Kapitali 1
Kisermaassinermut aalajangersakkat 

  § 1.  Namminersorlutik Oqartussat Kalaallit Nunaanni, Kalaallit Nunaannut aamma Kalaallit Nunaanniit nalunaarasuartaatitigut atassuteqarnermik neqerooruteqartartutut, kiisalu Kalaallit Nunaanni nalunaarasuartaatitigut attaveqarnermut atortunik, pilersuisut atuisullu akornanni attaveqaatit naapiffiisa (nettermineringspunkt) akornanni imaluunniit illoqarfiit nunaqarfiillu akornanni aammalu nunanut allanut atortut elektroniskiusut atorlugit attaveqaqatigiinnissamik ajornarunnaarsitsisut sanaartornerini ingerlanneqarnerinilu kisermaassisuupput. 
  Imm 2. Imm. 1 naapertorlugu kisermaassinermi pineqanngillat:
1) radiukkut atassuteqarneq aamma radiukkut aallakaatitsinermi frekvensenik atugassanngortitsineq, aamma
2) imaatigut ajunaalernerni isumannaallisaanikkullu sullissinerit.
  Imm. 3. Namminersorlutik Oqartussat kisermaassineranni ilaatinneqanngillat atortut soorlu:
1) naalagaaffimmi oqartussat kommunilluunniit taamaallaat namminneq oqartussaaffimminni nalunaarasuartaatitigut attaveqarnissamut pisariaqartitsinerannut immikkut ittunut atugassat nalunaarasuartaatitigut aqqusersuutini tamanut ammasuni nalinginnaasuni periarfissiinngitsut, imaluunniit
2) illuutigisap iluani imaluunniit illuutigisat arlariit ataatsimik piginnittoqartut akornanni taamaallaat atorneqartut, atortut illoqarfimmi nunaqarfimmiluunniit ataatsimiippata, imaluunniit.

  § 2. Kisermaassinermut § 1, imm. 1-imi  taaneqartumut ammanerulersitsineq pillugu Naalakkersuisut aalajangiisinnaapput.
  Imm. 2.  Nalunaarasuartaateqarnermi kiffartuussiviit uku ammanerulersinneqarput:
1) Paasissutissat ingerlaarnerinut kiffartuussivik.
2) Internetimik kiffartuussivik.
3) Radiukkut TV-kullu aallakaatitanik siaruarterineq.
  Imm. 3.  Nalunaarasuartaateqarnermik attaveqaqatigiinnermi atortut uku ammanerulersinneqarput:
1) Silaannakkut aallakaatitsinermut attaveqaqatigiinnermut atortut.
2) Radiukkut TV-kullu aallakaatitanik satellitikkut tigooraasinnaanermut attaveqaqatigiinnermut atortut.
3) Radiukkut TV-kullu aallakaatitat siaruarternissaannut attaveqaqatigiinnermut atortut.
  Imm. 4.  Imm. 1-imi nalunaarasuartaatitigut atortut, pilersuisut atuisullu akornanni attaveqaatit naapiffiisa (nettermineringspunkt) akornanni imaluunniit illoqarfiit nunaqarfiillu akornanni aammalu nunanut allanut atortut elektroniskiusut atorlugit attaveqaqatigiinnissamik ajornarunnaarsitsisut pineqanngillat.  
  Imm. 5.  Naalakkersuisut nalunaarasuartaatitigut attaveqarnermut imm. 4-mi taaneqartut ammanerulersinneqarnissaannik aalajangiisinnaapput, tassani teknologi pineqartoq silaannakkut aallakaatitsissutit atorlugit nuussisarneq aallaavigineqarpat, aammalu taamaallaat illoqarfiit imaluunniit nunaqarfiit ataasiakkaat iluanni atorneqartussatut naatsorsuussaappata. Ammanerulersitsinissaq aalajangiunneqarpat Nalunaarasuartaateqarnermi Aqutsisut (Telestyrelsen) pisuni immikkut ittuni teknologimi pineqartut atortut kabelillit atorlugit atuinissamut immikkut ittumik akuersissuteqarsinnaapput.
  Imm. 6.  Naalakkersuisut nalunaarasuartaatitigut kiffartuussinerit aamma nalunaarasuartaatitigut attaveqaatit ammanerulersinneqartut pillugit maleruagassanik aalajangersaassapput.

  § 3.  Naalakkersuisut apparatinik atortunillu, nalunaarasuartaatitigut attaveqaatinut atatillugu attavilerneqartunik imaluunniit atorneqartunik, kiisalu sanaartukkanik immikkut ittumik siunertaqarfiusumik atorneqartunik ammanerulersitsisoqassanersoq pillugu aalajangiisinnaapput.
  Imm. 2. Naalakkersuisut apparatit atortullu tamanut ammasumik nalunaarasuartaatitigut attaveqarnermi aqqutinut atassuserneqartut taakkununngaluunniit atatillugu atorneqartut pillugit malittarisassanik piumasaqaatinillu aalajangersaasinnaapput:
1) Aaqqissuussaaneri,suliarineqarneri, inissinneqarneri, ingerlanneqarneri atorneqarnerilu pillugit.
2) Atortunik apparatinillu akuersissuteqartarneq pillugu.
3) Atortulersuutit ikkussukkallu nakkutiginerat takusartarnerallu pillugu.

