§ 1

Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaanni nr. 11, 22. november 2011-meersumi tulliuttut allanngortinneqarput:

1. § 4, imm. 2 imatut oqaasertalerneqassaaq:
”  Imm. 2.  Meeqqat illersuisuat ukiunut sisamanut toqqarneqartassaaq. Toqqaqqinneqarsinnaavoq.”

2. § 4, imm. 3 imatut oqaasertalerneqassaaq:
”  Imm. 3.  Meeqqat illersuisuat piffissami toqqaanermi Naalakkersuisunit tunuartinneqarsinnaavoq, tamatumunnga pissutaasinnaasoq ataaseq arlallilluunniit kinguliini taaneqartut naammassineqarsimappata:
1)  Inatsisartut inatsisaat manna malillugu Meeqqat illersuisuata suliassaasa suliarineqarnerat Meeqqat illersuisuannit annertuumik sumiginnarneqarsimappata.
2)  Meeqqat illersuisuat iliuuseqarsimappat Meeqqat illersuisuata Inatsisartut inatsisaannut tunngatillugu suliassaasa Meeqqat illersuisuannit isumannaatsumik suliarineqarnissaannik nalorninartitsilersumik.
3)  Meeqqat illersuisuat soraartussatut Meeqqat pillugit Siunnersuisoqatigiit ilaasortaannit ikinnerpaamik tallimanit innersuussutigineqartassaaq aammalu Meeqqat illersuisuata soraarnissaanut Naalakkersuisunit pissutsinik sukumiisumik misissuisoqareerneritigut. Innersuussineq allakkatiguussaaq tunngavilersugaallunilu.”

3. § 5, imm. 3 ima oqaasertalerneqassaaq:
”  Imm. 3.  Ilaasortat piffissamut ukiunut sisamanut toqqarneqartassapput, taamaalilluni ilaasortat nutaat pingasut ukiut marlukkaarlugit toqqarneqartassallutik. Ilaasortat nutaat toqqarneqarnissaata tungaanut ilaasortaareersut atuutissapput. Ataasiarluni toqqagaaqqittoqarsinnaavoq.”

4. § 7 imatut oqaasertalerneqassaaq:
“  § 7.  Meeqqat pillugit Siunnersuisoqatigiinnut ilaasortaq piffissami toqqaanermi Naalakkersuisunit tunuartinneqarsinnaavoq, tamatumunnga pissutaasinnaasoq ataaseq arlallilluunniit kinguliini taaneqartut naammassineqarsimappata:
1)  Inatsisartut inatsisaat manna malillugu Meeqqat pillugit Siunnersuisoqatigiinnut ilaasortap suliassani annertuumik sumiginnarsimappagit.
2)  Meeqqat pillugit Siunnersuisoqatigiinnut ilaasortaq iliuuseqarsimappat ilaasortap Inatsisartut inatsisaannut tunngatillugu suliassaminik isumannaatsumik suliarinnissinnaaneranik nalorninartitsilersumik.
3)  Meeqqat pillugit Siunnersuisoqatigiinnut ilaasortaq soraartussatut Meeqqat pillugit Siunnersuisoqatigiinnut ilaasortaannit arfinilinnit innersuussutigineqartassaaq aammalu Meeqqat pillugit Siunnersuisoqatigiinnut ilaasortap soraarnissaanut Naalakkersuisunit pissutsinik sukumiisumik misissuisoqareerneritigut. Innersuussineq allakkatiguussaaq tunngavilersugaallunilu.”

§ 2

Inatsisartut inatsisaat ulloq 1. januaari 2020-mi atuutilissaaq. Meeqqat illersuisuata toqqagaaneranut imaluunniit toqqagaaqqinneranut aammalu Meeqqat pillugit Siunnersuisoqatigiinnut ilaasortamik toqqaanermut imaluunniit toqqagaaqqinnerannut § 1, nr. 1 aamma 3, Inatsisartut inatsisaata atuutilerfiata kingorna atuuttuulissaaq, taamaattorli tak. imm. 2.
  Imm. 2.  Meeqqat illersuisuat aamma Meeqqat pillugit Siunnersuisoqatigiit pillugit Inatsisartut inatsisaanni § 6, imm. 2 malillugu Meeqqat pillugit Siunnersuisoqatigiinnut ilaasortamik toqqaaneq siullermeersumik pissaaq, Inatsisartut inatsisaata atuutilernerata kingorna, toqqagaaneq taamaallaat ukiuni marlunni atuuffiusussaq.

Namminersorlutik Oqartussat, ulloq 28. november 2019

Kim Kielsen