Peqqinnissaqarfiup aqunneqarnera, aaqqissuussaanera kiisalu peqqinnissamut tunngasutigut sullissisut aamma tarnip pissusaanik ilisimasallit pillugit Inatsisartut inatsisaanni nr. 27, 18. november 2010-meersumi aammalu Inatsisartut inatsisaatigut nr. 2, 29. maj 2012-imeersukkut allanngortinneqartumi § 9, imm. 1-imit 4-mut aammalu § 11a, imm. 2 naapertorlugit aalajangersarneqarpoq:

 

Allaffissornikkut aqutsinermi pissutsit

 

  § 1. Nunatsinni Nakorsaaneqarfik nuna tamakkerlugu atorfeqarfiuvoq nalunaarut una naapertorlugu suliassanik ingerlataqarfinnillu isumaginnittuusoq.

 

  § 2.  Naalakkersuisut Nunatta Nakorsaaneranik atorfinitsitsisuussapput.
  Imm. 2. Nunatta Nakorsaanera missingersuutit aqutsinerlu eqqarsaatigalugit atorfeqarfimmut taassumalu ingerlanneqarneranut akisussaasuuvoq, tassungalu ilanngullugu atorfeqarfimmi sulisunut atatillugu nunap nakorsaanera suliatigut aqutsinikkullu pisortatut piginnaatitaaffeqarpoq.

Nunatsinni Nakorsaaneqarfiup nalinginnaasumik suliassai pillugit

 

  § 3. Nunatsinni Nakorsaaneqarfiup nunami peqqissuseq malinnaaffigissavaa, atorfeqarfiullu innuttaasut peqqissusaannut sunniuteqartussat ineriartorneri malinnaaffigissavai.
  Imm. 2. Nunatsinni Nakorsaaneqarfiup peqqinnissaqarfinni unioqqutitsisoqarsimasoq imaluunniit peqqinnissaqarfiup iluani amigaateqartoqartoq paasiguniuk nunami pisortaqarfiit susassaqarfeqartut ilisimatissavai, taamalu pisortanut pitsanngorsaatissat pillugit siunnersuuteqassalluni.

 

§ 4. Nunatsinni Nakorsaaneqarfiup Peqqissutsimut Naalakkersuisoq suliat peqqinnissamut tunngassuteqartut pillugit siunnersortassavaa, atorfeqarfittut nammineerluni siunnersuisarnermigut imaluunniit Peqqissutsimut Naalakkersuisumit qinnuigineqaruni. Nunatsinni Nakorsaaneqarfiup peqqinnissamut atatillugu suliniutini amigaatit pillugit maluginiagassanik ilisimatittassavaa aammalu pitsanngorsaatissanik siunnersuuteqartassalluni.
  Imm. 2. Nunatsinni Nakorsaaneqarfiup pisortaqarfiit allat suliani peqqinnissamut  tunngassutilinni siunnersortaaffigai.

 

  § 5. Pisariaqartillugu Nunatsinni Nakorsaaneqarfiup Peqqissutsimut Naalakkersuisoq peqqinnissamut tunngassutilinni inatsisissanik suliaqarnerani ikiortassavaa.
  Imm. 2. Nunatsinni Nakorsaaneqarfik peqqinnissamut tunngassutilinni suliaqartut peqqissaanikkut maleruagassiornermi suliaqartassaaq.   

 

  § 6. Nunatsinni Nakorsaaneqarfiup peqqinnissamut attuumassuteqartunik pingaarutilinnik pisoqartillugu inuiaqatigiit ilisimatittassavai, taamaalilluni innuttaasut peqqissusaannut akornusiisinnaasunut illersorniarumallugit, soorlu tunillaattartunik nappaateqartoqartillugu / nunarsuarmilu siammaattumik nappaalasoqartillugu, avatangiisini peqqissutsimut akornutaasinnaasunik ajornartorsiortoqartillugu, inuussutissat aqqutigalugit nappaalasoqartillugu, imeqarfiit uumasullu inunnut tunillaassuuttunik nappaateqartillugit, allanillu pisoqartillugu innuttaasut ilaasaluunniit peqqissusaannut navianaateqarsinnaasunik.

