Kapitali 1

Atuuffia, siunertaq, nassuiaatit aamma oqartussaasut pillugit aalajangersakkat

 

Inatsisartut inatsisaata atuuffii

 

  § 1.  Inatsisartut inatsisaat manna Kalaallit Nunaata nunataani inuussutissanik tunisassiornermut, suliarinninnermut tunisinermullu atuuppoq, taamaattoq tak. imm. 3 aamma 4. 
  Imm. 2.  Inatsimmiipput inuussutissanik passussinermi immikkoortut tamarmik, tassunga ilanngullugit tunisassiorneq, suliarinninneq, uninngatillugit toqqortarinninneq, poortuineq, assartuineq, naggataatigullu atuisussamut tuniniaaneq pilersuinerlu.
  Imm. 3.  Inatsit inoqutigiinni nammineq atugassanik inuussutissanik suliarinninnermut atuutinngilaq, taamaattorli tak. § 8 imm. 3.
  Imm. 4.  Inuussutissanik eqqussuineq annissuinerlu inatsimmut ilaanngillat, tassunga ilanngullugit aalisakkanik aamma aalisakkanit tunisassianik niueqatigiinneq. 

 

Inatsisartut inatsisaata siunertaa

 

  § 2.  Inatsisartut inatsisaata matuma siunertaraa inuussutissanut naleqqiullugu inuit peqqissussaasa qaffasissumik illersorneqarnissaasa atuisullu soqutigisaasani illersorneqarnissaasa qulakkeerneqarnissaat, taamaalilluni inuussutissatigut qinigassat assigiinngisitaartuuneri, tassunga ilanngullugit ileqqutoqqat malillugit tunisassiorneq pingaartumik eqqarsaatigineqarlutik.

Nassuiaatit

 

  § 3.  Uani Inatsisartut inatsisaanni tulliuttut ima paasineqassapput:
1)  “Inuussutissat” atortussiat tunisassialluunniit, suliarineqarsimannginnerat imaluunniit tamakkiisumik ilaannakortumilluunniit suliarineqarsimanerat apeqqutaatinnagu, inunnit nerisassatut imaluunniit nerineqartussatut naatsorsuutigineqarlutik aalajangiunneqarsimasut. Inuussutissat pillugit nassuiaammut ilaapput imeq tunisassianik atortussianilluunniit nerisassatut aalajangiussanik suliaqarnermut, suliarineranut asiunaveersaarneqarneranullu inuussutissaleriffinnit atorneqartoq. 
2)  “Inuussutissat pillugit inatsit” nalinginnaasumik inuussutissanut pingaartumillu inuussutissat isumannaatsuunissaannut atorneqartut inatsisit, peqqussutit allaffissornikkullu aalajangersakkat. Inuussutissanik tunisassiornermut, suliarinninnermut nassiussuinermullu atasut tamarmik Inuussutissat pillugit inatsimmiipput. 
3)  “Inuussutissaleriffik” pisortanit namminersortunilluunniit ingerlanneqartoq sunaluunniit, inuussutissanik sutigulluunniit tunisassiornermut, suliarinninnermut, nassiussuinermut aamma tunisinermut atasumik iluanaaruteqarluni iluanaaruteqarnaniluunniit sumilluunniit suliaqartoq.  
4)  “Inuussutissaleriffimmi pisortaq” inuk imaluunniit inatsisitigut pisinnaatitaasoq pisussaatitaasorlu pineqartup pisortaaffigisaani inuussutissaleriffimmi inuussutissat pillugit inatsimmi aalajangersakkat eqqortinneqarnissaannut akisussaasoq imaluunniit inuit imaluunniit inatsisitigut pisinnaatitaasut pisussaatitaasullu inuussutissaleriffimmi pineqartut pisortaaffigisaanni inuussutissat pillugit inatsimmi aalajangersakkat eqqortinneqarnissaannut akisussaasut. 
5)  “Niuertarfik” inuussutissanik passussineq suliarinninnerluunniit taakkuninngalu tunisisarfiani toqqortarineri imaluunniit inaarutaasumik atuisussamut pilersuineq, tassunga ilanngullugit, taakkununngali killilerneqanngitsumik nassiussuiffiit, kalaalimineerniarfik, nerisassanik pilersuiffiit, suliffeqarfiit kantiinai, pisortat suliffiutaasa igaffii, neriniartarfiit allallu taamaaqataanik nerisassatigut kiffartuussisut kiisalu niuertarfiit. 
6)  “Tunisineq” tunisinissaq siunertaralugu inuussutissanik pigisaqarneq, tassunga ilanngullugit tunisinissamik neqerooruteqarneq akissarsiaqarnikkulluunniit allatigut nuussinerit, tassunga ilanngullugit tunisinertaa nassiussuinerlu allatigullu ingerlanneqartoq nuussinertaa.
7)  “Suminngaanneernerannik paasisaqarsinnaaneq” inuussutissap, uumasup inuussutissanik tunisassiornermi atorneqartup imaluunniit atortussiat inuussutissamut akussatut aalajangiussap imaluunniit naatsorsuutigineqarsinnaasup imaluunniit nerukkaatip tunisassiornermut suliarinninnermut nassiussuinermut atasut tamarmik suminngaanneernerisa paasineqarnissaanut malinnaaffigisinnaanerinillu periarfissaqarneq. 
8)  “Inaarutaasumik atuisoq”, inuussutissamik inaarutaasumik atuisoq suliffeqarfimmut inuussutissaleriffimmut atatillugu sulianut atatillugu imaluunniit suliat ingerlaqqinnerini nioqqutissamik atuisuunngitsoq.
9)  “Ajutoorsinnaaneq” ingerlanerup peqqissusermut ajortumik sunniuteqarsinnaanerata ilimanaateqarnera, tamatuma qanoq annertutigisumik sunniuteqarsinnaanermik nalilersuinermut sanilliullugu.
10)  “Ajutoortoqarsinnaaneranik misissueqqissaarneq” ingerlatsineq imminnut atasumik pingasunik immikkoortoqartoq: ajutoortoqarsinnaaneranik nalilersuineq, ajutoorfiusinnaasunik aqutsineq ajutoornerillu pillugit attaveqaqatigiinneq.
11)  “Ajutoortoqarsinnaaneranik nalilersuineq” ilisimatuussutsikkut tunngaveqartumik ingerlataqarneq sisamanik immikkoortulik: navianartup paasineqarnera, navianartup pissusiata nalilernera, sunniutaanik nalilersuineq ajutoorfiusinnaasullu pissusianik naliliineq.
12)  “Ajutoorfiusinnaasunik aqutsineq” ingerlatsineq tassaasoq suliniutip assigiinngitsunik periarfissaqarneranik missiliuineq, ajutoortoqarsinnaaneranik nalilersuinermik pissutsinillu attuumassuteqartunik allanik naliliineq pisariaqassappallu tulluartumik pitsaaliuinissamut nakkutilliinissamullu periarfissanik toqqaaneq.
13)  “Ajutoornerillu pillugit attaveqaqatigiinneq” ajutoortoqarsinnaaneranik nalilersuinerup inerneri pillugit attaveqaqatigiinneq nassuiaanerlu aamma ajutoorfiusinnaasunik aqutsinermut atatillugu aalajangiinernut tunngaviusut.
14)  “Navianartoq” inuussutissani uumassuseqartunut, akuutissatigut sunniuteqartitsisunulluunniit atasinnaasunik imaluunniit inuussutissap qanoq ittuunerannut atasut peqqinnissamut ajoqusiillutik sunniuteqarsinnaasut.
15)  “Tunisassiornermut, suliarinninnermut nassiussuinermut tunisinermullu atasut” inuussutissap aallaqqaammut tunisassiarineraniit toqqortarineranut, assartorneranut, tunineqarneranut imaluunniit inaarutaasumik atuisumut tunniunneranut atasut tamarmik.
16)  “Pingaarnertut tunisassiat” pingaarnertut tunisassiat tassaapput pingaarnertut tunisassiornermiit tunisassiat, tassunga ilanngullugit nunalerinermi nersutaatiniillu tunisassiat, kiisalu aallaaniarnermiit aalisarnermiillu tunisassiat. 
17)  “Pingaarnertut tunisassiorneq” pingaarnertut tunisassianik tunisassiorneq, kinguaassiortitsineq naatitsinerluunniit, tassunga ilanngullugit inerittunik katersuineq, immuiaaneq toqutsinerlu sioqqullugu nersutaatinik tunisassiorneq. Taaguummut aamma ilaapput aallaaniarneq aalisarnerlu inerittunillu katersuineq aamma pinngortitamiittunik toqqaannartumik katersuineq.
18)  “Pingaarnertut tunisassiortoq” inuk suliffeqarfilluunniit pingaarnertut tunisassiortuusoq.  
19)  “Nammineq nakkutilliineq” tassaavoq aaqqissuussineq tunisassiat peqqinnissamut ajoqusiinnginnissai taamaalillutillu inuussutissat pillugit inatsimmik atuuttumik eqquutitsineranik qulakkeerinninnissamut tunisassianik suliffeqarfiup tunisaanik suliffeqarfiullu suliarisaanik inuussutissaleriffiit ingerlaavartumik nakkutilliinerat.
20)  “Annikitsumik tunisassiorneq” tassaavoq pilersitsisuaqqat annikitsumik annertussuseqartumik tunisassianik pisiortortut, suliarinnittut tunisaqartullu. 
21)  “Nittarsaaneq” tunisinissaq siunertaralugu tunisassianik eqqartuineq nassiussuinerlu.
22)  “Oqartussat aalajangiisussaatitaasut” Kalallit Nunaanni Uumasunut Nakorsaqarfik Inuussutissalerinermullu Oqartussaaffik imaluunniit Naalakkersuisunit toqqarneqartoq nakkutilliinermi oqartussat. 
23)  “Akuersissut” tassaavoq oqartussat aalajangiisussaatitaasut suliffeqarfiup aaqqissuunnera, ingerlanneqarnera namminerlu nakkutiginera pillugit Inatsisartut inatsisaannut uunga naapertuunnissaa pillugu akuersissuteqarnerat. 
24)  “Utertitsineq” tassaavoq nioqqutit niuertarfinnit peerneqarneri inaarutaasumik atuisumut anngutinnginneranni. 
25)  “Utertitseqqusineq” tassaavoq nioqqutissat inaarutaasumik atuisunut tunniunneqareersut atorneqartussalluunniit uterteqquneqarneri suulluunniit.  
26)  “Nioqqutissat inuussutissanik isumannaallisaanermik piumasaqaatinik eqquutsitsinngitsut” tassaapput nioqqutissiat Inatsisartut inatsisaannik tassanngalu malittarisassanik piumasaqaatinillu aalajangersakkanik eqquutsitsinngitsut.  
27)  “Niuertarfinnut pilersuisoq” suliffeqarfiuvoq suliffeqarfimmut allamut inuussutissanik suliareqqiisartoq, toqqorsisartoq, assartuisartoq tuniniaaqqittartorluunniit.
28)  “Atortut inuussutissanut attuutussat” tassaapput inuussutissalerinermut atatillugit suliaqarnernut atortut inuussutissanut attuuttussatut naatsorsuutigineqartut. 

