Efterskolit pillugit Inatsisartut inatsisaanni nr. 13-imi, 5. december 2008-meersumi § 20 a, Inatsisartut inatsisaatigut nr. 17, 3. december 2012-imeersukkut allanngortinneqartoq naapertorlugu makku aalajangersarneqarput:

 

Atuuffii

 

§ 1. Kalaallit Nunaata aamma Danmarkip avataani, inuusuttut atuagarsornikkut, inuttut aamma nunat allat kulturiinut ilisimasaqarnerisa annertusarnissaannik siunertaqartunut (paarlaasseqatigiilluni nunami allaniinnerannut), nalunaarut atuuppoq.

 

Tapeeriaatsit

 

  § 2.  Paarlaasseqatigiilluni nunami allamiinnermut atatillugu tulliuttutut allanneqartunut Ilinniartitaanermut Naalakkersuisoqarfik tapiissutinik tunniussisinnaavoq:

1)  Peqataasussap akiliutissaanik appartitsineq.

2)  Visumimut aningaasartuutit.

3)  Sillimmasernernut pisariaqartunut aningaasartuutit.

4)  Nakorsamit misissortinnissanut aamma akiuussutissanik kapitinnissanut pisariaqartunut aningaasartuutit.

5) Ilinniarnerup aallartilerneranut naammassineranullu atasumik Kalaallit Nunaannit utimullu inuusuttup angalanera.

6)  Angalanermut atatillugu inuusuttup unnuineri pisariaqartut.

7)  Angalanermut atatillugu inuusuttup nerisaqartinnissaa pisariaqartoq.

8) Qanigisat napparsimarulunnerannut toqukkulluunniit qimagunnerannut atasumik Kalaallit Nunaannut utimullu inuusuttup angalanera.

9)  Inuusuttup napparsimarulunneranut toqukkulluunniit qimagunneranut atasumik Kalaallit Nunaannit utimullu angajoqqaatut oqartussaassuseqartup angalanera.

  Imm. 2.  Qanigisat pineqartillugit, tak. imm. 1, nr. 8, ima paasineqassaaq qatanngutit, katissimallugu aapparisaq, qitornat, angajoqqaat, angajoqqaatut oqartussaassuseqartut aamma aanaa/aataa. Immikkut ittumik pisoqartillugu Ilinniartitaanermut Naalakkersuisoqarfiup inuit allat qanigisatut isigineqarnissaat aalajangersinnaavaa.

 

Peqataanissamut akiliummut tapiissutit

 

  § 3.  Kalaallit Nunaata aamma Danmarkip avataani paarlaasseqatigiilluni nunami allamiinnermi peqataanissamut akiliutip appartinnissaanut, isertitanit aallaaveqartumik tapiissutinik Ilinniartitaanermut Naalakkersuisoqarfik tunniussisarpoq. Tapiissutit Ilinniartitaanermut Naalakkersuisoqarfimmut qinnuteqarneq aallaavigalugu inummut ataatsimut tapiissutitut tunniunneqassapput.

 

  § 4.  Tapiissutit naatsorsornerinut aningaasarsiat tunngaviusut tassaapput, angajoqqaatut oqartussaassuseqartut maannakkorpiaq ataatsimoortumik aningaasarsiaat, tak. procenti aaqqiissutissaq aamma maannakkorpiaq aningaasarsiat pillugit Inatsisartut inatsisaat, taamaattoq tak. imm. 2-5. Inuusuttoq katinnikuusimappat, piffissami qinnuteqarfiusumi inuusuttup katissimallugulu aappaata maannakkorpiaq ataatsimoortumik aningaasarsiaat aallaavigineqassapput.

  Imm. 2.  Angajoqqaatut oqartussaassusillit avissimappata imaluunniit avissaaqqappata, inuusuttup najugaqarfigisaata angajoqqaatut oqartussaasuusup maannakkorpiaq aningaasarsiai, tapiissutit amerlassusilerneqarnissaannut naatsorsuinermi aallaavigineqassapput. Tamanna aamma atuuppoq, inuusuttoq angajoqqaamini marluusuni sivisoqatigiimmik najugaqartaraluarpalluunniit.

