§ 6, imm 1 naapertorlugu Sanaartukkat innaallagissamut atugassat, innaallagissamut ikkussuinerit aamma atortut innaallagiatortut pillugit Inatsisartut peqqussutaat nr. 12, 3. november 1994-imeersumi, Inatsisartut inatsisaanni nr. 19, 12. juni 2019-imeersumi allanngortinneqartumi, Innaallagissiornermut Oqartussanit aalajangersaneqassaaq:

Kapitali 1

Pitsaassutsimut qulakkeerinninnissamut atortoq

 § 1.  Pitsaassutsimut qulakkeerinninnissamut atortoq suliffeqarfiup akuersissummik pigisaqartup suliarisartagaasa ilaannut, sammisamut innaallagissamut tunngasunut akuersissummik pigisaqarnissamut piumasaqaataaffiusunut sammitinneqarpoq. Atortoq suliffeqarfiup aaqqissuussaanerani ilusiliussamut naleqqussarneqarsimassaaq aamma inuup akuersissummik pigisaqartup suliffeqarfimmi qanoq pisinnaatitaaneranut.

  § 2.  Pitsaassutsimut qulakkeerinninnissamut atortumut ilanngunneqarsimasussat tassaapput ilanngussaq 1-imi allaaserineqartut.

  § 3.  Pitsaassutsimut qulakkeerinninnissamut atortoq uppernarsaasersorneqarsimassaaq pitsaassuseq pillugu mappersakkamut imaluunniit pitsaassuseq pillugu atortumut elektroniskiusumut, tassani ilanngunneqarsimassapput uppernarsaasersuutit attuumassuteqartut aamma nutarterneqarsimasut aaqqissuulluakkamik aamma takulertorneqarsinnaasunngorlugit inissitsitsiterlugit, tak. ilanngussaq 1.

  Imm. 2.  Pitsaassutsimut qulakkeerinninnissamut atortoq toqqortarineqassaaq Innaallagissiornermut Oqartussanit takuneqarsinnaasussanngorlugu. Pitsaassuseq pillugu uppernarsaasersuut suliarineqarsimasumut tunngasoq taamatuttaaq suliffeqarfinnut pilersuinermik ingerlatsisunut pissarsiarineqarsinnaassaaq.
  Imm. 3.  Suliffeqarfiup pitsaassutsimut qulakkeerinninnissamut atortoq aamma pitsaassutsimut uppernarsaasersuut aarlerinanngitsumik ukiuni tallimani toqqortarissavaa. Elektroniskiusumik toqqortarinninneq imatut pissaaq piffissaq toqqortaqarfiusoq tamakkerlugu, atortup ilaanit arlaannut attuumassuteqartunit aallerfigineqarsinnaanngorlugu.

  § 4.  Suliffeqarfik akisussaasuuvoq pitsaassutsimut qulakkeerinninnissamut atortup atuutsinneqarnissaanut, taassumalu ingerlaavartumik atorneqartarnissaanut, nutarterneqartarnissaanut aamma nalilersorneqartarnissaanut. Suliffeqarfimmi namminermi aqutsisut nalilersuinerat minnerpaamik ukiumut ataasiarluni ingerlanneqartassaaq. Suliffeqarfik pisussaaffeqarpoq pitsaassutsimut qulakkeerinninnissamut atortumit misissuititsinissaminut, tamanna Innaallagissiornermut Oqartussanit piumasarineqarpat.

Kapitali 2

Akuersissutip akuerineqarnera aaamma pitsaassutsimik qulakkeerinninnermut atortumik misileraaneq

  § 5.  Suliffeqarfiup akuersissummik pigisaqalernissaminut qinnuteqaateqarneranut atatillugu, pitsaassutsimut qulakkeerinninnermut atortup assinganik Innaallagissiornermut Oqartussanut nassiussisoqassaaq. Qinnuteqaat aamma uppernarsaasersuut elektroniskiusumik nassiunneqarsinnaapput.

  § 6.  Innaallagissiornermut Oqartussat suliffeqarfimmut akuersissummik ataasiinnarmik tunniussissarput, Innaallagissiornermut Oqartussat misissuigallarnerup kingornatigut atortoq tamakkiisuusoq isumaqarunik. Innaallagissiornermut Oqartussat isumaqarunik atortoq tamakkiisuunngitsoq, taava akuersissummik peqalernissaq itigartitsissutigineqassaaq.