 

Oqartussaasut pillugit aalajangersakkat

 

  § 4.  Inatsisartut inatsisaanni matumani aalajangersakkat malinneqarnnerat Naalakkersuisut nakkutigissavaat. 
  Imm. 2. Aalajangiinermut piginnaatitaanermik inatsimmi akisussaaffiit pillugit kommunalbestyrelsinut sinniisuusinnaatitaanermut tamakkiisumut ilaannakuusumulluunniit malittarisassanik Naalakkersuisut aalajangersaasinnaapput.

 

  § 5.  Kalaallit Nunaanni Uumasunut Nakorsaqarfik Inuussutissalerinermullu Oqartussaasut inatsisartut inatsisaanni matumani aalajangersakkat eqqortinneqarnerinik nakkutilliinermi oqartussat nakkutilliillutillu misissuinernik ingerlataqarput, tak. kapitali 13.
  Imm. 2.  Kalaallit Nunaanni Uumasunut Nakorsaqarfik Inuussutissalerinermullu Oqartussaasunit allaanerusunik nakkutilliinermi oqartussatut Naalakkersuisut toqqaasinnaapput.

 

Kapitali 2

Inuussutissanik tunisassiornermut, toqqorsinermut, nassiussuinermut tunisinermullu tunngaviit

 

  § 6.  Inuussutissat atortussiallu inuussutissanut atassuteqartut suliarineqarnerminni, tunisassiarineqarnerminni, toqqortarineqarnerminni ussassaarutigineqarnerminnilu pitsaasuussapput aamma piffissami tunineqarnerminni naammaginartumik ajortunngujaassuseqassallutik tunineqarnerminnilu nalaanni ullussaminnik qaangiisimassanatik. 
  Imm. 2.  Inuussutissat nalinginnaasumik atorneqarnermikkut nappaatinik tunillaassinnaasutut imaluunniit napparsimalersitsisinnaasutut, toqunartoqalersitsisinnaasutut naatsorsuutigineqarpata, imaluunniit inuussutissat peqqiilliortitsinerat, asiusimaneri, mingutsinneqarsimaneri, kukkusumik nerisassiarineqarsimaneri allatigulluunniit inuit nerisassaattut naleqqutinngitsutut isigineqarsinnaappata imaluunniit inuussutissat isumannaatsuunissaat pillugu piumasaqaatinik naammassinninngippata tunineqaqqusaanngillat imaluunniit inuit nerisassaattut tunniunneqaqqusaanatik. 
  Imm. 3. Inuussutissanik nioqqutissiat imm. 1 naapertorlugu ullussaminnik qaangiisimasut tuniniarneqartarneri allatulluunniit tunniunneqartarneri pillugit Naalakkersuisut malittarisassiorsinnaapput.

