Meeqqanut tapiissutit pillugit Inatsisartut inatsisaanni nr. 9, 7. december 2009-meersumi, Inatsisartut inatsisaanni nr. 7, 27. november 2018-imi allanngortinneqartumi, § 6, imm. 5, aamma § 10, imm. 2 naapertorlugit aalajangersarneqarpoq:

Kapitali 1

Meeqqanut tapiissutit naatsorsorneqarnerat

  § 1.  Meeqqanut tapiissutit aningaasarsiat apeqqutaatillugit tunniunneqassapput aamma maannakkorpiaq aningaasarsiat aallaavigalugit naatsorsorneqassapput, procenti aaqqiissutissaq aamma maannakkorpiaq aningaasarsiat pillugit tak. § 5.

Kapitali 2

Meeqqanut tapiissutinik tunniussinissaq

  § 2.  Kommunalbestyrelsip aalajangissavaa, meeqqanut tapiissutit qanoq ilillugit tunniunneqartassanersut, piumasaqaatigisinnaavaalu, meeqqanut tapiissutinik pisartagalik aningaasaateqarfimmi kontomik assigisaanilluunniit, tapiissutinik ikisiffiusinnaasumik paasissutissiissasoq.

 Imm. 2.  Meeqqanut tapiissutit qaammammut 100 kr.-t inorpatigit tunniunneqartassanngillat.

  § 3.  Meeqqanut tapiissutit tunniunneqarneranni meeqqanut tapiissutinik pisartagalik ilisimatinneqassaaq:

1)  meeqqanut tapiissutinik tigusinermut atatillugu piumasaqaatit pillugit

2)  naatsorsuinermut tunngavigineqartoq pillugu

3)  pissutsinik meeqqanut tapiissutinik tunniussisarnermut pingaaruteqartunik allannguuteqarnermik paasissutissiisussaatitaaneq pillugu.

  Imm. 2.  Kommunimut allamut nuunnermi, kommuni nuuffigineqartoq paasissutissanik meeqqanut tapiissutit annertussusissaannik naatsorsuinissamut pisariaqartinneqartunik pissarsiniassalluni pisussaavoq. Kommunip nuuffigineqartup paasissutissat suliamut attuumassuteqartut inunnik nalunaarsuiffimmut akileraartarnermillu ingerlatsivimmut pissarsiariniassavai.

  § 4.  Meeqqanut tapiissutit tunniunneqarneri meeqqamut iluaqutaanngitsut uppernarsarneqarpat, kommunalbestyrelsip aalajangersinnaavaa, meeqqanut tapiissutit aqussallugit imaluunniit tapiissutit tamakkiisumik ilaannakortumilluunniit inuussutissanngoreerlugit tunniunneqartassasut.

  Imm. 2. Meeqqanut tapiissutinik tunniussinermi nioqqutissanik pisissutissanngorlugit (rekvisition) pisassapput.

Kapitali 3

Nakkutiginninneq

  § 5.  Meeqqanik tapiissutinik tigusisartoq pisussaaffeqarpoq pissutsit tamaasa meeqqanut tapiissutit annertussusissaannik naatsorsuisarnermut uppernarsaatit pingaaruteqartut paasissutissiissutigissallugit tunniullugillu.

Kapitali 4

Atortuulersitsineq

  § 6.  Nalunaarut manna 1. januar 2019 atortuulersinneqarpoq.

  Imm. 2.  Peqatigitillugu Meeqqanut tapiissutit pillugit Namminersorlutik Oqartussat nalunaarutaat nr. 19, 18. oktober 2012-imeersoq atorunnaarsinneqarpoq.

Namminersorlutik Oqartussat, 14. december 2018

Martha Abelsen

/

Julie Præst Wilche