Kapitali 2
Isumasiuutit

  § 4.  Inatsisartut inatsisaanni matumani nalunaarasuartaatitigut kiffartuussinermi pineqartut tassaapput kiffartuussinerit, nipitut, assitut, allakkatut taakkuluunniit akuleriisillugit radiukkut nalunaarasuartaatitigulluunniit attaveqaqatigiinnermi atortut atorlugit pilersuisut atuisullu akornanni attaveqaatit naapiffiisa (nettermineringspunkt) akornanni tamakkiisumik ilaannaasumilluunniit elektroniskiusumik nuunneqartartut, taakkununnga ilaallutik siumut utimullu attaveqaqatigiinnerit imaluunniit siumuinnaq attaveqarnerit, aallaavimmiit aallaavimmut attaveqaqatigiinnerit aammalu aallaavimmiit aallaavimmut tamanut atuuttumut attaveqaqatigiinnerit.
  Imm. 2. Inatsisartut inatsisaanni matumani pilersuisut atuisullu akornanni attaveqaatit naapiffiat (nettermineringspunkt) pineqartoq tassaavoq nalunaarasuartaatitigut attaveqaatit ilusilersugaaneranni atortulersuutit imaluunniit atortut naaffii, atuisuusup attassusiivigisai.  Naalakkersuisut atortut naaffii taaneqartut qanoq paasineqarnissaat pillugu maleruagassiorsinnaapput.
  Imm. 3. Inatsisartut inatsisaanni matumani atuisuusutut taaneqartut tassaapput nalunaarasuartaatitigut kiffartuussinernik atuisut, niuernermik tunngaveqarani nalunaarasuartaatitigut kiffartuussinernik pineqartunik allanut atugassiisuusut.

Kapitali 3
Akuersissummi aalajangersakkat

Akuersissummik nalunaaruteqarneq

  § 5.  Naalakkersuisut sanaartukkanut, nalunaarasuartaatitigut attaveqaqatigiinnermut atortut ingerlanneqarnerinut aamma nalunaarasuartaatitigut, taakkununngalu qaammataasatigut ilangullugit, kiffartuussinernik neqerooruteqarnermut akuersissutinik nalunaaruteqarsinnaapput.
  Imm. 2. Akuersissummik pigisaqartup akuersissuteqarfiusumi ammanerulersitsinikkut imaluunniit suliassaqarfinnut imm. 1-imi taaneqartunut immikkut pisinaatitaaffeqartitsinerup atuutsinneqalerneratigut annikillissutissat sapissanngilai.
  Imm. 3. Naalakkersuisut akuersissummut tunngatillugu maleruagassiorsinnaapput:
1) Sullississutini pineqartuni atorsinnaassusissatut sullissinerullu qaffasissusissaatut piumasaqaatinik.
2) Akilersueriaatsinik atuinermullu piumasaqaatinik akuersissuteqarnissamut.
3) Akuersissummik pigisaqartup maleruagassiornermi piumasaqaatinillu aalajangersaanermi, kiisalu nakkutilliinermi misissuinermilu suleqataanissamut pisussaaffeqarneranut.
4) Akuersissummik pigisaqartup immikkut iluanaaruteqarani imaluunniit toqqaannartumik amigartooruteqarani suliassanik immikkut ittunik suliaqarnissamut pisussaaffeqarneranut.
5) Nalunaarasuartaatitigut attaveqaqatigiinnermi inuiaqatigiinnut pingaarutilimmi immikkut pisoqartillugu tamatuma Namminersorlutik Oqartussanut aningaasartuutaanngitsumik ingerlanneqarnissaanik qulakkeerinissamut ingerlatsinissamullu.
6) Akuersissummik pigisaqartup akeqanngitsumik nunat allat nunallu iluani suleqatigiiffinni peqataaneranut.
7) Akuersissummik pigisaqartup ingerlaneranik nakkutilliinermut, tassunga ilaallutik taarsigassarsisarnermik periaatsinik, kiisalu nalunaarasuartaatitigut attaveqaqatigiinnermut atortunik ineriartortitsinermik aserfallatsaaliuinissamillu aalajangersaaneq.

Nalunaarasuartaatitigut attaveqaatinik, kabelinik ledninginillu il.il. inissiineq.

  § 6.  Akuersissummik pigisaqartoq nunaminertanik atuinermut pilersaarusiornermullu Inatsisartut inatsisaanni maleruagassat naapertorlugit nalunaarasuartaatitigut attaveqaatinik ikkussuisinnaavoq, tassanissaarlu aamma nalunaarasuartaatinut kabelit pineqarput.
  Imm.  2.  Akuersissummik pigisaqartoq nalunaarasuartaateqarnermut atortulersuutinik illuutini pisortanit namminersortunillu pigineqartuni ikkussuinissamut pisinnaatitaavoq. Suliassat suliarineqarnerini piginnittup atuisulluunniit atortut inissiffissaattut kissaataasa annertunerpaamik malinniarneqarnissaat sapinngisamik anguniarneqassaaq.
  Imm 3.  Akuersissummik pigisaqartoq nalunaarasuartaateqarnermi attaveqaatit pisinnaasaannik allanngutsaaliuinermut atatillugu tamanna pisariaqartinneqarpat, aammalu atuisumut imaluunniit piginnittumut siumoortumik ilisimatitsereernikkut nalunaarasuartaatitigut atortulersuutinik nakkutilliinermut suliaqarnermullu atatillugu uppernarsaammik iluameersumik eqqartuussivitsigut aalajangigaanngitsumik takutitsinikkut illuutinut pisortanit namminersortunillu allanit pigineqartunut isernissamik piumasaqarsinnaavoq. 
  Imm 4. Illuutini pisortanit namminersortunilluunniit allanit pigineqartuni nalunaarasuartaatitigut atortulersuutinik kabelinillu ikkussuinermut aserfallatsaaliuinermullu, aammalu taakkuninnga nakkutilliinermut atatillugu annaasat taarsiiffigineqarnissamut maleruagassat atuuttut malillugit taarsiiffigineqarsinnaapput.

