Kapitali 1

Atuuffia

 

  § 1.  Inatsisartut inatsisaat una atuutissaaq qaffasinnerusumik ilinniakkanut neqeroorutigineqartunut, Ilisimatusarfimmit, qitiusumik inuutissarsiutinillu ilinniarfiit aamma ilinniarfinnit allanit neqeroorutaasartunut.

  Imm. 2.  Qaffasinnerusumik ilinniagaq tassaavoq ilinniagaq annerusumik teoretiskiullunilu atuagarsorfiusoq, ilinniarnertuutut soraarummeeqqaarsimanissamik piumasaqaatitaqarfiusoq, tamatumunnga ilanngullugit immikkut aaqqissuussamik ilinniarnertuunngorniarnermik ingerlatsineq imaluunniit inuutissarsiummik ilinniagaqarneq. Qaffasinnerusumik ilinniakkanut ilaapput bacheloritut, kandidatitut-, ph.d.-tut, inuussutissarsiornermut akademimi, diplomitaarniarluni aamma masteritut ilinniakkat, tak. §§ 11-16.

 

  § 2. Naalakkersuisut qaffasinnerusumik ilinniakkanik ataqatigiissakkanik aaqqissuussissapput.

 

Kapitali 2

Ilinniakkat

 

Neqeroorutit aamma ilinniarfissanik aqutsineq

 

  § 3.  Qaffasinnerusumik ilinniartitsinerit Ilisimatusarfimmit neqeroorutigineqarsinnaapput.

  Imm. 2.  Qitiusumik inuutissarsiutinillu ilinniarfiit aamma ilinniarfiit allat Naalakkersuisunit akuerineqareernermik kingorna ilinniakkanik ingerlaqqiffiusunik neqerooruteqarsinnaapput. Qaffasinnerusumik ilinniakkat, qitiusumik inuutissarsiutinillu ilinniarfiit neqeroorutaat ilinniarfiup ilinniartitsissutigisartagaasa iluanniissapput.

  Imm. 3.  Naalakkersuisut qaffasinnerusumik ilinniakkat neqeroorutigineqartarnerat pillugu malittarisassanik aalajangersaasinnaapput, tamatumunnga ilanngullugit:

1)  piffissaq tamaat piffissallu ilaani ilinniakkat neqeroorutaanersut,

2)  ilinniakkat ungasianiit ilinniartitsinertut neqeroorutaasartut,

3)  neqeroorutit akuersissutiginissaat akuersissutillu tunuartinneqarsinnaanerat,

4)  ilinniartitsissutinik ataasiakkaanik neqeroortarneq aamma ilinniartitsissutinut aalajangersimasunut tunngatillugu pikkorissarnerit,

5)  naammattusaammik immikkullu ilinniartitsinernik ingerlatsinerit, kiisalu

6)  qaffasinnerusumik ilinniakkat ilaannik nunani allani ingerlatsisinnaaneq.

 

  § 4.  Naalakkersuisut qaffasinnerusumik ilinniakkanik neqeroorutit akuerisinnaavaat:

1)  ilinniagaq assingusoq Kalaallit Nunaanni ilinniarfinni allani neqeroorutigineqanngippat, taamaattoq tak. imm. 2,

2)  ilinniakkap nunat tamat akornanni pitsaassusissanut pitsaassusissallu qularnaarnissaannut aalajangersagaasut piviusunngortissinnaappagit, taamaalillunilu angusat nuunneqarsinnaanerat, ilinniartunik paarlaasseqatigiittoqarsinnaanera aamma nunat tamat akornanni akuerisaaneq anguneqarsinnaallutik.

3)  suliffeqarnermi politikkikkut, aningaasaqarnikkut aamma inuiaqatigiinnermi isiginiagassanut naleqqiullugu ilinniagaq pisariaqartinneqartutut isigineqarpat.

  Imm. 2.  Naalakkersuisut imm. 1-imi, nr. 1-imi aalajangersakkat sanioqqunneqarnissaat aalajangiussinnaavaat, ilinniakkap Kalaallit Nunaanni ilinniarfinni arlariinni neqeroorutigineqarnissaa pisariaqartinneqarpat, aamma

  Imm. 3.  Naalakkersuisut imm. 1 naapertorlugu akuersissuteqarnissamut atugassarititaasussanik aalajangersaasinnaapput.

 

§ 5.  Ilinniarfiit qaffasinnerusumik ilinniakkanit neqeroorutaasunit, ilinniartitsissutinik ataasiakkaanik aamma ilinniartitsissutinut aalajangersimasunut tunngatillugu pikkorissartitsinernik, Inatsisartut inatsisaat manna naapertorlugu neqeroorutaasunik, neqerooruteqarsinnaapput, taamaallaat ph.d.-tut ilinniagaq pinnagu.

 

  § 6.  Ilinniarfiit naammattusaammik ilinniartitsinermik ingerlatsinissat, ilinniartunut qaffasinnerusumik ilinniakkami ilinnialersussatut akuerisaasunut, neqeroorutigisinnaavaat, ilinniartut ilinniagassatigut ilinniakkap naammassinissaanut pisariaqartunik tunngavissinnissaat siunertaralugu.

 

  § 7.  Ilinniarfiit ilinniartunut bacheloritut imaluunniit kandidatitut ilinniakkami ilinnialersussatut akuerisaasunut piginnaaneqarluartunut, ilassutitut ilinniartitsinernik ingerlatsinerit neqeroorutigisinnaavaat.

