§ 1

Allagaateqarfeqarneq pillugu Inatsisartut inatsisaanni nr. 5, 3. juni 2015-imeersumi tulliuttut allanngortinneqarput:

1. § 1, imm. 2, ima oqaasertaqassaaq:
“  Imm. 2.  Naalakkersuisut maleruagassatigut aalajangersarsinnaavaat Inatsisartut inatsisaat tamakkiisumik ilaannakortumilluunniit atortuussasoq ingerlatseqatigiiffinnut, suliffeqarfinnut il.il. erseqqinnerusumik taaneqartunut pisortat ingerlatsinerannut naatsorsuunneqarsinnaanngitsunut. Aatsaalli taamaattoqartassaaq sulinerminni aningaasartuutaat tamarmik amerlanersaalluunniit pisortanit akilerneqartarpata imaluunniit Inatsisartut inatsisaat imaluunniit peqqussut naapertorlugu pisortat sinnerlugit aalajangiinissaminnut pisinnaatitaaffilerneqarsimappata.”

2. § 6 imatut oqaasertalerneqarpoq:
”  § 6.  Pisortat sullissiveqarfiutaasa, toqqortaatimik qaqugukkulluunniit isumannaatsumik suliarineqarnissaat toqqortarineqarnissaallu isumagissavaat. Elektroniskimik toqqortat suliarineqassapput toqqorneqarlutillu Nunatta Katersugaasiviata Allagaateqarfiatalu atortulersuummi akuerisaani, taakkulu qarasaasiamut toqqorsiviusumut millisillugit nuunneqarsinnaassapput.
  Imm. 2.  Pisortat sullissiveqarfiutaasa toqqortatik pisortat sullissiveqarfiisa allat toqqortaataannit immikkoortissavaat, taamaattoq tak. imm. 3. 
  Imm. 3.  Naalakkersuisut aalajangersinnaavaat, Inatsisartut inatsisaat atsiukkat siullerpaat, Inatsisartut peqqussutaat, Namminersornerullutik Oqartussat aamma Namminersorlutik Oqartussat peqqussutaat kiisalu kommunit ileqqoreqqusaat, toqqorsiveqarfiup toqqagaani toqqorsivimmi toqqortaatigineqassasut.”

3. § 8, oqaaseqatigiit aappaat, imatut oqaasertalerneqarpoq:
”Kommunini ingerlatsiviit toqqortaatinik suliarinnittarnerat toqqortaqartarnerallu pillugit maleruagassat aamma kommuninut isumaqatiginninniareernikkut aalajangersarneqassapput.”

4. § 8-p kingorna ivertinneqassaaq:
”  § 8 a.  Nunatta Katersugaasiviata Allagaateqarfiatalu pigisanik, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik, toqqortarinnittarnera pillugu ersarinnerusunik maleruagassanik, Datatilsyn-imit oqaaseqaammik pissarsinerup kingorna, Naalakkersuisut aalajangersaasinnaapput.”

5. § 10, oqaaseqatigiit aappaat, ima oqaasertaqarpoq:
”Kommunini ingerlatsiviit toqqorsiveqarnermut allakkanillu nalunaarsuiffeqarnermut pilersaarutinik suliaqartarnissaat pillugu maleruagassat aamma kommuninut isumaqatiginninniareernikkut aalajangersarneqassapput.”

6. § 12, imm. 1, imatut oqaasertaqartinneqassaaq:

“Toqqortaatit ukiunit 15-init pisoqaanerusut pisortallu sullissiveqarfiutaata sulinerani atortussaajunnaartut, kinguarsarnertaqanngitsumik Nunatta Katersugaasivianut Allagaateqarfianullu tunniunneqassapput. Pisuni immikkut ittuni aamma Nunatta Katersugaasivianut Allagaateqarfianullu isumaqatigiissuteqarnikkut tunniussineq piffissami allami pisinnaavoq. Piffissami allami tunniussisoqassappat tamanna Nunatta Katersugaasivianit Allagaateqarfianiillu qinnuiginninneq malillugu pissaaq.”

7. § 13, imm. 2, ima oqaasertaqarpoq:
”  Imm. 2.  Nunatta Katersugaasiviata Allagaateqarfiatalu inassuteqarnerata aamma Datatilsyn-imit oqaaseqaammik pissarsinerup kingorna, matumani elektroniskimik toqqortat ilanngullugit, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik toqqorneqartussanillu, toqqorneqartussanik tigusisarneq pillugu ersarinnerusunik maleruagassanik Naalakkersuisut aalajangersaasinnaapput.”

8. § 14 imatut oqaasertalerneqassaaq:
”  § 14.  Pisortat suliffeqarfiutaata attartorlugit angerlaakkallarsinnaavai nammineq allagaatit toqqortaatigineqalersut, sulianut atatillugu atorumallugit, tak. taamaattoq § 21 c.”

9. § 14-imi kapitali 4-p kingorna ivertinneqassaaq:
”  § 14 a.  Pisortatut oqartussaasoq kinaluunniit siusinnerusukkut maannakkulluunniit pisortatut oqartussaasunit toqqortaatigineqarsimasunik tigusaqaruni pissarsiaqaruniluunniit, tamanna pillugu Nunatta Katersugaasivianut Allagaateqarfianullu ingerlaannartumik nalunaaruteqassaaq. Toqqortaatinik taama ittunik oqartussaasut neqeroorfigineqarunik imaluunniit toqqortaatip piunera pillugu arlaatigut ilisimasaqalerunik taamatuttaaq Nunatta Katersugaasivianut Allagaateqarfianullu tamanna pillugu ingerlaannartumik nalunaaruteqassapput.”