 

  § 7.  Inuussutissanik atortussiallu inuussutissanut atassuteqartut suliarinninneq, tunisassiorneq, toqqortaqarneq, nassiussuineq tuniniaanerlu eqqiluisaarnikkut illersorneqarsinnaasumik ingerlanneqassaaq taamaalilluni inuussutissat atortussiallu inuussutissanut atassuteqartut inuit nerisassaattut naleqqukkunnaarlutik mingutsinneqarnatik allatigulluunniit ajoqusiisinnaasumik sunnerneqarnatik.
  Imm. 2.  Inunnut inuussutissanik atortussiallu inuussutissanut atassuteqartut suliarinninnermik, toqqorsinermik, tunisassiornermik, nittarsaanermik nakkutilliinermillu suliaqartunut inuup eqqiluisaarnissaa peqqissutsikkullu misissorneqartarnissaa pillugu malittarisassanik Naalakkersuisut aalajangersaasinnaapput.  
  Imm. 3.  Inuussutissanik atortussiallu inuussutissanut atassuteqartut suliarinninneq, tunisassiorneq, toqqortaqarneq, tunisineq nakkutilliinerlu inunnit napparsimasunit imaluunniit inuussutissanut tunillaassinnaasumik inuussutissanik atortussiallu inuussutissanut atassuteqartut inuit nerisassaattut naleqqukkunnaarsitsisinnaasumik nappaateqartutut naatsorsuutigineqartumit suliaqaqqusaanngillat.
  Imm. 4.  Inuussutissanik suliarinninnermi, toqqorsinermi, tunisassiornermi nittarsaanermilu eqqiluisaarneq pillugu malittarisassanik Naalakkersuisut aalajangersaasinnaapput.

 

  § 8.  Nunap ilaani aalajangersimasumi inuussutissat atortussialllu inuussutissanut atassuteqartut mingutsinneqarsinnaanerannik aarlerinartoqarpat, tassunga ilanngullugu radiup qinngorneranik imaluunniit avatangiisimi mingutsinneqarsimappata, allatigulluunniit inuit nerisassaattut atorneqarnissaat naleqqukkunnaarpata, nioqqutissiat taamatut ittut tuniniarneqarneri Naalakkersuisunit inerteqqutigineqarsinnaapput, killeqartinneqarlutik imaluunniit piumasaqaatinik aalajangersaavigineqarlutik. 
  Imm. 2.  Inuussutissat atortussallu inuussutissanut attuuttussat mingutsinneqarsimasut piumasaqaatit suut tunngavigalugit tuniniarneqarsinnaaneri pillugit Naalakkersuisut malittarisassanik aalajangersaasinnaapput. 
  Imm. 3.  Nunap immikkoortuini aalajangersimasuni naatitanik naatitsineq, nersutaatinik kinguaassiortitsineq, piniarneq, aalisarneq imaluunniit inerittunik, paarmanik, pupinnik, manninnik, honningimik katersineq nioqqutissiornerluunniit Naalakkersuisunit inerteqqutigineqarsinnaapput, killilerneqarsinnaapput imaluunniit piumasaqaatinik aalajangersaaffigineqarsinnaapput. 

 

  § 9.  Inuussutissanik atortussallu inuussutissanut attuuttussanik suliarinninnermi atortussat aamma atortut imaluunniit suliarinneriaatsit aalajangersimasut atorneqarnissaat pillugit maleruagassanik Naalakkersuisut aalajangersaasinnaapput, tassunga ilanngullugit sananeqaatitigut atortorissaarutit, qinngornerit atorlugit asiunaveersaatinik allanillu asiunaveersaatinik imaluunniit suliarinneriaatsinik atuinerit. 
  Imm. 2.  Inuussutissat imaluunniit akorineqartut atortussalllu inuussutissanut attuuttussat manna tikillugu inuussutissatut atortussalluunniit inuussutissanut attuuttussatut isigineqarsimanngitsut, imaluunniit siusinnerusukkut siunertamut atorneqarsimanngitsut atortorissaarutit atornerisigut pilersinneqartut, atorneqarnissaat imaluunniit tuniniarneqarnissaat sioqqullugu akuerineqartarnissaannut malittarisassanik Naalakkersuisut aalajangersaasinnaapput. 

 

Kapitali 3

Ajutooratarsinnaanermik misissueqqissaarneq

 

  § 10.  Inuit peqqissuunerisa inuunerisalu qaffasissumik illersorneqarnissaat pillugu nalinginnaasumik anguniagaq naammassiniarlugu inatsisartut inatsisaat manna malillugu inuussutissanik nakkutiginninneq ajutoortoqarsinnaaneranik misissueqqissaarnernik tunngaveqassaaq, aaqqiissutissap qanoq ittuunerani allatigulluunniit pisut eqqarsaatigalugit tamanna naleqqutinngitsuunngippat.
  Imm. 2.  Ajutoortoqarsinnaaneranik misissueqqissaarnerup suliarinissaanut malittarisassanik suleriaatsinillu Naalakkersuisut aalajangersaassapput.

 

Kapitali 4

Inuussutissat katitigaanerat

 

  § 11.  Inuit peqqissuunerisa illersorneqarnissaat siunertaralugu inuussutissat nunatsinni tunisassat katitigaaneri qanorlu pitsaassuseqarnissaat, tassunga ilanngullugit inuussutissatigut immikkut siunertanut inuussutissanullu akussanut aalajangerneqarsimasut inuussutissat pillugit malittarisassanik Naalakkersuisut aalajangersaasinnaapput.

 

  § 12.  Piumasaqaatit suut tunngavigalugit nunatsinni tunisassanut akuutissat mamarsaasiallu atorneqarsinnaaneri, tassunga ilanngullugu siunertanut sunut, qanoq annertutigisut tunisassianullu sunut, aamma akuutissat suuneri akuitsuunerilu pillugit malittarisassanik Naalakkersuisut aalajangersaasinnaapput.

 

Kapitali 5

Inuussutissanik nittarsaassisarneq nalunaaqutsersuisarnerlu

 

  § 13.  Paasissutissanik atuisunut, suliffeqarfinnut imaluunniit nakkutilliinermi oqartussanut pingaaruteqartunik inuussutissat atortussallu inuussutissanut attuuttussat nalunaaqutsersornissaat pillugu malittarisassanik Naalakkersuisut aalajangersaasinnaapput. 
  Imm. 2.  Inuussutissanik atortussallu inuussutissanut attuuttussanik nalunaaqutsersuisarneq nittarsaassisarnerlu pillugit Naalakkersuisut malittarisassanik aalajangersaasinnaapput, tassunga ilanngullugit: 
1)  Inuussutissat immikkut peqqissinartuunerisa imaluunniit pitsaaliuinermut sunniuteqarnerisa allanneqarnissaat.
2)  Inuussutissap aalajangersimasumik pissuseqarnera pillugu pitsassuuneranik erseqqissaanerup atorneqarnera.

 

  § 14.  Nunatsinni tuniniagassanik akuutissanik aamma mamarsaasianik nalunaaqutsersuineq, tassunga ilanngullugit atornissaanut ilitsersuutit mianersoqqussummillu nalunaaqutsersuineq pillugit maleruagassanik Naalakkersuisut aalajangersaasinnaapput.