  § 7.  Ikkussuiffinnik kabeleqarfinnilluunniit akuersissummik pigisaqartup pigisaanik ikkussuiffiusimasuni akuersissummik pigisaqartoq akuersiteqqaarnagu illuliortoqarsinnaanngilaq nunaluunniit assallugu sulisoqarsinnaanani imaluunniit allanik iliuuseqartoqarsinnaanani, nalunaarasuartaateqarnermi atortut akornusersorneqarnissaannik ajoquserneqarnissaannilluunniit kinguneqarsinnaasunik.

 
Taarsiineq

  § 8.  Akuersissummik pigisaqartoq atortuni, Namminersorlutik Oqartussat kisermaassisuuffigisaani akornusersuinerup, kinguaattoornerup, maskiinanik unittoornerup imaluunniit ingerlatsinermi kukkusumik suliaqarnerup kingunerisaanik annaasanut taarsiissuteqarnissamut pisussaatitaanngilaq.

 
Naalakkersuisunut ilisimatitsisarneq

  § 9.  Naalakkersuisutakuersissummik pigisaqartup siulersuisuini siulittaasoq taassumalu tullia pissutsinik akuersissummik pigisaqartup suliffeqarfiutaanut tunngasunik ilisimasariaqartunik Naalakkersuisunut ilisimatitsisarnissamik pisussaatissinnaavaat.
  Imm. 2. Akuersissummik pigisaqartup siulersuisuini siulittaasup taassumalu tulliata Naalakkersuisunut soqutiginaateqartutut isumaqarfigineqarsinnaasut pillugit nammineerlutik Naalakkersuisut ilisimatittassavaat.

Kapitali 4
Nalunaarasuartaateqarnermut Aqutsisut

Nalunaarasuartaateqarnermi Aqutsisut suliassaat

  § 10.  Nalunaarasuartaateqarnermi Aqutsisut aqutsisoqarfiuvoq nammineq ingerlalluni nammineq pisortaqartoq.
  Imm. 2.  Nalunaarasuartaateqarnermi Aqutsisut nalunaarasuartaatitigut atassuteqarnermi ilaatigut suliassaraat:
1) Naalakkersuisunut siunnersuisarneq.
2) Ineriartornermik nakkutilliineq
3) Kisitsisitigut paasissutissanik katersineq.
4) Inatsisissanik siunnersuusiorneq.
5) Nalunaarasuartaatititugt kiffartuussinerni piumasaqaatissanik akinillu siunnersuusiorneq.
6) Akuersissummik, pilersuisussaatitaanermik sullissisunillu allanik nakkutilliineq.
7) Inatsisartut inatsisaata matuma malinneqarnissaanik aamma taanna naapertorlugu maleruagassatut piumasaqaatitullu aalajangersakkat malinneqarnissaannik nakkutilliineq.
8) Naalakkersuisut suleqatigalugit nunani tamalaani aaqqissuussanut atassuteqarnernik isumagisaqarneq.
9) Nalunaarasuartaateqarnermi tunngasunut Danmarkip Kalaallit Nunaatalu akornanni atassuteqarnernik isumagisaqarneq  Naalakkersuisut suleqatigalugit.
  Imm. 3. Aammattaaq nalunaarasuartaateqarnermi aqutsisut radiukkut atassuteqarneq ingerlatarissavaat.
  Imm. 4. Naalakkersuisut suliassat imm. 2-mi 3-milu taaneqartut saniatigut suliassanik allanik Nalunaarasuartaateqarnermi Aqutsisunut suliakkiisinnaapput.

Naalakkiisinnaaneq

  § 11.  Naalakkersuisut Nalunaarasuartaateqarnermi Aqutsisunut  suliassani aalajangersimasuni oqartussaasutut suliassat isumaginissaannut, suliani ataasiakkaani sullissinerup aalajangiinissallu isumaginissaannut imaluunniit peqqussutip matuma taassumalu nassatarisaanik allaffissornikkut peqqussutaasut malitsinnissaat qulakkeerniarlugu Nalunaarasuartaateqarnermi Aqutsisut nakkutilliisussaatitaanerminik isumagisaqarnissaanut naalakkersinnaanngilaat.

Paasissutissiisussaatitaaneq

§ 12.  Nalunaarasuartaateqarnermi Aqutsisut nakkutilliinissaq, isumaqatigiissitsiniarnissaq, aalajangiinissaq allanilluunniit misissuinissaq siunertaralugu paasissutissanik attuumassuteqartutut naliliiffigineqartunik tamanik nalunaarasuartaatitigut kiffartuussinernik sullissisunut piumasaqarsinnaapput.

