Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 12 c naapertorlugu aalajangersarneqarpoq:

Atuuffii

  § 1.  Naalakkersuisut COVID-19-ip tunillaassuunnissaa pinngitsoortinniarlugu utoqqaat illuini assigisaannilu aamma napparsimmavinni pulaartunut killilersuinerup atuuttunngortikkallarnissaanut piginnaatinneqarput.
  Imm. 2.  Suliffeqarfimmut pineqartumut peqqussuteqarnikkut killilersuinermik atuuttunngortitsisoqassaaq. Killilersuinerit peqqussummi erseqqinnerusumik aalajangersarneqassapput.
  Imm. 3.  Peqqussutit Nunatta Nakorsaaneqarfiata nittartagaani atuarneqarsinnaassapput.
  Imm. 4.  Peqqussutit piaarnerpaamik atorunnaarsinneqassapput.

Utoqqaat illui, inissiat il.il.

  § 2.  Utoqqaat illuinut pulaartut isersinnaanerannut inerteqquteqarnermik killilersuinernilluunniit Naalakkersuisut atuuttunngortitsisinnaapput, matumani inissat oqilisaataasut, inissiat imaluunniit allatut init sulisunut ataatsimoortumillu najugaqarfinnut attuumassutillit ilanngullugit, tamanna nunami maani nappaammik nalinginnaasumik inunnut ulorianaateqartup pinaveersaartinnissaa imaluunniit siammarnerata killilersimatinnissaa pisariaqarpat. Tamanna atuuppoq isumaginninnermik suliassaqarfimmi pissaanermik atuineq pillugu Inatsisartut inatsisaanni §§-ini 37-mi aamma 39-mi maleruagassaqaraluartoq.
  Imm. 2.  Inerteqquteqarnerit killilersuinerilluunniit atuutsinneranni pineqartut tassaasinnaapput nunaminertat ataatsimoorfiusartut, inissiallu ilaa najugaqartup nammineq atorsinnaasaa.
  Imm. 3.  Pulaartut isersinnaanerannut inerteqquteqarneq killilersuinerilluunniit neqeroorutinut aalajangersimasunut, neqeroorummut ataatsimut imaluunniit nunap ilaani arlalinni imaluunniit nalinginnaasumik neqeroorutinut tunngassuteqartinneqarsinnaapput.

Napparsimmaviit

  § 3.  Napparsimmavinnut peqqinnissaqarfiullu immikkoortuinut pulaartut isersinnaanerannut inerteqquteqarnermik killilersuinernilluunniit Naalakkersuisut atuuttunngortitsisinnaapput, nunami maani nappaammik nalinginnaasumik inunnut ulorianaateqartup pinaveersaartinnissaa imaluunniit siammarnerata killilersimatinnissaa pisariaqarpat. 
  Imm. 2.  Pulaartut isersinnaanerannut inerteqquteqarnerit killilersuinerilluunniit napparsimmavinnut aalajangersimasunut peqqinnissaqarfiullu immikkoortuinut ataatsimulluunniit isigalugu napparsimmavinnut peqqinnissaqarfiullu immikkoortuinut tamanut, peqqinnissaqarfiup nunami immikkoortuani pineqartumiittunut tunngasinnaapput.

Inerteqquteqarnermut killilersuinermullu ilaanngitsut

  § 4.  Naalakkersuisut §§-it 2 aamma 3 malillugu inerteqquteqarneq killilersuinerluunniit, najugaqartup imaluunniit katsorsarneqartup qanigisaata perulunnerata nalaani pulaarnissamut atuutinngitsoq aalajangersinnaapput.
  Imm. 2.  Perulunneq ima paasineqassaaq, assersuutigalugu napparsimaruluttumut imaluunniit inummut toqulersumut imaluunniit angajoqqaat qanigisaasulluunniit meeqqamut mikisumut allamulluunniit pinngitsoorani pulaartariaqarnerit.
  Imm. 3.  Suliffeqarfimmi najugaqarfimmiluunniit aqutsisut imaluunniit napparsimmavimmi peqqinnissaqarfiulluunniit immikkoortortaani aqutsisut, perulunnerup nalaani illersorneqarsinnaasumik pulaarnerup ingerlanneqarsinnaanerata qulakkeernissaanut pisussaaffeqarput.

  § 5.  Nalunaarut saqqummiussinerup aqaguani atortuulissaaq. 
  Imm. 2.Utoqqaat illuini assigisaannilu aamma napparsimmavinni pulaartunut killilersuinerup atuuttunngortikkallarnissaanut periarfissiinissaq pillugu Namminersorlutik Oqartussat nalunaarutaat nr. 7, 7. april 2020-meersoq atorunnaarsinneqarpoq.

Namminersorlutik Oqartussat, ulloq 14. april 2020

Martha Abelsen

/

Tine Pars