 

  § 8.  Ilinniarfiit nunani allani ilisimatusarfimmik ataatsimik arlalinnilluunniit imaluunniit ingerlatsivinnik allanik qaffasinnerusumik ilinniakkanik neqerooruteqartartunik suleqateqarlutik, ilinniakkat immikkoortuisa ilaannik nunani allani ingerlatsinissaq neqeroorutigisinnaavaat.

 

  § 9.  Naalakkersuisut ilinniakkamik § 4, imm. 1 naapertorlugu neqerooruteqarnissamut akuersissummik tunuartitsisinnaapput, ima pisoqartillugu:

1)  ilinniakkap neqeroorutigineqarnissaa pisariaqartinneqarunnaarpat,

2)  ilinniakkamut pineqartumut tunngatillugu pitsaassusissamut piumasaqaatit qaqugukkulluunniit atuuttut ilinniakkap piviusunngortissinnaajunnaarpagit,

3)  ilinniakkamut qinnuteqartartut amerlassusaat imaluunniit ilinniagaqartut naammassisartut amerlassusaat nukissatigut sillimmatigisanut ilinniakkamut atorneqartartunut naleqqiullugit naapertuukkunnaarsimappata, imaluunniit

4)  Naalakkersuisut suliffeqarnermi politikkikkut, aningaasaqarnikkut aamma inuiaqatigiinnermi isiginiagassanut naleqqiullugu ilinniakkamik neqerooruteqarnerup killilerneqarnissaa pisariaqartutut isigippassuk.

 

Ilinniakkat imaat siunertaallu

 

§ 10.  Qaffasinnerusumik ilinniakkat, tak. §§ 11-16, ilinniakkanik ingerlatsinerupput, European Credit Transfer System (ECTS) naapertorlugu aalajangersimasunik ECTS-pointillit.

  Imm. 2.  Piffissaq tamaat ilinniarnermik ingerlatsinerup ukiumi ataatsimi suliassartaasa assigaat 60 ECTS-point.

 

  § 11.  Bacheloritut ilinniagaq tassaavoq ilisimatusarnermik tunngaveqartumik piffissaq tamaat ilinniagaq minnerpaamik 180 ECTS-pointinik naleqartoq, ilinniakkatut immikkoortutut, naammassisassatut ingerlanneqartoq. Ilinniartitaaneq ilinniartitaanerit pillugit ilinniakkat aaqqissugaaneri atorfinissutaasinnaasumik bacheloritut ilinniarnertut taaneqarsinnaavoq, ilinniartitaaneq atorfinissutaasinnaasumi aalajangersimasumi atorfininnissamik siunnerfeqarpat.

  Imm. 2.  Bacheloritut ilinniakkap siunertarai:

1)  ilinniartup ilinniartitsissummi ataatsimi amerlanerniluunniit ilisimatusarnikkut sammisassanik ilinniartinneqarnissaa, tamatumunnga ilanngullugit ilinniartitsissutip imaluunniit ilinniartitsissutit teoriivi periusaalu, tassuunakkut ilinniartoq ilinniakkamut tunngatillugu tamatigoortumik ilisimasaqalerlunilu piginnaaneqaleqqullugulu,

2)  ilinniartup ilinniakkami ilisimasassanik aamma teoretiskimik periutsitigullu piginnaasanik pisinnaasanilu pissarsitinnissaa, tassuunakkut ilinniartoq nammineerluni ilinniartitsissutip iluani imaluunniit ilinniartitsissutit iluanni apeqqutinik assigiinngisitaartunik katitikkanik suussusilersuisinnaaleqqullugu, oqaasertalersuisinnaaleqqullugu naammassinnissinnaaleqqullugulu, aamma

3)  ilinniartup inuutissarsiutini suliassanik ingerlatsisinnaalernissaanut aamma kandidatitut ilinniakkami ilinnialernissaanut tunngavissinnissaa.

 

  § 12.  Kandidatitut ilinniagaq tassaavoq ilisimatusarnermik tunngaveqartumik piffissaq tamaat ilinniagaq minnerpaamik 120 ECTS-pointinik naleqartoq, ilinniakkatut immikkoortutut, naammassisassatut ingerlanneqartoq.

  Imm. 2. Kandidatitut ilinniakkap siunertarai:

1)  ilinniartup ilinniagassatigut ilisimasaanik pisinnaasaanillu annertusaanissaq aamma teoretiskimik periutsitigullu piginnaasanik pisinnaasanilu kiisalu bacheloritut ilinniakkap killiffianut naleqqiullugu nammineersinnaanermik annertusaanissaq,

2)  ilinniartup ilinniartitsissummi imaluunniit ilinniartitsissutini sammisassani periutsinilu immikkoortunik annertusisanik atuineq aqqutigalugu ilisimasassatigut itisilerinissaa, tamatumunnga ilanngullugit ilisimatuutut suliaqarnermik periutsinillu sungiusarneq, ilinniartup inuutissarsiutini suliassanik immikkut ilisimasaqarfiunerusariaqartunik suliaqalernissaanik aamma ilisimatusarnikkut inerisaalluni sulianut peqataanissaanut piginnaanngortitsisumik, aamma

3)  ilinniartup ingerlaqqilluni ilinniarnissaanut piginnaanngorsarnissaa, tamatumunnga ilanngullugu ph.d.-tut ilinniagaq.