Nipangiussisimasussaatitaaneq

  § 13.  Nalunaarasuartaateqarnermi Aqutsisuni sulisut Kalaallit Nunaanni pinerluttulerinermut inatsit naapertorlugu akisussaaffeqarlutik inuinnaat imaluunniit suliffeqarfiit aningaasaqarnikkut inissisimanerannut paasissutissat suliassaminnik isumagisaqarnerminni ilisimalikkatik eqqarsaatigalugit susassaqanngitsunut pinngitsooratik nipangiussisussaatitaanertik ataqqissavaat.
  Imm. 2. Taamatut pisussaaffiliineq aammattaaq ikiortinut sulianik paasisimasalinnut, kiisalu allanut, Nalunaarasuartaateqarnermi Aqutsisut isumaqatigiissuteqarfiginerisigut suliassamik tigusisimasunut pissutsinillu pineqartunik ilisimasaqalersimasunut tamanut atuuppoq.
  Imm. 3. Tamanna suliffeqarfimmut isumaqatigiissutaasimappat, taamatut pisussaaffiliineq sulisunut suliffimmi sulinerminni pissutsinik imm. 2-mi taaneqartunik ilisimasaqalersunut tamanut atuuppoq.

Nalunaarusiortussaatitaaneq

  § 14.  Nalunaarasuartaateqarnermi Aqutsisut pissutsit Nalunaarasuartaateqarnermi Aqutsisut aqutsinerannut tamakkiisumut attuumassuteqartut pillugit Naalakkersuisunut nalunaarusiortussaatitaapput, taassunga ilaallutik suliassat ataasiakkaat annertunerusut, Naalakkersuisunut ilisimassallugit soqutiginaateqartutut isumaqarfigineqarsinnaasut.

  § 15.  Nalunaarasuartaateqarnermi Aqutsisut nakkutilliinerminnut atatillugu namminneerlutik misissuisassapput, paasiniaasassapput il.il.  Taamatut paasiniaaneq misissuinerlu nalunaarasuartaateqarnermik suliassaqarfimmit aningaasalersorneqartassaaq.
  Imm. 2. Nalunaarasuartaateqarnermi Aqutsisut ukiumoortumik nalunaarasuartaateqarnerup iluani suliassaqarfinnut imaluunniit isummerfigisassanut, ukiuni tulliuttuni nalunaarasuartaateqarnermi aqutsisut immikkoortortanut annertunerusunik aningaasaliissuteqarnikkut paasiniaanernik misissuinernillu aallartitsinissamik pisariaqartitsiviusut pillugit Naalakkersuisunut siunnersuuteqartassapput.
  Imm. 3. Naalakkersuisut paasiniagassanik allanik nalunaarasuartaateqarnermi Nalunaarasuartaateqarnermi Aqutsisunut suliakkiisinnaapput.

  § 16.  Nalunaarasuartaateqarnermi Aqutsisut ukiumoortumik nalunaarummik Naalakkersuisunut saqqummiussisassapput:
1) Nalunaarasuartaateqarnermi Aqutsisut suliaat pillugit,
2) inatsimmut atuuttumut misilittagaat pillugit, kiisalu
3) nalunaarasuartaateqarnermi pissutsit  pilersuisussaatitaanermut atuisunullu illersuinermut attuumassuteqartut.

Kapitali 5
Nalunaarasuartaateqarnermi Maalaaruteqartarfik

  § 17.  Naalakkersuisut Nalunaarasuartaateqarnermi Maalaaruteqartarfimmik arlaannulluunniit attuumassuteqanngitsumik pilersitsisinnaapput, nalunaarasuartaatitigut attaveqaqatigiinnermi maalaarutinik suliaqartartussamik.
  Imm. 2. Nalunaarasuartaateqarnermi Maalaaruteqartarfik siulittaasoqassaaq, tassunga sinniisussamik ataatsimik arlalinnilluunniit ilaasortaqassalluni, aammalu aningaasaqarnermik nalunaarasuartaateqarnermilu teknikkimut tunngasunik ilisimasalinnik marlunnik ilaasortaqassalluni.
  Imm.  3. Nalunaarasuartaateqarnermi Maalaaruteqartarfimmi ilaasortat ukiuni marlunni atuuttussanngorlugit qinerneqartassapput, qinigaaqqissinnaanermut periarfissaqartitsisoqarluni.
  Imm. 4. Kalaallit Nunaanni Landsdommeri maalaaruteqartarfimmi siulittaasussamik taassumalu sinniisussaanik, inatsisilerinermi soraarummeersimasumik toqqaassaaq.  Siulittaasoq eqqartuussivimmi fuldmægtigissamik toqqaaniarnermi piumasarineqartutut piginnaaneqassaaq misilittagaqassallunilu.
  Imm. 5. Naalakkersuisut Kalaallit Nunaanni nalunaarasuartaateqarnermik suliassaqarfimmit innersuussisoqareerneratigut ilaasortassanik marlunnik toqqaassapput.
  Imm. 6. Naalakkersuisut Nalunaarasuartaateqarnermi Maalaaruteqartarfiup oqaaseqaataanik piniareernermikkut taassuma suleriaasissaanik aalajangersaassapput.
  Imm. 7. Naalakkersuisut allattoqarfittut ikiorsiisussanik Nalunaarasuartaateqarnermi Maalaaruteqartarfimmut atugassiissapput.

  § 18.  Nalunaarasuartaateqarnermi Maalaaruteqartarfiup Nalunaarasuartaateqarnermi Aqutsisut akuersissutinik pigisaqartut, kiffartuussinernik tuniniagaqartut allat aamma pilersuisussaatitaasut pillugit aalajangiinerinut maalaarutit suliarisassavai. 
  Imm. 2. Nalunaarasuartaateqarnermi Maalaaruteqartarfiup pissutsit imm. 1-imi taaneqartut pillugit maalaarutinut aalajangiineri sapinngisamik Nalunaarasuartaateqarnermi Maalaaruteqartarfimmut saqqummiunneqarneranniit kingusinnerpaamik qaammatit pingasut qaangiunnerini piareersimassapput.
  Imm. 3. Suliassat suliarineqarnerat allakkatigut ingerlanneqassaaq.