 

Kapitali 6

Atortussiat atortullu inuussutissanut attuuttussatut naatsorsuussat

 

  § 15.  Makku pillugit malittarisassanik Naalakkersuisut aalajangersaasinnaapput:
1)  Atortussanik inuussutissanut attuuttussanik atuineq. 
2)  Atortussanik inuussutissanut attuuttussanut ilaasunik akuutissanik atuineq. 
3)  Atortussanik inuussutissanut attuuttussanik tunisassiornermi atorneqartussanik suliarinneriaatsinik atuineq.
4)  Atortussanik inuussutissanut attuuttussanik katiterisarneq nalunaaqutsersuisarnerlu.
5)  Atortussanit inuussutissanut attuuttussaniit tuniluunnerit. 
6)  Inuussutissanut aalajangersimasunut pissutsinulluunniit aalajangersimasunut atorneqartussat atortussat inuussutissanut attuuttussat piusinnaanerinut kimittussusissaanullu piumasaqaatit. 
7)  Atortussanik inuussutissanut attuuttussat atorfissaannut naleqquttuunerinik uppernarsaammik ilaqartinneqassasut.  
  Imm. 2.  Aammattaaq Naalakkersuisut makku pillugit malittarisassanik aalajangersaasinnaapput:
1)  suliffeqarfimmi aqutsisut, nioqqutissiortut imaluunniit atortussanik inuussutissanut attuuttussanik nioqqutissanut aalajangersimasumik atugassanik eqqussuisartut atortussat atortulluunniit tamakku qanoq iliorluni niuerfimmiit peerneqartarnissaat siunertaralugu aalajangiisarnissaat.  
2)  atortussat inuussutissanut attuuttussat inuussutissat isumannaatsuunissaannut ulorianarpata imaluunniit ulorianartutut isumaqarfigineqarpata nittarsaanneqassanngitsut. 

 

  § 16. Atortussat inuussutissanut attuuttussat, inuussutissanut attuuttussatut aalajangiussat, inuussutissat isumannaatsuunissaannut piumasaqaatinik eqqortitsinngitsut ingerlataqartut pineqartut isumaqarpata imaluunniit isumaqassallutik tunngavissaqarpata § 15, imm. 2, nr. 1 malillugu malittarisassat atulersinneqartut malillugit utertitsineq pissaaq.

 

Kapitali 7

Suminngaanneernerannik paasisaqarsinnaaneq

 

  § 17.  Inuussutissaleriffimmik pisortat inuussutissat aamma atortussanit inuussutissanut attuuttut imaluunniit uumasut inuussutissanik tunisassiornermi atorneqartut aalajangersimasut aamma akuutissat suulluunnit inuussutissamut akussatut aalajangiunneqarsimasup imaluunniit akussatut naatsorsuutigineqartup suminngaanniit pissarsiarisimanerlugit paasisinnaassavaat. Inuussutissaleriffimmi pisortaq aamma tunisassiap sumut tunniunneqarnissaa pillugu paasisaqarsinnaassaaq ilisimatitsisinnaassallunilu. Paasissutissat tamakkua taakku noqqaanerisigut oqartussanut piginnaatitaasunut piareersimassapput.  
  Imm. 2.  Suliffeqarfinnut allanut sumut tunisassiamik pilersuisimanerup paasineqarnissaanut inuussutissaleriffinni pisortanut aaqqissuussinernik suleriaatsinillu pilersitsinissamut piumasaqaatit pillugit malittarisassanik Naalakkersuisut aalajangersaasinnaapput. 

 

  § 18.  Inuussutissaq atortussarluunniit inuussutissanut attuuttoq tunineqartoq imaluunniit tunineqartussatut naatsorsuutigineqartoq uppernarsaat paasissutissalluunniit tulluartut iluaqutigalugit suminngaanneernerannik paasisaqarnissamik ajornannginnerulersitsisumik tulluartumik nalunaaqutserneqarsimassaaq suuneranilluunniit paasissutissiissutigineqarluni. 
  Imm. 2.  Nalunaaqutsiinermut paasisaqarnissamullu piumasaqaatinik Naalakkersuisut aalajangersinnaapput, tak. imm. 1.

 

Kapitali 8

Inuussutissanut akisussaaneq

 

  § 19.  Inuussutissaleriffinni pisortat suliffeqarfimmi pisortaaffigisaminni tunisassiornermi, suliarinninnermi nassiussuinermilu atasuni tamani ingerlataminnut attuumassuteqartunik inuussutissat atortussalluunniit inuussutissanut attuuttut pillugit inatsimmi piumasaqaatit naammassineqartut qulakkiissavaat, piumasaqaatillu pineqartut eqqortinneqarneri nakkutigalugit. Suliffeqarfik suliffeqarfiup nakkutilliinermik suliaanut tamanut akisussaasuuvoq.

 

  § 20.  Inuussutissaq atortussalluunniit inuussutissanut attuuttoq suliffeqarfiup eqqussimasai, tunisassiarisimasaa, suliarisimasai, suliareqqissimasai nassiussimasaaluunniit inuussutissat isumannaatsuunissaannik piumasaqaatinik naammassinninngitsoq suliffeqarfimmi inuussutissaleriffimmi pisortaq ilisimasaqarpat imaluunniit naatsorsuutiginissaanut tunngavissaqarpat inuussutissap atortussalluunniit inuussutissanut attuuttup pineqartup niuerfimmiit utertinneqarnissaa siunertaralugu ingerlaannartumik qanoq iliornissamut taanna aalajangiissaaq, tamannalu pillugu oqartussat aalajangiisussaatitaasut ilisimatillugit. 
  Imm. 2.  Nioqqutissiaq imm. 1 naapertorlugu atuisunut anngussimappat inuussutissalerinermik suliffeqarfiup pisortaata atuisut paasinartumik pitsaasumillu paasitissavai nioqqutissap sooq utertinneqarnerata tunngavianik, pisariaqarpallu nioqqut pineqartoq atuisunit utertissallugu peqqinnerup illersorneqarnissaata qaffasissumik inissisimanissaa pillugu iliuusissat allat naammanngippata.

 

  § 21.  Suliffeqarfimmi inuussutissaleriffiusumi pisortaq niuertarfinnut imaluunniit nassiussuinermut akisussaasoq, aamma inuussutissap poortorneqarneranut, nalunaaqutsersorneranut, isumannaatsuuneranut imaluunniit innarligassaannginneranut sunniuteqanngitsoq, tunisassiat inuussutissat isumannaatsuunissaannut piumasaqaatinik naammassinninngippata niuerfimmiit, inaarutaasumilluunniit atuisumiit utertinneqarnissaat, tuniniarnerisa unitsinnissaat utertinnissaalluunniit siunertaralugu ingerlatanut sinaakkusiussat iluanni pisariaqartumik qanoq iliornissamut piareersaateqassaaq. 
  Imm. 2.  Suliffeqarfimmi inuussutissaleriffiusumi pisortaq inuussutissap suminngaanneernerannik paasisaqarnissamut noqqaasoqarneratigut nakkutilliinermi oqartussanut paasissutissanik tulluartunik ingerlatitseqqinnikkut inuussutissap isumannaatsuuneranut ikiuutissaaq.