  Imm. 3.  Inuusuttup najugaqarfigisaa angajoqqaatut oqartussaassuseqartoq inummik allamik najugaqatigisaminik aappaqarsimappat, tapiissutit amerlassusilerneqarnissaannik naatsorsuinermi najugaqatigisatut aappaasup maannakkorpiaq aningaasarsiai ilanngullugit naatsorneqassapput, aappariinneq katissimanermik aallaaveqarpat imaluunniit katissimanermut assinguppat aamma piffissami qinnuteqarfiusumi ukiumik ataatsimik sivisunerusimappat.

  Imm. 4.  Angajoqqaatut oqartussaassusilimmik inummik peqanngippat, tapiissutit amerlassusilernissaannik naatsorsuinermi aningaasarsiat 0 kr.-iusut aallaavigineqassapput.

  Imm. 5.  Aningaasarsianut tunngaviusoq inuusuttup qatanngutai ataasiakkaat 18-it inorlugit ukiullit tamaasa aallaavigalugit paarlaasseqatigiilluni nunami allamiinnissap aallartinnerani 30.000 kr.-nik appartinneqartassaaq, pineqartoq inuusuttumik najugaqateqarsimappat. Meeqqamut 18-it inorlugit ukiulimmut ataatsimut, aningaasarsianut tunngaviusoq aamma 30.000 kr.-nik appartinneqassaaq, nunami allamiinnerup aallartinnerani meeqqamik najugaqateqartunut, meeraq aapparisatut inooqatigisap meerarippagu, tak. imm. 3.

 

  § 5.  Maannakkorpiaq aningaasarsiat tapiissutillu sanilliunneqarnissaannut uuttuut ukiumut pineqartumut aningaasanut inatsimmi aalajangersarneqartassaaq, taamaattoq tak. imm. 2. Nalunaarummi uani isertitakitsutut isigineqarneq malillugu aningaasarsiat sorliit tapiissutinut attuumassuteqarnersut uuttuummi takuneqarsinnaassaaq.

  Imm. 2.  Paarlaasseqatigiilluni nunami allamiinnermut peqataanissamut akiliutip appartinnissaanut tapiissutit tunniunneqarsinnaasut amerlanerpaaffissaat, ukiumut pineqartumut aningaasanut inatsimmi aalajangersarneqarsinnaavoq.

  Imm. 3.  Ukiumoortumik aningaasanut inatsisini aningaasarsiakinnernut angajoqqaat akiliutissaannut tamakkiisumik akiliussisoqarsinnaanera aalajangersarneqarsinnaavoq.

 

Visummimut, sillimmasiinermut, nakorsamit misissortinnermut aamma akiuussutissamik kapitinnermut tapiissutit

 

  § 6.  Angajoqqaatut oqartussaasup maannakkut aningaasarsiai, appasissumik isertitatut taaneqarsimappata ukiumoortumik aningaasanut inatsimmi uuttuutitut aalajangersarneqarsimasutuut, tak. § 5, imm. 1, aningaasartuutinut matussutissanik tapiisoqartassaaq ukununnga:

1)  Visummi.

2)  Sillimmasiinernik pisariaqartunik sillimmasiineq.

3)  Nakorsamit misissortinnerit pisariaqartut.

4)  Akiuussutissamik kapitinnerit pisariaqartut.

 

Angalanerit, ineqarnerit nerisaqarnerillu akilernissaannut tapiissutit

 

  § 7.  Inuusuttup imaluunniit angajoqqaatut oqartussaassuseqartup angalanerani aningaasartuutit matussusernissaannut tapiissutit, tak. § 2, imm. 1, nr. 5, 8 aamma 9, tunniunneqassapput pisortat angallassissutaannut akikinnerpaamut aningaasartuutit naleqataannik, taamaattoq tak. imm. 4.

  Imm. 2.  Aqqut alla atorlugu angalasoqarsimappat pisortat angallassisinnaanermik akuerisaannut akikinnerpaamut aningaasartuutit killigalugit akiliussisoqassaaq. Aqqummut Ilinniartitaanermut Naalakkersuisoqarfiup angallassisinnaanermik akuerisaannik angallassisinnaaneq periarfissaqanngippat angalanertut akikinnerpaatut periarfissaasumut aningaasartuutit qaffasinnerpaaffigisinnaasaannik akiliussisoqassaaq.

  Imm. 3.  Timmisartumut bilitsit suliarereernerisa kingorna allannguinermi aningaasartuutit allineri aningaasartuutit angajoqqaanit akilerneqassapput, tamanna angajoqqaatut oqartussaassuseqartut angalanermut kissaatinik allannguinerannik pissuteqarpat.