  § 7.  Innaallagissiornermut Oqartussat misissuisinnaapput tassa suliffeqarfik pitsaassutsimik qulakkeerinninnermut atortumik atuineranik aamma ilumut pitsaassutsimik qulakkeerinninnissamut atortoq ilumut malinneraat, tamatuttaaq atortumit piumasaqaatit atuuttut naammassineqarnersut.

  Imm. 2.  Suliffeqarfiup uniuinerit Innaallagissiornermut Oqartussanit paasineqartut naleqquttumik pissuseqartilissavai, naleqqussaalluni iliuuseqarnermigut.

  Imm. 3.  Suliffeqarfiup Innaallagissiornermut Oqartussat naqqiutaat malitseqartissavaat kingusinnerpaamik piffissaliussarineqartup iluani. Innaallagissiornermut Oqartussat naqqitigisatik suliffeqarfimmit malinneqarsimanngitsut, qularnaarlugu paasiguniuk, tassa kingusinnerpaamik iliuuseqarnissamut piffissaliussap iluani, suliffeqarfiup iliuuseqarfigisimanngikkai, taava tamanna nikingasoqarneranik kinguneqassaaq, tak. imm. 2.

  Imm. 4.  Innaallagissiornermut Oqartussat misissuinermigut qularnaarlugu paasiguniuk, pitsaassutsimik qulakkeerinninnissamut atortumut piumasaqaatit eqqortinneqanngitsut, taava Innaallagissiornermut Oqartussat akuersissummik pigisaqarneq utertissinnaavaa. 

  § 8.  Suliffeqarfik nunamit allameersoq innaallagissamik ikkussuisinnaanermut akuersissuteqalernissamut qinnuteqaateqartoq Kalaallit Nunaanni pilersitsiniarnini siunertaralugu, taava uppernarsaasersuummik saqqummiussissaaq suliffeqarfiup pitsaassutsimik qulakkeerinninnissamut atortumik pigisaqarluni, suliassanik innaallagissamik ikkussuisarnermut aamma ingerlatsinermut tunngatillugu suliffeqarfinnut akuersissummik pigisaqartunut najoqqutassamut matumunnga ilaasunut, atortoq najoqqutassami matumani maleruaqqusat naapertorlugit akuersissutigineqarsinnaassaaq.

  Imm. 2.  Danskit imaluunniit nunani allamiut suliffeqarfiutaat suliaqarnermut aamma inaarutaasumik nakkutilliinermut pitsaassutsimik qulakkeerinninnermut atortumik pigisaqareerluni, taannalu akuersissuteqartarnermut tunngatillugu, Europami nalinginnaasut ataatsimoortut tunngavigalugit akuerisaasumik akuerineqarsimappat, taava Innaallagissiornermut Oqartussat atortoq nalilissavaat uppernarsaasersuutit tiguneqartut tunngavigalugit. Tamanna tunngavigalugu Innaallagissiornermut Oqartussaasut isummerfigissavaat atortoq akuerineqarsinnaanersoq, tak. § 7 aamma § 8. 

  Imm. 3.  Innaallagissiornermut Oqartussat misissuisinnaapput, tak. § 9, tassa suliffeqarfik pitsaassutsimik qulakkeerinninnermut atortumik atuineranik aamma pitsaassutsimik qulakkeerinninnissamut atortortik ilumut malinneraat, tamatumani tunngavigineqassapput misissueqqinnermut nalunaarutit akuersissuteqartarnermut akuerisaasuneersut.

  § 9.  Suliffeqarfik akuersissut pigisaa Inatsisartut Peqqussutaat nr. 12, § 6, imm. 5, kiisalu suliffeqarfimmik innaallagissamik ikkussuisartumik akuersissuteqartarneq aamma ingerlatsineq pillugu najoqqutassaq naapertorlugit arsaarinnissutigineqarsimappat, taava akuersissummik nutaamik qinnuteqaateqarnermut atatillugu, uppernarsaasersuut Innaallagissiornermut Oqartussanut nassiunneqassaaq, taamaaliornikkut suliffeqarfiup pitsaassutsimik qulakkeerinninnermut atortua misissortinniarlugu taana najoqqutassiamut matumunnga naapertuunnersoq.

