Meeqqat tapersersorneqarnissaannut Inatsisartut inatsisaanni nr. 20, 26. juni 2017-imeersumi § 37, imm. 7 aamma § 39, imm. 6 aalajangersarneqarput:

 

Kapitali 1
Kommunip aaqqissuussaanik ilaqutariit paarsisartut

  § 1.  Ilaqutariit qanigisaasut paarsisartut tassaapput, ilaqutariit namminneq angerlarsimaffimminni meeqqamut aalajangersimasumut qanigisaanertik pissutigalugu paarsisartut, meeqqamik isumassuisuullutillu paarsisuusut, imaluunniit Meeqqat tapersersorneqarnissaannut Inatsisartut inatsisaat naapertorlugu imaluunniit Inuit innarluutillit tapersersorneqarnissaannut Inatsisartut inatsisaat naapertorlugit oqilisaanneqartussamik isumassuisuullutillu paarsisuusut.
  Imm. 2.  Ilaqutariit qanigisaasut paarsisartut angajoqqaatut akisussaassuseqarnermik ilaqutariilluunniit inoqutaannik allanik ulloq unnuarlu najugaqartitsisinnaanngillat.

  § 2.  Ilaqutariit kommunip aaqqissuussaanik paarsisartut, tassaapput ilaqutariit meeqqamik ilaqutariinnut inissinneqarsimasumik, imaluunniit Meeqqat tapersersorneqarnissaannut Inatsisartut inatsisaat naapertorlugu imaluunniit Inuit innarluutillit tapersersorneqarnissaannut Inatsisartut inatsisaat naapertorlugit oqilisaanneqartussamik isumassuisuullutillu paarsisuusut.
  Imm. 2.  Aamma ilaqutariit kommunip aaqqissuussaanik paarsisartut angajoqqaatut oqartussaassuseqartumik ilaqutariilluunniit inoqutaannik allanik ulloq unnuarlu najugaqartitsisinnaapput.

  § 3.  Ilaqutariit kommunip aaqqissuussaanik inuussutissarsiutigalugu paarsisartut tassaapput, ilaqutariit paarsisartut arlaat pinngitsoorani isumaginninnermik ilinniarsimasuusoq allatul­luunniit isumaginninnermut sanilliunneqarsinnaasumik misilittagaqartuusoq.
  Imm. 2.  Angajoqqaarsiat arlaat isumaginninnikkut assigisaanilluunniit ilinniarsimasuusoq,  taamaallaat allamik inuussutissarsiutigalugu suliffeqarsinnaavoq piffissami meeqqap paarineqartup meeqqalluunniit paarineqartut ulluunerani paaqqinnittarfimmiinneranni atuarneranniluunniit.

Kapitali 2
Ilaqutariinnut paarsisartunut akuersissut

  § 4.  Ilaqutariit paarsisartut, ilaqutariinnut paarsisartunut akuersissummik peqarunik aatsaat meeqqamik ataatsimik tigusisinnaallutillu paarsaqarsinnaapput.
  Imm. 2.  Ilaqutariinnut paarsisartunut akuersissut kommunimi ilaqutariit paarsisartut najugarisaanni kommunalbestyrelsimit tunniunneqassaaq.
Imm. 3. Ilaqutariinnut paarsisartunut akuersissut allakkatigut tunngavilersorlugu nalunaarutigineqassaaq. Ilaqutariit paarsisartut meeqqanik qassinik tigusisinnaanerat ilaqutariinnut paarsisartunut akuersissummi allaqqassaaq.

