Kapitali 1
Kommunip agguarneqarnera

  § 1.  1. januar 2018 aallarnerfigalugu Qaasuitsup Kommunia kommuninut marlunnut avinneqassaaq.
  Imm. 2.  Siusinnerusukkut kommuniusimasut, 1. januar 2009-mi kommunitut atorunnaarsinneqartut aallaavigalugit, Kommuni 1-imi imatut inissinneqassapput:
1) Qaanaap Kommunia,
2) Kommuneqarfik Upernavik,
3) Uummannap Kommunia, aamma 
4) Ilulissat Kommunia
  Imm. 3.  Siusinnerusukkut kommuniusimasut, 1. januar 2009-mi kommunitut atorunnaarsinneqartut aallaavigalugit, Kommuni 2-mi imatut inissinneqassapput:
1) Qeqertarsuup Kommunia,
2) Qasigiannguit Kommunia,
3) Aasiaat Kommunia, aamma
4) Kangaatsiap Kommunia.

Kapitali 2
Qinersineq

§ 2.  Maannakkut Qaasuitsup Kommunerisaani ikaarsaariarnermut ataatsimiititaliassanik marlunnik 4. april 2017-imi qinersisoqassaaq. Qinersinerit kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaanni aalajangersakkat naapertorlugit ingerlanneqassapput.
  Imm. 2.  Qaasuitsup Kommuniani kommunalbestyrelsimut qinersisoqassanngilaq.
  Imm. 3.  Qaasuitsup Kommuniani kommunalbestyrelsip piffissaq atuuffia ulloq 31. december 2017-p tungaanut sivitsorneqassaaq.

Kapitali 3
Ikaarsaariarnermi ataatsimiititaliat

  § 3.  Ikaarsaariarnermi ataatsimiititaliat marluusut ima katitigaassapput:
1) Kommuni 1-imi ikaarsaariarnermi ataatsimiititaliami ilaasortat 17-it, tak. § 1, imm. 2, aamma
2) kommuni 2-mi ikaarsaariarnermi ataatsimiititaliami ilaasortat 15-it  tak. § 1, imm. 3.

  § 4.  Ikaarsaariarnermi ataatsimiititaliami ilaasortaq utoqqaanersaq inissititerluni ataatsimiinnissamut aggersaassaaq.
  Imm. 2.  Ikaarsaariarnermi ataatsimiititaliaq inissititissaaq Inatsisartut inatsisaanni kommunit aqunneqarnerat pillugu aalajangersakkat naapertorlugit. Inissititerluni ataatsimiinneq kingusinnerpaamik 1. juni 2017 ingerlanneqarsimassaaq.
  Imm. 3.  Ikaarsaariarnermi ataatsimiititaliat isumaqatigiinniarneri ikaarsaariarnermi ataatsimiititaliani siulittaasut qinerneqarnissaasa tungaanut ilaasortamit ataatsimiinnissamut aggersaasumit aqunneqassapput.

  § 5.  Ikaarsaariarnermi ataatsimiititaliani ilaasortat kommunit aqunneqarnerat pillugu Inatsisartut inatsisaanni kommunalbestyrelsimi ilaasortat akissarsiaat pillugit aalajangersakkat atuuttut malillugit akissarsiaqartinneqassapput.
  Imm. 2.  Ikaarsaariarnermi ataatsimiititaliani siulittaasut, siulittaasut tullii aamma siulittaasut tulliisa aappaat kommunit aqunneqarnerat pillugu Inatsisartut inatsisaanni borgmesterit, borgmesterit tulliisa aamma borgmesterit tulliisa appaat akissarsiaat pillugit aalajangersakkat atuuttut malillugit akissarsiaqartinneqassapput.

  § 6.  Ulloq 1. januar 2018-imi kommunini nutaani ikaarsaariarnermi ataatsimiititaliat kommunalbestyrelsitut atuutilissapput 2021-imilu apriilimi kommunalbestyrelsinut qinersinissap tungaanut atuutissallutik.

  § 7.  Kommunini nutaani taakkunani ikaarsaariarnermi ataatsimiititaliani siulittaasut borgmesteritut, siulittaasut tullii borgmesterip tulliatut siulittaasullu aappaat borgmesterip tulliata aappaattut ingerlaqqissapput.

Kapitali 4
Pisussaaffiit piginnaatitaaffiillu

  § 8.  Ikaarsaariarnermi Ataatsimiititaliat atuunnerminni kommunit aqunneqarnerat pillugu inatsisartut inatsisaat naapertorlugu sulissapput.

  § 9.  Ikaarsaariarnermi ataatsimiititaliat pingaarnertut suliassaat tassaavoq Qaasuitsup Kommuniata kommuninut marlunnut nutaanut avinneqarnissaata piareersarnissaa.

