Kalaallit Nunaanni Peqqinnissaqarfik pillugu Inatsimmi nr. 369-imi 6. juni 1991-imeersumi § 1 tunngavigalugu aalajangersarneqarput:

Kapitali 1.
Inatsisartut peqqussutaata atuuffii.

§ 1. Inatsisartut peqqussutaanni matumani ilaatinneqarput inuussutissat, kiisalu nersutit nappaataat inunnut tunillaassorsinnaasut, perlerorneq trikinilu ilanngullugit, pillugit nakkutilliineq, akuersissutit misissuinerlu.
Imm. 2. Inatsisartut peqqussutaanni matumani ilaatinneqanngillat neqinik avammut tunisassianik nakkutilliineq aamma aalisakkat aalisakkanillu tunisassiat pitsaassusaannik nakkutilliineq.

Kapitali 2.
Oqartussat.

§ 2. Naalakkersuisut qitiusumik oqartussat.
Imm. 2. Kapitalit 3, 4, 5 aamma kapitali 7, § 13, imm. 3 eqqarsaatigalugit qitiunngitsumik oqartussat Naalakkersuisut aalajangersassavaat, kapitalilu 1, § 13, imm. 2 eqqarsaatigalugu kommunalbestyrelsip.

§ 3. Oqartussaaffiup ingerlanneqarnera pillugu Naalakkersuisut malittarisassiussapput.

Kapitali 3.
Nakkutilliineq.

§ 4. Peqqinnissaqarfeqarfinni tamani Naalakkersuisunit taamaaliornissamut piginnaatinneqartup inuussutissat nunamut eqqussorneqarnerini, tunisassiarineqarnerini, suliarineqarnerini, nioqqutigineqarnerini, uninngatillugit toqqortarineqarnerini assartorneqarnerinilu, kiisalu namminersortut pisortalluunniit nerisassiorfigisartagaanni akiliilluni, atorfeqarfeqarnermut inissinneqarsimanermulluunniit atatillugu neriffiusartuni eqqiluisaarnikkut pissutsit nakkutigissavai.

§ 5. Nakkutilliisoq kinaassutsimut uppernarsaammik takutitsinikkut eqqartuussivimmiillu taamaaliornissamut piginnaatitsissummik peqanngikkaluarluni pisortat namminersortullu pigisaannut isersinnaatitaavoq inatsisartut peqqussutaat imaluunniit inatsisartut peqqussutaat naapertorlugu malittarisassiat naapertorlugit aalajangiinernut atatillugu paasissutissanik pissarsiniarluni.

§ 6. Nakkutilliinerup qanoq akulitsigisumik pisarnissaa annertutiginissaalu kiisalu nakkutilliinermut atatillugu nalunaarusiortarnissaq pillugit Naalakkersuisut malittarisassiussapput.

§ 7. Nakkutilliinnermik ingerlataqartup suliassap kapitalimi matumani taaneqartup ingerlanneqarnerani Nersutaateqarnermik Nakkutilliisoq, Veterinærinspektøri, Aalisarnermi Nakkutilliisoqarfik, Fiskerikontroli, Suliffinnillu Nakkutilliisoqarfik, Arbejdstilsyni, suliassani suliassaqarfinnut taakkununnga attuumassuteqarfiusuni suleqatigissavai.

Kapitali 4.
Peqqussutit inerteqqutillu.

§ 8. Nakkutilliinermik ingerlataqartup piginnittoq, pisortaq aqutsisorluunniit peqqusinnaavaa eqqiluisaarnikkut pissutsit naammaginanngitsut piffissap erseqqinnerusumik aalajangersarneqartup, peqqussutillu suuneranut naapertuuttup, iluani aaqqiivigissagai. Taamatut peqqussuteqarneq allakkatigut nalunaarutigineqassaaq, allakkallu assilineri Naalakkersuisunut nassiunneqarlutik.
Imm. 2. Peqqussutigineqartoq piffissaliunneqartup iluani aaqqinneqanngippat nakkutilliinermik ingerlataqartoq suliffimmik matusinissamut pisinnaatitaavoq pissutsit pineqartut aaqqinneqarnissaasa tungaanut.