  Imm. 4.  Nunami allamiinneq unitsinneqarpat § 17, imm. 1, nr. 6 malillugu angerlamut angalanissamut tapiissutinik tunniussisoqarneq ajorpoq. 

 

  § 8.  Angalanermut atatillugu inuusuttup pisariaqartumik unnuisariaqarnerinut matussutissatut tapiissutit, tak. § 2, imm. 1, nr. 6, tunniunneqassapput aningaasartuutit tamarmiusut ilanngullugit.

  Imm. 2. Angalaneq inuusuttup pisuussutiginngisaanik allanngortariaqalersillugu tassanngaannartumik ineqartitsinissaq pisariaqalissappat, ineqarfissaq aningaasartuuteqarnissarlu inissiineq sioqqullugu Ilinniartitaanermut Naalakkersuisoqarfimmit akuerineqaqqaassaaq.

  Imm. 3.  Angajoqqaatut oqartussaassuseqartut pisinnaatitsissuteqarfimmik tuninikuusaasa, ilaqutariit ineqarfiusussat imaluunniit allat inissaqartinngippassuk, inuusuttup utaqqiisaasumik pisariaqartunik inissisimaffissaanut aningaasartuutit Ilinniartitaanermut Naalakkersuisoqarfiup akilersinnaavai. Pisup kingornatigut angajoqqaatut oqartussaassuseqartunut aningaasartuutit akilersinniarneqassapput.

 

  § 9.  Angalanermut atatillugu pisariaqartumik nerisaqarnermut matussutissatut tapiissutit, tak. § 2 imm. 1 nr. 7, tunniunneqartarput ineqarfigisami nerinermut allagartatut ilusilerlugit.

  Imm. 2.  Ineqarfigisaq nerinermut allagartanik tigusineq ajorpat, nerisaqarnermut tapiissutit tunniunneqassapput, angalareernermi aningaasartuutigisimasanut uppernarsaatinik tunniussisoqarpat nerinermullu ataatsimut kr. 100 tapiissutaassalluni.

  Imm. 3. Angalanerup ingerlanerani inuusuttup pisuussutiginngisaanik allannguisoqarneratigut nerinissaq pisariaqalersimappat, nerisaqarnermut aningaasartuutigisimasanut uppernarsaatit tunniunnerisigut tapiissutit tunniunneqassapput, nerinerlu ataaseq kr. 100 tikillugu akeqartussaavoq.

 

Tapiissuteqarnissami piumasaqaatit

 

  § 10.  Paarlaasseqatigiilluni nunami allamiinnermut tapiissutinik pissarsisinnaaniaraanni piumasaqaatit tulliuttutut allanneqartut eqquutsinneqarsimassapput: 

1)  Inuusuttoq danskisut innuttassuseqassaaq.

2)  Nunami allamiinnerup aallartinnerani inuusuttoq aamma angajoqqaatut oqartussaassusillit Kalaallit Nunaanni aalajangersimasumik najugaqassapput aammalu nunami aallamiinnissaq sioqqullugu sivikinnerpaamik ukiumi ataatsimi Kalaallit Nunaanni aalajangersimasumik najugaqarsimassallutik, tak. taamaattoq imm. 2. Kalaallit Nunaata avataani najugaqarnermut ilaatinneqarneq ajorput nunami allamiinnerit ilinniarnermik imaluunniit pilersuisussaanermik patsiseqartumik ingerlanneqartut, nunami allamiinnermi Kalaallit Nunaanni oqartussaasut peqataaffigisimasaat.

3) Paarlaasseqatigiilluni nunami allamiinnerup aallartinnerani inuusuttoq 15-inik ukioqalereersimassaaq kisiannili 18-inik ukioqalereersimassanani.

4)  Nunami allamiinneq suliniaqatigiiffimmit, Ilinniartitaanermut Naalakkersuisoqarfimmit akuerineqarsimasumit, tak. § 11, aaqqissuunneqarsimassaaq.

5)  Ilaqutariinni najugaqartitsisuni ataatsini arlalinniluunniit inuusuttoq najugaqassaaq.

6)  Nunami allamiinneq ukiumik atuarfiusumik ilivitsumik sivisussuseqassaaq.

7)  Atuarfimmi, najukkami oqartussaasunit akuerisaasumi, tamakkiisuusumik atuartinneqarnermik nunami allamiinneq ilaqartinneqassaaq.