 

Kapitali 9

Eqqiaanermi tunillannartuiaanermi tarngutinillu atortut

 

  § 22.  Akuersisarneq pillugu katiterineq nalunaaqutsersuinerlu kiisalu eqqiaanermi, tunillannartuiaanermi tarngutinillu atortunik akuersineq, katiterineq nalunaaqutsersuineq kiisalu atuineq pillugu malittarisassanik Naalakkersuisut aalajangersaasinnaapput. 
  Imm. 2.  Aammattaaq Naalakkersuisut makku pillugit malittarisassanik aalajangersaasinnaapput: 
1)  suliffeqarfimmi pisortat, eqqiaatinik, tunillannartuiaatinik imaluunniit tarngutissanik tunisassiortut eqqussuisartulluunniit eqqiaatit, tunillannartuiaatit imaluunniit tarngutissat nioqqutigineqartut niuertarfinnit utertinneqarnissaat siunertaralugu upalungaarsimanissaminnut malittarisassaqassasut. 
2)  eqqiaatit, tunillannartuiaatit tarngutissat tuniniarneqaqqusaanngitsut inuussutissat isumannaatsuunissaannut ulorianarpata imaluunniit ulorianartutut naatsorsuutigineqarpata. 

 

  § 23.  Eqqiaatit, tunillannartuiaatit tarngutilluunniit inuussutissat isumannaatsuunissaannut piumasaqaatinik eqqortitsinngitsut ingerlataqartut pineqartut isumaqarpata imaluunniit isumaqassallutik tunngavissaqarpata § 22, imm. 2, nr. 1 malillugu malittarisassat atulersinneqartut malillugit utertitsineq pissaaq.

 

Kapitali 10

Suliffeqarfinnik inuussutissaleriffiusunik nalunaarsuineq, akuersineq namminerlu nakkutilliineq

 

  § 24.  Suliffeqarfiit inuilluunniit inuussutissarsiornissaq siunertaralugu inuussutissanik imaluunniit atortussanik inuussutissanut attuuttunik suliarinnittut, toqqorsisut, assartuisut, niueruteqartut imaluunniit eqqussuisut oqartussat aalajangiisussaatitaasunit nalunaarsorneqaqqaaratik ingerlatartik aallartissinnaanngilaat.

 

  § 25. Suliffeqarfiit inuussutissaleriffiusut aalajangersimasut imaluunniit suliffeqarfiit inuussutissaleriffiusut immikkut ittut aalajangiisinnaasutut oqartussanit akuerineqaqqaarnatik ingerlataminnik aallartitsisinnaanngitsut pillugit malittarisassanik Naalakkersuisut aalajangersaasinnaapput.
  Imm. 2. Naalakkersuisut suliffeqarfiit inuussutissaleriffiusut akuerineqarnissaat pillugu malittarisassanik aalajangersaassapput, tamatumunnga ilanngullugit suliffeqarfiup inuussutissalerisup akuersissummik nalunaarfigineqarnissaa pillugu piumasaqaatit, aamma akuersissummut atugassarititaasunik ilanngussinissamut periarfissaq pillugu.
  Imm. 3.  Qaqugukkut akuersissummik nutaamik piniartoqartarnissaa pillugu maleruagassanik Naalakkersuisut aalajangersaasinnaapput. 
  Imm. 4. Suliffeqarfiit inuussutissaleriffiusut aalajangersimasut imaluunniit suliffeqarfiit inuussutissaleriffiusut immikkut ittut akuersineq pillugu piumasaqaatinut ilaatinnginnissaat pillugu maleruagassanik Naalakkersuisut aalajangersaasinnaapput. 
  Imm. 5. Suliffeqarfik piumasaqaatinik naammassinninngippat, imaluunniit akuersisimanermut tunngaviusut annertuumik allanngorsimappata akuersisimanerup arsaarinnissutigisinnaanera pillugu maleruagassanik Naalakkersuisut aalajangersaasinnaapput. Aalajangiussami allamik allassimasoqanngippat arsaarinninneq piffissami suliffeqarfimmut nalunaaruteqarnermiit atuutilissaaq. Suliffeqarfik inuussutissaleriffiusoq, akuersissumminik arsaarneqarsimasoq kingumut akuerineqarnissamik kissaateqarpat suliffeqarfimmik inuussutissaleriffiusumik ingerlatsinissamut akuersissummik nutaamik qinnuteqartoqassaaq. 

 

  § 26.  Piginnittunik nikittoqarneranik qanoq ilinerani nalunaartoqarnissaa pillugu malittarisassanik Naalakkersuisut aalajangersaasinnaapput kiisalu paasissutissat suut nalunaarutigineqassanersutpillugit.

 

  § 27. Inuussutissat eqqiluisaarnikkut, peqqinnissakkut imaluunniit pitsaassutsikkut pitsaasuunissaasa qulakkeerneqarnissaat siunertaralugu inuussutissanik pingaarnertut tunisassiorneq pillugu malittarisassanik Naalakkersuisut aalajangersaasinnaapput.

 

  § 28.  Tunisinissaq nioqqutissiornissarlu siunertaralugu ileqquusumik sularineqartunik inuussutissanik tunisassiorneq aamma annikitsumik tunisassiorneq pillugu immikkut ittunik malittarisassanik Naalakkersuisut aalajangersaasinnaapput.
  Imm. 2.  Annikitsumik tunisassiornerup annertussusaa pillugu piumasaqaatinik erseqqinnerusunik Naalakkersuisut aalajangersaassapput. 

 

 § 29.  Suliffeqarfiit inuussutissaleriffiusut, toqqorsiviusut, assartuutit assigisaalu inuussutissat pillugit inatsimmut ilaasut eqqiluisaartinnissaat kiisalu aaqqissuunneqarneri ingerlanneqarnerilu pillugit malittarisassanik Naalakkersuisut aalajangersaasinnaapput. Matumani ilanngullugit assartuutinik, ininik, pequtinik, atortunik, maskiinanik, poortuutinik assigisaanillu kiisalu siku, imeq, aalaq, silaannaq silaannaallu inuussutissanik passussinermi atorneqartartunik imaluunniit ininik, atortunik il.il. eqqiaanermi atortut akuerineqartarnissaat pillugit malittarisassaliortoqarsinnaavoq imaluunniit aalajangersagaliortoqarluni.

 

  § 30.  Suliffeqarfiit inatsimmut ilaatinneqartut tunnisassiat Kalaallit Nunaanni Europamilu niuffaffinnut nioqqutissianngorlugit akuerisaasunut suliffeqarfinnullu ilaatinneqartunuinnaq atorneqartussaasutut Naalakkersuisut malittarisassiorsinnaapput.

 

  § 31.  Suliffeqarfiit inatsimmut ilaasut, nammineq akilikkaminnik, eqqiaanermi pissutsinik aamma inuussutissanik tunisassiornermut atasunik tamanut attuumassuteqartunik ingerlatanik nammineq nakkutilliinermik ingerlatsisarnissaat pillugu malittarisassanik Naalakkersuisut aalajangersaasinnaapput. Tassunga ilanngullugu nammineq nakkutilliinerup qanoq piareersarnissaa, ingerlanneqarnissaa uppernarsarnissaalu pillugit malittarisassanik aalajangersaasoqarsinnaavoq. 
  Imm. 2.  Suliffeqarfiit inatsimmut ilaasut nammineq akilikkaminnik erseqqinnerusumik aalajangersarneqarsimasunik paasiniaanermik misissuinernillu ingerlatsisarnissaat pillugu Naalakkersuisut malittarisassanik aalajangersaasinnaapput. 
  Imm. 3. Suliffeqarfiit inatsimmut ilaasut nammineq akilikkaminnik misissueqqissaarnerup inernerinik oqartussat aalajangiisussaatitaasunut nassiussinissaat pillugu malittarisassanik Naalakkersuisut aalajangersaasinnaapput.