  § 10.  Ikaarsaariarnermi Ataatsimiititaliat kommunit nutaat aqutsinermut ileqqoreqqusassaannik suleriaasissaannillu suliaqassapput.
  Imm. 2.  Ikaarsaariarnermi Ataatsimiititaliat aningaasaqarnermut ataatsimiititaliamik tamarmik immikkut pilersitsissapput taassumalu ataani ataatsimiititalianik allanik pilersitsisinnaallutik.

  § 11.  Ikaarsaariarnermi ataatsimiititaliat aalajangersakkat 1. januar 2018 -imiit atuutilersumi inatsimmi pisortat suliassaqarfiinik kommunit nutaat nakkutiginnissinnaanerannik aalajangersakkat pisariaqartitat aalajangiiffigissavaat.
  Imm. 2.  Ikaarsaariarnermi ataatsimiititaliat kommunip nutaap qanoq ateqarnissaanik sumillu ilisarnaateqarnissaanik kissaatitik kingusinnerpaamik ulloq 1. august 2017 aalajangiiffigissavaat.

  § 12.  Ingerlatsiviit siunissami sumi inissinneqassanersut ikaarsaariarnermi ataatsimiititaliat aalajangiiffigissavaat.
  Imm. 2.  Kommunimi nutaami allaffeqarfik ikaarsaariarnermi ataatsimiititaliat piareersassavaat, allaffeqarfiullu pilersinneqarnissaanut allaffissornermi aqutsisut pisariaqartumik amerlassuseqartut atorfinitsissallugit.
  Imm. 3.  Sumi inissiinissaq allaffissornermilu aqutsisunik atorfinitsitsinissat kingusinnerpaamik 31. december 2017 aalajangiiffigineqareersimassapput.

Kapitali 5
Sulisut

  § 13.  Tjenestemandit Qaasuitsup Kommuniani atorfeqartut maannamut atugassaritinneqartut assigalugit kommunit nutaat marluusut arlaasa ataanni ulloq 1. januar 2018-imi atorfeqalissapput. Atorfinitsitsinissamik piginnaatinneqartoq tamassuma kingorna tassaassaaq kommunalbestyrelsi nutaaq atorfeqarfiusorlu tassaassalluni kommuni nutaaq.
  Imm. 2.  Sulisut isumaqatigiissutit naapertorlugit imaluunniit inuit ataasiakkaarlugit immikkut atugassaritinneqarlutik atorfeqartut Qaasuitsup Kommuniani atugassaritinneqartut assingi atorlugit suliassatik suliariinnarlugit nuunnissamik neqeroorfigineqassapput.

Kapitali 6
Aningaasaqarneq, missingersuutit, naatsorsuutit kukkunersiuisarnerlu

  § 14.  Ikaarsaariarnermi ataatsimiititaliat ingerlatsineranni aningaasartuutit Qaasuitsup Kommunianit akilerneqassapput.
  Imm. 2.  Tapiissutinik naatsorsuisarneq aningaasartuuteqarnerlu pillugit Naalakkersuisut erseqqinnerusumik maleruagassiorsinnaapput.
  Imm. 3.  Qaasuitsup Kommuniani kommunalbestyrelsi ikaarsaariarnermi ataatsimiititalianut marluusunut akiliutitaqanngitsumik allaffissornikkut ikiorsiissaaq.

  § 15.  Ikaarsaariarnermi ataatsimiititaliap siulittaasuata ikaarsaariarnermi ataatsimiititaliap missingersuutinut siunnersuutissaa suliarissavaa kingusinnerpaamillu 1. juli 2017 saqqummiutissallugu.
  Imm. 2.  Missingersuutinut siunnersuut ikaarsaariarnermi ataatsimiititaliap suliarissavaa akueralugulu kingusinnerpaamik 1. august 2017.
  Imm. 3.  Ikaarsaariarnermi Ataatsimiititaliap missingersuutip akuerineqarneranit ullut 14-it qaangiutsinnagit missingersuut Naalakkersuisunut ingerlatissavaa missingersuutinullu nassuiaammik tamanut saqqummiilluni.

  § 16.  Kukkunersiuisoq suliamik ilisimasaqartoq kina ikaarsaariarnermi ataatsimiititaliat 2017-imut naatsorsuutaannik kukkunersiuissanersoq ikaarsaariarnermi ataatsimiititaliat kingusinnerpaamik 1. august 2017 aalajangissavaat.
  Imm. 2.  Ikaarsaariarnermut ataatsimiititaliat 2017-imut naatsorsuutaat kommunimi nutaami aningaasaqarnermut ataatsimiititaliap kommunalbestyrelsimut saqqummiutissavaat, taamaalilluni ukiumoortumik naatsorsuutit kingusinnerpaamik 1. juni 2018 kukkunersiuisumut tunniunneqarsinnaaniassammata.