§ 9. Inuussutissanik nalinginnaasumik atorneqarnermikkut tunillaassuilersinnaasorisanik nappaalalersitsisinnaasorisanilluunniit, imaluunniit toqunartoqalersitsisinnaasut, imaluunniit isikkui allanngorsimasut, mikiarsimasut, mingutsinneqarsimasut, kukkusumik passunneqarnermikkut allalluunniit pissutigalugit inunnut nerisassatut isigineqarsinnaanngitsut tuniniarneqarneri tunniussuunneqarneriluunniit nakkutilliinermik ingerlataqartup inerteqqutigissallugit pisussaavoq.

Kapitali 5.
Suliffeqarfinnut inuussutissanik suliarinninnissamik, uninngatillugit toqqortarinninnissamik, assartuinissamik nioqquteqarníssamilluunniit kissaateqartunut akuersissuteqartarneq.

§ 10. Suliffeqarfiit inuussutissanik inuutissarsiutigalugu suliarinninnissamik, uninngatillugit toqqortarinninnissamik, assartuinissamik nioqquteqarnissamilluunniit kissaatigisaqartut akuersissummik peqqaarsimatinnatik taamatut ingerlatsisinnaanngillat.
Imm. 2. Suliffeqarfiit imm. 1-imi taaneqartut pillugit qinnuteqaat titartakkanik paasissutissanillu sukuumisunik ilaqartinneqartoq Naalakkersuisunut nassiunneqassaaq.
Imm. 3. Qitiunngitsumik oqartussaasup tusarniaavigineqareerneratigut suliffeqarfik Naalakkersuisunit akuerineqarsinnaavoq.
Imm. 4. Akuerineqarsimanissamik piumasaqaat aalisakkanik pisanilluunniit allanik namminersortup ilaannikkuinnaq tuniniaasarnera imaluunniit piniartumit pisisartumut toqqaannartumik tuniniaaneq inerteqqummi ilaatinneqanngillat.
Imm. 5. Suliffeqarfiit pioreersut akuersissutaagallartumillu pigisaqartut piffissap Naalakkersuisunit aalajangersarneqarsimasup iluani suliffeqarfiup ingerlaannarsinnaanissaanut qinnuteqaammik pissarsiniassapput.

§ 11. Inuussutissalerinermik suliffeqarfinnut akuersissutit pillugit Naalakkersuisut malittarisassiussapput.

Kapitali 6.
Naammagittaalliuuteqartarneq.

§ 12. §§ 8-9 tunngavigalugit nakkutilliinermik ingerlataqartup aalajangigai Naalakkersuisunut naammagittaalliuutigineqarsinnaapput.
Imm.2. Naammagittaalliuuteqarsinnaatitaapput:
1) aalajangiinermi pineqartoq, aamma
2) kinaluunniit suliassap inerneqarnerata qanoq kinguneqarneranik nammineerluni annertuumilluunniit soqutigisaqartoq.
Imm. 3. Aalajangiinerup pineqartumut ulloq nalunaarutigineqarfianiit sap. akunneri arfinillit naammagittaalliuuteqarnissamut piffissarititaapput.
Imm. 4. Naammagittaalliorneq Naalakkersuisut allamik aalajangiisimatinnagit aalajangikkap atuukkunnaarallarnissaanik kinguneqarneq ajorpoq.

Kapitali 7.
Nersutit nappaataat inunnut tunillaassorsinnaasut, perlerorneq trikinillu ilanngullugit.

