Kapitali 1
Inatsisip atortuuffia

§ 1.  Inatsimmit pineqarput:
1) Uumasut nappaataat inunnut tunillaassorsinnaasut, taakkulu akuutissartaat siaruaassinnaasut.
2) Uumasoqatigiit nunatsinniittuunngitsut nujuartaatsinnut unammillersinnaasut uumasut nappaataannik taakkulu akuinik siaruarterisinnaasut pillugit malittarisassaliorneq.
3) Akiuiniarnissamut pilersaarutit.
4) Akiuiniariaatsit.
5) Nakkutilliineq.
  Imm. 2.  Uumasut nappaataat inunnut tunillaassorsinnaasut tamarmik taakkulu akui siaruaassinnaasut inatsimmi pineqarput, suliffeqarfinni inuussutissaleriffiusuni, uumasunik pingaarnertut tunisassiortuni, uumasuutini piniagassaniluunniit paasineqarneri apeqqutaatinnagit.
  Imm. 3. Uumasut eqqiluitsumik pineqarnissaannut tunngasut inatsimmi pineqanngillat. 

Kapitali 2
Nassuiaatit

§ 2.  Inatsimmi matumani makku imatut paasineqassapput:
1) Uumasut nappaataat inunnut tunillaassorsinnaasut: Tassaapput nappaatit tunillannartullu uumasut inuillu akornanni toqqaannartumik toqqaannanngitsumilluunniit tunillaassinnaasut. Uumasunik toqqaannartumik attaveqarnermi nerisassalluunniit aqqutigalugit tunillaassuuttoqarsinnaavoq.
2) Uumasut nappaataasa akui siaruaassinnaasut: Bakteriat, virusit, miluuffigisaminnit ilanngartuisut (parasit) uumasut inuillu akornanni tunillaassorsinnaasut suulluunniit.
3) Uumasut eqqiluitsumik pineqarnissaannut tunngasut: Uumasuutit nappaataannik, kiisalu nunalerinermi uumasuutini piniagassanilu nappaatinik pinaveersaartitsineq, nakkutiginninneq akiuiniarnerlu.
4) Uumasoqatigiit nunatsinniittuunngitsut nujuartaatsinnut unammillersinnaasut: Uumasoqatigiit pissusissamisoortumik nunatsinneersuunngitsut, takkunnermikkut siaruaannermikkulluunniit uumasut assigiinngisitaarnerannik, inuit peqqissusiannik inuiaqatigiilluunniit aningaasarsiornerannik ulorianartorsiortitsisinnaasut.

Kapitali 3
Oqartussat

§ 3.  Uumasunut Nakorsaqarnermut Inuussutissalerinermullu Oqartussat piginnaatitaasutut oqartussatut inatsimmik aqutsisuupput, kiisalu inatsimmi pineqartunik nakkutilliisuullutik.
  Imm. 2.  Uumasunut Nakorsaqarnermut Inuussutissalerinermullu Oqartussaqarfiup akisussaaffigai:
1) uumasut nappaataannik inunnut tunillaassorsinnaasunik taakkulu akuinik siaruaassinnaasunik akiuiniarnermut pilersaarusiornissaq,
2) paasissutissanik nuna tamakkerlugu akiuiniarnissamut pilersaarutinut atatillugu inernernik naliliinissamut pisariaqartinneqartunik katersinissaq,
3)  uumasut nappaataat inunnut tunillaassorsinnaasut pillugit inatsisip eqqortinnissaanut nakkutiginninnissaq siunertaralugu Kalaallit Nunaanni suliffeqarfiit inuussutissalerisut tunisassianik uumasuneersunik tuniniaanissamik akuerineqarsimasut akuttunngitsumik misissuiffigisar-nissaat, aamma
4)  uumasut nappaataat inunnut tunillaassorsinnaasut taakkulu akuinik siaruaassinnaasunik akiuiniarnissaq siunertaralugu uumasunik uumasuutinillu pingaarnertut tunisassianik akuttunngitsumik misissuisarnissaq.
  Imm. 3.  Suliffeqarfiit inuussutissalerisut pingaarnerusumillu uumasunit tunisassiortut Uumasunut Nakorsaqarnermut Inuussutissalerinermullu Oqartussaqarfiup qinnuiginninnerati-gut suliaminnik naammassinnittarnerannut pingaarutilinnik paasissutissanik tamanik § 3, imm. 2, nr. 2-mi aalajangersarneqartunik tunniussisassapput.