 

  § 32. § 32, imm. 2 malillugu misissueqqissaarnissat piumasarineqartut laboratoriani aalajangiisussaasutut oqartussanit akuerisaasunit suliarineqartassapput. Misissueqqissaarnermi inernerit nakkutilliisussatut oqartussanut piumasarineqarneranni takutinneqartassapput piffissallu naammaginartup iluani.

 

  § 33.  Suliffeqarfinni inuussutissaleriffiusuni inatsimmut ilaasuni sulisunut suliaqartunut inuussutissalerinermi eqqiluisaarnissamut pinngitsoorani ilinniartitaanissaq pillugu maleruagassanik Naalakkersuisut aalajangersaasinnaapput. 

 

Kapitali 11

Ilitsersuutit

 

  § 34.  Inuussutissat isumannaatsuunissaannik qulakkeerinninniarnermi inuussusissalerinermik suliaqartunut inatsisartut inatsisaannut ilaatinneqartunut ilitsersuutit taakkulu tamanut saqqummiunneri Naalakkersuisut suliarisinnaavaat. 
  Imm. 2.  Inuussutissalerinermik suliaqartut Inatsisartut inatsisaannut ilaatinneqartut aalajangiisussatut oqartussanut akuersissutinik piniarnerminni namminneq ilitsersuusiatik suliaralugillu nassiussinnaavaat. 

 

Kapitali 12

Akiliutit

 

  § 35.  Pingaarnertut tunisassiortut suliffeqarfiillu inuussutissaleriffiusut inatsimmut ilaasut, tassunga ilanngullugit suliffeqarfiit atortussat inuussutissanut attuuttussanik sanaartortut, inatsit malillugu ingerlanneqartunut aamma inatsit malillugu malittarisassaqartinneqartunut nakkutilliinerni misissuinernilu aningaasartuutinik akiliuteqarnissaat pillugu malittarisassanik Naalakkersuisut aalajangersaasinnaapput.  
  Imm. 2.  Inuussutissalerinermik suliaqartut ilaat, isumaginninnermi suliaqarnermut atatillugu imaluunniit inuussutissarsiutigalugu iluanaarutiginarneqanngitsunik tuniniaasut suliffeqarfinnullu allanut unammilleqatigiinnermik siunertaqanngitsunik suliaqartut imm. 1 naapertorlugu nakkutilliinermi aningaasartuutit ilaannakortumik akiliisarnissaat tamakkiisumilluunniit akiliisannginnissaat pillugit Naalakkersuisut malittarisassiorsinnaapput.

 

  § 36. Akitsuutit akileqqunissaat akilerneqarnissaallu kiisalu inatsit naapertorlugu akiliutinik akileeqqusineq akiliinerlu, tassunga ilanngullugit immikkut ulapinnartut nakkutilliinerit immikkullu ittumik misissuinerit, kiisalu suliffeqarfiup inuussutissaleriffiusup nakkutigineranut atatillugu nakkutilliisut angallannerisa, illusimatinnerinut nerisaqartinnerinullu akiliinerit pillugit malittarisassanik Naalakkersuisut aalajangersaasinnaapput.

 

Kapitali 13

Nakkutilliineq

 

  § 37.  Nakkutilliinerit nakkutilliinermilu nalunaarusiornerit akulikissusissaat annertussusissallu pillugit malittarisassanik Naalakkersuisut aalajangersaasinnaapput.

 

  § 38.  Inuussutissat atortussalluunniit inuussutissanut attuuttut aamma suliffeqarfiit inuussutissaleriffiusut aalajangersimasut immikkut nakkutigineqarnissaat pillugu Naalakkersuisut malittarisassanik aalajangersaasinnaapput. 
  Imm. 2.  Uumasunik toqoraavinni, nunatsinnut tunisassiortunut neqinik nakkutilliisarnermut Naalakkersuisut malittarisassaliorsinnaapput.

 

  § 39.  Aalajangiisussaatitaasutut oqartussat piumasaqaatit inatsimmi aalajangersarneqarsimasut malinneqarnissaannut pisariaqartutut isigineqartunik aalajangiisinnaapput, taakkununnga ilanngullugu erseqqissaanernik, peqqussutinik inerteqqutinillu nalunaaruteqartassallutik. 
  Imm. 2.  Aalajangiisussaatitaasutut oqartussat peqqussutit inerteqqutillu, tak. imm. 1, suliffeqarfiup akiligaanik naammassitissinnaavaat.

 

 § 40.  § 39, imm. 1 naapertorlugu inerteqqut imaluunniit peqqussut malinneqanngippat inatsimmi matumani aalajangersakkanut ilaasut suliffeqarfiit ingerlatsiinnarnissaannut aalajangiisussaatitaasutut oqartussat inerteqquteqarsinnaapput aamma inatsisartut inatsisaat manna naapertorlugu akuersissutaannik atulersinneqarsimasunik arsaarinnissinnaallutik. Aalajangiinermit allamik allassimasoqanngippat arsaarinninneq piffissami suliffeqarfimmut nalunaarutigineraniit atuutilissaaq.

 

  § 41.  Peqqussutip qanoq ittuuneranut naleqqiullugu naammaginartumik erseqqinnerusumik piffissaliussatut aalajangerneqartup iluani suliffeqarfimmi eqqiluisaarnikkut tunisassiornikkullu pissutsit iluarsineqarnissaannut aalajangiisussaasutut oqartussaasut suliffeqarfimmi inuussutissaleriffiusumi piginnittunut, pisortanut siulersuisunullu peqqusisinnaapput. Peqqusineq taamaattoq allaganngorlugu nalunaarutigineqassaaq, suliffeqarfiullu piginnittuanut aqutsisuanullu nalunaarutigineqassaaq.  
  Imm. 2.  Peqqussut piffissaliussatut aalajangerneqartup iluani malinneqanngippat pissutsit pitsaanerulersinnissaasa aamma aalajangiisussaasutut oqartussaasunut uppernarsarneqarnissaasa tungaannut suliffeqarfik aalajangiisussatut oqartussanit matuneqarsinnaavoq.

 

  § 42.  Atorneqarnermikkut nalinginnaasumik inuit peqqissusiannut navianaateqarsinnaasutut naatsorsuutigineqartunik inuussutissanik atortussalluunniit inuussutissanut attuuttunik tunisinissaq, pilersuinissaq tunniussinissarluunniit aalajangiisussatut oqartussanit inerteqqutigineqarsinnaavoq.
  Imm. 2.  Aammattaaq allanngorneri, mingutsinneqarsimaneri, asiusimaneri, kukkusumik nerisassiarineqarsimaneri pissutigalugu allatigulluunniit inuit nerisassaattut naleqqutinngitsutut isigineqarsinnaappata inuussutissat tuniniarneqarneri, pilersuineq tunniussinerluunniit aalajangiisussaasutut oqartussat pisussaaffigaat inerteqqutigissallugu. 
  Imm. 3.  Nalunaaqutsersuineq paasinerluissutaasinnaappat imaluunniit inuussutissat inuit peqqissusiannut navianaateqarpata imaluunniit inuit nerisassaattut naleqqutinngitsutut isigineqarsinnaappata inuussutissat atortussalluunniit inuussutissanut attuuttut utertinneqarnissaat aalajangiisussatut oqartussat peqqusisinnaapput.