§ 13. Naalakkersuisut pisussaaffigaat nersutit nappaataasa inunnut tunillaasorsinnaasut nakkutiginissaat, kiisalu tunillaassuuttoqalinnginnissaa siunertaralugu akiuussutissanik kapuinerup nakkutilliinerullu qularnaarneqarnissaa.
Imm. 2. Perlerornermut akiuussutissamik kapuisoqarnissaanik Naalakkersuisut peqqussutaata isumaginissaa, tamanna pillugu Naalakkersuisunut nalunaaruteqarnissaq kommunalbestyrelsip pisussaaffigaa.
Imm. 3. Naalakkersuisunit taamaaliornissamut piginnaatinneqartup trikinimik nakkutiginninnerup pisariaqartup ingerlanneqarnissaa kiisalu tamanna pillugu Naalakkersuisunut nalunaaruteqartoqarnissaa pisussaaffigai.

§ 14. Nersutit nappaataasa inunnut tunillaassorsinnaasut nakkutigineqarnerat, akiuussutissamik kapuisarneq, tunillaassuuttoqalinnginnissaalu siunertaralugu qanoq iliuusissat pillugit Naalakkersuisut malittarisassiussapput.

Kapitali 8.
Pineqaatissiisarneq atortuulersitsinerlu pillugit aalajangersakkat.

§ 15. Arsaarinninnermik pillaammillu akiliisitsinermik pineqaatissinneqarsinnaapput,
1) § 5 malillugu misissuinermik akornusersuisut.
2) § 8 malillugu peqqussutinik unioqqutitsisut,
3) § 9 malillugu inerteqqutinik unioqqutitsisut,
4) § 10-mik unioqqutitsisut.
Imm. 2. § 3, § 5, § 6, §11 aamma § 14 naapertorlugit malittarisassiani arsaarinninnernik pillaammillu akiliisitsinermik pineqaatissiissutissanik aalajangersaasoqarsinnaavoq.
Imm. 3. Aktiaateqarluni ingerlatseqatigiiffik (A/S), pinginneqatigiilluni ingerlatseqatigiiffik (Aps), piginneqatigiiffik (Amba) assigisaalluunniit unioqqutitsisuuppat ingerlatseqatigiiffik pillaammik akiliisinneqarlunilu arsaarinniffigineqarsinnaavoq. Naalagaaffik, Namminersornerullutik Oqartussat, kommuni kommunilluunniit ataatsimut ingerlatseqatigiiffiat unioqqutitsisuuppat naalagaaffik, Namminersornerullutik Oqartussat, kommuni kommunilluunniit ataatsimoorlutik ingerlatseqatigiiffiat pillaammik akiliisinneqarsinnaavoq arsaarinniffigineqarsinnaalluniluunniit.
Imm. 4. Imm. 1-3 tunngavigalugit pillaammik akiliisitsinerup arsaarinninnerullu saniatigut Kalaallit Nunaanni suliffimmik pisortanit akuerineqarsimasussamik ingerlatsisinnaatitaaneq arsaarinnissutigineqarsinnaavoq, piffissami erseqqinnerusumik aalajangikkamik sivisussusilimmi imalunniit killilerneqanngikkallartumik.

§ 16. Inatsisartut peqqussutaat atortuulersinneqarpoq 15. november 1993, tamatumunngalu peqatigitillugu inuussutissat qerititat pillugit nalunaarut nr. 162 21. april 1969-imeersoq atorunnaarsinneqarpoq.
Imm. 2. Kalaallit Nunaanni Peqqinnissaqarfik pillugu inatsit nr. 275 27. maj 1950-imeersoq inatsisikkut nr. 107-ikkut 26. april 1961-imeersukkut allanngortinneqarsimasoq tunngavigalugu nalunaarutit atortussanngortinneqarsimasut Inatsisartut peqqussutaat manna tunngavigalugu atorunnaarsinneqarnissamik malittarisassanilluunniit allanik taarserneqarnissamik tungaannut atuutissapput.

Namminersornerullutik Oqartussat, ulloq 28. oktober 1993.

Lars Emil Johansen

/

Ove Rosing Olsen