 

  § 13.  Ph.d.-mi ilinniagaq tassaavoq ilisimatuutut ilinniarneq 180 ECTS-pointinik naleqartoq, nunat tamat akornanni angusassat nalingannut piginnaaneqalersitsisumik, ph.d.-tut ilinniartumik, namminersortut pisortallu ingerlatsiviini, ilisimatusarnermik tamatigoortumik ilisimasaqarnissamik piumasaqarfiusuni, nammineerluni ilisimatusarnermi, ineriartortitsinermi aamma ilinniartitsinermi suliassanik ingerlatsisinnaalersitsisoq. Ph.d.-tut ilinniarneq annerusumik ingerlanneqassaaq ilisimatusarnermik ingerlatsinikkut.

 

  § 14.  Inuussutissarsiornermut akademimi ilinniagaq tassaavoq ilinniagaq ECTS-pointit 120-180-illu akornanni annertussusilik, ilinniakkatut immikkoortutut, naammassisassatut aaqqissuussaq, teorii sulinerlu paarlakaallugit ingerlanneqartoq.

  Imm. 2.  Inuussutissarsiornermut akademimi ilinniagaq piffissap ilaa ilinniakkatut 60 ECTS-pointinik naleqartutut teoretiskiinnaasutullu neqeroorutigineqarsinnaavoq, ilinniartoq minnerpaamik ukiuni 2-ni inuussutissarsiummik naapertuuttumik misilittagaqarpat.

 

  § 15.  Diplomitaarniarluni ilinniagaq tassaavoq, inuutissarsiummik aamma suliamik tunngavilimmik qaffasinnerusumik ilinniagaq 60 ECTS-pointinik naleqartoq.

 

  § 16.  Masteritut ilinniagaq tassaavoq ilinniagaq ilisimatusarnermik tunngavilik 60 ECTS-pointinik naleqartoq, ilinniakkatut immikkoortutut, naammassisassatut ingerlanneqartoq.

  Imm. 2.  Masteritut ilinniakkap siunertaraa ilinniartup inuutissarsiutini sulinermik misilittagaqareersup aamma ilinniakkamik tunuliaqutaqartup ingerlaqqiffiusumik ilinniagaqarnissaa, immikkut ilinniakkap iluani, imaluunniit siammasinnerusumik siunnerfeqarluni ilikkagassap ataatsip iluani imaluunniit ilikkagassat arlaqartut iluanni.

 

Ilinniakkat aaqqissugaaneri

 

 § 17.  Inatsisartut inatsisaata matuma sinaakkusiussaasa iluanni, ilinniarfiit ilinniakkat pillugit malittarisassat erseqqinnerusut aalajangersassavaat, ilinniakkani tamani ilinniakkap aaqqissugaanerata allaaserineratigut, ph-d-tut ilinniagaq kisiat pinnagu. Ilinniakkat aaqqissugaaneri aamma kingusinnerusukkut taakkunani allannguutit annertunerusut Naalakkersuisuni tusarniaassutigineqassasut, taakku ilinniarfeqarfimmit aalajangersarneqarnissaat sioqqullugu.

  Imm. 2.  Ilinniakkat aaqqissugaaneri ilinniakkanut ataasiakkaanut naleqqussagaassapput, paasissutissanillu ilinniakkamut pingaaruteqartunik imaqassallutik. Ilinniakkanut naleqquttuussusia aallaavigalugu ilinniakkat aaqqissugaanerisa makku imarissavaat:

1)  Ilinniakkap taaguutaa kalaallisut, qallunaatut aamma tuluttut.

2)  Ilinniakkap annertussusiligaanera ECTS-pointinik nalunaarlugu.

3)  Ilinnialernissamut piumasaqaatit, qinnuteqartut ilinniakkami inissaqartinneqartunit amerlanerutillugit qinnuteqartunik tulleriiaarinissamut malittarisassat, aamma qinnuteqarnissamut killiliussat.

4)  Ilinniakkap ilinniagassatigut ilisarnaatai, makkunannga ersersitsisut:

a)  ilinniakkap siunertaa,

b)  ilinniakkami ilinniartitsissutit, aamma

c)  ilinniakkami ilikkagassatigut pissarsiassat.

5)  Immikkoortukkaat pillugit malittarisassat, ilikkagassani immikkoortutut aamma ilikkagassat toqqagassat, tamatumunnga ilanngullugit:

a)  ilisimaligassatut, pisinnaaligassatut piginnaasaqarfigiligassatullu iluseqartillugit ilikkagassatigut pissarsiassat,

b)  annertussusaa ECTS-pointitut nalunaarsorlugu,

c)  ilinniartitseriaatsit suleriaatsillu, aamma

d)  peqataanissamut piumasaqaatit.

6)  Allattariarsorluni suliassat pillugit malittarisassat, tamatumunnga ilanngullugit bacheloritut suliassaq aamma speciali.

7)  Soraarummeernerit pillugit malittarisassat.

8)  Sungiusarluni sulinerit pillugit malittarisassat.

9)  Nunani allani ilinniarnerit pillugit malittarisassat.

10)  Ilinniartup piffissaq ilinniarfissaa sivisunerpaaq, immikkut akuerineqarnissamut periarfissat ilinniarunnaarnerlu pillugit malittarisassat.