8)  Danmarkimi imaluunniit Kalaallit Nunaanni paarlaasseqatigiilluni nunami allamiinnermut imaluunniit efterskolernermut inuusuttoq siusinnerusukkut tapiissutinik tunineqarsimassanngilaq.

9)  Nunami pineqartumi pisariaqartumik sillimmasiissutaasussanit inuusuttoq matussuserneqarsimassaaq.

10)  Inuusuttoq nunamut pineqartumut visummeqassaaq.

11)  Paarlaasseqatigiilluni nunami allamiinnermut tapiissutinik tamakkiisuusunik allaneersuniit inuusuttoq peqqusaanngilaq.

  Imm. 2.  Ilinniartitaanermut Naalakkersuisoqarfik immikkorluinnaq pisoqarsimatillugu najukkamut piumasaqaat imm. 1 aamma 2-miittoq saneqqussinnaavaat, soorlu assersuutigalugu ilinniartoq angajoqqaatullu oqartussaassuseqartut ukiuni arlalinni Kalaallit Nunaanni aalajangersimasumik najugaqarsimappata imaluunniit meeraq Kalaallit Nunaanni aalajangersimasumik najugaqarsimappat ukiuni arlaqartuni najugaqareersimappat, taamaalineranilu angajoqqaatut oqartussaassuseqartut nunami allami aalajangersimasumik najugaqarsimappata.

  Imm. 3.  Imm. 1, nr. 8-mi piumasaqaat immikkut ittumik pisuni Ilinniartitaanermut Naalakkersuisoqarfiup saneqqussinnaavaa, matumani atuartup pissutsit akuerineqarsinnaasut pissutigalugit efterskolimiinnerminik imaluunniit paarlaasseqatigiilluni nunami allamiinnerminik siusinaarluni unitsitsisariaqalernera ilanngullugu.

 

Suliniaqatigiiffiit akuerineqartarnerat

 

  § 11.  Ilinniartitaanermut Naalakkersuisoqarfiup paarlaasseqatigiinnermik isumagisaqartoq suliniaqatigiiffik akuerisinnaavaa, tapiissutit atorlugit inuusuttumik paarlaasseqatigiilluni nunami allamiisitsilluni allartitsinissaanut, suliniaqatigiiffiup uppernarsaaffigisinnaappagu:

1)  suliniaqatigiiffik tassaasoq nammineerluni inatsisitigut akisussaasuusoq,

2)  suliniaqatigiiffiup paarlaasseqatigiilluni nunami allamiisitsisarnera tamanut ammasumik neqeroorutigineqartartoq,

3)  suliniaqatigiiffiup paarlaasseqatigiilluni nunami allamiisitsisarnera tamatigoortuunermik tamanullu ammasuunermik aallaaveqartoq,

4)  suliniaqatigiiffiup paarlaasseqatigiilluni nunami allamiisitsisarnera pitsaassutsikkut qaffasissuusoq, ilinniartup pissarsiaqarnissaanik qularnaarisuusumik § 1-imut naapertuuttumik, aamma

5)  suliniaqatigiiffiup inuusuttut misissuiffigisarai taakku paarlaasseqatigiilluni nunami allamiinnissamut inerisimallutillu piareersimanissaat qulakkeerumallugu.

  Imm. 2.  Imm. 1 naapertorlugu akuersissut atorunnaarsinneqartutut nalunaarutigineqarnissami tungaanut imaluunniit paarlaasseqatigiilluni nunami allaniitsitsisartutut suliniaqatigiiffiup atorunnaarnera tikillugu atuuttarpoq.

  Imm. 3.  Imm. 1 naapertorlugu akuersissutit tunniunneqarsimasut atorunnaarsinneqarsinnaapput, imm. 1-imi piumasaqaatit ilaat ataaseq arlallilluunniit eqquutsinneqarunnaarsimappata.

  Imm. 4.  Paarlaasseqatigiilluni nunami allaniitsitsisartutut suliniaqatigiiffittut akuerineqarnissaq pillugu qinnuteqaat paasissutissanik naleqquttunik ilaqartillugu Ilinniartitaanermut Naalakkersuisoqarfimmut kingusinnerpaamik 1. december nassiunneqassaaq, taassuma ukiumi tulliuttumi ukiup allartinneraniit atuuttunngornissaata akuersissutigineqarnissaa siunertaralugu, taamaattoq tak. § 21.

