Aalisarneq pillugu Inatsisartut Inatsisaanni nr. 18, 31. oktober 1996-imeersumi § 25  aamma § 33 imm. 2, kingullermik Inatsisartut Inatsisaanni nr. 17, 3. december 2009-meersumi allanngortinneqartoq naapertorlugu, aalajangersarneqarpoq:

Atuuffia

 § 1.  Kalaallit Nunaata aalisarnermut oqartussaaffigisaani inuussutissarsiutigalugu aalisarnermut, kiisalu taamatut oqartussaaffiup avataani kalaallit inuussutissarsiutigalugu aalisarneranni aalisariutinut 6 meterit sinnerlugit takissusilinnut nalunaarut atuuppoq.
  Imm. 2.  Nalunaaruttaaq nunami tunisassiorfinnut tunitsivinnullu aalisakkerinermut attuumassuteqartunut aamma atuutsinneqarpoq.
  Imm. 3.  Nalunaarut aalisartunut 6 meterisut takitigisumik naannermilluunniit aalisariutilinnut atuutsinneqanngilaq.

Paasissutissanik nalunaaruteqartarnissamut piumasaqaat

 § 2.  § 1-imut ilaasumi ingerlatseqatigiiffimmik ingerlatsisoq, ukiut tamaasa novembarip aallaqqaataa nallertinnagu Aalisarnermut Piniarnermullu Naalakkersuisoqarfimmut paasissutissanik nalunaaruteqartassaaq, pineqartup aalisarnermi angallataani, tunisassiorfeqarnikkut imaluunniit tunitsiveqarnikkut ukiumi ullorsiuteqarfiusumi qaangiuttumi tunisassiorfeqarnermi aamma aningaasarsiornermi pissutsit pillugit.
  Imm. 2. Paasissutissat nalunaarutigineqannginnerminni Kukkunersiuisumit nalunaarsorneqarsimasumit imaluunniit naalagaaffimmit akuerineqarsimasumit uppernarsarlugit atsiorneqarsimassapput.
  Imm. 3.  Nalunaarut paasissutissanik ilanngussat 1-3-mi taaneqartunik imaqassaaq.

  § 3.  § 2-mi paasissutissat elektronisk atorlugu Aalisarnermut Piniarnermullu Naalakkersuisoqarfimmut nalunaarutigineqartassapput sullissivik.gl aqqutigalugu.

  § 4.  Tunisassiorfiit aamma tunitsiviit § 1 imm. 1 naapertorlugu suliffeqarfimmik ingerlatsisumut aamma tunisisimasumut tunisineq pillugu ukiumoortumik naatsorsuusiornermik tunniussinissamut eqqortunik tamakkiilluinnartunillu paasissutissanik nalunaaruteqarnissamut pisussaaffeqarput, takukkit ilanngussat 1 aamma 2.
  Imm. 2. Ukiumoortumik naatsorsuusiornerup imarisassavai kaaviiaartitsineq pillugu paasissutissat, bonusit aamma akissarsiat allat artinut assigiinngitsunut agguataarlugit.

Iliuusissat

  § 5.  Piaaraluni mianersuaalliorujussuarluniluunniit §§ 2, 3, imaluunnit § 4-mit unioqqutitsisoq Kalaallit Nunaanni Pinerluttulerinermik inatsimmi maleruagassat naapertorlugit akiliisitsinertut isikkoqartumik pineqaatissinneqarsinnaavoq.
  Imm. 2. Ingerlatseqatigiiffiit il.il. (inatsisitigut akisussaaffimmik tigummiartut) Pinerluttulerinermi inatsimmi kapitali 5-imi malittarisassat malillugit pinerluuteqarsimasutut akisussaatinneqarsinnaapput.
  Imm. 3.  Akiliisitsissutit imm. 1 aamma 2 malillugit pineqaatissiissutigineqartut Nunatta Aningaasivianut tunniunneqassapput.

Atortuulersitsineq

   § 6.  Nalunaarut una atortuulissaaq ulloq 1. decemberi 2021-mi. 
  Imm. 2.   Inuussutissarsiutigalugu aalisarnermi aammalu nunami tunisassiorneq pillugu tunisassiornikkut aningaasaqarnikkullu paasissutissanik nalunaarutiginnittarneq pillugu Namminersorlutik Oqartussat nalunaarutaat nr. 11, 1. august 2017-imeersoq peqatigisaanik atorunnaarsinneqarpoq.

Namminersorlutik Oqartussat, ulloq 12. november 2021

Aqqaluaq B. Egede
Aalisarnermut Piniarnermullu Naalakkersuisoq

/ Jørgen Isak Olsen