  § 17.  Kommunit nutaat 2018-imut missingersuutissaat ikaarsaariarnermi ataatsimiititaliat akuerissavaat.
  Imm. 2.  Ikaarsaariarnermi ataatsimiititaliat kommunit nutaat siunissami ingerlatsinissaasa annertussusissaat pillugu pingaarnertut politikkiliussapput.  Ikaarsaariarnermi ataatsimiititaliat kommunini nutaani akileraarutit annertussusissaat, akit sullissinerillu annertussusissaat aalajangersassavaat.

  § 18.  Kommunip aningaasaqarnerup ineriartornera pillugu Qaasuitsup Kommuniani kommunalbestyrelsip ikaarsaariarnermi ataatsimiititaliat ingerlaavartumik ilisimatittassavaat, tassunga ilanngullugit 2017-imi tapiliussatut aningaasaliissutit.
  Imm. 2.  Qaasuitsup Kommuniata 31. december 2017 tungaanut aningaasatigut aalajangiisarneri pillugit Naalakkersuisut malittarisassaliorsinnaapput.

  § 19.  Pisussaaffiit pisinnaatitaaffillu aamma pisassarisat akiligassallu kommunit nutaat marluk Qaasuitsup Kommunianit 1. januar 2018 tigussavaat.
  Imm. 2.  Kommunip  isumaqatigiissutai, atsiornikkut isumaqatigiissusiai, isumaqatigiissutai, pisussaaffiit inissitat pisussaaffigilersinnaasaaluunniit tamaasa Qaasuitsup Kommuniata ulloq 1. juli 2017 nallertinnagu misissussavai ikaarsaariarnermi ataatsimiititalianut marluusunut saqqummiutissallugit.  Agguaannissaat ikaarsaariarnermi ataatsimiititaliat tamassuma kingorna isummerfigissavaat.
  Imm. 3.  Qaasuitsup Kommuniani pisassarisat akiligassallu agguarnissaat tassunga ilanngullugu  aaqqiagiinngissutinik aaqqiissutaasartussat pillugit Naalakkersuisut immikkut maleruagassaliorsinnaapput.

  § 20.  Qaasuitsup Kommuniata 2017-imut naatsorsuutai, naatsorsuutinik saqqummiussisarneq pillugu malittarisassat malillugit saqqummiunneqassapput.
  Imm. 2. Kukkunersiuineq Qaasuitsup Kommuniani siornatigut kukkunersiuisorisimasaanit ingerlanneqassaaq.
  Imm. 3.  Naatsorsuutinik saqqummiussisarneq pillugu Naalakkersuisut erseqqinnerusumik malittarisassaliorsinnaapput.

Kapitali 7
Aalajangersakkat allat

  § 21.  Ikaarsaariarnermi ataatsimiititaliat allagaatinik uppernarsaatinik Qaasuitsup Kommunianit atorfissaqartitsippata, allagaatillu uppernarsaatit pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat aamma pisortat ingerlatsineranni suliassat suliarineqartarnerat pillugu Inatsisartut inatsisaat naapertorlugit suliffiup iluani atugassaappata, allagaatit uppernarsaatit ingerlateqqinneranni suliffiup iluani atugassaanerat atorunnaassanngilaq.

§ 22.  Qaasuitsup Kommuniani borgmesteri kommunit aqunneqarnerat pillugu Inatsisartut inatsisaanni borgmesterit akissarsiaat pillugit aalajangersakkat atuuttut malillugit 1. maj 2017-imiit 31. december 2017-imut akissarsiaqassaaq.
  Imm. 2.  Qaasuitsup Kommuniani borgmesteri ikaarsaariarnermi ataatsimiititaliat arlaanni aamma qinigaaguni marloriaammik akissarsiaqassanngilaq.
  Imm. 3.  Qaasuitsup Kommuniani kommunalbestyrelsimi ilaasortat kommunit aqunneqarnerat pillugu Inatsisartut inatsisaanni kommunalbestyrelsimi ilaasortat akissarsiaat pillugit aalajangersakkat atuuttut malillugit 1. maj 2017-imiit 31. december 2017-imut akissarsiaqassapput.

Kapitali 8
Atuutilersinneqarnera

  § 23.  Inatsisartut inatsisaat 1. januar 2017-imi atuutilerpoq.

Namminersorlutik Oqartussat, ulloq 28. november 2016

Kim Kielsen