§ 1

Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaat nr. 10, 19. maj 2010-meersoq, kingorna Inatsisartut inatsisaatigu,t nr. 3, 4. juni 2012-ikkut allanngortinneqartoq allannguutit makku suliarineqarput:

1.  I § 5-imi imm.  5-itut aamma imm. 6-itut ilanngunneqassapput:
"Imm. 5.  Qitiusumik inuussutissarsiutinillu ilinniarfiit Naalakkersuisut akuersitereernerisigut Akuerisaasumik inuussutissalerinermik sammiveqartumik ilinniartitsinermut aamma tassunga misilitsinnerit ingerlannerannut suliarinnittussarsiuussinnaavaat.
  Imm. 6.  Qitiusumik inuussutissarsiutinillu ilinniarfiit Naalakkersuisut akuersereernerisigut ilinniakkat ilaat ingerlariaqqiffiusut assingusut Kalaallit Nunaanni ilinniarfinnit neqeroorutaanngitsut neqeroorutigisinnaalissavaat"

2.  § 25, imm. 2-mi oqaaseqatigiit pingajuat imatut oqaasertalerneqassaaq:
”Sungiusarluni sulinerit § 10, imm. 4 naapertorlugu tamakkiisumik ilaannakortumilluunniit ilinniarfinni atuaatigalugu sungiusarnertut ingerlanneqarsinnaapput, ilinniartoq sungiusarluni suliffimmik, aamma illoqarfimmi allami ilinniartup najugarinngisaani, neqeroorutigineqartumik itigartitsisimappat.”

3.  § 25, imm. 2-mi,  oqaaseqatigiit sisamaattut ilanngunneqassaaq:
”Inunnik isumaginninnermi oqartussat tamanna pillugu nalunaaruteqarnerisigut uppernarsarneqartunik ilinniartup pisuussutiginngisaanik ilinniartup sungiusarluni sullivissatut innersuunneqartup sungiusarfigisinnaanngisaanik kinguneqartumik inuttut immikkorluinnaq atugaqartoqarpat tamanna pillugu qinnuteqartoqarneratigut Naalakkersuisut oqaaseqatigiit pingajuanni piumasaqaatinut immikkut akuersisinnaapput.

4.  § 34, imm. 1, imatut oqaasertalerneqassaaq:
”Qitiusumik ilinniarfiit, tak. § 31, imm. 1, tamarmik immikkut siulersuisunit 5-7-inik ilaasortalinnit aqutarineqassapput, taakkualu suliffeqarnermi kattuffiit akornannit toqqarneqartassapput, malittarisassat ilinniarfiit ataasiakkaat ileqqoreqqusaanni aalajangersarneqartut naapertorlugit. Qitiusumik ilinniarfiit ilinniartitsisui aamma teknikkikkut allaffissornikkullu sulisui, siulersuisuni taaseqataasinnaatitaanngitsumik sinniiseqartitsissapput. Taamaattoq qitiusumik ilinniarfik ataasiinnaanngitsumik, sumiiffinnili arlalinni neqerooruteqartarpat, neqerooruteqartarfinnit tamanit sulisut sinniisaannik aalajangeeqataasinnaanani peqataasartussamik siulersuisut ilaqartinneqassapput. Siulersuisunut ilaasortaq siulersuisunut marlunnik amerlanerusunut toqqarneqarsinnaanngilaq. Katiguttoqartillugu, tak. § 33, ilinniarfiit katiguttut siulersuisui piffissami ikaarsaariarfimmi, katiguttoqarnissaanik aalajangiisoqarneraniit ukioq ataaseq tikillugu sivisussusilimmik ingerlagallarsinnaapput, tamatuma kingorna ilinniarfiit katiguttut siulersuisussaannik nutaanik toqqaasoqassaaq, tak. naggat siulleq. Piffissami ikaarsaariarfiusumi ilinniarfiit katiguttut siulersuisui ilinniarfimmut katigutsitsinikkut pilersinneqartumut nutaanik ileqqoreqqusaliorlutillu ulluinnarni suleriaasissaliussapput.”

