Inunnut innarluutilinnut najugaqarfissatut neqeroorutit pillugit Namminersorlutik Oqartussat nalunaarutaat
Inuit innarluutillit tapersersorneqarnissaannut Inatsisartut inatsisaanni §§ 13, imm. 3, 14, imm. 3, 15 aamma 18, imm. 3 malillugit aalajangersarneqarput:
Kapitali 1
Najugaqaqatigiiffiit
Pitsaassutsimut malitassat
§ 1. Inunnut innarluutilinnut najugaqaqatigiiffimmik pilersitsinermi, najugaqaqatigiiffiup ataatsimoortumik nalilersorneqareerneratigut pisariaqartinneqartumik pitsaassuseqarnissaa kommunalbestyrelsip qulakkiissavaa.
Imm. 2. Najugaqaqatigiiffiup pitsaassusaa sammineqartut tulliuttut iluanni nalilersorneqassaaq:
1) Najugaqartut ineriartorsinnaanissaannik periarfissaat, namminneq periarfissaqarfiinik atorluaasinnaanermik periarfissaqarnerat, tamannalu aqqutigalugu sapinngisamik annerpaamik nammineersinnaanissaat.
2) Najugaqartut ilinniagaqarnissamut, suliffeqarnissamut aamma sammisaqarnissamut periarfissaat.
3) Najugaqaqatigiiffiup sullinniagai, matumani najugaqaqatigiiffiup sullinniakkaminut neqeroorutaasa imarisai, kiisalu najugaqartut namminneq inuunerminni atukkaminnut sunniuteqarsinnaanerat ilanngullugu.
4) Najugaqaqatigiiffiup periaasai angusaalu, matumani perorsaariaatsimut, tarnip pissusaatigut imaluunnit tarnikkut nappaatinut suleriaatsit ilanngullugit.
5) Najugaqaqatigiiffiup aaqqissugaanera aqunneqarneralu.
6) Najugaqaqatigiiffimmi sulisut piginnaasaat.
7) Najugaqaqatigiiffimmut illutatigut sinaakkusiussat, matumani sullinniakkat pisariaqartitaannut kiisalu ulloq najugaqaqatigiiffiup periaasaanut ikorfartuutaanersut ilanngullugit.
Imm. 3. Imm. 2 malillugu pitsaassutissanut malitassat, najugaqaqatigiiffiup pilersinneqarnissaanik kommunalbestyrelsip aalajangernerani takuneqarsinnaassapput. Najugaqaqatigiiffinnut ataasiakkaanut pitsaassutsimut malitassat ataasiakkaat qanoq ilillutik piviusunngortinneqassanersut allaaserineqarsimassaaq.
Aaqqissuussineq
§ 2. Najugaqaqatigiiffik nammineq najugarisatut isigineqassaaq. Najugaqaqatigiiffik ima aaqqissuunneqassaaq, najugaqartut tamarmik immikkut nammineq ineqassallutik, inigisarlu sapinngisamik nammineq anartarfeqarlunilu uffarfittaqassalluni.
Imm. 2. Najugaqartut inimik isersimaartarfimmik igaffimmillu atuisinnaassapput.
Malittarisassat
§ 3. Inunnut innarluutilinnut najugaqaqatigiiffik kommunalbestyrelsimit ingerlanneqartoq tulliuttunik imaqartumik malittarisassaqassaaq:
1) Aqqata, sumiiffiata siunertaatalu allaganngorlugu paasissutissiissutigineqarnera.
2) Sullinniakkat allaaserineqarnerat.
3) Aqutsisut suliassaasa allaaserineqarnerat.
4) Akisussaassutsimut malittarisassat kiisalu inummut allamut pingajuusutut inissisimasumut qanoq iliorsinnaatitaaneq.
5) Missingersuusiornermut, naatsorsuuserinermut kukkunersiuinermullu malittarisassat.
6) Malittarisassanik allannguinernut ingerlatseriaaseq.