Peqqinnissaqarfimmi sulisorisanik nakkutilliineq

 

  § 7.  Nunatsinni Nakorsaaneqarfiup peqqinnissamik  suliaqarnermut tunngasut peqqinnissaqarfimmi sulisorisanit suliffigineqartut tamaasa nakkutigisarai.
  Imm. 2. Nunatsinni Nakorsaaneqarfiup peqqinnissaqarfiup avataani peqqinnissaq pillugu ilinniarsimasutut sulisut aammalu peqqissaanermik avataanni suliaqarfiit namminersortut tamaasa nakkutigisarai.

 

 § 8. Nunatsinni Nakorsaaneqarfiup peqqinnissamik suliaqarfiit, peqqinnissamik suliaqartut  iluani ilinniagaqarsimasunit immikkut inatsisitigut akuerisaasumik pisinnaatinneqartunit suliffigineqartut, nakkutigisarai.
  Imm. 2. Nunatsinni Nakorsaaneqarfiup aamma peqqinnissamik suliaqarnermut tunngasut sulisorisanit peqqinnissamik tunngassutilinnik ilinniarsimasunit akuersissummik peqanngitsunit suliarineqartut nakkutigisarai.

 

  § 9. Nunatsinni Nakorsaaneqarfiup peqqinnissaqarfimmi peqqinnissakkut sulisorisat  peqqusinnaavai peqqinnissaqarfimmi sulisorisat suliaannut tunngatillugu  Nunatsinni Nakorsaaneqarfimmut unnerluutiginnillutillu nalunaaruteqartaqqullugit.

 

§ 10. Akuersissummik  peqanngikkaluarlutik peqqissaanermik katsorsaanermillu  ingerlataqartutut pasitsaanneqarpata Nakorsaqarneq pillugu inatsimmi kapitali 6 nakorsaanatik katsorsaaniartunut tunngasoq unioqqutillugu ingerlatsisut Nunap Nakorsaanerata nalilersuiffigissavai.

Suliffeqarfiit nakkutigineqarneri

 

  § 11. Nunatsinni Nakorsaaneqarfiup Peqqinnissaqarfiup angerlarsimaffiutaani  pissutsit peqqinnissamut tunngassutilimmik suliaqarfiusut tamaasa, tamatumunnga  ilanngullugit katsorsaaneq  nalinginnaasumillu paaqqinninneq, nerisaqartitsinerit, nakorsaatinik nakutilliineq, perusuersartarfeqarnermullu tunngassut ipeersaarnermilu pissutsit allat pitsaasumik eqqiluisaarnermi periutsit pissusissamisoornersut nakkutigissavai.
  Imm. 2. Nunatsinni Nakorsaaneqarfik peqqissaavinni, paaqqutarisarialinnullu angerlarsimaffinni il.il., atuarfinni, ulluuneranilu paaqqinnittarfinni, isertitsivinni assigisaannilu peqqinnissakkut pissutsit pillugit iliuusissanut ilitsersuutinik suliaqarsinnaavoq.
  Imm. 3. Ilitsersuutini angerlarsimaffinni suliffeqarfinnilu taaneqartuni nakkutiginninneq allaaserineqassaaq aammalu Nunatsinni Nakorsaaneqarfiup tamakkunani suliassai ilanngullugit.

Pineqaatissiinerit

 

  § 12.  Nunatta Nakorsaanera inuit pineqartut misissuineq tunngavigalugu isumaqaruni inuit § 8-mi pineqartut arlaat sulinermini imminut inoqatiminulluunniit navianaateqartoq, imaluunniit sulinissaminut naleqqutinngilluinnarluniluunniit ilaannakortumik atorsinnaassuseqartoq, Nunatta Nakorsaanerata maleruagassat atuuttut naapertorlugit pineqartoq sulisinnaatitaanermut akuersissutaanik arsaarallarsinnaavaa taamaattoqarneralu oqartussaasunut atorfinitsitsisunut nalunaarutigalugu.
  Imm. 2. Pissutsit imm. 1-mi pineqartut peqqinnissaqarfimmi sulisorisanut § 1, immik. 2 naapertorlugu sulisinnaatitaanermut akuersissummik peqartussaanngitsunut atuukkaangata Nunatta Nakorsaanerata pissuseq oqartussaasumut atorfinitsitsisumut nalunaarutigissavaa suliap aalajangiiffigineqarnissaa inassuteqaatigalugu.
  Imm. 3. Peqqinnissaqarfimmi sulisorisaq sulisinnaatitaanermut akuersissummik oqartussaasunit Kalaallit Nunaata avataaneersunit nalunaarutigineqarsimasunik arsaarneqarallarpat Nunatta Nakorsaanera pisussaavoq oqartussaasoq sulisinnaatitaanermut akuersissummik tunniussaqarsimasoq arsaarinnikkallarnermik nalunaarfigissallugu.

