Akileraartussaatitaaneq

  § 1. Soraarnerussutisiaqarsinnaatitaasut, aningaasarsianit akileraarutit pillugit Inatsisartut Inatsisaanni (aningaasarsianit akileraarutit pillugit inatsit) § 1, imm. 2. imaluunniit 2, imaluunniit imm. 2 naapertorlugit akileraaruteqartussaasut, kiisalu nunami allami, Danmarkimi imaluunniit Savalimmiuni, marloqiusamik akileraartannginnissamik isumaqatigiissummi aalajangersakkat naapertorlugit, nunaqavissutut isigineqarsinnaanngitsut Inatsisartut Inatsisaat manna naapertorlugu iluanaarutinit akileraaruteqartassapput, tassa soraarnerussutisiaqalernissaq siunertaralugu ileqqaakkanit aningaaserivinni Kalaallit Nunaanni angerlarsimaffeqartuni imaluunniit aalajangersimasumik ingerlatsiveqartuni pilersinneqarsimasuni, kiisalu inuunermik sillimmasiisarfinnit aamma soraarnerussutisiaqalernissamut aaqqissuussinernit iluanaarutinit, taakku aningaasarsianit akileraarutit pillugit inatsimmi § 39 a, imm. 1-imi aamma 2-mi piumasaqaatinit naammassinnissimagunik aamma aaqqissuussinerit § 53 A-mi soraarnerussutisiaqalernissamut aaqqissuussinerit il.il. akileraarusiisarneq pillugu danskit inatsisaanni ilaatinneqartut.
  Imm. 2.  Soraarnerussutisiaqarsinnaatitaasoq toqukkut qimaguppat akileraartussaatitaaneq unissaaq.

Akileraarusiinermut tunngaviit

§ 2.  Iluanaarutit akileraarusigassat nunatta karsianut 15,3 procentimik akileraaruserneqassapput.
  Imm. 2.  Akileraarusiinermut tunngaviusut tassaapput ukiumi aningaasarsiaqarfiusumi iluanaarutit. Ukioq aningaasarsiaqarfiusoq tassaavoq qaammatisiutit malillugit ukioq ataaseq. Soraarnerussutisiaqarsinnaatitaasut  soraarnerussutisiaqalersinnaanermut aaqqissuussinermi ataatsimi arlaliuppata iluanaarutit naatsorsorneqartut akileraaruserneqartussat  pineqartut akornanni ukiup aningaasarsiaqarfiusup naanerani aaqqissuussinermi uninngasuutaannut naleqqiussilluni agguarneqassapput.
  Imm. 3.  Ukiumi aningaasarsiaqarfiusumi akileraaruteqartussaatitaanerup aallartiffiani imaluunniit  uniffianit, taava ukioq aningaasarsiaqarfiusoq tassaassaaq qaammatisiutit malillugit ukioq aningaasarsiaqarfiusup ilaa akileraaruteqartussaanerup atuuffigisimasaa.

§ 3.  Iluanaarutit akileraaruserneqartussaat imatut naatsorsorneqassapput illuatungaani ukiup aningaasarsiaqarfiusup naanerani aaqqissuussinerup aningaatigut nalingata taakkununnga ilanngullugit ukiup ingerlanerani tunniunneqartut, illuatungaatigullu aaqqissuussinerup aningaasatigut ukiup aningaasarsiorfiusup aallartinnerani nalingata taakkununnga ilanngullugit ukiup ingerlanerani akilerneqartut taakku assigiinngissutaat. Akileraaruseriffik aningaasatigut nalinganik missingiilluni aalajangersaasinnaavoq, imaappat soraarnerussutisiaqarsinnaatitaasup aalajangersakkami matuma maleruaqqusat tunngavigalugit aningaasatigut nalinga naatsorsorsimanagu.
  Imm. 2.  Akileraarut Inatsisartut Inatsisaat manna naapertorlugu naalagaaffimmut allamut, Danmarkimut Savalimmiunulluunniit akilerneqarsimasoq aningaasarsianit akileraartarnermut inatsimmi § 69 naapertorlugu ilanngaatigineqarsinnaavoq.
  Imm. 3.  Ukiumi aningaasarsiaqarfiusumi iluanaarutaasussaagaluaq annaasanngorsimappat, taava taanna ukiumi aningaasarsiaqarfiusumi tassani ilanngaataasinnaavoq, soorluttaaq aamma iluanaarutaasut aaqqissuussinermi tassanerpiaq ukiuni tulliuttuni 10-ni. Annaasaqaatit ukiumut allamut aatsaat nuutsinneqarsinnaasassapput annaasaqaat ukiumi aningaasarsiaqarfiusumi siullimi ataatsimi iluanaarutaasimasunit matussuserneqarsinnaanngippat.