Ulluinnarni aqutsineq
§ 4. Inunnut innarluutilinnut najugaqaqatigiiffimmi 1-imi arlalinniluunniit aqutsisoq kommunalbestyrelsip atorfinitsittassavaa soraarsittassallugulu.
Imm. 2. Najugaqaqatigiiffiup ulluinnarni aqunneqarnera aqutsisup suliassaraa.
Imm. 3. Najugaqaqatigiiffimmi sulisut sinneri inatsisit isumaqatigiissutillu atuuttut malillugit kommunalbestyrelsip atorfinitsittassavai soraarsittarlugillu.
Imm. 4. Aqutsisumik sulisunillu atorfinitsitsinermi pinerluuteqarsimannginnermik uppernarsaat piniarneqassaaq. Pisariaqarpallu meeqqamik pinerliisimannginnermik uppernarsaat aamma piniarneqassalluni.
§ 5. Najugaqaqatigiiffik ima ingerlanneqassasoq aqutsisup qulakkiissavaa, najugaqartut taamaalillutik:
1) piginnaasat sapinngisallu ulluinnarni inuunerisamik oqinnerulersitsisinnaasut angussallugit, taamatullu iliornikkut ataasiakkaat nammineersinnaalernissamut periarfissaat siuarsarneqassalluni,
2) ilaquttanut attaveqatigisartakkanullu attuumassutit attatiinnarsinnaassallugit, aamma
3) inuttut ineriartornissamut inooqatigiinnilu sammisaqartitsinernut peqataanissamut periarfissaqartitaallutik.
§ 6. Sulisut ataatsimut isigalugit imatut angusaqarsimanissaat aqutsisup qulakkiissavaa:
1) naleqquttumik ilinniarsimasuunissaat,
2) sullinniakkat pillugit nutaanerpaanik ilisimasaqarnissaat aamma
3) sullinniakkat pillugit misilittagaqarnissaat.
§ 7. Najugaqaqatigiiffiup sullinniakkat pisariaqartitaannik ineriartornissamullu periarfissaannik siuarsaasutut aaqqissugaasimanissaa aqutsisup qulakkiissavaa.
Kapitali 2
Najugaqarfiit illersugaasut
Pitsaassutsimut malitassat
§ 8. Inunnut innarluutilinnut najugaqarfimmik illersugaasumik pilersitsinermi, najugaqarfiup ataatsimoortumik nalilersorneqareerneratigut pisariaqartinneqartumik pitsaassuseqarnissaa kommunalbestyrelsip qulakkiissavaa.
Imm. 2. Najugaqarfiup illersugaasup pitsaassusaa sammineqartut tulliuttut iluanni nalilersorneqassaaq:
1) Najugaqartut ineriartorsinnaanissaannik periarfissaat, namminneq periarfissaqarfiinik atorluaasinnaanermik periarfissaqarnerat, tamannalu aqqutigalugu sapinngisamik annerpaamik nammineersinnaanissaat.
2) Najugaqartut ilinniagaqarnissamut, suliffeqarnissamut ingerlataqarnissamulluunniit periarfissaat.
3) Najugaqarfiup sullinniagai, matumani najugaqarfiup sullinniakkaminut neqeroorutaasa imarisai, kiisalu najugaqartut namminneq inuunerminni atukkaminnut sunniuteqarsinnaanerat ilanngullugu.
4) Najugaqarfiup periaasai angusaalu, matumani perorsaariaatsimut, tarnip pissusaatigut imaluunnit tarnikkut nappaatinut suleriaatsit ilanngullugit.
5) Najugaqarfiup aaqqissugaanera aqunneqarneralu.
6) Najugaqarfimmi sulisut piginnaasaat.
7) Najugaqarfimmi illutatigut sinaakkusiussat, matumani sullinniakkat pisariaqartitaannut kiisalu ulloq unnuarlu neqeroorutip periaasianut ikorfartuutaanersut ilanngullugit.
Imm. 3. Imm. 2 malillugu pitsaassutissanut malitassat, najugaqarfiup pilersinneqarnissaanik kommunalbestyrelsip aalajangernerani takuneqarsinnaassapput. Najugaqarfinnut ataasiakkaanut pitsaassutsimut malitassat ataasiakkaat qanoq ilillutik piviusunngortinneqassanersut allaaserineqarsimassaaq.