 

  § 13. Nunatta Nakorsaanera misissuereernermi isumaqaruni § 7-mi pineqartut ilaat suliinnassaguni aalajangersimasumik piumasaqarfigisariaqartoq, piumasaqaatit taamaattut  Nunatsinni Nakorsaanerup aalajangersassavai.
  Imm. 2. Nunatta Nakorsaaneqarfia pisussaavoq piumasaqaatit malinneqarnersut nakkutigissallugu. Taamaattorli Nunatta Nakorsaaneqarfiata nunap immikkoortuani eqqaaniluunniit aqutsisut isumaqatigiissuteqarfigineratigut najukkammi  peqqinnissaqarfimmi atorfilimmit Nunatsinni Nakorsaaneqarfik ikiorlugu nakkutilliineq tamanna ingerlanneqarsinnaasoq.   
  Imm. 3. Aammattaaq Nunatta Nakorsaaneqarfia pisussaavoq piumasaqaatit aalajangersarneqarsimasut pisariaarussorineqarpata atorunnaarsissallugit.
  Imm. 4. Piumasaqaatit inuit § 7-imi pineqartut arlaata piginnaatitaaffiinut sulineranullu allannguutinik killilersuutinilluunniit kinguneqarpata, nunap immikkoortuani eqqaanilu pisortat allannguut piginnaatitaaffinnulluunniit killiliineq pillugu nalunaarfigineqassapput. Peqqinnissakkut pisortatut sulisorisaq pineqarpat oqartussaasoq atorfinitsitsisoq nalunaarfigineqassaaq.
  Imm. 5. Taamatuttaaq Nunatsinni Nakorsaaneqarfik pisussaavoq  maleruagassat atuuttut naapertorlugit pissuseq pillugu oqartussaasutut atorfinitsitsisartoq ilisimatissallugu, Nunatsinni Nakorsaaneqarfimmit piumasaqaatit malinneqanngippata.
  Imm. 6. Peqqinnissaqarfimmi sulisoq oqartussaasunit Kalaallit Nunaata avataaniittunit sulisinnaatitaanermut akuersissummik tunineqarsimasoq, piumasaqaatinillu nalunaarfigineqarsimappat, sulisoq nunami peqqinnissaqarfianut uterpat oqartussaasoq taanna nalunaarfigineqassaaq. Nunatta Nakorsaaneqarfiata aamma nunani allani oqartussaasut sulisinnaatitaanermut akuersissummik tunniussisartut nalunaarfigisinnaavai.

 

  § 14.  Nunatta Nakorsaaneqarfia isumaqaruni inuit § 7-imi pineqartut ilaat peqqinnissakkut sulinermini politiinit misissuiffigisariaqarluniluunniit suliassanngortittariaqartoq, tamanna pillugu politeeqarfik qaninnerpaaq qinnuigineqassaaq
  Imm. 2. Nunatta Nakorsaaneqarfia isumaqaruni inuit § 7-imi pineqartut ilaat peqqinnissakkut sulinermini politiinit misissuiffigisariaqarluniluunniit suliassanngortittariaqartoq, taannalu qallunaat nunaanniluunniit allamiut oqartussaasuinit sulisinnaatitaanermut akuersissummik tunineqarsimappat, inassuteqaat pillugu oqartussasoq pineqartoq akuersissumik tunniussisimasoq taamatuttaaq nalunaarfigineqassaaq.

 

  § 15. Nunatsinni Nakorsaaneqarfik suliani peqqinnissakkut nakkutilliinermut attuumassuteqartuni, immikkut ilisimasaqarfigisariaqartuni oqartussaasunit immikkut ilisimasalinnik ikiortissarsiorsinnaavoq.

Sulisinnaatitaanermut akuersissutit

 

  § 16. Nunatsinni Nakorsaaneqarfik peqqissaasunut sulisinnaatitaanermut akuersissutinik tunniussisartuuvoq.

Napparsimasut naammagittaalliutaannik suliat

 

  § 17.   Nunatsinni Nakorsaaneqarfiup suliat napparsimasut naammagittaalliutaannut tunngasut Napparsimasut Maalaarutaannik Aalajangiisartunut maleruagassat naapertorlugit tigussavai  piareersarlugillu.