Kapitali 3

Immikkut ittumik misileeqqinneq

  § 10.  Innaallagissiornermut Oqartussat suliffeqarfik peqqusinnaavaa pitsaassutsimik qulakkeerinninnermut atortuata immikkut ittumik misileqqinnissaanut, imatut pisoqartillugu suliffeqarfik ikkussuinermik suliaqarnerminut atatillugu sumiginnaasimanermik takutitsisimappat. Innaallagissiornermut Oqartussat kingusinnerpaamik piffissaliussamik aalajangersaasinnaapput, tassa immikkut ittumik misileeqqinnerup qaqugu ingerlanneqareersimanissaanut tunngatillugu.

  Imm. 2.  Imaappat Innaallagissiornermut Oqartussat immikkut ittumik misileeqqinnermi, pitsaassutsimik qulakkeerinninnermut atortumut piumasaqaatit eqqortinneqanngitsut qularnaarlugu paasillugu, taava Innaallagissiornermut Oqartussat suliffeqarfiup akuersissut pigisaa utertissinnaavaat.

  Imm. 3.  Suliffeqarfik allatut pisoqartillugu imm. 2-mi pisumik taaneqartumit allaanerusumik, taava misiliinerup kingornatigut qaammat ataaseq qaangiutsinnagu Innaallagissiornermut Oqartussanut immikkut ittumik misileeqqinnerup inernera pillugu nalunaarummik nassiussaqassaaq.

Kapitali 4

Pitsaassutsimik qulakkeerinninnermut atortumik misiliinissamut piumasaqaammik pinngitsoortitsisoqarsinnaanera

  § 11.  Suliffeqarfik nunami EU-miittumi imaluunniit nunami EØS-imut ilaasortaasumik pilersinneqarsimasoq, utaqqiisaagallartumillu sullissisuugallarluni pitsaassutsimik qulakkeerinninnermut atortuminik akuerineqarsinnaavoq, suliffeqarfiup uppernarsaasersuut Innaallagissiornermut Oqartussaasunut nassiukkuniuk, tassa suliffeqarfik pitsaassutsimik qulakkeerinninnermut atortumik suliaqarnermut aamma inaarutaasumik nakkutilliinermut atuisooreersoq, taannalu akuersissuteqartarnermut tunngatillugu, Europami nalinginnaasut ataatsimoortut tunngavigalugit akuerisaasumik akuersissuteqartartumik akuerineqarsimasoq.

  Imm. 2.  Tamatumunnga ilutigitillugu suliffeqarfiup Innaallagissiornermut Oqartussaasunut uppernarsassavaa suliffeqarfiup pitsaassutsimik qulakkeerinninnermut suliaqarnermut aamma inaarutaasumik nakkutilliinermut atortuanut aammattaaq ilaatinneqartut akuersissummik pigisaqarluni suliaqarnissamut, tassa suliffeqarfiup Kalaallit Nunaanni suliarisassamisut kissaatigisaanut kiisalu sammisanut taakkununnga tunngatillugu suliarisassat maleruaqqusat atuuttut naapertorligit suliarineqartussaasut.

Kapitali 5

Aningaasalersuineq

  § 12.  Innaallagissiornermut Oqartussat suliffeqarfimmik peqqusisinnaavoq, Innaallagissiornermut Oqartussat imaluunniit misissuisartup avataaneersup pitsaassutsimik qulakkeerinninnermut atortumik misissueqqinnermut aningaasartuutaasunik akileeqqullugu. Tamanna taamatuttaaq atuuppoq immikkut ittumik atortumik misileeqqinnermut tunngatillugu, tak. § 10.

Kapitali 6

Pineqaatissiissutit

  § 13.  Pillaammik akiliisinneqarsinnaavoq imatut iliortoq:
1)  uppernarsaasersuummik, tak. § 4, takutitsinngitsoq,
2)  §§ 7, 8, 9-mik aamma 11-mik unioqqutitsisoq,
3)  atugassarititaasunik § 10 naapertorlugu aalajangersakkanik sumiginnaasoq.
  Imm. 2. Inuit inatsisitigut pisinnaatitaasut aamma pisussaatitaat akiliisussanngortinneqarsinnaapput Kalaallit Nunaanni Pinerluttulerinermi Inatsimmi maleruaqqusat naapertorlugit.
  Imm. 3. Pillaammik akiliisitsinerit najoqqutassaq manna naapertorlugu pineqaatissiissutaasut Nunatta Karsianut nakkartinneqassapput.

Kapitali 7

Atuutilersitsineq aamma ikaarsaariarnermi aalajangersakkat

  § 14.  Nalunaarut atuutilerpoq ulloq 1. januar 2020.

Innaallagissiornermut Oqartussat, ulloq 12. december 2019

Michael Petersen

/

Jane Lynge Hansen