11)  Ilinniariikkanik nuutsitsisinnaanermut malittarisassat.

  Imm. 3. Ilinniakkat aaqqissugaaneri ukiup ilinniarfiusup aallartinneraniit atortuulertassapput. Ilinniakkat aaqqissugaaneri, ilinniartunut ukiup ilinniarfiusup tulliani aallartittussanut atuuttussat, ilinniarfiup nittartagaani tamanut saqqummiunneqareersimassapput piffissaq qinnuteqarnissamut killiliussaq, § 19, imm. 1 aamma 2-mi aalajangersarneqartoq, nallertinnagu.

  Imm. 4. Ilinniartut ilinniakkamik aallartitsereersut, ilinniakkap aaqqissugaanera ilinniarnerup aallartinnerani atuuttoq malissavaat. Ilinniakkap aaqqissugaanera allanngortinneqartillugu, ilinniartoq ilinniarnermi ingerlanerani ilinniakkap aaqqissugaaneranut nutaamut nooqqullugu peqquneqarsinnaanngilaq.

  Imm. 5.  Naalakkersuisut ilinniakkat aaqqissugaaneri pillugit malittarisassaliorsinnaapput, aamma piffissaq ilinniarfissaq sivisunerpaaq pillugu malittarisassat.

 

Pitsaassutsimik qularnaarineq

 

  § 18. Ingerlaqqiffiusumik ilinniakkat ataasiakkaat pitsaassutsimikkut qularnaarneqassapput, nunat tamat akornanni aalajangersakkat naapertorlugit.

  Imm. 2.  Naalakkersuisut pitsaassutsimik qularnaarineq pillugu malittarisassiussapput.

 

Kapitali 3

Qinnuteqarneq aamma ilinnialernissamut piumasaaqaatit

 

Qinnuteqarneq

 

  § 19. Ingerlaqqiffiusumik ilinniakkanut augustimi imaluunniit septemberimi aallartittussanut qinnuteqarnissamut killigititaq tassaavoq 1. marts, taamaattoq tak. imm. 2.

  Imm. 2.  Ilinniarfiit qaffasinnerusumik ilinniakkanut ataasiakkaanut tunngatillugu aalajangersinnaapput, ilinniartunik upernaakkut semesterimi aallartittussanik ilinnialertussatut akuersiniarlutik. Upernaakkut semesterimi ilinniarlutik aallartittussanut qinnuteqaateqartitsinermi ilinniartunngortitsinermilu periutsit, tamatumunnga ilanngullugit qinnuteqarnissamut akissuteqarnissamullu killiliussat, malittarisassat ilinniarfiup aalajangersagai nittartakkatigullu tamanut saqqummiussai malillugit pisassapput.

  Imm. 3. Qinnuteqarnissamut killiliussaq, tak. imm. 1 aamma 2, ilinniakkat ataasiakkaat aaqqissugaaneranni aamma ilinniarfiup nittartagaani ersarissumik takuneqarsinnaassaaq.

  Imm. 4.  Ilinniarfiit qinnuteqaatinik kingusinaartumik annguttoqartillugu, qinnuteqarnissamut killiliussaq saneqqussinnaavaat, tak. imm. 1 aamma 2, pissutsit immikkut ittut tamanna pisariaqalersippassuk.

 

  § 20.  Qaffasinnerusumik ilinniakkamut ilinnialerumalluni qinnuteqarneq, periaasissat Naalakkersuisunit innersuunneqartut naapertorlugit pisassaaq, tak. imm. 2.

  Imm. 2.  Naalakkersuisut qinnuteqaateqarnermi periaasissat, ilusiliussassatut piumasaqaatit aamma teknikkikkut periarfissat innersuutissavaat tamannalu ilinniarnermik ilitsersuinerit pillugit nittartakkani naapertuuttuni saqqummiutissallugu.

  Imm. 3.  Imm. 1 naapertorlugu qinnuteqaatinut ilanngunneqassapput ilinniagassatut qinnutigisami ilinnialernissamut tunngavigisanut uppernarsaatit. § 19, imm. 1 aamma 2-mi qinnuteqarnissamut killiliussat naaneranni, ilinnialernissamut tunngavigisat uppernarsaataat pissarsiarineqarsimanngippata, uppernarsaatit malinnaatillugit nassiunneqassapput ilinniarfiup tamatumunnga killiliussaata iluani.

  Imm. 4. Soraarummeersimanermut uppernarsaatit il.il., ilinnialerumalluni qinnuteqarnermi nassiunneqartut kalaallisut, qallunaatut, Nunat Avannarliit allat oqaasii atorlugit imaluunniit tuluttut allagaanngitsut, oqaatsit pineqartut arlaannut ataatsimut nutserneqarsimanissaat pillugu ilinniarfik malittarisassanik aalajangersaasinnaavoq.

 Imm. 5.  Qinnuteqaatit, tamatumunnga ilanngullugit qaffasinnerusumik ilinniakkamut qinnuteqaatit ilinnialernissarlu pillugu attaveqaqatigiinnerit, tamakkiisumik ilaannakortumilluunniit digitaliusumik pisassanersut, tamatumunnga ilanngullugu digitaliusumik aaqqissuussinerit aalajangersimasut pinngitsoorani atorneqarnissaat qularnaatsumillu kinaassutsimik ilisarsisoqarsinnaanissaa pillugit Naalakkersuisut malittarisassanik aalajangersaasinnaapput.