  § 19.  Naalakkersuisut Nalunaarasuartaateqarnermi Maalaaruteqartarfiup sulineranut maleruagassanik sukumiinerusunik aalajangersaassapput.

Paasissutissiisussaatitaaneq

  § 20.  Nalunaarasuartaateqarnermi Maalaaruteqartarfiup maalaarutinik suliaqarnerminut atatillugu akuersissummik pigisaqartoq, pilersuisussaatitaallutik sullissisut aamma nalunaarasuartaateqarnermi tuniniagaqartut paasissutissanik aalajangiinissamut attuumassuteqartutut nalilerneqartunik piniarfigisinnaavai.

 
Nipangiussisimasussaatitaaneq

  § 21.  Nalunaarasuartaateqarnermi Maalaaruteqartarfimmi sulisut Kalaallit Nunaanni pinerluttulerinermut inatsit naapertorlugu akisussaaffeqarlutik inuinnaat imaluunniit suliffeqarfiit aningaasaqarnikkut, inuussutissarsiornikkut imaluunniit inuttut inuunermut inissisimanerannut paasissutissat, suliassaminnik isumagisaqarnerminni ilisimalikkatik eqqarsaatigalugit susassaqanngitsunut pinngitsooratik nipangiussisussaatitaanertik ataqqissavaat.
  Imm. 2. Taamatut pisussaaffiliineq aammattaaq ikiortinut sulianik paasisimasalinnut, kiisalu allanut, Nalunaarasuartaateqarnermi Maalaaruteqartarfiup isumaqatigiissuteqarfiginerisigut suliassamik tigusisimasunut pissutsinillu pineqartunik ilisimasaqalersimasunut tamanut atuuppoq.
  Imm. 3. Tamanna suliffeqarfimmut isumaqatigiissutaasimappat, taamatut pisussaaffiliineq sulisunut suliffimmi sulinerminni pissutsinik siuliani taaneqartunik ilisimasaqalersunut tamanut atuuppoq, tak. imm. 2.

  § 22.  Nalunaarasuartaateqarnermi Maalaaruteqartarfiup aalajangigai allaffissornikkut oqartussaasunut allanut ingerlateqqinneqarsinnaanngillat.
  Imm. 2. Nalunaarasuartaateqarnermi Maalaaruteqartarfiup aalajangiineri aalajangiinerup pineqartumut nalunaarutigineqarneraniit kingusinnerpaamik sapaatit akunnerisa arfineq pingasut qaangiunnerini eqqartuussivinnut ingerlateqqinneqarsinnaapput.

Kapitali 6
Pilersuisussaatitaaneq

Pilersuisussaatitaasussamik pilersuutissatullu pisussaaffinnik toqqaaneq

  § 23. Naalakkersuisut pilersuisussaatitaanerup iluani kiffartuussissutinik ammanerulersinneqartunik sullissisussamik ataatsimik amerlanerusunilluunniit toqqaasinnaapput sukumiinerusunillu maleruagassiorsinnaallutik:
1) Nalunaarasuartaateqarnermik kiffartuussinerni arlaat pilersuisussaatitaaffiussanersoq.
2) Pilersuisussaatitaanermi nalunaarasuartaateqarnermik sullissinerit qanoq annertussuseqassanersut, taassuma ataani atortulersuutit sullississutillu suut tamatumunnga attuumassuteqassanersut.
3) Pilersuinissamut pisussaatitaaffik qanoq annertussuseqassanersoq, tak. imm. 2.
  Imm. 2. Pilersuisussaatitaanermi pineqarpoq pilersuisussaatitaanerup iluani kiffartuussissutinik sullissisussanik, kikkunnulluunniit tamanna pillugu qinnuteqartunut pilersuisussaatitaanermi sullississutinik pilersuisussamik tuniniagaqartussamilluunniit toqqaanissamut pisussaatitaaffik, tamannalu aamma imm. 3 tunngavigalugu maleruagassiat piumasaqaatillu naapertorlugit pissaaq.
  Imm. 3. Naalakkersuisut nalunaarasuartaateqarnermi kiffartuussissutinik pilersuisussaatitaaffiusunik akinik aalajangersaasarnermut maleruagassanik aalajangersaasinnaapput.