  § 5.  Kommunalbestyrelsip ilaqutariinnut paarsisartunut akuersissummik tunniussaqarnissamik aalajangiinermini ilaqutariinnut qinnuteqartunut ilaqutariit katitigaanerat pillugu pissutsit misissuinermi tunngavigissavaa. Kommunalbestyrelsip misissuinermini, ilaqutariit pineqartut meeqqamik ataatsimik arlaqartunilluunniit paarsassanik tigusinissamut qanoq naleqqutsiginerat nalilissavai.
  Imm. 2.  Kommunalbestyrelsip imm. 1 malillugu misissuinermini pissutsit ilaatigut makkua ilaqutariit qanoq naleqqutsiginerannik naliliinermi ilanngutissavai:
1) Ilaqutariit ilaqutariittut atugaat.
2) Ilaqutariit ilinniagaat.
3) Ilaqutariit suliffeqarnerannut tunngasut.
4) Angajoqqaat inooqatigiinnerat.
5) Angajoqqaat ukiui.
6) Angajoqqaat meeraqarsimappata taakku matumani aamma qassiuneri ukiuilu.
7) Ilaqutariit attaveqarfii.
8) Ilaqutariit ineqarnerannut tunngasut, matumani aamma angerlarsimaffik peqqinnissaq eqqarsaa­tigalugu isumannaatsuunersoq.
9) Ilaqutariit angerlarsimaffiata avatangiisii, matumani aamma sunngiffimmi periarfissat, atuarfik il.il.
10) Ilaqutariit peqqissusiannut tunngasut.
11) Pinerluuteqarsimanermut tunngasut.
12) Ilaqutariit aanngajaarniutinik atuinerat.
13) Ilaqutariit aningaasaqarnerannut tunngasut.
14) Angajoqqaat perorsaaneq pillugu isumaat.
15) Ilaqutariit paarsisuunissamik akuersissummik qinnuteqarnerat sumik tunngaveqarlunilu pissuteqarnersoq.
  Imm. 3.  Ilaqutariit inuussutissarsiutigalugu paarsisartuunissamik qinnuteqarsimappata, kommunalbestyrelsip aammattaaq nalilissavaa, angajoqqaat arlaat pinngitsoorani isumaginninnermik ilinniarsimasuunersoq allatulluunniit isumaginninnermut sanilliunneqarsinnaasumik misilittagaqartuunersoq.
  Imm. 4.  Imm. 2, nr. 10 malillugu kommunalbestyrelsip ilaqutariinni inoqutaasut ilaat ataaseq arlaqartulluunniit peqqissutsimut uppernarsaammik qinnuigisinnaavai, tamanna naliliinermut atatillugu pisariaqarsorineqarpat. Peqqissutsimut uppernarsaat qaammatinit 3 pisoqaanerussanngilaq.
  Imm. 5.  Kommunalbestyrelse Pinerluuteqarsimasunik Nalunaarsuiffimmit uppernarsaammik kiisalu ilaqutariinni inoqutaasunut 15-inik taakkualuunniit sinnerlugit ukiulinnut tamanut tunngatillugu meeqqanik pinerliisimannginnermut uppernarsaammik imm. 2, nr. 11 malillugu naliliinermut atatillugu piniassaaq.
  Imm. 6.  Imm. 2, nr. 12 naapertorlugu kommunalbestyrelsip aanngajaarniutinik atuisuunermik misissuineq naliliinermut atatillugu aallartissavaa. Kommunalbestyrelsip aanngajaarniutinik atuisuunermik misissuinissaq sioqqullugu, inuk aanngajaarniutinik atuisuunermik misissortittussaq akuersiseqqaassavaa. Aanngajaarniutinik atuisuunermik misissuineq peqqinnissaqarfimmi periusiusut nalinginnaasut malillugit tamatigut pisassaaq.
  Imm. 7.  Imm. 2, nr. 13 malillugu kommunalbestyrelsip ilaqutariit aningaasaqarnerat meeqqat ilaqutariinnit paarineqartussatut inissinneqartut aalajaatsumik atugaqarnissaannik tunngavissiinersoq naliliinermut atatillugu qulakkiissavaa.