Kapitali 4
Uumasoqatigiit nunatsinneersuunngitsut nujuartaatsinnut unammillersinnaasut

  § 4. Uumasut nappaataat inunnut tunillaassorsinnaasut taakkulu akuisa siaruaassinnaasut siaruarnissaat pinngitsoortinniarlugu uumasoqatigiit nunatsinniittuunngitsut avataaninngaanneersut qaqugukkut qanorlu atugassaqartitsilluni nunatsinnut eqqussorneqarsinnaanerannut Naalakkersuisut erseqqinnerusunik malittarisassiorsinnaapput.

Kapitel 5
Akiuiniarnissamut pilersaarutit

  § 5.  Uumasut nappaataannik inunnut tunillaassorsinnaasunik nakkutilliinissaq misissuinissarlu kiisalu tunillaassuuttoqalinnginnissaa siunertaralugu akiuussusersuinissap nakkutilliinissallu qularnaarneqarnissaa Naalakkersuisut qularnaagassaraat.

§ 6.  Akiuiniarnissamut pilersaarutit, taakkununnga ilanngullugit uumasut nappaataannik inunnut tunillaassorsinnaasunik taakkualu akuinik siaruaassinnaasunik nakkutiginninneq, misissuineq, akiuussusersuineq tunillaassortoqalinnginnissaalu siunertaralugu qanoq iliuusissat pillugit Naalakkersuisut ersarinnerusunik malittarisassiorsinnaapput.

§ 7. § 6 naapertorlugu akiuiniarnissamut pilersaarutit:
1)  uumasut nappaataat inunnut tunillaassorsinnaasut taakkulu akuutissartaat siaruaassinnaasut takutinneqarsinnaassapput, laboratoriami misissuinissamut, il.il., pilersaarusiornikkut
2)  piginnaatitaalluni oqartussaasup suliffeqarfinnillu nerisassaleriffiusut, uumasunik uumasuutinillu pingaarnertut tunisassianut aqutsisuusut akornanni akisussaaffimmik agguataarineq aalajangersarneqassaaq,
3)  uumasut nappaataannik inunnut tunillaassorsinnaasunik taakkulu akuutissartaannik siaruaassinnaasunik paasisaqartoqartillugu akiuiniarnissat sorliit aalajangiunneqarnersut allassimassaaq.

Kapitali 6
Akiuiniariaatsit

   § 8.  Suliffeqarfinni inuussutissaleriffiusuni, uumasunik pingaarnertut tunisassiornerni, uumasuutini kiisalu piniagassani uumasut nappaataannik inunnut tunillaassorsinnaasunik taakkulu akuinik siaruaassinnaasunik annikillisaanissaq anguniarlugu akiuiniarnissamut periutsinik immikkut ittunik Naalakkersuisut aalajangiisinnaapput.
  Imm. 2.  Periutsit imm. 1-imi taaneqartut atorneqarnissaannut piumasaqaatit, taakkununnga ilanngullugit uppernarsaatit suleriaatsillu pisariaqartut pillugit malittarisassanik Naalakkersuisut akuersisinnaapput.
  Imm. 3.  Akiuiniariaatsit immikkut ittut ilaasa akiuiniarnissamut pilersaarutit ilaattut atorneqannginnissaat pillugu Naalakkersuisut aalajangiisinnaapput.