 

  § 18.  Nunatsinni Nakorsaaneqarfiup makku suliaralugillu aalajangiiffigisassavai:
1) Peqqinnissamut tunngasuni atorfillit suliaat Napparsimasut Maalaarutaannik Aalajangiisartut susassaqarfiinut ilaatinneqanngitsut.
2) Peqqinnissaqarfimmi sulisut peqqinnissamut tunngasunik suliaqartut, taamaattorli Napparsimasut Maalaarutaannik Aalajangiisartunut susassaqarfiinut ilaanngitsut.
  Imm. 2  Nunatsinni Nakorsaaneqarfiup pisariaqartitsineq naapertorlugu qulakkiissavaa pissutsinik ilisimasalinnik pisup suliarineqarnerani ikiorteqarnissaq.

 

  § 19. Nunatsinni Nakorsaaneqarfiup nammineerluni sukkulluunniit peqqinnissaqarfimmi sulisut sulinerat pillugu suliassanik aallarniisinnaavoq.

 

 § 20. Nunatsinni Nakorsaaneq Tarnimikkut Napparsimasut Naammagittaalliortarfianni ilaasortaavoq, Nunatsinnilu Nakorsaaneqarfik allattoqarfittut atorneqarluni. 

Pinerluttoqarsimatillugu suliassat

 

  § 21.  Nunatsinni Nakorsaaneqarfiup pinerluttoqarsimatillugu iliuusissanik piumasaqaateqartartut politiillu pisortaat ikiorsissavaat Nunap Nakorsaaneqarfiata peqataanissaanik pisariaqartitsisoqartillugu.
  Imm. 2. Ataatassarsiuisoqarnerani Nunatsinni Nakorsaaneqarfik meeqqap qanga naartuulerneranik nalunaaruteqartassaaq. Nunatsinni Nakorsaaneqarfiup pisariaqartitsineq naapertorlugu nalunaarusiani Retslægerådimut saqqummiussinnaavaa.
  Imm. 3. Nunatsinni Nakorsaaneqarfiup politiit qamutinik motoorilinnik ingerlatsisinnaanermik uppernarsaatit pillugit suliassani siunnersortassavai.

 

  § 22. Politiinit eqqartuusivimilluunniit qinnuigineqarnikkut Nunatta Nakorsaanerata imaluunniit peqqinnissaqarfimmi nakorsat piginnaatitaasut Nunatsinni Nakorsaaneqarfik sinnerlugu eqqartuussivinni suliassat makku suliarisinnaavai:
1) Eqqartuussivik sinnerlugu toqungasut timaanik nakorsatut misissuineq inatsisini allani tamanna pillugu aalajangersakkat naapertorlugit.
2) Suliani nakuusernermut kinguaassiuutinullu tunngassutilinni inunnik misissuineq, inuit eqqarsartaatsimikkut pissusaat pillugit oqaaseqaateqarneq ilanngullugu.
3) Imigassartorsimaneq aamma/imal. nakorsaatitorsimaneq pillugit aalajangiiniarnermi aaversinnerit kiisalu tamatumunnga atatillugu nakorsatut misissuinerit.
4) Nammineersinnaajunnaarsitaaneq kiisalu timikkut eqqarsartaatsikkulluunniit akornuteqarneq pissutigalugit sinniisutut nakkutilliisoqarnissaq pillugu suliat pillugit misissuineq.
5) Ataatassarsiuinermi atugassanik misissugassanik tigusinerit.

Isumaginninnermut atatillugu peqqinnissaqarfimmi suliassat

 

  § 23. Nunatsinni Nakorsaaneqarfiup kommunit oqartussallu allat  isumaginninnermut atatillugu peqqissutsikkut suliassani  siunnersuisortassavai.

 

  § 24. Nunatsinni Nakorsaaneqarfiup kommunini oqartussaasunut  inunnut ataasiakkaanut tunngassutilinni periarfissat pisariaqassusiallu naapertorlugit isumaginninnermut atatillugu siunnersortassavai.

 

  § 25.  Nunatta Nakorsaaneqarfia Naartuersittarneq pillugu isumalioqatigiit allattoqarfiattut inissisimavoq.

Avatangiisini eqqiluisaarnerlu pillugit sualiassat

 

  § 26.  Nunatsinni Nakorsaaneqarfiup nappaatit tuniluuttartut atugaalersarneri tunillaassuuttarnerallu nakkutigissavai nappaatillu tuniluuttartut akiorneqarnerat pilersaarusioqataaffigissallugu.