  § 6.  Inoqutaasut arlaat eqqartuunneqarsimappat imaluunniit eqqartuussinertaqanngitsumik aalajangiisoqarsimappat, taassuma ataani akiligassinneqarsimappat, Kalaallit Nunaanni pinerluttulerinermi inatsimmi kapitali 17-18 pinerluuteqarsimasutut akiligassinneqarsimappat ilaqutariinnut paarsisartunut kommunalbestyrelse akuersissummik tunniussaqarsinnaanngilaq.
  Imm. 2. Inoqutaasut arlaat Kalaallit Nunaanni pinerluttulerinermi inatsimmi kapitali 9-11, 15 imaluunniit 19-20 pinerluute­qarsimasutut ukiut qulit kingulliit iluanni pineqaatissinneqarsimappat imaluunniit eqqartuussinertaqanngitsumik aalajangiisoqarsimappat, taassuma ataani akiligassinneqarsimappat ilaqutariinnut paarsisartunut kommunalbestyrelse akuersissummik tunniussaqarsinnaanngilaq. Piffissaq eqqartuussinermi suliap naammassineqarnerata nalunaarutigineqarneranit naatsorsorneqassaaq.
  Imm.3. Inoqutaasut arlaat eqqartuunneqarsimappat imaluunniit eqqartuussinertaqanngitsumik aalajangiisoqarsimappat, Kalaallit Nunaanni pinerluttulerinermi inatsimmi kapitali 9-11-mut, 15-imut imaluunniit 19-20-mut pinerluuteqarsimasut, aamma imm.2 malillugu piffissaq qaangiussimappat, ilaqutariinnut paarsisartunut kommunalbestyrelse akuersissummik tunniussa­qarsinnaanngilaq, naliliinermi aalajangersimasumi isumaqartoqarpat, ilaqutariittut paarsisartuunissamut pingaaruteqartoq.
  Imm. 4.  Ilaqutaasut arlaat ukiut kingulliit tallimat iluanni allatut ittumik pinerluuteqarsimappat imaluunniit pinerluutinik allanik pinerluuteqarsimappat eqqartuussinertaqanngitsumik aalajangiisoqarluni, taassumalu ataani akiligassinneqarsimappat, ilaqutariinnut paarsisartuunissamut akornutaasussamik, kommunalbestyrelse akuersissummik tunniussaqarsinnaanngilaq. Piffissaq inaarutaasumik nalunaarutigineqarneraniit naatsorsorneqassaaq.

  § 7.  Kommunalbestyrelse ilaqutariinnut paarsisartunut akuersissuteqarnissamini piumasaqaatinik aalajangersaasinnaavoq. Makkua pillugit piumasaqaatit aalajangersarneqarsinnaapput:
1) Ilaqutariinnut paarsisartunut tunngasut.
2) Meeqqat ilaqutariit paarsassamissut tigusinnaasaasa amerlassusissaat.
3) Meeqqat ilaqutariit paarsassamissut tigusinnaasaasa qanoq pisariaqartitsitiginissaat.
  Imm. 2.  Imm. 1 malillugu piumasaqaatit siunertaasumit oqimaannerussanngillat.

§ 8. §§ 1-3-mut naapertorlugit ilaqutariit paarsisartut ilaqutariinni pissutsinik pillugit allannguuteqartoqartillugu kommunalbestyrelsimut piaartumik nalunaaruteqarnissamut pisussaaffeqarput, § 4, imm. 2 naapertorlugu kommunalbestyrelsimut ilaqutariittut paarsisartuunissamut akuersissuteqartumut.

Ilaqutariinnut paarsisartunut akuersissummik utertitseqqusineq

  § 9.  § 4 naapertorlugu ilaqutariinnut paarsisartunut akuersissummi piumasaqaatit atuukkunnaarsimappata akuersissutip utertinneqarnissaa kommunalbestyrelsip ilaqutariit najugaqarfigisaaniittup aalajangissavaa.
  Imm. 2. Akuersissutip utertinneqarnissaa kommunalbestyrelsip ilaqutariinnik paarsisartunik nakkutilliineranut atatillugu, imaluunniit kommunalbestyrelsip ilaqutariinnut paarsisartunutakuersissummi piumasaqaatit atuukkunnaarsimanerat allatigut paasippagu atorunnaarsinneqarsinnaavoq.
  Imm. 3.  Kommunalbestyrelsip ilaqutariinnut paarsisartunutakuersissutip utertinneqarnissaanik aalajangiisup kommunalbestyrelse kommunalbestyrelsilluunniit, meeqqamik ilaqutariinnut inissiinissamik aalajangiisimasut sapinngisamik piaarnerpaamik ilisimatissavai.
  Imm. 4.  Kommunalbestyrelsip ilaqutariinnut paarsisartunutakuersissummik utertitsinissamik aalajangiinermini, meeqqap meeqqalluunniit ilaqutariinnit paarsarineqartut nuutsinneqarnissaannut piffissaliussaq naammaginartumik sivisussusilik aalajangissavaa. Piffissaliussaq meeqqap ukiuminut naleqquttumik sutigut tamatigut alliartorneranut, peqqissusaanut ineriartorneranullu naleqquttumik, nutaanik inissiivissanik tulluartunik nassaarnissaq kiisalu pissutsit ilaqutariinnut paarsisartunutakuersissummik atorunnaarsitsinissamut pissutaasut eqqarsaatigalugit aalajangerneqassaaq.