Paasissutissanik nalunaarutiginninneq

§ 4. Kingusinnerpaamik februaarip aallaqqaataani aningaaseriviit §1, imm. 1-imi taaneqartut ukiup siuliani aningaasarsiaqarfiusumi akileraartarnermut aqutsisoqarfimmut paasissutissat makku nalunaarutigissavaat:
1) kontumik piginnittup aqqa, najugaa aamma inuup normua,
2) ukiup aallartinnerani aamma naanerani uninngasuutit, kiisalu
3) ukiup ingerlanerani iluanaarutit, tak. § 3
  Imm. 2.  Konto matusimagaluarpat, allamut nuussimagaluarpat assigisaanilluunniit paasissutissat nalunaarutigineqassapput.
  Imm. 3.   Paasissutissat imm. 1-imi 2-milu taaneqartut tunniunneqartarnerat pillugu malittarisassanik sukumiinerusunik Naalakkersuisut aalajangersaasinnaapput.

Nammineerluni nalunaarusiaq

§ 5.  Soraarnerussutisiaqarsinnaatitaasut § 1, imm. 1-imi 2-milu taaneqartut, ukiup aningaasarsiaqarfiusup siuliani iluanaarutit § 3-mi taaneqartut pillugit akileraaruseriffimmut nammineerluni nalunaarusiaq atorlugu nalunaaruteqassapput kingusinnerpaamik ulloq:
1) 1. maaji tamanut, tassa normu 2-mi ilaatinneqanngitsunut,
2) 15. maaji namminersorlutik inuussutissarsiutinik ingerlatsisunut, tassa elektroniskiusumik akileraaruserfiup innersuussinera malillugu nammineerluni nalunaarusiamik nassiussisartunut.

Akiliisitsiniut

§ 6.  Akileraaruseriffik akileraarummit naatsorsorneqarsimasumit akiliisitsissaaq.
  Imm. 2.  Ukiup aningaasarsiaqarfiusup siuliani iluanaarutinit akileraarutit akiligassanngortinneqassapput 1. septembari, kingusinnerpaamillu akiliiffissaq tassaassalluni 20. septembari.
  Imm. 3.  Soraarnerussutisiaqarsinnaatitaasut  akileraaruserfimmut akileraarummik akiliigallarsinnaapput. Akiliineq taama ittoq ukiup aningaasarsiaqarfiusup naareernerani pisinnaavoq, taamaattorli ukiumi aningaasarsianik akileraaruteqaataasussanik naatsorsuiffiusumi 1. maajip kingornatigut pisinnaanani. Ukiumi aningaasarsiaqarfiusumi akiliuteqarnermut tunngasumut akileraarutit kinguaattoorutaasimasinnaasut erniaat ilanngullugit, aningaasanit akiliutigineqartunit taakku ilanngaatigineqaqqaassapput.

§ 7. Soraarnerussutisiaqalernissamut aaqqissuussinernit il.il. § 1-imi taaneqartunit tunniunneqartut ingerlaavartumik iluanaarutit akileraarutaannut matusissutissatut, aningaasarsianut akileraaruserneqartussanut ilanngunneqassanngillat kiisalu suli piffissanngunngitsoq atorunnaarsitsinertut isigineqanngillat.  
  Imm. 2.  Aningaasanik akileraarutinut matussusiissutissanik tunniussineq ingerlanneqassaaq kingusinnerpaamik ukiup iluanaarutip pissarsiarineqarfiata kingornatigut ukiumi tullermi.

Allaffissornikkut isumaqatigiissutit

  § 8.  Inuunermik sillimmasiinernik aamma soraarnerussutisiaqalernissamut aaqqissuussinernik nioqquteqartunik, aningaasarsianit akileraarutit pillugit inatsimmi § 39 a, imm. 1 aamma 2 naapertorlugit kiisalu soraarnerussutisiaqalernissamut aaqqissuussinernik akileraarusiisarneq pillugu qallunaat inatsisaanni § 53 A-mi aaqqissuussinerni ilanngunneqartuni il.il. piumasaqaatinik naammassinnittunik paasissutissanik nalunaaruteqartarneq § 4, imm. 1-imi taaneqartoq pillugu Naalakkersuisut isumaqatigiissuteqarsinnaapput.
  Imm. 2.  Soraarnerussutisiaqarnissaq siunertaralugu ileqqaarnernik kiisalu inuunermik sillimmasiinermik aamma soraarnerussutisiaqalernissamut aaqqissuussinernik nioqquteqartunik, aningaasarsianit akileraarutit pillugit inatsimmi 39 a, imm. 1 aamma 2 naapertorlugit kiisalu soraarnerussutisiaqalernissamut aaqqissuussinernik akileraarusiisarneq pillugu qallunaat inatsisaanni § 53 A-mi aaqqissuussinerni ilanngunneqartuni il.il. naatsorsuinermut, soraarnerussutisiaqarsinnaatitaasut sinnerlugit akileraarutinik uninngatitsineq akiliinerlu pillugit Naalakkersuisut isumaqatigiissuteqarsinnaapput, tak. § 2, imm. 1 aamma 2, § 3, § 6 aamma § 7.