 

  § 43.  Aalajangiisussaasutut oqartussaasut inuussutissalerinerup iluani ilisimasalittut siunnersortimit ikiortissarsiortoqassasoq imaluunniit suliffeqarfiup inuussutissaleriffiusup aqutsisui sulisulluunniit pikkorissarnermut peqataassasut imaluunniit aalajangersimasumik ilinniagaqarsimanissaat pillugu peqqussuteqarsinnaapput. Eqqiluisaarnerup, nammineq nakkutilliinerup kiisalu inuussutissanik passussisarnerup iluani siunnersuisoqarnissaa peqqussutaasinnaavoq. 
  Imm. 2.  Imm. 1 malillugu siunnersuineq, pikkorissarnermut peqataaneq ilinniagaqarnerlu pillugit malittarisassanik erseqqinnerusunik Naalakkersuisut aalajangersaasinnaapput.

 

  § 44.  Aalajangiisussaasutut oqartussaasut inatsisartut inatsisaanni matumani imaluunniit taanna naapertorlugu malittarisassani atulersinneqarsimasuni aalajangersarneqarsimasunik suliassat naammassineqarnissaannut atugassanik paasissutissanik pissarsiniarlutik qaqugukkulluunniit, pissusissamisoortumik kinaassutsimut uppernarsaammik pissusissamisoortumik takutitsinikkut eqqartuussivimmiillu aalajangiinertaqanngitsumik, illunut tamanut ammasunut pigineqartunullu, suliffeqarfinnut sumiffinnullu, assartuutinut, niuernermi allattaavinnut aamma allagaatinut, tassunga aamma ilanngullugit atortussat elektroniskimik pigineqartut, isersinnaapput.

 

  § 45.  Suliffeqarfik inuussutissalerisoq aalajangiisussatut oqartussaniit noqqaasoqarneratigut, nakkutilliinerup naammassineqarnissaanut pingaaruteqartunik, paasissutissanik tamanik tunniussissaaq kiisalu nakkutilliinermi, misiligutissanik tigusinermi, assiliinermi aamma atortunik allanneqarsimasunik tunniussinermi aamma elektronikkikkut nalunaarsukkat anisinneqarnerini nakkutilliinermi oqartussanik akeqanngitsumik pisariaqartinneqarpat ikiuutissalluni, tassunga ilanngullugit aningaasaqarnikkut naatsorsuuserinikkullu pissutsit. 
  Imm. 2.  Paasissutissat oqaatigisallu nammineq piumassutsimik saqqummiunneqartut eqqortuusut suliffeqarfiup inuussutissaleriffiusup uppernarsarsinnaassavai. 
  Imm. 3.  Aalajangiisussaatitaasutut oqartussaasut nakkutilliinermut nakkutiginninnermullu atasumik suliffeqarfik inuussutissalerisoq piumaffigisinnaavaat uppernarsaasiinikkut inuussutissanit atortussanilluunniit inuussutissanut attuuttunit misissugassanik tiguseqqullugu imaluunniit akeqanngitsumik tigusissasoq, tassunga ilanngullugit tunisassiassat, ilaannakortumik nioqqutissiat kiisalu naammassillugit nioqqutissiat, sermeq, imeq, aalaq, silaannaq, silaannaat, atortussiassat aamma atortut, akiuiniarnermi sakkut, eqqiaanermi tunillannartuiaanermilu atortut il.il.  
  Imm. 4.  Suliffeqarfik inuussutissaleriffiusoq aalajangiisussatut oqartussaasunut misissugassanik nassiussinerni ikiuuttassaaq tamatumuunalu aningaasartuutigineqartut akilerlugit. 
  Imm. 5.  Pisortaq isumaqaruni imaluunniit pasitsaassaqaruni, inuussutissaq suliffeqarfiup eqqussimasaa, tunisassiarisimasaa, suliarisimasaa, piareersarsimasaa siammartersimasaaluunniit inuussutissanik isumannaatsuutitsinissamut piumasaqaatinik inatsit tunngavigalugu inatsimmi matumani malittarisassanilu aalajangersarneqarsimasunik naammassinnissimanngitsoq, suliffeqarfiup pisortaa aalajangiisussatut oqartussanut nalunaarutiginnittussaatitaavoq.

 

  § 46.  Naalakkersuisut nakkutilliinissaq siunertaralugu inuussutissalerinermi inatsisip malinneqarnissaata qulakkeernissaanut pisariaqartunik paasissutissanik oqartussaasunut allanut piniarsinnaapput paarlaasseqatigiissinnaallutillu. 
  Imm. 2.  Imm. 1 naapertorlugu paasissutissanik piniarneq, aammattaaq akileraartarnermut pissutsit pillugit paasissutissanut tunngavoq. 
  Imm. 3.  Paasissutissat imm. 1 naapertorlugu piniarneqartut tunngavigalugit Naalakkersuisut nalunaarsuinerit paasissutissiissutigineqartullu malillugit nakkutilliiartorsinnaapput.

 

  § 47.  Aalajangiisussatut oqartussat inuussutissat pillugit inatsit naapertorlugu, suliffeqarfiup inuussutissalerisup aqqa taallugu nakkutilliinerup inernerinik kiisalu nakkutilliinerup suunera aamma pineqaatissiinerit annertussusaannik tamanut saqqummiussisinnaanerat pillugu malittarisassanik Naalakkersuisut aalajangersaasinnaapput. 
  Imm. 2.  Nakkutilliinerup inernerinik pineqaatissiinernillu qanoq iliorluni, qanoq isikkulerlugu qanorlu annertutigisumik tamanut saqqummiunneqartarnissaat, tassunga ilanngullugu tamanut saqqummiussinerup elektronikkikkut ingerlanneqarsinnaanera pillugu malittarisassat pillugit malittarisassanik Naalakkersuisut aalajangersaasinnaapput. 
  Imm. 3.  Suliffeqarfiup inuussutissalerisuata inuussutissat pillugit inatsit naapertorlugu nakkutilliinerup ingerlanneqartup inernerinik tamanut saqqummiussinissaminut nammineerluni pisussaaffeqarnera pillugu malittarisassanik Naalakkersuisut aalajangersaasinnaapput. Tassunga ilanngullugu nakkutilliinerup inernerinik qanoq iliorluni, qanoq isikkulerlugu qanorlu annertutigisumik tamanut saqqummiussisoqarnissaa pillugu aamma atugassarititaasut suut tunngavigalugit tamanut saqqummiussinerup pinngitsoortinneqarsinnaanera pillugu malittarisassanik Naalakkersuisut aalajangersaasinnaapput.

 

  § 48.  Nakkutilliinermut tunngasuni suliassat immikut ittut aalajangiisussatut oqartussaasut kommuninut suliassanngortissinnaavaat. Suliassat suliassanngortinneqarsimasut naammaginartumik isumagineqarnerinik aalajangiisussatut oqartussaasut nakkutilliissapput.