  § 10.  Ilaqutariit paarsisartut pikkorissarnerni ilinniaqqinnernilu §§-ini 17-imi 18-imilu pineqartuni peqataasarnissamik piumasaqaatinik eqquutsitsinngippata ilaqutariinnut paarsisartunut akuersissutip utertitsinneqarnissaa kommunalbestyrelsip aalajangissavaa.
  Imm. 2.  Kommunalbestyrelsip imm. 1 malillugu utertitsinissamik aalajangiisoqannginnerani ilaqutariit paarsisartut, pikkorissarnerni ilinniaqqinnernilu §§-ini 17-imi 18-imilu pineqartuni peqataasarnissamik piumasaqaatit qanoq eqquutsinneqarsinnaanerat pillugu oqaloqatigeqqaassavai.
  Imm. 3.  Ilaqutariinnut paarsisartunutakuersissutip utertitsinissaanik imm. 1 malillugu aalajangiinermi § 9, imm. 4 aamma 5 atuutissapput.

  § 11.  Ilaqutariit paarsisartut piffissami ukiunik 3-nik sivisunerusumik meeqqanik paarsaqarsimanngippata, ilaqutariinnut paarsisartunutakuersissutip utertitsinissaa kommunalbestyrelsip aalajangissavaa.

Kapitali 3
Paarsisuunissamut akuersissut aamma ilaqutariinni paarsisartuni inissiinermut isumaqatigiissut

Paarsisuunissamut akuersissut

  § 12.  Ilaqutariit kommunip aaqqissuussaanik paarsisartut, meeqqamut pineqartumut paarsisuunissamut akuersissummik peqarunik aatsaat meeqqamik ataatsimik tigusisinnaallutillu paarsisinnaapput.
  Imm. 2.  Paarsisuunissamut akuersissut allakkatigut tunngavilersorlugu nalunaarutigineqassaaq.

  § 13.  Kommunalbestyrelsip paarsisuunissamut akuersissummik tunniussaqarnissamik aalajangiinermini, ilaqutariit pineqartut meeqqap tapersersorneqarnissa­mik, isumassorneqarnissamik paarineqarnissamillu pisariaqartitaanik naammassinninnissamut qa­noq naleqqutsiginerat nalilissavaa. Kommunalbestyrelsip naliliinermini ilaatigut ilanngutissavai:
1) § 4. Imm. 3 naapertorlugu meeqqat ilaqutariit paarsarisinnaasaasa amerlassusiat, ilaqutariinnut paarsisartunut akuersissum­mi allassimasoq.
2) Meeqqat ilaqutariit paarsassatut inissinneqareersimasut amerlassusaa.
3) Meeqqap tapersersorneqarnissamik, isumassorneqarnissamik paarineqarnissamillu pisariaqarti­tai.
4) Ilaqutariit meeqqap tapersersorneqarnissamik, isumassorneqarnissamik paarineqarnissamillu pisariaqartitaanik naammassinninnissamut piginnaasaat.
5) Meeqqap inatsisit allat, naapertorlugit tapersersorneqarnissamik pisariaqartitsinera, meeqqallu ilaqutariinni paarsisartuni taamatut tapersersorneqarnissaminut periarfissai.

  § 14. § 12 naapertorlugu ilaqutariit paarsisartut ilaqutariinni pissutsinik pillugit allannguuteqartoqartillugu kommunalbestyrelsimut imaluunniit kommunalbestyrelsinut piaartumik nalunaaruteqarnissamut pisussaaffeqarput kommunalbestyrelsimut meeqqamut aalajangersimasumut ilaqutariittut paarsisartuunissamut akuersissuteqartumut.

