§ 1

Namminersornerullutik Oqartussat kommunillu inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaanni nr. 12-imi, 19. november 2007-imeersumi, Inatsisartut inatsisaatigut nr. 26-kkut, 17. november 2017-imeersukkut allannguuteqartinneqartumi imatut allannguisoqarpoq:

1. § 14a-p kinguliani §14 b ilanngunneqassaaq:
”  § 14 b.  Taarsigassarsisup taarsigassarsiani maanna naliusut malillugit sioqqutsilluni akilersinnaavai. Taarsigassarsisup taarsigassarsiani sioqqutsilluni akilerpagit, akiitsut sinneri ullormi qinnuteqaatip tunniunneqarfiani 3%-inik ernialerlugit Nationalbankip erniarititaanik ilallugit utertitassatut kisitsisitalerneqassapput. Akiitsut sinneri piffissamit, taarsigassarsisup allakkatigut akiitsuminik akiliiniarluni qinnuteqarfianit aammalu taarsigassarsiat piffissap erniaqartitsiviunngitsup akilersuiffiusussaanngitsullu sinneranut kingumut ernialerneqassallutik, taamaattorli siusinnerpaamik taamaaliortoqarsinnaavoq taarsigassarsinermit ukiut tallimat qaangiunnerini.

  Imm.2. imm.1 taarsigassarsianut januaarip aallaqqaataa 2019 sioqqullugu tunniunneqarsimasunut aamma atuutsinneqarpoq.”

§ 2

Inatsisartut inatsisaat 1. januar 2019-imi atuutilissaaq.

Namminersorlutik Oqartussat, ulloq 27. november 2018