Aaqqissuussineq
§ 9. Najugaqarfik nammineq najugarisatut isigineqassaaq. Najugarfik ima aaqqissuunneqassaaq, najugaqartut tamarmik immikkut nammineq ineqassallutik, inigisarlu sapinngisamik nammineq anartarfeqarlunilu uffarfittaqassalluni.
Imm. 2. Najugaqartut inimik isersimaartarfimmik igaffimmillu atuisinnaassapput.
Malittarisassat
§ 10. Inunnut innarluutilinnut najugaqarfik illersugaasoq kommunalbestyrelsimit ingerlanneqartoq tulliuttunik imaqartumik malittarisassaqassaaq:
1) Aqqata, sumiiffiata siunertaatalu allaganngorlugu paasissutissiissutigineqarnera.
2) Sullinniakkat allaaserineqarnerat.
3) Aqutsisut suliassaasa allaaserineqarnerat.
4) Akisussaassutsimut malittarisassat kiisalu inummut allamut pingajuusutut inissisimasumut qanoq iliorsinnaatitaaneq.
5) Missingersuusiornermut, naatsorsuuserinermut kukkunersiuinermullu malittarisassat.
6) Malittarisassanik allannguinernut ingerlatseriaaseq.
Ulluinnarni aqutsineq
§ 11. Inunnut innarluutilinnut najugaqarfimmi illersugaasumi 1-imi arlalinniluunniit aqutsisoq kommunalbestyrelsip atorfinitsittassavaa soraarsittassallugulu.
Imm. 2. Najugaqarfiup illersugaasup ulluinnarni aqunneqarnera aqutsisup suliassaraa.
Imm. 3. Najugaqarfimmi illersugaasumi sulisut sinneri inatsisit isumaqatigiissutillu atuuttut malillugit kommunalbestyrelsip atorfinitsittassavai soraarsittarlugillu.
Imm. 4. Aqutsisumik sulisunillu atorfinitsitsinermi pinerluuteqarsimannginnermik uppernarsaat piniarneqassaaq. Pisariaqarpallu meeqqamik pinerliisimannginnermik uppernarsaat aamma piniarneqassalluni.
§ 12. Najugaqarfik illersugaasoq ima ingerlanneqassasoq aqutsisup qulakkiissavaa, najugaqartut taamaalillutik:
1) piginnaasat sapinngisallu ulluinnarni inuunerisamik oqinnerulersitsisinnaasut angussallugit, taamatullu iliornikkut ataasiakkaat nammineersinnaalernissamut periarfissaat siuarsarneqassalluni,
2) ilaquttanut attaveqatigisartakkanullu attuumassutit attatiinnarsinnaassallugit, aamma
3) inuttut ineriartornissamut inooqatigiinnilu sammisaqartitsinernut peqataanissamut periarfissaqartitaallutik.
§ 13. Sulisut ataatsimut isigalugit imatut angusaqarsimanissaat aqutsisup qulakkiissavaa:
1) naleqquttumik ilinniarsimasuunissaat,
2) sullinniakkat pillugit nutaanerpaanik ilisimasaqarnissaat aamma
3) sullinniakkat pillugit misilittagaqarnissaat.
§ 14. Najugaqarfiup illersugaasup sullinniakkat pisariaqartitaannik ineriartornissamullu periarfissaannik siuarsaasutut aaqqissugaasimanissaa aqutsisup qulakkiissavaa.
Kapitali 3
Ulloq unnuarlu neqeroorutit
Ulloq unnuarlu neqeroorummik pilersitsineq
§ 15. Inunnut innarluutilinnut ulloq unnuarlu neqeroorutit Isumaginninnermut Aqutsisoqarfimmit pilersinneqassapput ingerlanneqarlutillu.