Pilersuisussaatitaanermi amigartoorutinut aningaasaliisarneq

  § 24.  § 23, imm. 1 naapertorlugu pilersuisussaatitaanerup iluani kiffartuussissutinik sullissisussatut toqqarneqartoq pisinnaatitaavoq amigartoorutit, suliassaqarfimmi ammanerulersinneqartumi pilersuisussaatitaanermik suliakkerneqarnerup kingunerisaanik pilersimasinnaasut uppernarsarneqartut tamaasa matussusertissallugit.
  Imm. 2. Naalakkersuisut pilersuisussaatitaanerup iluani kiffartuussissutinik sullissisup naatsorsuutaasa ilusissaannut, amigartoorutinik naatsorsueriaasissamik uppernarsaasioriaasissamillu piumasaqaatit pillugit maleruagassanik sukumiinerusunik aalajangersaasinnaapput, tak. imm. 1.
  Imm. 3. Nalunaarasuartaateqarnermi Aqutsisut pilersuisussaatitaanerup iluani kiffartuussissutinik sullissisoq imm. 1-imi taaneqartutut amigartoorutiminut matussusiiffigineqarnissaminut naammattunik uppernarsaasiisimanersoq aalajangissavaat. 
  Imm. 4. Nalunaarasuartaateqarnermi Aqutsisut imm. 3 naapertorlugu uppernarsaammik akuersinerat kiffartuussissummik pilersuisussaatitaanermi amigartoorutit matussusertinneqarnissaannik pisinnaatitsissaaq, tak. imm. 1.
  Imm. 5. Naalakkersuisut amigartoorutinut matussusiisarnerup imm. 1-imi taaneqartup naatsorsorneqarnissaannut maleruagassanik sukumiinerusunik aalajangersaassapput.

Pilersuisussaatitaanerup iluani tuniniagaqartunut piumasaqaatit

  § 25.  Naalakkersuisut pilersuisussaatitaanerup iluani kiffartuussissutinik tuniniagaqarnermut pilersuinermullu atatillugu atuisut pisinnaatitaaffiinut tunngaviusussanik qulakkeerinissaq eqqarsaatigalugu, pilersuisussaatitaanerup iluani kiffartuussissutinik sullissisussatut toqqarneqartup pisussaaffii pillugit maleruagassanik aalajangersaasinnaapput.
  Imm. 2. Maleruagassat imm. 1 naapertorlugu aalajangersarneqartut piumasaqaatit nalinginnaasut, pilersuisussaatitaanerup iluani kiffartuussissutinik sullissisup atuisullu akornanni atuuttussat imaannut aalajangersakkanik immikkut piumasaqaateqarfiusunik imaqarsinnaapput, taamaattorli tak. § 28.
  Imm. 3. Naalakkersuisut isumaqatigiissutini piumasaqaatit imm. 2-mi taaneqartut Nalunaarasuartaateqarnermi Aqutsisunit akuerineqartarnissaannut maleruagassiorsinnaapput.

Kapitali 7
Nalunaarasuartaateqarnermi Aqutsisut, Nalunaarasuartaateqarnermi Maalaaruteqartarfik pilersuisussaatitaanermilu amigartoorutit aningaasalersorneqarnissaat

  § 26.  Nalunaarasuartaateqarnermik suliaqartut Nalunaarasuartaateqarnermi Aqutsisut, Nalunaarasuartaateqarnermi Maalaaruteqartarfik pilersuisussaatitaanermilu amigartoorutaasinnaasut aningaasalersussavaat.
  Imm. 2.  Taakkununnga aningaasalersuutissatut ungasianiit attaveqaqatigiinnermik atuinermut immikkut akiliummik akiliisitsisoqartassaaq, taannalu akuersissummik pigisaqartup Nalunaarasuartaateqarnermi Aqutsisunut akilertassavaa.
  Imm. 3. Akiliut imm. 1 naapertorlugu Inatsisartut Aningaasaqarnermut Inatsisaatigut aalajangersarneqartassaaq. Ungasissumit attaveqaqatigiinnermut akiliut amerlasuukkaaraluni tuniniaavimmut atatillugu akilersinneqartassaaq.

Kapitali 8
Atuisunik illersuineq

Nalunaarasuartaatitigut atassuteqarnermi atortulersuutinik nalunaarasuartaateqarnermilu kiffartuussissutinik piginnittunut tuniniagaqartunullu piumasaqaatit minnerpaaffiat

  § 27.  Naalakkersuisut Naalakkersuisut atuisut kalerrisaarivimmut tamanut ammasumut aamma normunik paasiniaavinnut atassuteqarsinnaanissaat qulakkeerniarlugu nalunaarasuartaatitigut atassuteqarnermi atortulersuutinik piginnittut aamma nalunaarasuartaatitigut atassuteqarnermi atortulersuutinik nalunaarasuartaateqarnermilu kiffartuussissutinik tuniniagaqartut pisussaaffilerneqarnissaat eqqarsaatigalugu maleruagassanik aalajangersaasinnaapput, tamatuma ataani pisussaaffiliinerup tamatuma imassaanut sukumiinerusunik maleruagassiorneq.

