Aalisarneq pillugu Inatsisartut Inatsisaanni nr. 18, 31. oktober 1996-imeersumi §§ 25 aamma  33 imm. 2, kingullermik Inatsisartut Inatsisaanni nr. 17, 3. december 2009-meersumi aamma nr. 28, 28. november 2016-imeersumi allanngortinneqartoq naapertorlugu, aalajangersarneqarpoq:

 

Atuuffia

   § 1.  Kalaallit Nunaata aalisarnikkut imartami oqartussaaffigisaani inuussutissarsiutigalugu aalisarnermut nalunaarut atuuppoq, kiisalu taamatut oqartussaaffiup avataani Kalaallit Nunaanneersut 6 miiterinit anginerusumik aalisariuteqarlutik aalisartartunut atuulluni.
  Imm. 2.  Nalunaaruttaaq nunami tunisassiorfinnut tunitsivinnullu aalisakkerinermut attuumassuteqartunut aamma atuutsinneqarpoq.
  Imm. 3.  Nalunaarut aalisartunut 6 meterisut angitigisumik minnermilluunniit aalisariutilinnut atuutsinneqanngilaq.

Paasissutissanik nalunaaruteqarnissamut piumasaqaat

   § 2.  Ingerlatseqatigiiffimmit § 1-imi ilaatinneqartumik ingerlatsisoq, ukiut tamaasa 1. juli nallertinnagu  Aalisarnermut Naalakkersuisoqarfimmut ukioq qaangiuttumi aalisariummi, tunisassiorfimmi imaluunniit tunitsivimmi pineqartumi tunisassiornikkut aningaasaqarnikkullu pissutsit pillugit paasissutissanik nalunaaruteqartassaaq.
  Imm. 2. Paasissutissat imm. 1-mi nalunaarutigeqquneqartut nalunaarutigineqannginnerini kukkunersiuisumit nalunaarsorneqarnikumit akuersissutilimmilluunniit atsiorneqarsimassapput.
  Imm. 3.  Nalunaarusiornermi paasissutissat ilanngussami 1-imi, 2-mi 3-milu taaneqartut ilanngunneqassapput.

  § 3.  Paasissutissat § 2-imiittut Aalisarnermut Naalakkersuisoqarfimmut paasissutissanik immersuiffissat www.businessgreenland.gl-imiittut atorlugit elektroniskimik nassiunneqassapput.

  § 4.  Tunisassiorfiit aamma tunitsiviit pisussaaffeqarput tulaassat pillugit § 1, imm. 1-imi taasatut suliffeqarfimmik ingerlatsisunut ukiumoortumik naatsorsuummik tunniussissallutik aamma tulaassisutut ingerlatsisimasuusunut, tamanna eqqortumik paasissutissanik nalunaarusiorluinnarsimasumik tunniussinissaq ilanngussaq 1 aamma 2-mi taaneqartuni qulakkeeqqullugu.
  Imm. 2.  Imm. 1-mi taasatut ukiumoortumik nalunaarut kaaviiaartitat, ajunngitsorsiat (bonus) aamma suussusaanut aggulussimasunut aningaasarsiat allat pillugit paasissutissanik imaqassaaq.

Pineqaatissiinerit

  § 5.  Piaaraluni mianersuaalliorujussuarluniluunniit §§ 2, 3 imaluunniit 4-imit unioqqutitsisoq Kalaallit Nunaanni Pinerluttulerinermik inatsimmi maleruagassat naapertorlugit akiliisitaanermik pineqaatissinneqarsinnaavoq.
  Imm. 2.  Inatsisitigut pisinnaatitaasutut pisussaatitaasutullu isigineqarsinnaasoq unioqqutitsisimappat, Kalaallit Nunaanni Pinerluttulerinermik inatsimmi maleruagassat naapertorlugit pinerluutinut akisussaatitsisoqarsinnaavoq.
  Imm. 3.  Akiliisitsissutit imm. 1 aamma 2-mi aalajangersakkat malillugit pineqaatissiissutigineqarsimasut Nunatta Karsianut pisassanngortinneqassapput.

Atortuulersitsineq

  § 6.  Nalunarut ulloq 2. august 2017 –i atuutsilersinneqarpoq.
  Imm. 2.  Peqatigitillugu Inuussutissarsiutigalugu aalisarneq pillugu tunisassiornikkut aningaasaqarnikkullu paasissutissanik nalunaarutiginnittarneq pillugu Namminersorlutik Oqartussat nalunaarutaat nr. 11, 29. juni 2015-imeersoq atorunnaarsinneqarpoq.

Namminersorlutik Oqartussat, ulloq 1. august 2017

Karl Kristian Kruse

/

Jørgen Isak Olsen