Nukissamik pilersuineq pillugu Inatsisartut peqqussutaat nr. 14, 6. november 1997-imeersumi § 18, imm. 3, aamma § 21 naapertorlugit makku aalajangersarneqarput:

Kapitali 1
Atuuffia

  § 1.  Nalunaarummut ilaapput pilersuiviit innaallagissamik, imermik ataatsimoortumillu kiassarnermik pisortat pilersuiviinut pissarsiniartarnermik, ingerlatseqqittarnermik, tunisassiornermik siammarterisarnermillu suliaqartut.

  § 2.  Nalunaarut inunnut namminneq atuisartunut nalinginnaasutullu inuussutissarsiorfimmi niuerfigisanut assigiissitanik akigititanik, kiisalu agguataakkanik naatsorsuusiornermut atugassamik pilersuiviit aningaasartuutit agguataarnissaannut aalajangersaavoq.

Kapitali 2
Akigititamut allattuiffimmi immikkoortukkuuttaanut akigititap aalajangersarnera

  § 3.  Akigititamut allattuiffimmi niuerfigisaqatigiit 1-ip malitsigisaanik illoqarfinni nunaqarfinnilu inuit namminneq atuisartut aamma nalinginnaasutut inuussutissarsiorfimmi niuerfigisat innaallagissamut imermullu assigiissitanik akigititanik akiliissapput, takuuk ilanngussaq 1.
  Imm. 2.  Aalisakkanik suliffissuaqarfimmut akigitanut ilaasutut niuerfigisanut inuit namminneq atuisartut aamma nalinginnaasutut inuussutissarsiorfimmi niuerfigisat ilaanngillat, takuuk § 4.

§ 4.  Akigititamut allattuiffimmi niuerfigisaqatigiit 2-p malitsigisaanik illoqarfinni nunaqarfinnilu ataasiakkaani tamani innaallagissamut imermullu aalisakkanik suliffissuaqarfimmut akigititaq aalajangersarneqarpoq, takuuk ilanngussaq 1.

  § 5.  Kingusinnerpaamik ukiup atuuttup naanerani akigititanut allattuiffimmi akigititat ukiut tamaasa aalajangerneqartassapput, takuuk ilanngussaq 1.
  Imm. 2.  Akigititanut allattuiffimmut allaqqaagaq kingusinnerpaamik ukiumi atuuttumi decembarimi Naalakkersuisunit akuersissutigineqassaaq.

Kapitali 3
Agguaassinermut naatsorsuutit

Sumiiffikkaarlugu ukiumoortumik suliarinnittarneq

  § 6.  Pilersuiviit ataasiakkaat ukiut tamaasa agguaassinermut naatsorsuusiortassapput ukiumoortumik naatsorsuutini paasissutissaatit assingi toqqammavigalugit, sumiiffinnut tamanut ataasiakkaanut atuuttunik, takuulli imm. 3. Sumiiffittut paasineqartassapput illoqarfiit ataasiaakkaat aamma nunaqarfiit ataasiakkaat.
  Imm. 2.  Illoqarfiit marluk arlallilluunniit tunisassiornermik siammaterinermillu pilersuivimmiit ataatsimit pilersorneqartarpata, tamakku sumiiffittut ataatsitut naatsorsuutigineqassapput.
  Imm. 3.  Pilersuivinnik ataasiakkaani agguaassinermut naatsorsuutinut, imm. 1-imi aalajangersarneqartunut attuumassuteqartunik ilassutitut nalunaarsuinernik aamma misissueqqissaarinernik suliaqarnissaannik Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik peqqusisinnaavoq.

  § 7.  Agguaassinermut naatsorsuutit illoqarfinni nunaqarfinnilu Nukissiorfiit najuuffigisaanni pilersuiffigisaanilu naatsorsorneqartassapput.

Kapitali 4
Periusissatut tunngaviit

Ingerlatsinermi sanaartornermilu aningaasartuutit

  § 8.  Agguaassinermut naatsorsuutinut ilaapput pilersuiviit ataasiakkaat ingerlatsinermi sanaartornermilu aningaasartuutaat imatut paasineqartussat:
1)  Toqqaannartumik toqqaannartuunngitsumillu aningaasartuutit, taakkununnga ilanngullugit sulisunut, naammassisaqarsinnaassutsikkut aningaasartuutinut, isumakkeerisarnernut, nioqqutissanik atuinermut, ernianut il.il. aningaasartuutit.
2)  Pilersuiviup nammineerluni akilersuutigisartagai.