Pitsaassutsimut malitassat
§ 16. Inunnut innarluutilinnut ulloq unnuarlu neqeroorummik pilersitsinermi, ulloq unnuarlu neqeroorutip ataatsimoortumik nalilersorneqareernermigut pisariaqartinneqartumik pitsaassuseqarnissaa isumaginninnermut aqutsisoqarfiup qulakkiissavaa.
Imm. 2. Najugaqaqatigiiffiup pitsaassusaa sammineqartut tulliuttut iluanni nalilersorneqassaaq:
1) Najugaqartut ineriartorsinnaanissaannik periarfissaat, namminneq periarfissaqarfiinik atorluaasinnaanermik periarfissaqarnerat, tamannalu aqqutigalugu sapinngisamik annerpaamik nammineersinnaanissaat.
2) Najugaqartut ilinniagaqarnissamut, suliffeqarnissamut ingerlataqarnissamulluunniit periarfissaat.
3) Ulloq unnuarlu neqeroorutip sullinniagai, matumani najugaqarfiup sullinniakkaminut neqeroorutaasa imarisai, kiisalu najugaqartut namminneq inuunerminni atukkaminnut sunniuteqarsinnaanerat ilanngullugit.
4) Ulloq unnuarlu neqeroorutip periaasai angusaalu, matumani perorsaariaatsimut, tarnip pissusaatigut imaluunniit tarnikkut nappaatinut suleriaatsit ilanngullugit.
5) Ulloq unnuarlu neqeroorutip aaqqissugaanera aqunneqarneralu.
6) Ulloq unnuarlu neqeroorummi sulisut piginnaasaat.
7) Ulloq unnuarlu neqeroorummi illutatigut sinaakkusiussat, matumani sullinniakkat pisariaqartitaannut kiisalu ulloq unnuarlu neqeroorutip periaasianut ikorfartuutaanersut ilanngullugit.
Imm. 3. Imm. 2 malillugu pitsaassutissanut malitassat, ulloq unnuarlu neqeroorutip pilersinneqarnissaanik kommunalbestyrelsip aalajangernerani takuneqarsinnaassapput. Najugaqarfinnut ataasiakkaanut pitsaassutsimut malitassat ataasiakkaat qanoq ilillutik piviusunngortinneqassanersut allaaserineqarsimassaaq.
Aaqqissuussineq
§ 17. Ulloq unnuarlu neqeroorut sapinngisamik ima aaqqissuunneqassaaq, najugaqartut immikkut nammineq ineqassallutik, inigisarlu sapinngisamik nammineq anartarfeqarlunilu uffarfittaqassalluni.
Imm. 2. Najugaqartut inimik isersimaartarfimmik igaffimmillu atuisinnaassapput.
§ 18. Najugaqartut inaat sapinngisamik najugaqartut suleqatigalugit aaqqissuunneqassaaq aammalu najugaqartut ukiuinut innarluuteqassusaannullu naleqquttunik pequtserneqassalluni.
§ 19. Init ataatsimoorfigineqarsinnaasut ima aaqqissuunneqassapput, najugaqartut tamarmik qanorluunniit innarluutaat ikkaluarpata, tamarmik ininik atuisinnaassallutik.
Malittarisassat
§ 20. Inunnut innarluutilinnut ulloq unnuarlu neqeroorut Isumaginninnermut Aqutsisoqarfimmit ingerlanneqartoq malittarisassaqassaaq, tulliuttunik imaqartumik:
1) Aqqata, sumiiffiata siunertaatalu allaganngorlugu paasissutissiissutigineqarnera.
2) Perorsaanermi siunertarineqartut allaaserineqarneri
3) Sullinniakkat allaaserinerat.
4) Aqutsisut suliassaasa allaaserineqarnerat.
5) Akisussaassutsimut malittarisassat kiisalu inummut allamut pingajuusutut inissisimasumut qanoq iliorsinnaatitaaneq.
6) Missingersuusiornermut, naatsorsuuserinermut kukkunersiuinermullu malittarisassat.
7) Malittarisassanik allannguinernut ingerlatseriaaseq.