 

Ilinnialernissamut piumasaqaatit

 

  § 21. Bacheloritut ilinniakkami ilinnialernissamut piumasaavoq ilinniarnertuunngorniarfimmi ilinniarsimaneq, tamatumunnga ilanngullugit immikkut aaqqissuussamik ilinniarnertuunngorniarnermik ingerlatsineq, ilinnialernissamut immikkut piumasaqaatinik naammassinninneq, tak. § 22, kiisalu karakteeritigut piumasaqaataajunnartunik piviusunngortitsisinnaaneq, tak. § 23.

  Imm. 2.  Aammattaaq ilinnialernissamut piumasaqaataasinnaavoq, malittarisassat ilinniarfiup aalajangersagai naapertorlugit qinnuteqartup ilinnialernissamut misilitsinnermi angusisimanissaa.

 

  § 22.  Ilinnialernissamut immikkut piumasaqaatit tassaapput ilinniarnertuunngorniarfimmi ilinniartitsissutit aalajangersimasut killiffik A-, B-, imaluunniit C-miittut, tak. ilinniarnertuunngorniartarneq pillugu Inatsisartut inatsisaat.

  Imm. 2.  Ilinniartitsissutip aalajangersimasumik qaffasissuseqarnissaa piumasaappat, tak. imm. 1, qinnuteqartup ilinniartitsissutini angusinissamut killigititaq, killiffimmi tassani qaffasinnerusumiluunniit angusimassavaa, ilinniarnertuunngorniarfimmi pineqartumi karakteeriliisarneq pillugu malittarisassat naapertorlugit. Ilinniartitsissummi karakteerit arlallit ilaappata, karakteeritigut piumasaqaat naammassineqarsimassaaq agguaqatigiissitsinermi pingaartitaq anguneqarsimappat. Karakteeritigut piumasaqaat naammassineqarsinnaanngilaq qummut akunnaalliliinikkut.

 

  § 23.  Karakteeritigut piumasaqaat ima paasineqassaaq, ilinnialissutaasinnaasumik soraarummeerneq naammassineqarsimassasoq, ilinniarnertuunngorniarfimmi pineqartumi karakteeriliisarneq pillugu malittarisassat naapertorlugit, agguaqatigiissitsinermi karakteeri aalajangersimasoq minnerpaatut karakteereralugu, imaluunniit ilinniartitsissutit ataasiakkaat angusiffiusimassasut karakteerip minnerpaaffissaa aalajangersimasoq karakteereralugu. Piumasaqaat naammassineqarsinnaanngilaq qummut akunnaalliliinikkut.

 

  § 24.  Iliniakkanut ataasiakkaanut ilinnialernissamut piumasaqaatit aalajangersimasut aamma karakteeritigut piumasaqaatit, tak. §§ 22 aamma 23 ilinniarfinnit ataasiakkaanit aalajangersarneqassapput.

  Imm. 2.  Ilinniarfiit aalajangersinnaavaat, misilitsinnermi ilinniarfimmit immikkut aaqqissuussaasumi angusaq, aammalu assingusunik piginnaaneqarnermik uppernarsaasoq, qinnuteqartunut § 23 naapertorlugu karakteeritigut piumasaqaammik naammassinninngitsunut, karakteeritigut piumasaqaatinik naammassinninnertut naleqartinneqarsinnaasoq.

  Imm. 3.  Ilinniarfik § 23-mi karakteeritigut piumasaqaammik saneqqutsisinnaavoq, pissutsit immikkut ittut tamanna pisariaqalersippassuk.

 

  § 25.  Bacheloritut ilinniagaqarumallutik qinnuteqartut, ilinnialernissamut piumasaqaatitut aalajangiunneqartunit, tak. § 21, allaanerusumik tunngaveqarlutik qinnuteqarnissaat ilinniarfiup akuerisinnaavaa, qinnuteqartoq piumasaqaatinut sanilliunneqarsinnaasunik ilisimasassatigut piginnaaneqarpat, ilinniarfiullu nalilerpagu qinnuteqartup ilinniagaq naammassisinnaassagaa.

  Imm. 2.  Ilinniarfiup imm. 1 naapertorlugu akuersinissaminut piumasarisinnaavaa, qinnuteqartup kingusinnerpaamik ilinniarnerup aallartinnerani naammattusaammik misilitsinnermi anguseqqaarnissaa, piginnaanerit pisariaqartut uppernarsarumallugit.

 

  § 26. Kandidatitut ilinnialernissamut piumasaavoq, naapertuuttumik bacheloritut ilinniagaqarnissaq, tak. § 11, imm. 1, imaluunniit naapertuuttumik allamik, assingusumik qaffasissusilimmik Kalaallit Nunaanni, Danmarkimi nunamiluunniit allami ilinniagaqarsimanissaq.

  Imm. 2.  Ilinniarfiup kandidatitut ilinniakkani ataasiakkaani ilinnialernissamut piumasaqaatit aalajangersassavai.