5.  § 34, imm. 2-mi, oqaaseqatigiit pingajuattut, sisamaattut tallimaattullu ilanngunneqassapput:
“Siulersuisuni ilaasortat qassiunissaannik suliffeqarnermi kattuffiit sorliit siulersuisut atuuffissaanni aggersumi toqqaasinnaatitaanissaannik kissaatigineqartut pillugit siulersuisut atuuffiisa naanissaa kingusinnerpaamik ukiumik ataatsimik sioqqullugu siulersuisut Naalakkersuisunut ilisimatitsissuteqassapput. Naalakkersuisut siulersuisut ilisimatitsissutaasa tigunerata kingorna piffissap qaammatit pingasut iluanni kissaatigineqartut oqaaseqaateqarfigisinnaavaat. Siulersuisut kissaataat qitiusumik ilinniarfiup malittarisassaasa allanngortinneqarnissaannik pisariaqartitsinermik kinguneqassappata, siulersuisut atuuffiisa naanissaa kingusinnerpaamik qaammatit arfinillit sioqqullugit tamanna pillugu siunnersuummik akuerineqartussanngorlugu Naalakkersuisunut nassitsissapput.”

6.  § 46 imatut oqaasertalerneqassaaq:
”§ 46.  Tunngaviusumik inuutissarsiummik ilinniagaq naammassineqassappat piumasaavoq, ilinniartup aamma suliffeqarfiup ataatsip amerlanerilluunniit akornanni lærlingitut imaluunniit ilinniartinneqarnissamik isumaqatigiissuteqartoqarsimanissaa.
  Imm. 2.  Lærlingitut imaluunniit ilinniartinneqarnissamik isumaqatigiissummut ilaassapput ilinniakkami sungiusarluni sulinissat ilinniarfimmiittarnissallu tamarmik, tassunga ilanngullugit svendinngussalluni misilitsinnerit. Naalakkersuisut qitiusumik ilinniarfinnit inuussutissarsiutinulluunniit ilinniarfinnit qinnuteqartoqareerneratigut immikkut akuersissuteqarsinnaapput, ilinniarfik atuarfimmi sulilluni sungiusarnissamut pisariaqartinneqartunik atortoqarpat uppernarsarsinnaallugulu ilinniartup sungiusarluni sulinera atuarfimmi sungiusarluni sulinermigut naammassisinnaagaa. Ilinniartut atuarfimmiittarluni ilinniarnissamik isumaqatigiissuteqanngitsut, matumani atuarfinni sungiusarlutik sulinissaq aamma eqqarsaatigalugu, suliffeqarfimmit akissarsiaqanngitsutut tunngaviusumik inuussutissarsiummik ilinniartutut isigineqassapput."
  Imm. 3.  Suliffeqarfiit arlallit isumaqatigiissummut peqataappata, isumaqatigiissummi ersissaaq, ilinniarfimmiinnerit sungiusarlunilu sulinerit suut suliffeqarfiit ataasiakkaat peqataaffigineraat.
  Imm. 4.  Isumaqatigiinnermi suliffeqarfik imminut pisussaaffilersinnaavoq, ilinniartup ilinniarnerata ilaa suliffeqarfimmi allami imaluunniit atuarfimmi sungiusarluni sulineq ingerlatikkumallugu.
  Imm. 5.  Inuutissarsiutinik ilinniartitsinerit Naalakkersuisunit akuerisaasut, lærlingitut ilinniartinneqarnissamilluunniit isumaqatigiissuteqarnissamik piumasaqaateqarfiunngitsut aamma atuaatigaluni sungiusarluni sulineq, imm. 1-4-mi ilaatinneqanngillat.

7.  § 61, imm. 1 imatut oqaasertalerneqassaaq:
"Aningaasaliissutit aningaasanut inatsimmi aalajangersarneqartut iluannit, inuutissarsiutinik ilinniartitsinermut tunngasutigut pikkorissartitsinernut atatillugu angalanernut najugaqarnernullu aningaasartuutit matussuserneqarnissaannut, tapiissuteqartoqarsinnaavoq."

§ 2

Inatsisartut inatsisaat aggustip aallaqqaataani 2016-imi atuutilissaaq.
  Imm. 2.  Oqaatsinik Pikkorissarfik pillugu Inatsisartut inatsisaat nr. 14, 6. November 1997-imeersoq tassunga peqatigitillugu atorunnaarsinneqarpoq.
  Imm. 3.  Siulersuisut inatsisip atuutilernerani ukiumit ataatsimit sivikinnerusumik suli atuuttussat, ilisimatitsissut § 1, nr. 4-mi taaneqartoq sapinngisamik piaarnerpaamik nassiutissavaat.

Namminersorlutik Oqartussat, ulloq 6. juni 2016

Kim Kielsen