Kapitali 7
Nakkutilliineq

  § 9.  Uumasunut Nakorsaqarnermut Inuussutissalerinermullu Oqartussaqarfik uumasut nappaataasa inunnut tunillaassorsinnaasut taakkulu akuisa siaruaassinnaasut killilersimaarneqarnissaat imaluunniit siaruatsaaliorneqarnissaat anguniarlugu immikkut ittumik iliuuseqarnissamut inerteqquteqarsinnaavoq peqqussuteqarsinnaallunilu.
  Imm. 2.   Imm.1 aamma imm. 4 naapertorlugit iliuuserisassat imarisinnaavaat:
1)  Uumasuutigisanut piniagassanullu tunngatillugit:
a)  Immikkut misissuinerit,
b)  nakkutilliinerit,
c)  nalunaaqutsersuinerit,
d)  nakorsaanerit,
e)  akiuussutissalersuinerit,
f)  immikkoortitsilluni mattussinerit,
g)  uumasumik tunniussinissamut immikkut piumasaqaatit,
h)  uumasunik toqutsineq, tassunga ilanngullugit tuniluuffiusup eqqaani toqutsineq imaluunniit immikkut ittunik piumasaqaatitaqartumik toqoraaneq, aamma
i)  suujunnaarsitsineq.
2)  Uumasunit tunisassianik kiisalu nerukkaatissanik, naggorissaatinik, kinnerinik atortunillu allanik tunillatsisimasinnaasunik:
a)  Immikkut misissuinerit,
b)  suliarinninnerit,
c)  nalunaaqutsersuinerit,
d)  immikkut atuinissamut peqqussuteqarnerit,
e)  immummik, manninnik uumasunillu tunisassianik allanik tunniussinissamut immikkut piumasaqaatit,
f)  tunillannartuiaaneq,
g)  nungutitsineq,
h)  toqqortaateqarneq atortussaajunnaartitsinerlu, aamma
i)  suujunnaarsitsineq.
3)  Suliffeqarfinnut inuussutissaleriffiusunut aamma uumasunik pingaarnertut tunisassiortunut tunngatillugu kiisalu uumasuutinut atorneqartussatut sanaartukkanut, illuutinut, maskiinaatigut assartuussutigisartakkanullu tunngatillugit:
a)  Aaqqissuussinissamut ingerlatsinissamullu immikkut piumasaqaatit,
b)  eqqiaaneq tunillannartuiaanerlu
c)  akuersissummik utertitsineq,
d)  assiaqusersuineq, aamma
e)  imermik kuutsitsinissamut aamma aalajangersimasumut kuutsitsinissamut inerteqquteqar-neq.
  Imm. 3. Peqqussut inerteqqulluunniit malinneqanngippat Uumasunut Nakorsaqarnermut Inuussutissalerinermullu Oqartussaqarfik nioqqutissanik peqqussuteqarfigineqarsimasunik imaluunniit inerteqqutigineqarsimasunik suujunnaarsitseqqusisinnaavoq, aamma uumasut napparsimasut akiuussutissamik kapineqarnissaannik toqunneqarnissaannilluunniit peqqussuteqarsinnaalluni. Suujunnaartitsineq, akiuussutissamik kapisineq toqutsinerlu suliffeqarfimmut piginnittumullu taarsiissutitaqanngitsumik akiligassanngortinneqassaaq.
  Imm. 4.  Naalakkersuisut uumasut nappaataasa inunnut tunillaassorsinnaasut taakkulu akuisa siaruaassinnaasut killilersimaarneqarnissaat imaluunniit siaruatsaaliorneqarnissaat anguniarlugu immikkut ittumik iliuuseqarnissaq pillugu inerteqquteqarnissamut peqqussuteqarnissamullu malittarisassaliorsinnaapput.

  § 10.  Uumasunut Nakorsaqarnermut Inuussutissalerinermullu Oqartussaasut uppernarsaammik atorsinnaasumik eqqartuussisumiillu aalajangiinertaqanngitsumik, inatsimmi matumani imaluunniit inatsit una malillugu malittarisassani aalajangersarneqarsimasunik suliassanik naammassinninnermi atorneqartussanik paasissutissanik pissarsiniarlutik pisortat illuutaannut namminerisamillu illuutinut, sumiiffinnut, assartuutinut, niuertarfiup allagaataanut, pappiaqqanut il.il. , tassunga ilanngullugit aamma atortussianut elektronikki atorlugu toqqorneqarsimasunut sukkulluunniit isersinnaapput.

