Kommunini suliassaqarfiit aaqqissuuteqqinneqarnerata allanngortinneqarneranik Inatsisartut inatsisaanni nr. 30, 28. november 2016-imeersumi § 18, imm. 2, § 19, imm. 3 aamma § 20, imm. 3 kiisalu Kommunit aqunneqarnerat pillugu Inatsisartut inatsisaanni nr. 22, 18. november 2010-meersumi § 41, imm. 5 aamma § 47 imm. 3 naapertorlugit aalajangersarneqassaaq:

Missingersuutinik malinnaaviginnittarneq aamma aningaasatigut aqutsineq

  § 1.  2017-mi nalunaarutip atortuulerneraniit naatsorsuutini kisitsisit pigineqartut, paasissutissat allat pigineqartut aamma aningaasanut ukioqarfiusup sinneranut aningaasartuutissatut naatsorsuutigisanut missingiusiat tunngavigalugit kvartalip ataatsip naanerata kingorna qaammammi 2017-imut kommunip inaarutaasumik naatsorsuutinut kisitsisitai ukiumi naatsorsuusiorfiusumi aningaasaliissutinik sinniinissat naatsorsuutigineqarsinnaanersut pillugit Qaasuitsup Kommunia misissuissaaq.
  Imm. 2.  2017-imi nalunaarutip atortuulerneraniit  Qaasuitsup Kommuniata kvartalip ataatsip qaangiunnerani qaammatip naanerani Aningaasaqarnermut Akileraartarnermullu Naalakkersuisoqarfimmut aningaasartuutinik nakkutilliinerup inernera nalunaarutigisassavaa.
  Imm. 3. Nakkutilliinermut atugassanik Aningaasaqarnermut Akileraartarnermullu Naalakkersuisoqarfik kommunimi paasissutissanik amerlanerusunik pissarsiniarsinnaavoq.
  Imm. 4.Aningaasartuutinik nakkutilliinerup takutippagu ukiumut naatsorsuusiorfiusumut kommunip inaarutaasumik naatsorsuutitigut kisitsisaatai ukiumut naatsorsuusiorfiusumut kommunip isertitaanit 1 procentinik annertunerusumik sinniinissaat naatsorsuutigineqarsinnaasoq ukiumut naatsorsuusiorfiusumut sinniinissamut naatsorsuutigisanut naapertuuttunik aningaasanut tamarmiusunut atorneqarsinnaasunut killiliussanik kommunalbestyrelsi ullut 30-it qaangiutsinnagit aalajangersaassaaq.
  Imm. 5.  2017-imi nalunaarutip atortuulerneraniit kommunalbestyrelsi taamaallaat ikaarsaariarnermi ataatsimiititaliap siumoortumik akuersineratigut ilassutissatut aningaasaliissutinik akuersissuteqarsinnaavoq, inatsisitigut aningaasartuutissaanngitsut pillugit.

Pigisatigut nalilitsigut ikaarsaarneq

§ 2.  Illut aalajangersimasut aamma pigisat nuunneqarsinnaasut Qaasuitsup Kommunianit pigineqartut aamma ulloq 31. december 2017-imi kommunimiittut, pigisat nalillit ullormi 31. december 2017-imi inissisimaffigisaanni, kommuninut nutaanut nuunneqassapput.
  Imm. 2. Kommunini nutaani tassani illu aalajangersimasoq inissisimasoq, illumi qularnaveeqqusiilluni taarsigassarsianut akiliisussaavoq.
  Imm. 3.  Pigisat nalillit tigussaanngitsut, Qaasuitsup Kommunianit pigineqartut, kiisalu illut aalajangersimasut aamma pigisat nuunneqarsinnaasut, ulloq 31. december 2017-imi kommunip avataaniittut, tamarmik 50 procentinngortillugit kommuninut nutaanut ataatsimoorlutik nuunneqassapput.

§ 3   Ulloq 31. december 2017-imi innuttaasunit suliffeqarfinniillu Qaasuitsup Kommuniata pissarsiassai innuttaasup imaluunniit suliffeqarfiup innuttaasut allattorsimaffiat malillugu najugaqarfigisaani imaluunniit angerlarsimaffigisaani kommunimut nutaamut nuunneqassapput.
  Imm. 2.  Innuttaasuni suliffeqarfinnilu ulloq 31. december 2017-imi Qaasuitsup Kommuniani najugaqartutut angerlarsimaffeqartunut inuit allattorsimaffianni nalunaarsorneqarsimanngitsuni Qaasuitsup Kommuniata pissarsiassai ataatsimoorlutik tamarmik 50 procentiutillugit kommuninut nutaanut tutsinneqassapput.

