunaarut ulloq 1. januar 2021 atuutilerpoq.
  Imm. 2.  Nalunaarut nakkutigisaasumik ingerlatitsinernut, ukiumi isertitaqarfiusumi ulloq 1. januar 2021 kingusinnerusumiluunniit aallartittumi, suliarineqartunut atuuppoq.

Namminersorlutik Oqartussat ulloq 25. november 2020

Vittus Qujaukitsoq

/

Nikolai S. Christensen