Paarsisuunissamut akuersissummik atorunnaarsitsineq

  § 15.  § 12 naapertorlugu paarsisuunissamut akuersissummi piumasaqaatit atuukkunnaarsimappata, matumani pingaartumik aamma meeqqap najugaqarnini iluaqutiginngippagu akuersissutip utertitsinneqarnissaa kommunalbestyrelsip inissiisup aalajangissavaa.
  Imm. 2.  Meeqqat tapersersorneqarnissaannut Inatsisartut inatsisaat § 8, imm. 2 naapertorlugu, meeqqap ilaqutariinni najugaqarnerani kommunalbestyrelsip nakkutilliineranut atatillugu,imaluunniit kommunalbestyrelsip paarsisuunissamutakuersissummi piumasaqaatit atuukkunnaarsimanerat allatigut paasippagu akuersissutip utertitsinneqarnissaa aalajangersinnaavaa.
  Imm. 3.  Kommunalbestyrelsip paarsisuunissamutakuersissutip utertitsinneqarnissaanik aalajangiisup, kommunalbestyrelse ilaqutariinnut paarsisartunut akuersissummik ilaqutariinnut tunniussisimasoq tuaviornerpaamik ilisimatissavaa.
  Imm. 4.  Kommunalbestyrelsip paarsisuunissamikakuersissummik utertitsinissamik aalajangiinermini, meeqqap ilaqutariinnit paarsarineqartup nuutsinneqarnissaanut piffissaliussaq naammaginartumik sivisussusilik aalajangissavaa. Meeqqap pisariaqartitaanut naapertuuttumik piffissaliussaq inissinneqassaaq, meeqqamik inissiivissatut naleqquttumik nassaarsinnaaneq, kiisalu pissutsit paarsisuunissamutakuersissummik atorunnaarsitsinermut pissutaasut eqqarsaatigalugit aalajangerneqassaaq.
  Imm. 5.  Kommunalbestyrelsip meeraq tuaviornerpaamik ilaqutariinnit paarsisartunit peersissavaa, tunngavilersukkamik pasitsaassaqartoqarpat meeqqap ukiuminut naleqquttumik sutigut tamatigut alliartornerata, peqqissusaata ineriartorneratalu ajoqusersinnaanera pasitsaanneqarpat makkuninnga:
1) meeqqap naammanngitsumik isumassorneqarnera imaluunniit passunneqarnera,
2) timikkut tarnikkullu persuttaaneq, paarsinerlunneq kinguaassiuutitigulluunniit innarliineq,
3) atuipilunnermik ajornartorsiutit, pinerlunniartutut pissusilersornerit allatigulluunniit meeqqap inooqataanerani meeqqap avangiisaani ajornakusoorutit annertuut imaluunniit,
4) meeqqap nammineq imaluunniit meeqqap avangiisaani allatigut pissusilersornerani naleqqussarniarneraniluunniit ajornartorsiutit.

Ilaqutariinni paarsisartuni inissiinermut isumaqatigiissut

§ 16. Meeqqap ilaqutariittut paarsisartuni inissinnginnerani, kommunalbestyrelse pisussaavoq ilaqutariinni paarsisartuni inissiinermut isumaqatigiissutip suliarineqarnissaa atsiortinnissaalu isumagissallugu.
  Imm. 2. Ilaqutariinni paarsisartuni inissiinermut isumaqatigiissut aalajangersakkanik minnerpaamik makkuninnga imaqassaaq:
1) §§ 21-22 naapertorlugit paaqqinninnersiutit
2) aningaasartuutaasinnaasut immikkut ittut allat
3) taamaatitsinermut malittarisassat
4) sillimmasiinermut tunngasut
5) meeqqamik suleqateqarnissaq
6) suliamillu ilisimasalinnit ikorfartuineq
7) nakkutilliineq, ilitsersuineq ilinniartitsinerlu.

 