Kingulliullutik atuisut pisinnaatitaaffii tunngaviusut

  § 28.  Naalakkersuisut nalunaarasuartaatitigut kiffartuussissutinik tuniniagaqartut atuisunut sullissisuusut pilersuinissamut isumaqatigiissuteqarnermut atatillugu atuisut pisinnaatitaaffiinut tunngavissanik arlalinnik qulakkeerinissaq anguniarlugu nalunaarasuartaatitigut kiffartuussissutinik tuniniagaqartut atuisunut sullissisut pisussaaffilerneqarnissaat eqqarsaatigalugu maleruagassanik aalajangersaasinnaapput.
  Imm. 2. Imm. 1 naapertorlugu maleruagassat ilaatigut aalajangersakkanik imaattunik imaqarsinnaapput
1) Tunngaviusumik sullitanut attaveqarnermi qanorluunniit ittumi allakkatigut isumaqatigiissuteqarsimanissaq, isumaqatigiissusiassap ilusissaanut piumasaqaatit minnerpaaffilerneqarnerat, sullissisup paasissutissiisussaatitaanera, kiisalu isumaqatigiissutip imassaanut isumaqatigiissummilu piumasaqaatigineqartussanut piumasaqaatit minnerpaaffissaat, matumani ilaallutik isumaqatigiissummi piumasaqaatit imassaanni piffissap pituttorsimaffiusussap, akinik piumasaqaatinillu allannguinermi siumut ilisimatitsinissap, qularnaveeqqusiinissap, taamaatitsinissap aammalu ilaatigut atuisup tungaaniit sumiginnaasoqarneranut atatillugu attaveersinerup sivisunerpaaffissaanut piumasaqaatit minnerpaaffissaat.
2) Terminalinut atortunut teknikkikkullu atortulersuutinik immikkut ittunik atugassiissutinik atassusiinermut atuinermullu piumasaqaatit minnerpaaffissaat.
3) Atugassanik atortunillu immikkut ittunik atuisunut atugassiinissamut pisussaaffeqarneq, matumani ilaalluni atugassat atortullu taakku atuisunut akeqanngitsumik atugassiisinnaanermut, aammalu atugassat atortullu pineqartut pillugit atuisunut ilisimatitsinissamut pisussaaffeqarneq.
4) Immikkut ittumik atuisuusut, tamatumani ilaallutik innarluutillit, pisariaqartitaannik naammassinninnissaq.
  Imm. 3. Imm. 1 aamma 2 naapertorlugit maleruagassiornermi aalajangerneqarsinnaavoq pineqartut taamaallaat isumaqatigiissutinut aalajangersimasunut atuutissasut, matumani ilaallutik atuisunut inuussutissarsiutinik ingerlataqanngitsunut isumaqatigiissutit, aammalu maleruagassat isumaqatigiissutigineqareernerminni sanioqqunneqarsinnaassanngitsut.

  § 29.  Naalakkersuisut nalunaarasuartaatitigut kiffartuussissutinik atuisunut tuniniagaqartut tuniniaanerminnut atatillugu atuisut ammasumik assigiimmillu periarfissaqarfiusumik nalunaarasuartaatitigut kiffartuussivinnik tuniniagaasunik atuinissamut periarfissinneqarnissaat qulakkeerniarlugu maleruagassanik aalajangersaasinnaapput.

  § 30.  Naalakkersuisut oqarasuaatinik akiliilluni atorneqartartunik, tuniniagaqartunut oqarsuaatinik akiliilluni atorneqartartunik pilersitsinissamut ingerlatsinissamullu piumasaqaatit annikinnerpaaffissaannik  imaqartunik maleruagassiorsinnaapput.

Nalunaarasuartaatitigut attaveqaqatigiinnernik isertuussineq

  § 31.  Nalunaarasuartaatitigut attaveqaqatigiinnermut atortunik piginnittut, nalunaarasuartaatitigut attaveqarnermut atortunik imaluunniit nalunaarasuartaatitigut kiffartuussinernik tuniniagaqartut kiffartuussissummik allat atuinerat pillugu paasissutissat taakkuluunniit imaasa susassaqanngitsunit pissarsiarineqarsinnaannginnissaat qulakkeerniarlugu iliuuseqassapput.
  Imm. 2. Nalunaarasuartaatitigut attaveqaqatigiinnermut atortunik imaluunniit nalunaarasuartaatitigut kiffartuussinernik piginnittut tuniniagaqartullu, inuinnaat imaluunniit suliffeqarfiit aningaasaqarnikkut inissisimanerannut paasissutissat, suliassaminnik isumagisaqarnerminni ilisimalikkatik eqqarsaatigalugit susassaqanngitsunut pinngitsooratik nipangiussisussaatitaanertik ataqqissavaat.
  Imm. 3. Taamatut pisussaaffiliineq aammattaaq maanna sulisuusunut siornatigullu sulisorineqarsimasunut, piginnittumut imaluunniit tuniniagaqartumut sullissinerminni pissutsinik taamaattunik ilisimalersimasaqalersimasunut atuuppoq.
  Imm. 4. Pisussaaffiliineq aama atuutissaaq ikiortaallutik sulisunut immikkut ilisimasalinnut aammalu kikkunnulluunniit tamanut piginnittumik neqerooruteqartumilluunniit isumaqatiginnillutik sulilersimasumut taannalu aqqutigalugu pissutsinik taamaattunik ilisimasaqalersimasunut. Tamanna suliffeqarfimmut isumaqatigiissutaasimappat, taamatut pisussaaffiliineq sulisunut suliffimmi sulinerminni pissutsinik siuliani taaneqartunik ilisimasaqalersunut tamanut atuuppoq.

Inuit pillugit paasissutissanik suliaqarneq normunillu isertortunik ingerlatitseqqittarneq

  § 32.  Naalakkersuisut nalunaarasuartaatitigut kiffartuussinermik tuniniagaqartut nalunaarasuartaatitigut atassuteqarnermut atatillugu inuit pillugit paasissutissanik oqarasuaatillu normuinik isertortunik suliaqarnerannut maleruagassanik aalajangersaasinnaapput.