  Imm. 3.  Kandidatitut ilinniagaqarumallutik qinnuteqartut, imm. 1-imi ilinnialernissamut piumasaqaatitut aalajangiunneqartunit allaanerusumik tunngaveqarlutik ilinnialernissaat ilinniarfiup akuerisinnaavaa, qinnuteqartoq piumasaqaatinut sanilliunneqarsinnaasunik ilisimasassatigut piginnaaneqarpat, ilinniarfiullu nalilerpagu qinnuteqartup ilinniagaq naammassisinnaassagaa. Ilinniarfiup aalajangersinnaavaa, qinnuteqartup kingusinnerpaamik ilinniarnerup aallartinnerani naammattusaammik misilitsinnermi anguseqqaarnissaa, imaluunniit ilinniartitsissutinik naammattusaataasunik ingerlatseqqaarnissaa.

 

  § 27.  Ph.d.-tut ilinnialernissamut piumasaavoq qinnuteqartup, ilinniakkamik qaffasissutsimigut kandidatitut ilinniakkamut nallersuunneqarsinnaasumik ilinniagaqarsimanissaa, tak. § 12, imm. 1.

  Imm. 2.  Ilinniarfiup aalajangersinnaavaa ph.d.-tut ilinniarnermik ingerlatsineq kandidatitut ilinniarnerup ingerlanneranut atasumik aallartinneqarsinnaasoq, kisianni qularnaarneqassaaq ilinniarnerup tamarmiusup, ilinniakkat marluk uiuleriissillugit ingerlanneqarnerat, annertoqatigalugulu qaffaseqatigigaa, tak. §§ 12 aamma 13.

  Imm. 3.  Ilinniarfiup aalajangissavaa kikkut ph.d.-tut ilinnialissanersut. Ilinniarfiup nittartagaani ersissaaq, ilinnialernissamik akuersinermut piumasaqaatit suut tunngaviussanersut.

 

 § 28.  Inuussutissarsiornermut akademimi ilinniakkami ilinnialernissamut piumasaavoq ilinniarnertuunngorniarfimmi ilinniarnermik naammassisimanissaq, tamatumunnga ilanngullugit immikkut aaqqissuussamik ilinniarnertuunngorniarnermik ingerlatsineq imaluunniit inuutissarsiummik ilinniagaqarneq, tak. inuussutissarsiutinik ilinniartitsinerit aamma inuussutissarsiutinik ilinniartitsinerit iluanni pikkorissartitsisarnerit pillugit Inatsisartut inatsisaat. Ilinniarfiup piumasaqaatigisinnaavaa, lærlingitut isumaqatigiissuteqarsimanissaq imaluunniit suliffeqarfimmik sungiusarluni sulinissamik isumaqatigiissuteqarsimanissaq.

  Imm. 2.  Ilinniarfiup imm. 1-imi ilinnialernissamut piumasaqaatitut aalajangiunneqartunit allaanerusumik tunngaveqarlutik qinnuteqartut ilinnialernissaat akuerisinnaavaa, erseqqissumik naliliineq tunngavigalugu nalilerneqarpat, qinnuteqartoq ilinniakkap naammassinissaanut ilinniakkamigut piginnaasaqartoq. Ilinniarfiup piumasarisinnaavai misilitsinnernik ingerlatsinissat, inuit ataasiakkaarlugit oqaloqatigineqarnissat imaluunniit qinnuteqaammik tunngavilersukkamik nassiussisoqarnissaa.

 

  § 29. Diplomitaarniarluni ilinnialernissamut piumasaavoq, ilinniakkamik ilinnialissutaasinnaasumik naapertuuttumik ilinniagaqarsimanissaq, minnerpaamik inuussutissarsiornermut akademimi ilinniakkap naligisaanik, tak. § 14, kiisalu diplomitaarniarluni ilinniakkamut tunngatillugu aalajangersarneqarsinnaasunik immikkut ilinnialernissamut piumasaqaataasinnaasunik naammassinninnissaq.

  Imm. 2.  Ilinniakkap ilinnialissutaasinnaasup naammassinerata kingorna, qinnuteqartut inuutissarsiummi sulinermik minnerpaamik ukiuni marlunni naapertuuttumik misilittagaqassapput. Suut inuutissarsiummi sulinermik naapertuuttumik misilittagaanerannik naliliineq, ilinniarfinnit isumagineqassaaq.

 

  § 30.  Masteritut ilinnialernissamut piumasaavoq qinnuteqartup ilinniakkamik ilinnialissutaasinnaasumik naapertuuttumik ilinniagaqarsimanissaa, minnerpaamik ima killiffilimmik:

1)  bacheloritut ilinniagaq, tak. § 11, imm. 1,

2)  diplomitaarniarluni ilinniagaq, tak. § 15, imaluunniit

3)  nunani allani ilinniagaq taakkua naleqqatigisaat, tak. nr. 1 aamma 2.

  Imm. 2.  Qinnuteqartut inuutissarsiummi sulinermik minnerpaamik ukiuni marlunni naapertuuttumik misilittagaqassapput. Suut inuutissarsiummi sulinermik naapertuuttumik misilittagaanerannik naliliineq, ilinniarfinnit isumagineqassaaq.

  Imm. 3.  Ilinniarfiup qinnuteqartut imm. 1-imi piumasaqaatinik naammassinninngitsut, kisiannili erseqqissumik nalileereernerup kingorna taakkununnga ilinniakkatigut nallersuussinnaasumik ilinniagaqartutut nalilerneqartut, ilinnialertussatut akuerisinnaavai. Ilinniarfiup aalajangersinnaavaa, qinnuteqartup kingusinnerpaamik ilinniarnerup aallartinnerani naammattusaammik misilitsinnermi anguseqqaarnissaa.

