Pinngortitamik illersuineq pillugu Inatsisartut inatsisaanni nr. 29-mi, 18. december 2003-meersumi § 5, imm. 1, nr. 4 aamma 6-imiit 9-mut, § 11, § 16, § 39, imm. 5, § 49 aamma § 63, piniarneq aallaaniarnerlu pillugit Inatsisartut inatsisaat nr. 12, 29. oktober 1999-imeersumi § 15, imm. 4 aamma Kalaallit Nunaannut pinerluttulerinermut inatsimmi §§ 17-imiit 19-imut, §§ 127-imiit 128-imut aamma §§ 166-imiit 170-imut naapertorlugit aalajangersarneqarput:

 

Kapitali 1
Siunertaq

 

  § 1.  Nalunaarummi siunertaavoq Kalaallit Nunaanni sumiiffiit Ramsar-eqarfiusut illersorneqarnissaat, aammalu sunik sumiiffimmi ingerlataqartoqaqqusaanersoq maleruagassiuinissaq. Sumiiffinni pinngortitap uumasullu piujuartinneqartussatut inissisimanerisa imaluunniit sumiiffinni pinngortitap ataqatigiittut isikkoqarnerata ajornerulersinneqannginnissaata qulakkerneqarnissaa siunertaralugu tamanna pivoq. Nalunaarut masarsoqarfiit nunanut tamalaanut pingaaruteqartut pillugit sumiiffinnut Ramsar-eqarfiusunut nunani tamalaani isumaqatigiissummi, 2. februar 1971-imeersumi Kalaallit Nunaata nunanut tamalaanut pisussaaffiinik atuutsitsilernissamut tapertaassaaq.

Killiliussat nassuiaatillu

 

  § 2.  Nalunaarut sumiiffinni Ramsar-eqarfiusuni ingerlatsinermut sinaakkusiivoq aammalu sumiiffinni pinngortitamik uumasunillu illersuinissamut maleruagassat minnerpaaffissaat ilaatinneqarlutik. Inatsisit allat naapertorlugit pinngortitamik uumasunillu illersuinissamut piumasaqaatinik sakkortunerusunik aalajangersaasoqarsimappat, taakku nalunaarummit matumannga salliutinneqassapput.
  Imm. 2.  Nalunaarut pinngortitamik illersuinermut inatsimmi § 4 naapertorlugu pisuussutsinik uumaatsunik, ilanngullugit aatsitassat, misissueqqaarnermut, aatsitassarsiorluni misissuinermut piiaanermullu atorneqassanngilaq.

 

  § 3.  Nassuiaatit:
1)  Angallatit motoorillit tassaapput qamutit larvefodinik assakaasunilluunniit ingerlatillit, sikukkut, aputikkut, qaqqatigut pinngortitamilu nunami allatut ilusilimmi angallatitut ilusiligaasut atorneqartulluunniit.
2)  Kommunalbestyrelsi tassaavoq kommunimi Ramsar-eqarfiup inissisimaffigisaani aalajangersimasumi kommunalbestyrelsi.

Sumiiffiit Ramsar-eqarfiit nalunaarsorsimaffii

 

  § 4.  Sumiiffiit Ramsar-eqarfiusut ilanngussaq 1-imi aamma 2-mi allassimapput.

 

Kapitali 2
Tamanit tikinneqarsinnaanera atorneqarsinnaaneralu

 

  § 5.  Kapitali 2-mi killilersuinerit aalajangersagaasut malinneqartillugit kikkulluunniit Ramsar-eqarfinnukarsinnaatitaapput.

Qamutinik motoorilinnik nunakkut angalaneq

 

   § 6.  Apriilip ulluisa 15-anniit septembarip ulluisa 30-annut sumiiffinni Ramsar-eqarfiusuni angallatit motoorillit atorlugit nunakkut angalanissaq inerteqqutaavoq, taamaattorli imm. 2-miit 4-mut takukkit.
  Imm. 2.  Pinngortitamut, Avatangiisinut Nukissiuuteqarnermullu Naalakkersuisoqarfik sumiiffinni Ramsar-eqarfiusuni nunakkut angallatit motoorillit atorlugit angalanissamut akuersissuteqarsinnaavoq:
1)  Angalaneq pinngortitamut uumasunullu annertuumik sunniuteqassangatinneqanngippat.
2)  Ilisimatusarneq misissuinissarluunniit, tassungalu ilanngullugu erngup nukinganik isumalluutinik misissueqqaarnissaq siunnerfigalugit angalanissaq pisariaqarpat.
  Imm. 3.  Pinngortitamut, Avatangiisinut Nukissiuuteqarnermullu Naalakkersuisoqarfik akuersissuteqarnermut atatillugu piumasaqaatinik, pinngortitamut uumasunullu sunniutinik annikillititsisussanik  aalajangersaasinnaavoq.
  Imm. 4.  Pisuni matuma kinguliani taaneqartuni imm. 1-imi allassimasut apeqqutaatinnagit qamutinik angallatinik atuisoqarsinnaavoq:
1)  Ujarlernerit, annaassiniarnerit imaluunniit ajornartoornerit assingusut.
2)  Politiit, aallaaniarnermut aalisarnermullu nakkutilliisut imaluunniit nakkutilliinermi oqartussaasut sulinerannut atatillugu.
3)  §§ 9-imiit 12-imut naapertorlugit akuersissummi imaluunniit akuersissuteqarnermi ingerlatassatut akuerineqarsimasunut atatillugu.