 

Kapitali 14

Pineqaatissiinerit

 

  § 49.  Kalaallit Nunaanni Pinerluttulerinermut inatsimmi malittarisassat naapertorlugit akiliisitsisoqarsinnaavoq:
1)  Inatsisartut inatsisaanni § 6, imm. 1 aamma 2, § 7, imm. 1 aamma 3, § 16, § 17, imm. 1, § 18, imm. 1, §§ 19-21, § 23, § 24, § 32 unioqqutinneqarpata. 
2)  § 8, imm. 1, § 8, imm. 3, §§ 39-42, aamma § 43, imm. 1. malillugit peqqussutinik malinninngitsoq imaluunniit inerteqqutinik piumasaqaataasunilluunniit unioqqutitsisoq.
3)  § 44 malillugu Uumasunut Nakorsaqarnermut Inuussutissalerinermullu Oqartussaasunik isertitsinngitsoqarpat. 
4)  inatsit imaluunniit inatsit malillugu malittarisassiarineqarsimasut naapertorlugit akuersissuteqarnermut piumasaqaataasunik unioqqutitsisoqarpat.  
5)  § 45 malillugu Uumasunut Nakorsaqarnermut Inuussutissalerinermullu Oqartussaasunik ikiorsiinngitsoortoqarpat imaluunniit § 45, imm. 3 malillugu misiligutissanik tigusinngitsoortoqarpat.     
6)  pisortani oqartussanut eqqunngitsunik salloqittaalluniluunniit paasissutissiisoq imaluunniit inatsimmi inatsilluunniit naapertorlugu malittarisassat aalajangersarneqartut naapertorlugit peqqussutigineqartunik paasissutissiinngitsoq.  
  Imm. 2.  § 6, imm. 3, § 7, imm. 2 aamma 4, § 8, imm. 2, § 9, § 10, imm. 2, §§ 11-15, § 17, imm. 2, § 18, imm. 2, § 22, §§ 25-31, § 33, § 34, imm. 1, § 35, imm. 1, § 36, 38, imm. 2, § 43, imm. 2, aamma § 47 malillugit najoqqutassatut malittarisassani aalajangersarneqartuni aalajangersarneqarsinnaavoq najoqqutassatut malittarisassani aalajangersakkanik unioqqutitsineq akiliisitsinermik kinguneqarsinnaasoq.
  Imm. 3.  Inatsisartut inatsisaat imaluunniit maligassat atuutilersinneqartut Inatsisartut inatsisaat akilii-sitsissummik aalajangersaanissamik tunngavissaqartitsippata, akiliisitsissut Kalaallit Nunaanni Pinerluttulerinermi inatsimmi kapitali 5-imi malittarisassat malillugit inatsisitigut pisinnaati-taasoq pisussaatitaasorlu akiliisitsissummut akileeqqullugu peqquneqarsinnaavoq.

 

  § 50.  § 49, imm. 1-3 naapertorlugit akiliinissamik arsaarneqarnissamilluunniit pineqaatissiinerup saniatigut peqqissutsikkut navialisitsinermik annertuumilluunniit kinguneqarsimasumik uteqattaartumik ilungersunartumilluunniit unioqqutitsisoqartillugu Kalaallit Nunaannut pinerluttulerinermik inatsimmi pisinnaatitaaffinnik annaasaqarneq pillugu malittarisassat malillugit Kalaallit Nunaanni suliffeqarfimmik ingerlatsisinnaanermut pisinnaatitaaffimmik arsaarinnittoqarsinnaavoq.

 

  § 51.  Unioqqutitsineq akiliisitsinermit qaffasinnerusumik kinguneqartinneqassanngitsoq isumaqarfigineqarpat, Naalakkersuisut nalunaaruteqarsinnaapput, inuk pineqartoq unioqqutitsinermi pisuusutut nassuerpat piffissaliunneqartullu ersarinnerusup ingerlanerani, sivitsuinissap qinnutiginerata kingorna, akiligassap nalunaarummi allanneqarsimasup akilernissaanut piumassuseqarluni nassuerpat, suliaq eqqartuussivimmi suliarineqanngitsumik aalajangiiffigineqarsinnaasoq. Taamatuttaaq arsaarinnittoqarnissaanik piumasaqaateqarneq, tassunga ilanngullugu pigisanik nalilinnik arsaarinnissinnaaneq eqqartuussivikkoortitsinngikkaluarluni aalajangiiffigineqarsinnaavoq.

 

  § 52.  Suliani allaffissornikkut suliarineqartuni, tak. § 51 Kalaallit Nunaanni eqqartuussisarnermut inatsimmi § 347 imm. 1 taamatuttaaq atorneqartassaaq.

 

  § 53.  Kalaallit Nunaanni pinerluttulerinermi inatsimmi arsaarinnittarneq pillugu malittarisassat Inatsisartut inatsisaanni uani taamaaqataanik atorneqassapput.

 

  § 54.  Inuussutissat immikkoortitat taakkuluunniit ilai arsaarinnissutaappata arsaarinninnermut atatillugu inuussutissat immikkoortitat taakku inuussutissanit allaniit immikkoortinneqarnissaat paarnaarlugillu naqissusernissaat suliffeqarfimmut inuussutissaleriffiusumut peqqussutigineqarsinnaavoq, taakkulu nakkutilliinermi oqartussanit nalunaaqutsernissaat naammagiinnarlugu. Inuussutissat nalillit arsaarinnissutaasimasut aamma inuussutissat allat akuleriissinnerat arlaatigut pinngitsoortinneqarsinnaanngippat inuussutissat nalii arsaarinnissutaasut siumoortumik aalajangerneqartumut sumiiffimmut assartorneqassasut suliffeqarfik peqquneqarsinnaavoq.

 

  § 55.  Inatsisartut inatsisaat una imaluunniit taanna naapertorlugu maleruagassat atulersinneqarsimasut naapertorlugit akiligassiinerit arsaarinninnerillu, Nunatta Karsianut tunniunneqassapput.

 

Kapitali 15

Atortuulersitsineq, atorunnaarsitsinermi ikaarsaarnermilu aalajangersakkat

 

  § 56.  Inatsisartut inatsisaat manna ulloq 1. januar 2020-imi atuutilissaaq.
  Imm. 2.  Tamatumunnga peqatigitillugu inuussutissanik uumasullu nappaataannik inunnut tunillaassorsinnaasunik nakkutilliineq pillugu Inatsisartut peqqussutaat nr. 17, 28. oktober 1993-imeersoq atorunnaarsinneqarpoq.
  Imm. 3.  Inatsisartut peqqussutaat naapertorlugu malittarisassat atulersinneqartut imaluunniit ingerlatiinnarneqartut, tak. imm. 2, atorunnaarsinneqarnissami tungaannut imaluunniit malittarisassanik nutaanik taarserneqarnissami tungaannut atuutiinnassapput. 
  Imm. 4. Suliffeqarfiit, manna tikillugu malittarisassat malillugit akuerineqarsimasut, inatsisartut inatsisaata matuma atulersinnerata kingorna akuerineqarsimasutut isigineqassapput.

 

 

 

Namminersorlutik Oqartussat, ulloq 28. november 2019

 

 

 

Kim Kielsen