 

  § 31.  Ilinnialernissamut piumasaqaatinik sakkortunerulersitsineq, tak. §§ 21 aamma 26-30, atuutsitsilernissaq minnerpaamik ukiunik 2-nik sioqqullugu nalunaarutigineqartassaaq.

  Imm. 2.  Nalunaaruteqarluni ilisimatitsineq pissaaq ilinniarfiup pineqartup nittartagaani.

 

Kapitali 4

Ilinnialertussanik killilersuineq aamma ilinniartunngortitsinermi inissaqartitsineq

 

  § 32. Ilinniarfiit namminneq aningaasaqarnikkut sinaakkusiussat iluanni aalajangissavaat, ilinniartut qassit iliniakkani ataasiakkaani ilinniartunngortinniarnerlugit, taamaattoq tak. imm. 2 aamma 5 aamma § 9, nr. 3. Taamaattoq ilinniartut piffissaq tamaat ilinniakkami allami ilinnialersussatut akuerisaasimasut ilinniartussatut akuerineqarsinnaanngillat, taamaaliornissamut immikkut illuinnartunik peqqutissaqartinnagu.

  Imm. 2.  Ilinniartunngortitsinermi inissaqartitsinerup aalajangiunnerani, ilinniarfiit qularnaassavaat, isumannaatsumik piginnaaneqarluartunillu ilinniartitsisoqarluni illutatigullu naammattunik inissaqartitsilluni ilinniartitsisoqarsinnaanissaa. Ilutigisaanik ilinniarfiit isiginiassavaat, ilinniartussatut akuerineqartut amerlassusaasa inuiaqatigiinni taamatut ilinniarsimasunik pisariaqartitsinernut naapertuuttuuneri.

  Imm. 3.  Ilinniarfiit ilinniartunngortitsinermi inissaqartitsinerup aalajangiunneranni, utaqqisut allassimaffianni tulleriiaakkami utaqqisutut inissat qassiunissaat aalajangiussinnaavaat.

  Imm. 4.  Ilinniarfiit ilinniakkamik neqerooruteqarnissaq pinngitsoorsinnaavaat, qinnuteqartut amerlassusaasa taamaaliornissaq pissusissamisoortippassuk.

  Imm. 5.  Naalakkersuisut ilinniakkani ataasiakkaani ukiumut ilinniartunngortitsinermi inissaqartitsinerup amerlanerpaaffissai aamma ikinnerpaaffissai aalajangersarsinnaavaat.

 

 § 33.  Ilinniakkanut ataasiakkaanut qinnuteqartut, ilinniartunut inissanit amerlaneruppata, ilinniartunngortitsisoqassaaq tulleriiaarinermi malittarisassat ilinniakkat ataasiakkaat aaqqissugaaneranni aalajangersarneqartut naapertorlugit.

  Imm. 2.  Qinnuteqartut utaqqisut allassimaffiannut ilanngunneqarsinnaapput, qinnuteqartut piginnaanillit ilinniartunut inissanit amerlaneruppata, tak. § 32, imm. 3.

 

  § 34.  Ilinniartut ilinniakkami qinnuteqaatigisaminni ilinnialersinnaasut, piffissaliussap Naalakkersuisunit tamanut nalunaarutigineqartup iluani, ilinniarfiit nalunaarfigissavaat ilinniakkami inissamik neqeroorfigalugit.

  Imm. 2.  Qinnuteqartut ilinniakkami qinnuteqaatigisaminni ilinnialernissaminnut akuerisaanngitsut, imm. 1-imi piffissaliussap iluani tamanna pillugu ilinniarfinnit nalunaarfigineqassapput.

  Imm. 3.  Qinnuteqartut imm. 2-mi pineqartut, tulleriiaarilluni utaqqisut allassimaffiannut ilanngunneqarsinnaasut, tak. § 33, imm. 2, tamanna pillugu, kiisalu utaqqisut allassimaffianni sumi inissisimanerminnik nalunaarfigineqassapput.

  Imm. 4.  Ilinniakkami inissaq neqeroorutigineqartoq, tak. imm. 1 aamma 3, atorunnaassaaq, qinnuteqartup ilinniakkami inissamik neqeroorutigineqartumik akuersinini uppernarsaasinngippagu, piffissaliussap neqerooruteqarnerup ilinniarfimmit nalunaarutiginerani aalajangerneqartup iluani.

 

  § 35.  Naalakkersuisut qaffasinnerusumik ilinniakkani ilinnialersinnaaneq ilinniartutullu akuerisaaneq pillugit malittarisassanik erseqqinnerusunik aalajangersaasinnaapput.

 

Kapitali 5

Aalajangersakkat allat

 

Ilinniagaqarluni Kalaallit Nunaata avataaniinneq

 

  § 36.  Bacheloritut ilinniartut, tak. § 12, imm. 1, ilinniarnerup ingerlanerani ilinniarnerminnut atatillugu Kalaallit Nunaata avataani ilinniassapput, taamaattoq tak. imm. 2 aamma § 41, imm. 1. Ilinniarnermut atatillugu nunami allamiinneq ima aaqqissuunneqarsinnaavoq:

1)  semesteritut ilivitsutut,

2)  ilinniartitsissutini ataasiakkaani imaluunniit

3)  piffissaq sungiusarluni suliffik ataaseq amerlanerilluunniit.