10. § 19 kingorna ivertinneqassaaq:
”  § 19 a.  Toqqortaatit tamanit pissarsiarineqarsinnaanngitsut, pissarsiarineqarsinnaanerat pillugu ersarinnerusunik maleruagassanik Naalakkersuisut aalajangersaasinnaapput”.

11. § 21, imm. 2-mi, ivertinneqassaaq oqaaseqatigiit aappaatut:
“Nunatta Katersugaasivia Allagaateqarfialu atukkiussinermut atasumik piumasaqaateqarsinnaavoq.”

12. § 21 kingorna ivertinneqassapput:
”  § 21 a.  Nunatta Katersugaasiviata Allagaateqarfiatalu pisuni aalajangersimasuni allagaatinik, allagaatinik toqqorsivinniittunik ataatsimoortunik imaluunniit allagaatinik ataatsimoortunik toqqorsivinnik arlaqartunik ataatsimoortunik imaqartunik Nunatta Katersugaasivianut Allagaateqarfianullu tunniunneqareersimasunik atuinissamut akuersissut nalunaarutigisinnaavaa, atuisinnaanermut piffissaliussaasup naannginnerani, tak. taamaattoq  § 21 b aamma c.

  § 21 b.  § 21 malillugu akuersissut, oqartussaasup tunniussisup akuersineranik piumasaqaateqarpoq, imaassimappat
1)  allagaatigineqartup imaluunniit toqqortaatigineqartup pissarsiarineqarsinnaaneranut piffissaliussaq § 17 malillugu aalajangersarneqartumit sivisuneruppat,
2)  toqqortaatigineqartoq imaluunniit allagaatigineqartoq ukiunik 25-nik nutaaneruppat imaluunniit
3) toqqortaatigineqartoq naalagaaffimmi oqartussaasumit pissarsiarineqarsimappat, tak. § 18.

  § 21 c.  § 21 malillugu akuersissut Datatilsyn-imiit akuersissummik pisariaqartitsivoq, toqqortaatigineqartoq pisortat ingerlatsiviisa akornanni oqartussaasumit tunniunneqarsimappat aamma inunnut ataasiakkaanut inuttut atugaannut tunngasunik paasissutissanik imaqarsimappat aamma
1)  paasissutissat siusinnerusukkut suliarineqarsimasut Inunnik paasissutissanik suliarinnittarneq pillugu inatsisip Kalaallit Nunaanni atuutilersinneqarnera pillugu peqqussummut ilaasimappata imaluunniit
2)  paasissutissat qarasaasiakkut-nalunaarsuiffimmit pissarsiarineqarsimappata, pisortat ingerlatsineranni suliarineqarsimasut.”

13. § 22 kingorna ivertinneqassaaq:
”  § 22 a.  Paasissutissanik, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik, atornerinut piumasaqaatit pillugit maleruagassanik, Datatilsyn-imit oqaaseqaammik pissarsinerup kingorna, Naalakkersuisut aalajangersaasinnaapput.”

14. § 26 kingorna ivertinneqassaaq:

”Kapitali 6 a

Paasissutissanik paasitinneqarnissamik qinnuteqaat, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasoq

  § 26 a.  Paasissutissat Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasut, Nunatta Katersugaasiviani Allagaateqarfianilu toqqortaatigineqartussatut nuunneqarsimasut, pillugit paasissutissanik pissarsitinneqarnissaq pillugu inuk kinaluunniit Nunatta Katersugaasivianut Allagaateqarfianullu qinnuteqaammik saqqummiussisinnaavoq.
  Imm. 2.  Imm. 1 malillugu qinnuteqaatip, paasissutissanik taakkuninnga suliarinneqqaartuusimasoq, oqartussaasoq nalunaassavaa.
  Imm. 3.  Paasitinneqarnissaq pillugu qinnuteqaat tamanna pillugu Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummi aalajangersakkat malillugit oqartussaasumut pineqartumut aalajangiisussamut, Nunatta Katersugaasiviata Allagaateqarfiatalu ingerlateqqissavaa.
  Imm. 4.  Nunatta Katersugaasivianut Allagaateqarfianullu tunniunneqarsimasunik inuit namminneerlutik toqqortaataannik paasitinneqarnissaq pillugu qinnuteqartoqartillugu, Inunnut paasissutissanik suliarinnittarneq pillugu inatsisip Kalaallit Nunaannut atuutilersinneqarnera pillugu peqqussummut ilaasunik, peqqussummi aalajangersakkat malillugit tamanna pillugu toqqortaasivik aalajangiissaaq. Qinnuteqaatip paasissutissanut akisussaasuusoq, paasissutissanik pineqartunik suliarinneqqaartuusoq, nalunaassavaa”

15. § 27, imm. 1, ima oqaasertaqarpoq:
”§ 5-imik, § 6, imm. 1-imik aamma 2-mik, § 7-imik, § 9, imm. 2-mik, § 11, imm. 2-mik, § 12-imik, § 13, imm. 1-imik, § 14 a-mik, § 22-mik aamma § 26-mik aamma § 21, imm. 2 naapertorlugu piumasaqaatinik aalajangersarneqarsimasunik unioqqutitsineq, Kalaallit Nunaanni pinerluttulerinermut inatsimmi maleruagassat malillugit akiliisitsinermik kinguneqaateqartinneqarsinnaavoq.”

§ 2

Inatsisartut inatsisaat manna ulloq 1. januar 2020-mi atuutilerpoq. 
  Imm. 2.  Inatsisartut inatsisaat toqqortaatinut, Inatsisartut inatsisaata atuutilernera sioqqullugu oqartussaasup naammassisimasaanut imaluunniit pissarsiarisimasaanut aamma atuuppoq.

Namminersorlutik Oqartussat, ulloq 28. november 2019

Kim Kielsen