Kapitali 9
Nalunaarasuartaatitigut attaveqarneq inuiaqatigiinnut pingaarutilik

  § 33.  Naalakkersuisut nalunaarasuartaatitigut attaveqarnermi atortulersuutinik sullissisut aamma nalunaarasuartaatitigut kiffartuussissutinik sullissisut inuiaqatigiinni nalunaarasuartaatitigut attaveqarneq pingaarutilik qulakkeerniarlugu pilersaarusiortarnissaat iliuuseqartarnissaallu pillugu maleruagassanik aalajangersaasinnaapput.
  Imm. 2. Nalunaarasuartaatitigut attaveqaatit upalungaarsimanerni pisunilu allani immikkut ittuni attaveqaqatigiinnermut tunngavissiisut, matumani ilaallutik immikkut atortussiat, Namminersorlutik Oqartussanut aningaasartuutaanngitsumik atortunik immikkut ittunik pilersuinissamut pisussaaffeqassaaq. 
  Imm. 3.  Naalakkersuisut maleruagassanik imm. 1-imi taaneqartut assinginik, pisortani oqartussaasunut kiisalu pisortat namminersortullu suliffeqarfiutaannut sullissiviutaannullu atuutsinneqartussanik aalajangersaasinnaapput.

Kapitali 10
Pineqaatissiisinnaanermut aalajangersakkat

  § 34.  § 1, imm. 1-ip aamma § 7-ip unioqqutinneqarneri Kalaallit Nunaanni pinerluttulerinermut inatsimmi maleruagassat naapertorlugit akiliisussanngortitsinermik kinguneqarsinnaavoq.
  Imm. 2. § 31-p unioqqutinneqarnera Kalaallit Nunaanni pinerluttulerinermut inatsimmi maleruagassat naapertorlugit akiliisussanngortitsinermik pinerluuteqarsimasunilluunniit inissiisarfimmiittussanngortitsinermik kinguneqarsinnaavoq.
  Imm. 3. § 8, imm. 1, § 12 aamma § 23, imm. 2 naapertorlugit peqqussuteqarnerup malinneqannginnerini Kalaallit Nunaanni pinerluttulerinermut inatsimmi maleruagassat naapertorlugit akiliisussanngortitsisoqarnissaa aalajangerneqarsinnaavoq.
  Imm. 4. § 3, § 23, § 25, § 27 aamma § 29 naapertorlugit peqqussuteqarnerni Kalaallit Nunaanni pinerluttulerinermut inatsimmi maleruagassat naapertorlugit akiliisussanngortitsisoqarnissaa aalajangerneqarsinnaavoq.
  Imm. 5.Inatsisartut inatsisaanni imaluunniit Inatsisartut inatsisaat naapertorlugu peqqussitini akiligassanngortitsinissap aalajangerneqarnissaa inatsisitigut tunngavissinneqarpat, Kalaallit Nunaanni pinerluttulerinermut inatsimmi maleruagassat naapertorlugit suliffeqarfinnut akiliisussanngortitsisoqarsinnaavoq.
  Imm. 6. Imm. 1-5 naapertorlugit suliat Kalaallit Nunaata Eqqartuussivianut siullertut suliakkiissutigineqartassapput.
  Imm. 7. Imm. 1-5 naapertorlugit akiligassiinerit Nunatta karsianut nakkartinneqassapput.

  § 35.  Inatsisartut inatsisaanni matumani imaluunniit taanna naapertorlugu peqqussutini aalajangersakkanik unioqqutitsinerni Pinerluttulerineq pillugu inatsimmi arsaarinninnermut malittarisassat taamatuttaaq atuutissapput.
  Imm. 2. Imm. 1 naapertorlugu arsaarinnissutit Nunatta karsianut nakkartinneqassapput.

Kapitali 11
Atulerfissaanut aalajangersakkat il.il.

  § 36.   Inatsisartut inatsisaat manna atuutilerpoq ulloq 31. januar 2018-imi.
  Imm. 2. Tamatumunnga peqatigitillugu nalunaarasuartaatitigut attaveqarneq sullissinerillu pillugit Inatsisartut peqqussutaat nr. 17 20. novembari  2006-imeersoq atorunnaarsinneqarpoq.
  Imm. 3.  Allaffissornikkut peqqussutit, Inatsisartut peqqussutaanni taaneqartumi imm. 2 naapertorlugu atulersinneqartut imaluunniit atuutsiinnarneqartut Inatsisartut Inatsisaat manna naapertorlugu taarserneqarnissamik atorunnaarsinneqarnissamilluunniit tungaanut atuutiinnassapput.

  § 37.    Danskit-amerikamiut illersornissamut suliassaqarfiinut Inatsisartut peqqussutaat nr. 10, 28. oktober 1993-imeersoq, danskit-amerikamiut illersornissamut suliassaqarfiini nalunaarasuaartaatitigut attaveqaqatigiinneq aamma nalunaarasuartaatitigut sullissinerit pillugit Namminersornerullutik Oqartussat nalunaarutaatigut nr. 31-ikkut, 10. august 2001-imeersukkut, isumaqatigiissut 27. april 1951-imeersoq naapertorlugu atuutsinneqalersoq tunngavigalugu atuutsinneqalersoq atuutiinnassaaq, imm. 2 naapertorlugu Inatsisartut peqqussutaata matuma atuutilernissaata tungaanut.
  Imm. 2. Inatsisartut peqqussutaat manna Kalaallit Nunaannut inatsimmi nr. 1089-imi, 29. december 1997-imeersumi § 3 naapertorlugu aamma ilinniartitaanermut Ilisimatusarnermullu Ministerip isumaqatigiissuteqarfigineratigut danskit amerikamiullu ataatsimut illersornissamut suliaqarfiinut, Kalaallit Nunaanni illersornissaq pillugu aalajangersagaq 27. august 1951-imeersoq naapertorlugu pilersinneqarsimasunut atuutsinneqalersinnaavoq.

Namminersorlutik Oqartussat, ulloq 23. november 2017

Kim Kielsen