Kapitali 8
Naammagittaalliorneq

  § 11.  Uumasunut Nakorsaqarnermut Inuussutissalerinermullu Oqartussaasunit aalajangiiffigineqartut Aalisarnermut, Piniarnermut Nunalerinermullu Naalakkersuisoqarfimmut naammagittaalliuutigineqarsinnaapput.
  Imm. 2.  Naammagittaalliorsinnaatitaapput:
1)  aalajangiinermi pineqartoq, aamma
2) kinaluunniit suliassap inernerata qanoq kinguneqarneranik nammineerluni annertuumilluunniit soqutigisaqartoq.
  Imm. 3. Naammagittaalliornissamut piffissaliussaq tassaavoq ulloq aalajangiinerup nalunaarutigineqarfianiit sapaatit akunneri arfinillit qaangiutsinnagit.
  Imm. 4.  Naammagittaalliuuteqarneq Naalakkersuisut allamik aalajangiisimatinnagit kinguartitsinermik kinguneqassanngilaq.

Kapitali 9
Pineqaatissiissutit

  § 12.  Inatsimmi immikkut allamik tunngavissaqarluni pineqaatissiissut sakkortunerusoq atorneqartariaqartoq isumaqartoqanngippat, arsaarinninnermik akiliisitsissummilluunniit pineqaatissinneqarsinnaavoq:
1)  § 9, imm. 1 naapertorlugu aalajangiussanik malinninngitsoq, imaluunniit
2)  § 10 malillugu nakkutilliinermi oqartussanik isertitsinngitsoq.
  Imm. 2.  Inatsisartut inatsisaat manna malillugu najoqqutassiani atulersinneqartuni najoqqutassani aalajangersakkanik unioqqutitsinermi akiliisitsinermik arsaarinnissuteqarnermilluunniit pineqaatissiinissaq pillugu malittarisassanik aalajangersaasoqarsinnaavoq.
  Imm. 3.  Inatsisitigut piginnaatitaasut pisussaatitaasullu Kalaallit Nunaanni pinerluttulerinermi inatsimmi maleruagassat malillugit pillaanermi akisussaatinneqarsinnaapput. Kalaallit Nunaanni Namminersornerullutik Oqartussat, kommuni kommunilluunniit ataatsimooqatigiiffiat unioqqutitsisuuppat Kalaallit Nunaanni Namminersornerullutik Oqartussat, kommune kommunilluunniit ataatsimooqatigiiffiat akiliisitaanermik pineqaatissinneqarsinnaavoq.

  § 13.  Inatsimmik unioqqutitsisoq unioqqutitsinermi pisuunini nassuerutigippagu, piffissallu aalajangersimasup iluani akileeqqusissut qinnuteqarnikkut sivitsorneqarsinnaasup akilernissaanik nalunaaruteqarpat, Naalakkersuisut nalunaaruteqarsinnaapput suliaq eqqartuussivikkoortinnagu aalajangiivigineqarsinnaasoq.
  Imm. 2.  Imm. 1-imi nalunaarut taaneqartoq eqqarsaatigalugu Kalaallit Nunaanni eqqartuussisarnermi inatsimmi allakkamut unnerluussutaasumut piumasaqaatit pillugit aamma oqaaseqarnissamut pisussaaffeqannginneq pillugu aalajangersakkat taamatuttaaq atuupput.
  Imm. 3.  Akiliisitsissut piffissaagallartillugu akilerneqarpat, imaluunniit akuerineqarnerata kingorna akilerneqarpat imaluunniit pillaatissaq atorneqarpat malersueqqinnissaq atorunnaassaaq.

§ 14. Akiliisitsissutit, Inatsisartut inatsisaat manna naapertorlugu imaluunniit Inatsisartut inatsisaat manna naapertorlugu najoqqutassat malillugit eqqartuussutigineqartut Nunatta Karsianut tutsinneqassapput.

Kapitali 10
Atortuulerfia

  § 15.  Inatsisartut inatsisaat ulloq 1. juli 2016 atuutilerpoq.

Namminersorlutik Oqartussat, ulloq 6. juni 2016

Kim Kielsen