Ulluinnarni aqutsineq
§ 21. Inunnut innarluutilinnut ulloq unnuarlu neqeroorummi pisortaq Isumaginninnermut Aqutsisoqarfiup atorfinitsittassavaa soraarsittassallugulu.
Imm. 2. Ulloq unnuarlu neqeroorutip ulluinnarni aqunneqarnera pisortap suliassaraa.
Imm. 3. Pisortap ulloq unnuarlu neqeroorummi sulisut sinneri inatsisit isumaqatigiissutillu atuuttut malillugit atorfinitsittassavai soraarsittarlugillu.
Imm. 4. Aqutsisumik sulisunillu atorfinitsitsinermi pinerluuteqarsimannginnermik uppernarsaat piniarneqassaaq. Pisariaqarpallu meeqqamik pinerliisimannginnermik uppernarsaat aamma piniarneqassalluni.
§ 22. Ulloq unnuarlu neqeroorut ima ingerlanneqassasoq pisortap qulakkiissavaa, najugaqartut taamaalillutik:
1) piginnaasat sapinngisallu ulluinnarni inuunerisamik oqinnerulersitsisinnaasut angussallugit, taamatullu iliornikkut ataasiakkaat nammineersinnaalernissamut periarfissaat siuarsarneqassalluni,
2) ilaquttanut attaveqatigisartakkanullu attuumassutit attatiinnarsinnaassallugit, aamma
3) inuttut ineriartornissamut inooqatigiinnilu sammisaqartitsinernut peqataanissamut periarfissaqartitaallutik.
§ 23. Sulisut ataatsimut isigalugit imatut angusaqarsimanissaat pisortap qulakkiissavaa:
1) naleqquttumik ilinniarsimasuunissaat,
2) sullinniakkat pillugit nutaanerpaanik ilisimasaqarnissaat aamma
3) sullinniakkat pillugit misilittagaqarnissaat.
§ 24. Ulloq unnuarlu neqeroorutip sullinniakkat pisariaqartitaannik ineriartornissamullu periarfissaannik siuarsaasutut aaqqissugaasimanissaa pisortap qulakkiissavaa.
Kapitali 4
Atuutilerfia- ikaarsaariarnermilu aalajangersakkat
§ 25. Nalunaarut 1. januar 2020-mi atuutilerpoq.
Imm. 2. Peqatigisaanik meeqqanut inuusuttunullu kiisalu inunnut annertuumik innarluutilinnut ulloq unnuarlu paaqqinniffiit pillugit Namminersornerullutik Oqartussat nalunaarutaat nr. 64, 29. december 1994-imeersoq atorunnaarsinneqarpoq.
§ 26. Najugaqaqatigiiffiit 1. januar 2020 sioqqullugu pilersinneqarsimasut, kapitali 1-imi piumasaqatit kingusinnerpaamik 1. januar 2023-mi eqqortissimassavaat.
Imm. 2. Najugaqarfiit illersugaasut 1. januar 2020 sioqqullugu pilersinneqarsimasut kapitali 2-mi piumasaqaatit kingusinnerpaamik 1. januar 2023-mi eqqortissimassavaat.
Imm. 3. Ulloq unnuarlu neqeroorutit 1. januar 2020 sioqqullugu pilersinneqarsimasut kapitali 3-mi piumasaqaatit kingusinnerpaamik 1. januar 2023-mi eqqortissimassavaat.
Imm. 4. Imm. 1-imi 2-milu piffissaliussat kommunalbestyrelsimit qinnutigineqarpata, Naalakkersuisunillu sioqqutsisumik akuersissummik pinikkut, ukiut marluk tikillugit sivitsorneqarsinnaapput.
Imm. 5. Naalakkersuisut akuersiteqqaarnerisigut piffissaliussaq imm. 3-mi taaneqartoq ukiut 2 tikillugit sivitsorneqarnissaa isumaginninnermut aqutsisoqarfimmit qinnutigineqarsinnaavoq.
Kalaallit Nunaanni Namminersorlutik Oqartussat, ulloq 4. november 2019
Martha Abelsen
/
Julie Præst Wilche