§ 1

Qaffasinnerusumik ilinniartitaanerit pillugit Inatsisartut inatsisaanni nr. 14, 12. juni 2019-imeersumi uku allanngortinneqarput:

1. § 1, imm. 2-mi oqaaseqatigiit siulliit ima oqaasertalerneqarput:
”  Qaffasinnerusumik ilinniagaq teorimut tunngasunik atuagarsornermillu annertunerusumik ilinniarfiuvoq, ilinnialerfigissagaanni ilinniarnertuunngorniarfimmi angusisimanissaq piumasaqaataalluni, tassunga ilanngullugu ilinniarnertuunngorniarfimmi immikkut aaqqissuussamik ilinniagaq imaluunniit inuussutissarsiummut ilinniagaq, taamaattorli § 31 a tak.”

2. § 17 kingorna una ikkunneqassaaq:              

”Ilinniarnermut ileqqorissaarnermullu malittarisassat

  § 17 a.  Ilinniarfiup pisortaata ilinniarnermut ileqqorissaarnermullu malittarisassat aalajangersassavai, taamaattorli imm. 3 tak. Ilinniarfiup pisortaata ilinniarnermut ileqqorissaarnermullu malittarisassat ilinniartunut ilisimatitsissutigissavai. Ilinniarfimmi pisortap ilinniarnermut ileqqorissaarnermullu malittarisassat ilisimatitsissutitut Naalakkersuisunut nassiutissavai.
  Imm. 2.  Ilinniarfimmi pisortaq ilinniartunut ilinniarnermut ileqqorissaarnermullu malittarisassanik maleruaanngitsunut pineqaatissiinissaq pillugu aalajangiissaaq. Ilinniarfimmi pisortap ilinniartut, ilinniarnermut ileqqorissaarnermullu malittarisassanik arlaleriarlutik sakkortuumilluunniit unioqqutitsisut anisissinnaavai.
  Imm. 3.  Naalakkersuisut ilinniarnermi pissuserissaarnissamillu malittarisassat pillugit malittarisassanik erseqqinnerusunik aalajangersaassapput, tamatumunnga ilanngullugit pinngitsoorani takkuttussaaneq aamma ilinniartunut ilinniarnermi pissuserissaarnissamilu malittarisassanik maleruaanngitsunut pineqaatissiisarnissat pillugit malittarisassat.”

3. § 20, imm. 3-mi oqaaseqatigiit siulliit ima oqaasertalerneqarput:
”  Imm.1 malillugu qinnuteqaatinut ilinniakkamut ilinnialerfissatut qinnuteqarfigisamut ingerlariaqqissutaasinnaasutut uppernarsaatit ilanngunneqassapput, taamaattorli § 31 a tak.”

4.  § 31-p kingornagut kapitali 3-mi ikkunneqassaaq:
”  § 31 a.  Naalakkersuisut eqqumiitsuliornermik qaffasinnerusumik ilinniarfinni ilinniartussanik akuersinermut atatillugu ilinnialernissamut piumasaqaatinik saneqqutsisoqarnissaa akuerisinnaavaat.
  Imm. 2.  Naalakkersuisut qaffasinnerusumik ilinniarfinni ilinnialernissamut akuerisaanissamullu malittarisassanik erseqqinnerusunik aalajangersaasinnaapput.”

5.  § 35 ima oqaasertalerneqassaaq:
”  § 35.  Naalakkersuisut qaffasinnerusumik ilinniarfinni akuerisaanissamut malittarisassanik erseqqinnerusunik aalajangersaasinnaapput.”

6.  § 39-p kingornagut ilanngunneqarpoq:

”Paasissutissanik nakkutilliineq pissarsiortarnerlu

  § 39 a. Naalakkersuisut ilinniakkat ilinniartitsinerlu Inatsisartut inatsisaat manna malittarisassallu taanna malillugu aalajangersarneqartut naapertorlugit nakkutigissavaat.

  § 39 b. Naalakkersuisut ilinniarfik, ilinniakkamut qinnuteqartut sulisullu pillugit paasissutissat pisariallit tamaasa ilinniarfeqarfinnit, qaffasinnerusumik ilinniakkanik neqerooruteqartunit piniarsinnaavaat, taamatuttaarlu nakkutilliinissaq kisitsisitigullu paasissutissanik suliaqarnissaq siunertaralugit ilinniarfeqarfinnut alakkarsinnaapput matumunngalu malittarisassanik aalajangersaasinnaallutik.
  Imm. 2.  Tassunga atatillugu Naalakkersuisut ilinniarfeqarfiillu qaffasinnerusumik ilinniakkanik neqerooruteqartut akornanni elektroniskiusumik attaveqatigiinneq, tassunga ilanngullugit paasissutissanik tunniussinermut atatillugu qanoq ittuunissaat ilusissaallu pillugit malittarisassanik Naalakkersuisut aalajangersaasinnaanissaannut tunngavissamik ilanngussisoqarsinnaassaaq. Aammattaaq Naalakkersuisut nakkutilliinissamut isumannaallisaanissamullu piumasaqaatinik aalajangersaasinnaapput.

Misileraalluni inerisaallunilu suliat

  § 39 c. Naalakkersuisut immikkut pisoqartillugu inatsit sanioqqussinnaavaat, tamanna misileraalluni sulinissap perorsaanikkullu inerisaanissap siuarsarnissaanik peqquteqarpat. Misileraalluni inerisaallunilu suliat ilinniartut ilinniakkaminnik inuussutissarsiummut ilinniakkamut, qaffasinnerusumik ilinniakkamut akuerineqarnissamut periarfissaannik allatigulluunniit pisinnaatitaaffiinik ajornerulersitsinnginnissaat piumasaqaataavoq.
  Imm. 2.  Naalakkersuisut immikkorluinnaq ittunik pisoqartillugu ilinniartunut ataasiakkaanut tunngatillugu inatsit sanioqqussinnaavaat.”

§ 2

Inatsisartut inatsisaat ulloq 1. januar 2022-mi atuutilissaaq.

Namminersorlutik Oqartussat, ulloq 1. december 2021

Múte Bourup Egede
Naalakkersuisut Siulittaasuat