Kapitali 1
Maleruagassat nalinginnaasut

§ 1.  Inuussutissarsiornikkut sivisunerumik ingerlataqarnerit Kalaallit Nunaata imartaani akisussaaffeqarfiusumi umiarsuarnit suliarineqartut Naalakkersuisunit akuersissuteqarfigineqarnissaat pisariaqarpoq.

Kapitali 2
Atuuffii

§ 2.  Inatsisartut inatsisaat inuussutissarsiornikkut ingerlatanut Kalaallit Nunaata imartaani akisussaaffeqarfiusumi umiarsuarnit suliarineqartunut atuuppoq.
  Imm. 2.  Inatsisartut inatsisaat ingerlatanut, ingerlatat pineqartut inatsimmi allami imaluunniit nunani tamalaani isumaqatigiissutini maleruagassiivigineqarsimappata, atuutinngilaq, tassani ilaapput ingerlatat aalisarnermut inatsisini, aatsitassat ikummatissallu, usinik assartuussineq pillugit inatsisini, imarsiornermut inatsisini ilaalu ilanngullugit pineqartunut ilaasut.
  Imm. 3.  Pissutsit avatangiisinut pinngortitamullu tunngassuteqartut, avatangiisinut pinngortitamullu pissutsinut maleruagassat sukkulluunniit atuuttut malillugit maleruagassiivigineqarput.
  Imm. 4.  § 1-imi aamma § 2, imm. 1-3-mi nassuiaatit pissutsillu pillugit Naalakkersuisut erseqqinnerusunik aalajangersakkanik aalajangersaasinnaapput, ilanngullugu inatsisip atorneqarfissaata killilersugaaneranik.

Kapitali 3
Atugassarititaasut

  § 3.  Naalakkersuisut Kalaallit Nunaata imartaani sumiiffimmi erseqqinnerusumik killissalersorneqartumut, atugassarititaasut erseqqinnerusumik aalajangersarneqartut tunngavigalugit, inuussutissarsiornikkut ingerlatanik suliaqarnissamut akuersissummik tunniussisinnaapput.
  Imm. 2.  Pisinnaatitsissummik pigisaqartoq qanoq Namminersorlutik Oqartussanut akiliuteqassanersoq, § 1 malillugu akuersissummik qinnuteqaatip suliarineqarneranut atatillugu isumaqatigiissutigineqassaaq.
  Imm. 3.  Akuersissummut tunngatillugu pissutsit tamaasa attuumassuteqartut pillugit Naalakkersuisut imm. 1 malillugu akuersissummi atugassarititaasunik aalajangersaasinnaapput.
  Imm. 4.  § 1 malillugu akuersissummik pigisaqartoq suliaqarnerup ingerlanneqarnera aammalu taassuma inerneri pillugit nalunaarusiamik akuttunngitsumik nassiussisassaaq.

Inuiaqatigiinni piujuartussamik iluaqutaasumik sunniutaasussanik nalilersuineq (VSB) aamma inuiaqatigiinni piujuartitsinissaq pillugu isumaqatigiissutit

§ 4.  Ingerlataq Inatsisartut inatsisaanni pineqartunut ilaasoq, inuiaqatigiinni pissutsinut annertuumik sunniuteqarsinnaasutut naatsorsuutigineqartariaqarpat, inuiaqatigiinni piujuartussamik iluaqutaasumik sunniutaasussanik nalilersuineq (VSB) suliarineqareerpat aammalu tamanna pillugu nassuiaat Naalakkersuisunit akuersissuteqarfigineqareerpat aatsaat akuersissummik tunniussisoqarsinnaavoq.
  Imm. 2.  VSB-imi tassungalu nassuiaammi inuiaqatigiinni pissutsinut toqqaannartumik aamma toqqaannanngitsumik sunniutaasussat kiisalu pissutsit imminnut attuumassuteqarnerat, pissutsit imminnut sunniisarnerat aammalu pissutsit sunniutaasa ataatsimut katillugit sunniutaat naleqquttumik uppernarsineqassapput, nassuiarneqassapput nalilersorneqassallutillu.
  Imm. 3.  Naalakkersuisut aalajangissavaat pisuni imm. 1, taaneqartuni VSB-imik suliaqartoqassanersoq kiisalu inuiaqatigiinni piujuartitsinissaq allallu inuiaqatigiit aningaasaqarnerannut tunngasut pillugu isumaqatigiissuteqartoqassarnersoq.
  Imm. 4.  VSB-p suliarineqarnera, kiisalu VSB-mik nassuiaasiornerit akuersissutiginerilu, ilanngullugit VSB-mut atugarisassatut atortussiat pissarsiarineqartussat pillugit Naalakkersuisut malittarisassianik erseqqinnerusunik aalajangersaasinnaapput.

Kapitali 4
Oqartussaasut suliarinninnerat ilaalu ilanngullugit

 § 5.  Suliaqarnermut ingerlatanullu Inatsisartut inatsisaanni matumani pineqartunut ilaasunut Naalakkersuisut nakkutilliisuupput, tassani ilaallutik aalajangersakkat atugassarititaasullu inatsit naapertorlugu aalajangersagaasut naammassineqarsimaneri. Nakkutilliisut sulisui sukkulluunniit eqqartuussivimmi aalajangiinertaqanngitsumik, sukumiisumik kinaassutsimut uppernarsaammik takutitsillutik, nakkutilliinermi suliassanik suliarinninnissamut tamanna pisariaqarsimappat, suliffeqarfiup aamma ingerlatat Inatsisartut inatsisaanni matumani pineqartunut ilaasut sortaannut tamaginnut isersinnaapput.  § 1 imaluunniit allat Inatsisartut inatsisaanni pineqartunut ilaasut malillugit akuersissummik piginnittoq Inatsisartut inatsisaannik matuminnga, aalajangersakkanik imaluunniit akuersissummut atugassaritaasunik inatsit naapertorlugu aalajangersagaasunik malinninnissamut Naalakkersuisut peqqusinnaavaat.