§ 4. Ulloq 31. december 2017-imi innuttaasunit suliffeqarfinniillu Qaasuitsup Kommuniata pissarsiassai illumik aalajangersimasumik qularnaveeqqusiussaqarluni taarsigassarsinermut  allagartakkut qularnaarneqarsimasut pigisat nalillit ullormi 31. december 2017-imi inissisimaffigisaanni, § 3 apeqqutaatinnagu, kommuninut nutaanut nuunneqassapput.

  § 5.  Ulloq. 31. december 2017-imi Qaasuitsup Kommuniata aningaaserivimmiittuutai, pigisallu aningaasanngorlugit allat, aktiat allallu pappiaqqat nalillit ulloq 1. januar 2018-imi kommunip inuttussutsikkut angissusianut naleqqiullugit kommuninut nutaanut nuunneqassapput.

  § 6.  Ulloq 31. december 2017-imi Qaasuitsup Kommuniata oqartussaasunit allanit  pissarsiassai ulloq 1. januar 2018-imi kommunip inuttussutsikkut angissusianut naleqqiullugit kommuninut nutaanut nuunneqassapput.

§ 7. Illuliornikkut sanaartornikkullu suliat  ulloq 31. december 2017-imi aallartinneqarsimasut kommunimut nutaamut illuliornermik sanaartornermillu suliaqarfiusumut nuunneqartassapput.
  Stk. 2. Ikaarsaariarnermi ataatsimiititaliat 2018-imut missingersuutini illuliornikkut sanaartornikkullu sulianut aallartinneqarsimasunut aningaasartuutit nuunneqarnissaannut pisussaaffeqarput.

Akiitsutigut ikaarsaariarneq 

§ 8.  Ulloq 31. december 2017-imi Qaasuitsup Kommuniata akiitsui allallu aningaasatigut pisussaaffii ulloq 1. januar 2018-imi innuttaasut amerlassusaat malillugit kommunit nutaat marluk akornanni agguaanneqassapput.
  Imm. 2.  Aningaasatiguunngitsoq pisussaaffiit missiliuinikkut aamma ikaarsaariarnermi ataatsimiititaliat akornanni isumaqatigiissuteqarnikkut annertussusilerneqassapput.

Naatsorsuutinik saqqummiussineq

§ 9. Kommunit nutaat marluk ataatsimoorlutik Qaasuitsup Kommuniata 2017-imut naatsorsuutai suliarissavaat.
  Stk. 2. Kommunini nutaani marluusuni tamani aningaasaqarnermut ataatsimiititaliap kommunalbestyrelsimut Qaasuitsup Kommuniata 2017-imut naatsorsuutai   saqqummiunneqartassapput.

Saqitsaannerit

  § 10.  Ikaarsaariarnermi ataatsimiititaliat aamma kommunit nutaat saqitsaassutaasinnaasut akunnerminni aalajangiiffigisassavaat. 
  Imm. 2.  Isumaqatigiittoqarsinnaanngippat ikaarsaariarnermi ataatsimiititaliap imaluunniit kommunip ataatsip marlulluunniit suliaq Naalakkersuisunut saqqummiutissavaat, soorluttaaq suliassap saqqummiunneqarnissaa Naalakkersuisut piumasaqaatigisinnaagaat.   Naalakkersuisut aalajangiitinnagit aaqqiisoqarnissaanik isumaqatigiinnissaq siunertaralugu suliaq ikaarsaariarnermi ataatsimiititalianik imaluunniit kommuninik nutaanik oqallisigineqassaaq.
  Imm. 3.  Suliap oqallisiginissaa imaluunniit aalajangiiffiginissaa siunertaralugu Naalakkersuisut eqqartuussissuserisunik, kukkunersiuisunik imaluunniit allanit sulianik ilisimasalinnik ikiortissarsiorsinnaapput.  Tamatumunnga aningaasartuutit ikaarsaariarnermi ataatsimiititaliamit imaluunniit kommuninit nutaanit tamanit 50 procentimik akilerneqassapput. 

Atuutilersitsineq

§ 11.  Nalunaarut ulloq 1. juni 2017-imi atuutilerpoq.

Namminersorlutik Oqartussat, ulloq 31. maaji 2017  

Erik Jensen

\

Ruth Lindhardt