Aningaasartuutit

  § 9.  Aningaasartuutit imatut agguataarneqartassapput:
1)  Annertussutsit pilersuutigineqartut aallaavigalugit agguaassisoqartassaaq, annertussutsilli akiligassiissutigineqarsimasut atorneqartassapput, annertussutsinut pilersuutigineqartunut tatiginartunik paasissutissaqanngippat.
2)  Innaallagissamut, imermut kiassarnermullu toqqaannartumik aningaasartuutit isertitallu assigiinngitsut toqqaannartumik innersuunneqarsinnaasut illoqarfinnut nunaqarfinnullu ataasiakkaanut naatsorsuutinut ilaatinneqartassapput.
3)  Immikkoortortaqarfinnut, illoqarfinni nunaqarfinni assigisaannilu nukissiorfeqarfinnut ataatsimoorussamik aningaasartuutit agguataarneqartassapput innaallagissamik, imermik kiassarnermillu pilersuinermut immikkoortortaqarfinni, innaallagissamut imermut kiassarnermullu sulisunut, naammassisaqarsinnaassutsimut isumakkeerisarnernullu aningaasartuutit malillugit. Qitiusumik allaffeqarfimmut aningaasartuutit, nukissiorfeqarfiit sulisuinut, naammassisaqarsinnaassutsimut immikkoortortaqarfinnilu ataasiakkaani isumakkeerisarnernut tamakkiisumik aningaasartuutit malillugit, innaallagissamik, imermik kiassarnermillu pilersuinermut agguataarneqartassapput. Tamatuma kingorna aningaasartuutit immikkoortortaqarfinni ataasiakkaani pilersuutigineqartut naapertorlugit illoqarfinnut nunaqarfinnullu agguataarneqartassapput. Qitiusumik allaffeqarfimmit tamakkiisumik agguataarisinnaaneq periarfissaqassanngippat, qitiusumik allaffeqarfimmi aningaasartuutinik ilanngaassineq pisinnaasaaq tunngavilersorluakkamik missingersuineq tunngavigalugu.
4)  Agguaassinermut naatsorsuutini Namminersorlutik Oqartussanut akiliutit, taakku ataanni kiffartuussinermut isumaqatigiissutinut akiliut, ilanngunneqassanngillat. Taamaattorli Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik tamatumunnga akuersissuteqassappat akiliutit ilanngunneqarsinnaapput.

Suliffeqarfimmi namminermi akilersuisarneq

  § 10.  Suliffeqarfimmi namminermi innaallagissamut, imermut kiassarnermullu akilersuisarneq imatut ingerlanneqassaaq:
1)  Tunisassiorfinnit siammarterivinnit allanit innaallagiaq, imeq kiassarnerlu pissarsiarineqartarpata tamanna akilersorneqartassaaq atuisumut aningaasartuutit sipaarutaasut aallaavigalugit. Taamatut akilersuisarneq nuna tamakkerlugu agguaqatigiissitsisimanermit tunngaveqartinneqassaaq.
2)  Erngup nukissiorfimmit innaallagiaq kiassarnerlu sinneruttoq pissarsiarineqartassaaq suliffeqarfimmi 0,01 kWh-tut akilersuinermi aki naapertorlugu.
  Imm. 2.  Kangerlussuarmut Narsarsuarmullu atuuppoq, nunap sinneranisut suliffeqarfimmi akilersuisarnermi aki atorneqartoq atorneqartassammat.

Ilanngaaseereerluni erniat

  § 11.  Ilanngaaseereerluni erniat agguataarneqartassapput ukiup naanerani illoqarfinnut nunaqarfinnullu innaallagissamik, imermik kiassarnermillu pilersuinermut sanaartukkat nalingi naatsorsuutini allanneqarsimasup nalinga naapertorlugu.

Isumakkeerisarnerit

  § 12.  Isumakkeerisarnerit, taakkununnga ilanngullugit nalikilliliinerit naleqarnerulersitsinerit, pilersuiviit ukiumoortumik naatsorsuutaannut maleruagassat naapertorlugit ilanngunneqartassapput.
  Imm. 2.  Agguaassinermut naatsorsuutitigut takuneqarsinnaassaaq, pigisat sorliit isumakkeerneqarsimannginnersut.

Kapitali 5
Immikkoortukkuutaanut aningaasartuutit naatsorsorneqartarnerat

  § 13.  Immikkoortukkaanut aningaasartuutit naatsorsorneqartassapput agguataarneqartussanik naatsorsuutini aningaasartuutit naatsorsorneqarsimasut annertussutsinik pilersuutigineqarsimasunik agguarlugit, annertussutsit akiligassiissutigineqarsimasut ikiorsiullugit.
  Imm. 2.  Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfiup nalunaarutigisinnaavaa, suli aningaasartuutitigut kisitsisinik allanik naatsorsuisoqassasoq.

Kapitali 6
Allaffissorneq

  § 14.  Agguaassinermut naatsorsuutit Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfimmut nassiunneqassapput.

Kapitali 7
Atuutilernera il.il.

  § 15.  Nalunaarut manna 1. januar 2018-imi atuutilerpoq.
  Imm. 2.  Tamanna ilutigalugu Innaallagissamut, imermut ataatsimoortumillu kiassarnermut immikkoortukkaanut aningaasartuutit naatsorsorneqartarnerini aningaasartuutit agguataarneqartarnissaannut periusissatut tunngavissanik aalajangersaasarneq pillugu Namminersornerullutik Oqartussat nalunaarutaat nr. 12, 10. august 2006-imeersoq atorunnaarpoq.

Namminersorlutik Oqartussat, ulloq 22. december 2017

Hans Enoksen

/

Jørn Skov Nielsen