 

 § 27.  Nunatsinni Nakorsaaneqarfiup Kalaallit Nunaanni Nersutinut Nakorsaqarfik Inuussutissalerinermullu Oqartussaqarfik suleqatigalugit nappaatit inuussutissat aqqutigalugit tuniluuttut, nappaatillu uumasuniit tuniluuttut pillugit innuttaasunut paasissutissiisarpoq.

 

  § 28.   Nunatsinni Nakorsaaneqarfik  Kalaallit Nunaanni Uumasunik Nakorsaqarfik Inuussutissalerinermilu Oqartussaqarfik suleqatigalugu pisariaqaraangat imatut pisoqartillugu oqaaseqaateqarlunilu tamanut ammasumik ilisimatitsissuteqartassaaq:
1) Inuussutissaleriffinni sulisorisanik nappaateqartoqartillugu inuussutissatigut tuniluussinnaasunik.
2) Nappaatit inuussutissanit pisut atugaappata nappaatilluunniit taamaattut pilersinnaanerat ilimagineqarpat. 
  Imm. 2. Nunatsinni Nakorsaaneqarfiup eqqiluisaarnikkut avatangiisitigullu pissutsit imm. 1. Naapertorlugu peqqissutsimut toqqaannartumik toqqaannanngikkaluartumilluunniit annertuumik pingaaruteqarsinnaasutut  paasigunigit, oqartussaasoq pineqartoq ilisimatissavaa oqartussaasorlu siunnersussallugu pitsanngorsaatissanik iluarsiissutissanillu siunnersuutitalinnik.

 

  § 29.   Nunatsinni Nakorsaaneqarfiup pisortat oqartussaasut, tamatumunnga ilanngullugit kommunit avatangiisinut, eqqiluisaarnermut, imermillu pissarsiniarnermut tunngatillugu peqqinnissakkut suliatigut nalinginnaasutigut siunnersortassavai.

Suliassaqarfiit allat

 

  § 30.  Nunatsinni Nakorsaaneqarfiup ingerlaavartumik nappaatit tuniluuttartut nakutigalugillu ilisimatitsissutigisassavai aammalu peqqissuseq pillugu pissutsit allat inuiaqatigiinnut pingaaruteqartut, taamatullu peqqissuseq pillugu pissutsinik soqutiginaatilinnik nalunaaruteqartassalluni.
  Imm. 2. Nunatsinni Nakorsaaneqarfiup peqqissutsimik nakkutilliinerminut ilanngullugu suliassaqarfimmi iluani piffissaq aalajangersimasoq qaangiukkaangat peqqissuseq pillugu kisitsisitigut takussutissiortassaaq. Peqqissuseq pillugu kisitsisitigut takussutissiat toqqorneqartarput, taamaalilluni nunami peqqissuseq pillugu ilisimasat attatiinnarneqassallutik.

 

  § 31.  Nunatsinni Nakorsaaneqarfiup  ajunaarnersuaqarnissamut sillimaniarneq nalinginnaasoq piareersaasioqataaffigissavaa ajunaarnersuaqartillugulu qitiusumit peqqinnissaqarfimmi suliatigut ajunaarnersuaqartillugu aqutsineq kiisalu Namminersorlutik Oqartussat Sillimaniarneq pillugu ataatsimiititaliami peqataassalluni.

 

  § 32. Nunatta Nakorsaaneqarfia nalinginnaasumik innuttaasut peqqinnerulernissaannik pitsaaliuinermilu suliniutinut peqataavoq, pingaartumik qitiusumiit pilersaarusiornerni pingaarutilinni tamakkiinerusunilu. Nunatta Nakorsaanera qitiusumik pitsaaliuinermut ataatsimiititaliami ilaasortaavoq.  

 

  § 33. Nunatsinni Nakorsaaneqarfiup ilisimatusarnikkut ileqqorissaarnissami ataatsimiititaliaq allattoqarfittut sullitaraa.

 

  § 34. Nalunaarut 15. juli 2017-imi atuutilerpoq.
  Imm. 2. Tamatumunnga peqatigitillugu Peqqinnissakkut Nakkutilliisoqarfiup sulinera pillugu  Namminersornerullutik Oqartussat nalunaarutaat nr. 1, 4. januar 1996-imeersoq - atorunnaarsinneqarpoq.

 

 

Namminersorlutik Oqartussat, ulloq 15. juni 2017

 

 

Agathe Fontain

/

Tine Pars