  Imm. 2.  Imm. 1-imi, oqaaseqatigiinni siullerni piumasaqaataasoq kandidatinngorniarluni ilinniartumut atuutissanngilaq bacheloritut ilinniartitaanermini pinngitsoorani nunap avataani ilinniagaqarsimanissamik kandidatitut ilinniarnissamik piumasaqaateqarfiusumi.

  Imm. 3.  Ilinniakkamut atatillugu nunami allamiinneq pillugu malittarisassat ilinniakkap pineqartup aaqqissugaanerani aalajangersarneqassapput.

  Imm. 4.  Inatsisartut inatsisaat manna naapertorlugu qaffasinnerusumik ilinniakkanut allanut, ilinniarfiit ilinniarnermut atatillugu pinngitsoorani nunami allamiittarneq, tak. imm. 1, pillugu malittarisassanik aalajangersaasinnaapput, taamaattoq tak. § 41, imm. 2. Malittarisassat ilinniakkap pineqartup aaqqissugaanerani ersissapput.

  Imm. 5.  Ilinniarfiit qinnuteqareernermikkut imm. 1-imik aamma malittarisassanik imm. 4 naapertorlugu aalajangersarneqartunik saneqqutsisinnaapput, pissutsit immikkut ittut tamanna pisariaqartippassuk, tamatumunnga ilanngullugit ilaqutariinni pissutsit, peqqissutsimut tunngasumik pissutsit, ilinniarnermut tunngatillugu pissutsit, ilinniagaqarluni nunanit tamanit misilittagaqarneq assigisaaluunniit.

  Imm. 6.  Ilinniartut imm. 5 naapertorlugu immikkut akuerineqartut, ilinniarnerup ingerlanissaanik allamik neqeroorfigineqassapput.

 

Ilinniartitsisut piginnaasaqarnissaannik piumasaqaatit

 

  § 37.  Naalakkersuisut Inatsisartut inatsisaat manna naapertorlugu qaffasinnerusumik ilinniakkani ilinniartitsisut piginnaasaqarnissaannik piumasaqaatit pillugit malittarisassat aalajangersassavaat.

 

Ilitsersuisarneq

 

  § 38.  Ilinniarfiit ilinniartut ilinniarnermik ingerlatsinerini ilinniakkamut kingornagullu suliffissanut periarfissaasunut tunngatillugu ilitsersorneqarnissamik neqeroorfigissavaat.

  Imm. 2.  Ilinniarfiit ilinniartut ilinniakkaminni piffissaliussaasumut sanilliullugu kinguartooqqasut immikkut ilitsersortassavaat, ilinniagaqartup ilinniakkaminik naammassinnissinnaanissaminut periarfissaasa tapersersornissaat siunertaralugu.

  Imm. 3.  Naalakkersuisut ilitsersuisarneq pillugu malittarisassanik annertunerusunik aalajangersaasinnaapput.

 

Maalaaruteqartarneq

 

  § 39.  Ilinniarfiit aalajangiineri, ilinniartut imaluunniit qinnuteqartut inatsisitigut inissisimanerinut tunngasut, Naalakkersuisunut saqqummiunneqarsinnaapput. Maalaaruteqarneq pissaaq ullormit aalajangiinerup maalaaruteqartumut nalunaarutigineraniit sapaatip-akunneri 4 qaangiutsinnagit.

  Imm. 2.  Maalaaruteqarneq kinguartitsinermik sunniuteqarsinnaanngilaq, taamaattoq tak. imm. 3.

  Imm. 3.  Naalakkersuisut maalaaruteqarnissamut periarfissat maalaarutillu suliarineqartarnerat aamma maalaarutit aalajangersimasut kinguartitsinermik sunniuteqarsinnaanerat pillugit malittarisassanik aalajangersaasinnaapput.

 

Atortuulersitsineq, atorunnaarsitsinermut ikaarsaariarnermullu aalajangersakkat

 

  § 40.  Inatsisartut inatsisaat atortuulerpoq 1. august 2019.

  Imm. 2.  Ilutigisaanik atorunnaarsinneqarpoq Isumaginninnermi perorsaasussanik ilinniartitsineq pillugu Inatsisartut peqqussutaat nr. 2, 20. maj 1998-imeersoq aamma najoqqutassat taassuma nassatarisaanik atuutsinneqartut.

 

  § 41.  § 36, imm. 1 naapertorlugu nunami allamiinneq pillugu malittarisassat atuutinngillat ilinniartunut Inatsisartut inatsisaata atuutilernerata nalaani bacheloritut ilinniakkamik aallartitsisimasunut imaluunniit 1. august 2021 sioqqullugu bacheloritut ilinniakkamik aallartitsisunut.

  Imm. 2.  Qaffasinnerusumik ilinniakkanut allanut tunngatillugu pinngitsoorani ilinniarluni nunami allamiinnissaq pillugu malittarisassat, tak. § 36, imm. 4, taamaallaat atuutissapput ilinniartunut, ilinniakkani 1. august 2021-mi kingusinnerusukkulluunniit aallartittuni ilinniartuusunut.

 

 

 

Namminersorlutik Oqartussat, ulloq 12. juni 2019

 

 

 

Kim Kielsen