Pineqaatissiissutit

§ 9.  Piaaraluni imaluunniit mianersuaalliorujussuarluni § 1, imm. 1-imik, § 4-mik aamma § 5-imik unioqqutitsineq, Kalaallit Nunaanni Pinerluttulerinermi inatsit naapertorlugu pineqaatissinneqaataasinnaavoq.
  Imm. 2.  Piaaraluni imaluunniit mianersuaalliorujussuarluni, isumaqatigiissuteqartup pisussaanerinik § 8-imi taaneqartunik unioqqutitsineq, Kalaallit Nunaanni Pinerluttulerinermi inatsit naapertorlugu pineqaatissiinneqaataasinnaavoq.
  Imm. 3.  Inatsisartut inatsisaata matuma kingunerisaanik najoqqutassat saqqummiunneqartut malillugit Kalaallit Nunaanni Pinerluttulerinermi inatsist naapertorlugu akiligassiisoqarsinnaavoq.
  Imm. 4.  Inatsisartut inatsisaat imaluunniit najoqqutassat Inatsisartut inatsisaata matuma kingunerisaanik saqqummiunneqartut malillugit akileeqqusissummik aalajangersaanissamik tunngaveqartitsippata, akileeqqusissut Kalaallit Nunaanni Pinerluttulerinermi inatsimmi maleruaqqusat malillugit inatsisitigut pisinnaatitaasoq akileeqqusissummik pisussaaffilerneqarsinnaavoq.
  Imm. 5.  Pillaammik akiligassiissutit imm. 1-4 naapertorlugit aalajangerneqartut Nunatta Karsianut nakkartassapput.

  § 10.  Akileraaruseriffik isumaqarpat unioqqutitsineq akiliisitaanermit sakkortunerusumik pineqaatissiissutigineqartariaqartoq, taava Naalakkersuisut imaluunniit Naalakkersuisut taamaaliornissamut piginnaatitaata pineqartoq nalunaarfigissavaa suliassaq eqqartuussisutigoortitsinertaqanngitsumik inerneqarsinnaasoq, pineqartup ilumut unioqqutitsisimanini nassuerutigippagu aammalu piffissaatitaasup erseqqinnerusumik aalajangikkap, qinnuteqarnikkut sivitsorneqarsinnaasup, qaangiutinnginnerani akiliutissamik nalunaarummi taaneqartumik akiliiumappat.
   Imm. 2.  Paasisitsissummut imm. 1-imi taaneqartumut tunngatillugu Kalaallit Nunaanni eqqartuussisarnermi inatsimmi maleruaqqusat unnerluussutip imarisai pillugit taamaallutik atuutissapput.

Atuutilerfia

§ 11.  Inatsisartut Inatsisaat 1. januaari 2019-imiit atuutilerpoq*.

Namminersorlutik Oqartussat, ulloq 23. november 2017

Kim Kielsen

__________________

*Aningaasaqarnermut Akileraartarnermullu Ataatsimiititaliaq aalajangiineq nr. 01.31.06/17 – 0078 aqqutigalugu ataatsimiinnermiinnermi ulloq 27. december 2017 ingerlanneqartumi aammalu aalajangiineq nr. 01.31.06/18-00792 aqqutigalugu ataatsimiiinnermi ulloq 7. februar 2018 ingerlanneqartumi Aningaasaqarnermut Inatsisini ukioq 2017-imut kiisalu 2018-imut oqaasertaliussat akuersissutigaat tulliuttunik imaqartunik:

"Pigisanit pissarsiat ilaasa akileraaruserneqartarnerat pillugu Inatsisartut Inatsisaat nr. 37, 23. november 2017-imeersoq atuutilersinneqassaaq ulloq 1. januar 2018."

Oqaasertaliussat Ilassutitut aningaasaliissutinut inatsisissatut siunnersuusiani ukioq 2017-imoortuni aammalu 2018-imoortuni ilanngunneqassapput.