  Imm. 5.  Suliniaqatigiiffiit naalakkersuisoqarfimmit akuerineqarsimasut pillugit allattorsimaffik, Ilinniartitaanermut Naalakkersuisoqarfiup www.sullissivik.gl aqqutigalugu tamanut saqqummiutissavaa.

 

Qinnuteqarnermi periutsit il.il.

 

  § 12. Paarlaasseqatigiilluni nunami allaniinnissamut tapiissutit pillugit qinnuteqaat, Ilinniartitaanermut Naalakkersuisoqarfiup aqutsisuusussatut toqqarsimasaanut nassiunneqassaaq. 

  Imm. 2.  Qinnuteqaat sukkulluunniit nassiunneqarsinnaavoq taamaattoq kingusinnerpaamik paarlaasseqatigiilluni nunami allamiinnissap aallartinnissaa qaammatinik marlunnik sioqqullugu pisassaaq, taamaattoq tak. imm. 3.

  Imm. 3.  Aqutsisuutitaasoq qinnuteqarnissamut piffissaliunneqartumik saneqqutsisinnaavoq pissutsit immikkut ittut atuussimappata, tak. imm. 2.

 

§ 13.  Tapiissutit pillugit qinnuteqarnermi, Ilinniartitaanermut Naalakkersuisoqarfiup qinnuteqarnermi immersuiffissaq akuerisimasaa atorneqassaaq. Qinnuteqarnermi immersuiffissaq www.sullissivik.gl-imi nassaassaavoq.

  Imm. 2.  Qinnuteqaammut ilanngussatut kakkiunneqassapput:

1) paarlaasseqatigiilluni nunami allamiisitsisarnermik suliniaqatigiiffimmut isumaqatigiissut,

2) sillimmasiisimanermut uppernarsaat,

3) visummimut uppernarsaat,

4) illoqutigiit oqaluttuarisaanikkut najugaqarnermut uppernarsaataat aamma

5) inuusuttup kuisinnermut allagartaa.

 

  § 14.  Inuusuttumut angajoqqaatut oqartussaassuseqartunut imaluunniit suliniaqatigiiffimmut tapiissutit akilerneqassapput. 

  Imm. 2.  Tapiissutit akilerneqarnerat, angajoqqaatut oqartussaassuseqartut inniminniinerup taamaatinnissaanut sillimasernikuunissamik piumasaqaatitaqarsinnaavoq.

  Imm. 3.  Inuusuttoq katissimasuusimaguni, nalunaarut una malillugu angajoqqaatut oqartussaassuseqartut pisinnaatitaaffiinut pisussaaffiinullu inuusuttoq akisussaasuussaaq.

 

Ilisimatitsisussaatitaaneq aamma utertitsilluni akiliineq

 

  § 15.  Tapiissutit pillugit qinnuteqarneq sioqqullugu allaninngaanniit tapiissutinik tigusaqartoqarsimanersoq imaluunniit neriorsuinermik nalunaaruteqartoqarsimanersoq pillugu aqutsisutut Ilinniartitaanermut Naalakkersuisoqarfiup toqqarsimasaanut, tak. § 12, imm. 1, ilisimatitsinissamik qinnuteqarnermut atatillugu angajoqqaatut oqartussaassuseqartut pisussaaffeqarput.

  Imm. 2.  Tapiissutinut aningaasaliissutit tiguneqarnerisa kingorna allaniit tapiissutinik, tapiissutit tiguneqarnerisa kingorna, tigusaqartoqarsimanersoq pillugu angajoqqaatut oqartussaassuseqartut ilisimatitsissuteqarnissaminnut pisussaaffeqarput.

  Imm. 3.  Allaniit tapiissutinik pissarsisoqartillugu, tak. imm. 1 aamma 2, nunatta karsianiit tapiissutisiat tamakkiisumik ilaannakuusumilluunniit annaaneqarsinnaapput.

 

  § 16.  Inuusuttup paarlaasseqatigiilluni nunami allamiinnerminik unitsitsiinnarnera, atuarfimmut allamut nuunnera aamma paasissutissanik allanik tapiissutit pigiinnarnissaannut pissutissaqartitsinermut sunniuteqarsinnaasut pillugit aqutsisutut Ilinniartitaanermut Naalakkersuisoqarfiup toqqarsimasaanut nalunaaruteqarnissamik angajoqqaatut oqartussaassuseqartut pisussaaffeqarput.