Kapitali 4
Ilinniartitsineq ilitsersuinerlu

Tunngaviusumik pikkorissarneq

  § 17.  § 1-3-mut naapertorlugit ilaqutariit paarsisartut Isumaginninnermut Aqutsisoqarfiup tunngaviusumik pikkorissartitsinera naammassisimassavaat. Angajoqqaarsiat tamarmik pikkorissarneq naammassisimassavaat.
  Imm. 2.  § 5 naapertorlugu ilaqutariit paarsisartut, ilaqutariinnut paarsisartunut akuersissutip siullermeersumik tunniunneqarneranut atatillugu tunngaviusumik pikkorissarnermik naammassinnissimassapput. Imaappoq ilaqutariit paarsisartut piffissap akuersissummik peqanngiffimmik kingorna ilaqutariinnut paarsisartunut akuersissummik nutaamik qinnuteqarunik tunngaviusumik pikkorissaqqissanngillat. Pissutsilli immikkut ittut atuutsillugit taamaaliornissaq kommunalbestyrelsip piumasarisinnaavaa.
  Imm. 3.  Ilaqutariit meeqqanik paarsassaannik tigusitinnagit tunngaviusumik pikkorissarneq naammassineqarsimassaaq, pissutsit immikkut ittut atuutinngippata. Ilaqutariit paarsisartut pikkorissarneq suli naammassineqanngitsoq meeqqamik tigusippata, tamatuma kingorna sapinngisamik piaarnerpaamik pikkorissartinneqassapput.
  Imm. 4.  Tunngaviusumik pikkorissarnerup sivisussusaata innerpaamik ullut pikkorissarfiusut ilivitsut 4 naligissavai.
  Imm. 5.  Tunngaviusumik pikkorissarnermut aningaasartuutit, tamatuma ataani angalanermut akunneqqanermullu aningaasartuutit, kommunalbestyrelsimit pikkorissartitsisumit ilaqutariit paarsisartut najugaqarfigisaannit akilerneqassapput.
  Imm. 6.  § 10 naapertorlugu, tunngaviusumik pikkorissarnermik naammassinnissimannginneq ilaqutariinnut paarsisartunut akuersissutip utertitsinneqarnissaanik aalajangernissamut tunngaviusinnaavoq.

Ilinniaqqinneq

  § 18.  § 4 naapertorlugu kommunalbestyrelsip paarsisuunissamut akuersissummik ilaqutariinnut paarsisartunut tun­niussaqartup, ilaqutariit paarsisartut ilinniaqqinnissaannik neqeroorfigissallugit pisussaaffigivaa. Ilaqutariit paarsisartut ilinniaqqinnermut peqataanissartik pisussaaffigaat.
  Imm. 2.  Imm. 1 malillugu ilinniartitseqqinneq ukiumut ataasiarluni Isumaginninnermut Aqutsisoqarfimmit ingerlanneqartassaaq.
  Imm. 3.  Ilinniaqqinnermut aningaasartuutit, matumani angalanermut akunneqqanermullu aningaasartuutit kommunalbestyrelsimit akilerneqassapput.

Ilitsersuineq suliamillu ilisimasalinnit ikorfartorneqarneq

  § 19.  § 12 naapertorlugu kommunalbestyrelsi paarsisuunissamut akuersissummik tunniussaqartup ilaqutariit paarsisartut paarsinermi suliassamut naapertuuttumik ilitsersorneqarnissaannik suliamillu ilisimasalinnit ikorfartorneqarnissaannik neqeroorfigis­sal­lu­git pisussaaffigaa. Ilaqutariit paarsisartut ilitsersuinermi peqataanissartik pisussaaffigaat.
  Imm. 2.  Meeraq kommunimi allami ilaqutariinni paarsisartuni inissinneqarpat, kommune inissiiviusimasoq kommunalbestyrelsimut ilaqutariit paarsisartut kommunemi najugaqarfigisaanni isumaqatigiissusiorsinnaavoq, ilaqutariit paarsisartut pisariaqartitaannik ilitsersuinermik tapersersuinermillu kommunalbestyrelsi sinnerlugu neqeroorfigissagai.
  Imm. 3.  Imm. 2 naapertorlugu, isumaqatigiissuteqartoqarsimappat ilitsersuineq suliamillu ilisimasalinnit ikorfartorneqarnissamik, kommune inissiiviusoq nakkutilliinissaminut pisussaaffilerneqassaaq, imm. 1 naapertorlugu ilaqutariit paarsisartut ilitsersorneqarnissamik suliamullu tunngasumik tapersersorneqarnissamik neqeroorfigineqarnissaat paarsinerup suliassartaata annertoqataanut naapertuuttumik.

Kapitali 5
Aningaasanut tunngasut

Nerisassarsiutissat, kaasarfimmiussat atisassarsiutissallu

  § 20.  Kommunalbestyrelse meeqqamik ilaqutariinnut paarsisartunut inissiisoq, nerisassarsiutissanik, kaasarfim­miussanik atisassarsiutissanillu ilaqutariinnut paarsisuusunut, meeqqap pilersorneqarneranut atugassanik tunniussaqartassaaq.
  Imm. 2.  Nerisassarsiutissat, kaasarfimmiut atisassarsiutissallu qaammatikkaartumik siumoortumik tunniunneqartassapput.
  Imm. 3.  Nerisassarsiutissat, kaasarfimmiut atisassarsiutissallu taaneqartut amerlassusissaat ukiumut ataasiartumik Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfimmit annertussusilerneqartarput.