§ 6.  § 1 malillugu akuersissummik tunineqartoq paasissutissanik tamaginnik, suliaqarnerannut ingerlataannullu Inatsisartut inatsisaani matumani pineqartunut ilaasunut oqartussaasut suliarinninnerannut pisariaqartunik, nalunaarutiginnissaaq.
  Imm. 2.  Oqartussaasut suliarinninnerata Inatsisartut inatsisaanni matumani pineqartunut ilaasup naammassineqarnissaanut, § 1 malillugu akuersissummik piginnittoq imm. 1 malillugu paasissutissanik Naalakkersuisut pisariaqartutut isigisaattut aammalu isumaqarnerat malillugu iluseqartumik nassiusseqqullugu Naalakkersuisut peqqusinnaavaat.
  Imm. 3.  § 1 malillugu akuersissummik Inatsisartut inatsisaanni matumani pineqartunut ilaasumik piginnittoq, Inatsisartut inatsisaat malillugu suliassanik suliarinninnermut allatullu oqartussaasut suliarinninnerannut atatillugu aningaasartuutit pisariaqartut akilissavai. Akiliinissaq akiliutitut imaluunniit aningaasartuutinik utertitsinertut akilersinneqarsinnaavoq.

§ 7.  Inatsisartut inatsisaat manna naapertorlugu akuersissuteqarnermi, pisinnaatitsissummik pigisaqartoq akuersissuteqarnernik imaluunniit akuersissutinik inatsisit allat malillugit pisariaqartunik, pinianngitsoornissaa akuerineqanngilaq.
  Imm. 2.  Taamaattoq Inatsisartut inatsisaat manna malillugu akuersissummi nunaminertamik atugassiinissaq pillugu piumasaqaatip naammassineqarnissaa ilaatinneqanngilaq. Inatsisartut inatsisaat manna malillugu akuersissut taamatuttaaq ingerlatassanik akuersissummi pineqartunut ilaasunik suliaqarnissamut pisinnaatitaaffiliivoq.

Kapitali 5
Pineqaatissiisarnerit

  § 8.  Inatsisartut inatsisaat manna naapertorlugu akuersissummik peqarani § 1-imi taaneqartutut inuussutissarsiornikkut ingerlataqartoq akiliisussanngortinneqarluni pineqaatissinneqassaaq.
  Imm. 2.  Akiliisussanngortinneqarluni pineqaatissinneqarsinnaavoq piaaraluni imaluunniit mianersuaalliorujussuarluni:
1)  Paasissutissanik Inatsisartut inatsisaat manna naapertorlugu imaluunniit aalajangersakkat imaluunniit atugassarititaasut Inatsisartut inatsisaat manna naapertorlugu aalajangersarneqartunik oqartussaasup pisinnaatitaaffeqarfigisaannik eqqunngitsunik imaluunniit paatsoortitsisunik tunniussisoq imaluunniit paasissutissanik nipangiussiinnartoq.
2)  Akuersissummut Inatsisartut inatsisaat manna malillugu tunniunneqartumut atugassarititaasunik imaluunniit aalajangersakkanik Inatsisartut inatsisaat manna naapertorlugu aalajangersarneqartunik unioqqutitsisoq.
3)  Peqqusissummik Inatsisartut inatsisaat manna imaluunniit aalajangersakkat Inatsisartut inatsisaat manna naapertorlugu aalajangersarneqartut naapertorlugit peqqusissutigineqartumik malinninngitsoq.
  Imm. 3.  Aalajangersakkani Inatsisartut inatsisaat manna naapertorlugu aalajangersarneqartuni aalajangerneqarsinnaavoq, aalajangersakkanik unioqqutitsinermut akiliisussanngortitsisoqarluni pineqaatissiisoqarsinnaasoq imaluunniit Kalaallit Nunaannut pinerluttulerinermut inatsit malillugu allanik pineqaatissiisoqarsinnaasoq.
  Imm. 4. Inuit pisinnaatitaasut pisussaatitaasullu Inatsisartut inatsisaannik matuminnga aamma atugassarititaasunik akuersissummi Inatsisartut inatsisaat manna naapertorlugu tunniunneqartumi aalajangersagaasunik unioqqutitsisut akiliisussanngortinneqarlutik pineqaatissinneqarsinnaapput, takuuk Kalaallit Nunaannut pinerluttulerinermut inatsimmi kapitali 5-imi maleruagassat.
  Imm. 5.  Akileeqqusissutit, Inatsisartut inatsisaat manna imaluunniit aalajangersakkat Inatsisartut inatsisaat manna naapertorlugu aalajangersarneqartut naapertorlugit pineqaatissiissutigineqartut, nunap karsianut tutsinneqassapput.

§ 9.  Inatsisartut inatsisaat ulloq 1. juli 2016 atuutilerpoq.

Namminersorlutik Oqartussat, ulloq 6. juni 2016

Kim Kielsen