  Imm. 2.  Tapiissutit pillugit qinnuteqaatip nalilersuiffiginissaanut pisariaqartut paasissutissat tamakkerlugit, matumani akissarsiaqarnermi pissutsinut paasissutissat ilanngullugit, Ilinniartitaanermut Naalakkersuisoqarfiup aqutsisuusussatut toqqarsimasaata pissarsiariniarsinnaavai.

 

  § 17.  Ilinniartitaanermut Naalakkersuisoqarfiup tapiissutit akilerneqarsimasut utertillugit akilerneqarnissaat tamakkiisumik ilaannakortumilluunniit piumasarisinnaavaa, imaattoqarsimappat:

1)  tapiissutit tunniunneqarnerannut sunniuteqarsinnaasunik paasissutissanik eqqortuunngitsunik nalunaaruteqarsimappata imaluunniit pissutsit atukkat allanngorneri pillugit angajoqqaatut oqartussaassuseqartut ilisimatitsisimanngippata,

2)  tapiissutit tunngavissaqanngitsumik tiguneqarsimappata,

3)  tapiissutit siunertamut aningaasaliiffiusumut atorneqarsimanngippata,

4)  paarlaasseqatigiilluni nunami allamiinneq aallartinneqarsimanngippat,

5)  paarlaasseqatigiilluni nunami allamiinneq unitsinneqarsimappat aamma unitsitsineq naammaginartumik tunngavilersorneqarsimanngippat, imaluunniit

6)  paarlaasseqatigiilluni nunami allamiisitsisartutut suliniaqatigiiffiup aamma inuusuttup akornanni isumaqatigiissut atorunnaarsinneqarsimappat, pinerluuteqarnermik, atuarfimmit anisitaanermik imaluunniit pissutsinit assingusunit suliniaqatigiiffimmit akuerineqanngitsunik patsiseqarsimappat.

  Imm. 2.  Aningaasanik utertitsilluni akiliuteqarnissamik piumasaqaat, taarsigassarsianngortillugu allanngortinneqarsinnaavoq. Aningaasat utertillugit akilerneqarnissaannik piumasaqaatip taarsigassarsianngortinneqarlutik allanngortinnerata kingorna ulloq siullermiit atuutilersumik taarsigassarsiat ernialersorneqalissapput. Taarsigassarsiat ukiumoortumik ernialersorneqassapput, pisortat qaqugukkulluunniit diskontoat procentimik ataatsimik ilasaq erniarineqartinneqarluni. Ernialiineq ukiut tamaasa 31. december imaluunniit ullormi akiitsut akilerneqarfianni pisassaaq.

 

Nalunaarummik saneqqutsisinnaaneq aamma naammagittaalliuteqarsinnaaneq

 

  § 18.  Inuusuttut pillugit pissutsit immikkorluinnaq ittut tunngavissaqartitsigaangata inuusuttut ataasiakkaat nalunaarummi aalajangersakkanik atuinnginnissaat Ilinniartitaanermut Naalakkersuisoqarfiup akuerisinnaavaa.

 

  § 19.  Nalunaarut una malillugu aalajangiinerit, allaffissornikkut oqartussaaffeqarfimmut allamut naammagittaalliutigineqarsinnaanngillat.

 

Atuutilersitsinermut aamma ikaarsaariartitsinermut aalajangersakkat

 

  § 20.  Nalunaarut ulloq 1. august 2019 atuutilerpoq aamma 1. januar 2020 aallarnerfigalugu paarlaasseqatigiilluni nunami allamiinnermut tapiissutinut atuuttussaalluni.

 

  § 21.  Paarlaasseqatigiilluni nunami allamiisitsisartutut suliniaqatigiiffittut akuerineqarnissaq pillugu qinnuteqaat, akuersissut ukiumut qaammatisiutit 2020-imut atuuttussaq eqqarsaatigalugu, paasissutissanik naleqquttunik tamanik ilaqartillugu Ilinniartitaanermut Naalakkersuisoqarfimmut kingusinnerpaamik ulloq 1. september 2019-imi nassiunneqassaaq.

 

 

 

Namminersorlutik Oqartussat, ulloq 4. juli 2019

 

 

 

Ane Lone Bagger

/

Lone Nukaaraq Møller