Ilaqutariit paarsisartut aningaasarsiaat

  § 21.  Imm. 2 naapertorlugu kommunalbestyrelsip inissiisup ilaqutariit paarsisartut paaqqinninnersiuteqartissavai. Paaqqinninnersiutit ilaqutariinnut paarsisartunut akissarsiaapput, taamaattumillu meeqqap pilersorneqarneranut atugas­saanatik.
  Imm. 2.  Imm. 1 ilaqutariinnut inuussutissarsiutigalugu paarsisartunut atuutinngilaq.
  Imm. 3.  Kommunalbestyrelsip inississimasup aalajangersimappagu meeraq efterskolissasoq allatulluunniit atuarfimmiissasoq, meeqqap angajoqqaarsiai meeqqap atuarfimmiinnerata naammassivinnissaata tungaanut appartitanik akissarsiaqartinneqassapput, meeqqap atuarnerani piareersimasutut inissisimasussaammata.

  § 22.  § 21 naapertorlugu paaqqinninnersiutit, qaammammut kingumoortumik tunniunneqartassapput.
  Imm. 2.  § 21 naapertorlugu, paaqqinninnersiutit aannertussusissaat Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfimmit ukiumoortumik annertussusilerneqartarput.
  Imm. 3.  Imm. 2 naapertorlugu. Meeqqamik ilaqutariinnut paarsisartunut inissiineq, perorsaaneq isumassuinerlu eqqarsaatigalugit ilaqutariinnut paarsisartunut immikkut perorsaanikkut isumassuinikkullu suliniarnartuuppat paaqqinninnersiutit Naalakkersuisoqarfimmit annertussusilerneqartut, 50 pct.-imik 100 pct.-imilluunniit qaffanneqarnissaat kommunal­bestyrelsip aalajangersinnaavaa.
  Imm. 4.  Nukinginnartumik sivikitsumik ullut 30-t tikillugit inissiisoqartillugu kommunalbestyrelse paaqqinninnersi­utinik annertusisanik tunniussisassaaq.

  § 23.  Kommunalbestyrelsip ilaqutariit inuussutissarsiutigalugu paarsisartut isumaqatigiissutit atuuttut naapertorlugit akissarsiaqartissavai.

Kapitali 6
Atuutilersitsineq ikaarsaariarnermilu aalajangersakkat

  § 24.  §§ 1-3-mut naapertorlugit ilaqutariit kommunip aaqqissuussaanik paarsisartut, meeqqamik ataatsimik arlaqartunilluunniit paarsaqareersut, paarsaqarnerlu kommunalbestyrelsip sulissutigisimappagu, § 4 naapertorlugu ilaqutariinnut paarsisartunut akuersissummik, kingusinnerpaamik ulloq 9. november 2018-imi tunineqassapput, aammattaarlu § 16 naapertorlugu tunngaviusumik pikkorissarsimassallutik. Kommunalbestyrelse ilaqutariit paarsisartut kommunimi najugallit ilaqutariinnut paarsisartunut akuersissummik tunineqarnissaat sulissutigissallugu pisussaaffeqarpoq.
  Imm. 2.  Meeqqat ilaqutariinni paarsisartuni ulloq 9. november 2017 nallertinnagu najugaqareersut ilaqutariinni paarsisartuni taakkunaniinnertik ulloq 9. november 2018 tikillugu ingerlatiinnarsinnaavaat, ilaqutariit paarsisartut ilaqutariinnut paarsisartunut akuersissummik piffis­sami tassani peqanngikkaluarpataluunniit.
  Imm. 3.  §§ 16-imiit 18-imut 9. november 2017-imeersoq aallarnerfigalugu atuuttut naapertorlugit Imm. 1-imi ilaqutariit paarsisartut ilinniaqqinnissamut, ilitsersorneqarnissamut suliamillu ilisimasalinnit ikorfartorneqarnissamut pisinnaatitaaffeqarlutillu pisussaaffeqarput.

  § 25.  Nalunaarut 9. november 2017-imi atortuulerpoq.

Namminersorlutik Oqartussat, ulloq 8. novemberi 2017

Sara Olsvig

/

Julie Præst Wilche