Immakkut angalaneq

 

  § 7.  Sumiiffinni Ramsar-eqarfiusuni juulip ulluisa aallaqqaataanniit septembarip ulluisa 30-iannut 10 knob sinnerlugu sukkassusilimmik immakkut angalasoqaqqusaanngilaq, taamaattorli imm. 2 takuuk.
  Imm. 2.  Pisuni matuma kinguliani taaneqartuni imm. 1 atuutissanngilaq:
1)  Angallavinni nalunaarsorneqarsimasuni imaatigut angalanerit.
2)  Ujarlernerit, annaassiniarnerit imaluunniit ajornartoornerit assingusut.
3)  Politiit, aallaaniarnermut aalisarnermullu nakkutilliisut imaluunniit nakkutilliinermi oqartussaasut sulinerannut atatillugu.
4)  Issittumi Sakkutooqarfiup annaassiniarnernik suliaqarluni angalanerinut atatillugu.
5)  §§ 9-imiit 12-imut naapertorlugit akuersissummi imaluunniit akuersissuteqarnermi ingerlatassatut akuerineqarsimasunut atatillugu.

Timmisartumik qulaassisarnerit timmisartornerillu

 

  § 8.  Sumiiffiit Ramsar-eqarfiusut silaannartaanni apriilip ulluisa 15-anniit septembarip ulluisa 30-annut immap qaaniit imaluunniit nunamiit 500 meterinit appasinnerusumi timmisartornissaq inerteqqutaavoq, taamaattorli imm. 2-miit 4-mut takukkit.
  Imm. 2.  Pinngortitamut, Avatangiisinut Nukissiuuteqarnermullu Naalakkersuisoqarfik sumiiffinni Ramsar-eqarfiusuni timmisartornissamut akuersissuteqarsinnaapput:
1)  Timmisartumik qulaassineq pinngortitamut uumasunullu annertuumik sunniuteqartussatut naliliiffigineqanngippat.
2)  Ilisimatusarneq misissuinerlu eqqarsaatigalugit timmisartumik qulaassinissaq pisariaqarpat.
  Imm. 3.  Pinngortitamut, Avatangiisinut Nukissiuuteqarnermullu Naalakkersuisoqarfik akuersissuteqarnermut atatillugu piumasaqaatinik, pinngortitamut uumasunullu sunniutinik annikillititsisussanik aalajangersaasinnaavoq.
  Imm. 4.  Pisuni matuma kinguliani taaneqartuni imm. 1-imi allassimasut apeqqutaatinnagit timmisartortoqarsinnaavoq:
1)  Ujarlernerit, annaassiniarnerit imaluunniit ajornartoornerit assingusut.
2)  Nakkutilliinermi oqartussaasut sulinerannut atatillugu.
3)  Miffiusinnaasut imaluunniit silaannakkut angallannermut maleruagassat pissutaallutik allatut iliuuseqarnissaq pisariaqartinneqarpat.
4)  §§ 9-imiit 12-imut naapertorlugit akuersissummi imaluunniit akuersissuteqarnermi ingerlatassatut akuerineqarsimasunut atatillugu.

Illuaqqanut sanaartukkanullu nunaminertanut pilersaarutit akuersissutillu

 

   § 9.  Pinngortitamut, Avatangiisinut Nukissiuuteqarnermullu akuersissummik piniaqqaarani, sumiiffinni Ramsar-eqarfiusuni illunik sanaartukkanillu aalaakkaasunik allanik sananissaq, illunik pioreersunik alliliinissaq allanngortiterinissarluuniit, kiisalu aqqusinernik pisuinnaallu aqquserninik sananissaq inerteqqutaavoq, taamaattorli § 10, imm. 2 takuuk.

 

  § 10.  Kommunalbestyrelsi sumiiffinnut Ramsar-eqarfiusut iluanni inissisimasunut kommunimut pilersaarusiorpat, kommunimut pilersaarutissatut siunnersuut atuutsinneqalinnginnerani Pinngortitamut, Avatangiisinut Nukissiuuteqarnermullu Naalakkersuisoqarfimmut akuerisassanngorlugu nassiunneqassaaq. Kommunalbestyrelsip kommunimut pilersaarummik nassiussinermi suliami sumiiffik Ramsar-eqarfiusoq pineqartoq erseqqissaatigissavaa.
  Imm. 2.  Sumiiffimmut Ramsar-eqarfiusumut atatillugu kommunimut pilersaarut akuerineqarpat, kommunalbestyrelsi kommunimut pilersaarut naapertorlugu nunaminertamik atuinissamut akuersissummik nalunaaruteqarsinnaavoq. Taamatut pisoqartillugu nunaminertamik atuinissamut akuersissuteqartoqassappat, § 9 naapertorlugu akuersissuteqarnissaq piumasarineqanngilaq.

 

  § 11.  § 9 naapertorlugu qinnuteqaammut aamma § 10, imm. 1 naapertorlugu kommunimut pilersaarutissatut siunnersuummut, sumiiffimmi Ramsar-eqarfiusumi pinngortitamut uumasunullu kingunerisassatut naatsorsuutigineqartut pillugit paasissutissat ilanngullugit nassiunneqassapput.
  Imm. 2.  Pinngortitamut, Avatangiisinut Nukissiuuteqarnermullu Naalakkersuisoqarfik § 9 naapertorlugu suliat imaluunniit § 10, imm. 1 naapertorlugu kommunimut pilersaarutissatut eqqarsaatigineqartut sumiiffimmi Ramsar-eqarfiusumi pinngortitap uumasullu eriagisassatut inissisimanerannik ajornerulersitsissanersut naliliissaaq.
  Imm. 3.  Imm. 2 naapertorlugu naliliinermi suliassatut eqqarsaatigineqartut sumiiffimmi Ramsar-eqarfiusumi pinngortitap uumasullu eriagisassatut inissisimanerannik ajornerulersitsissasut naliliisoqarpat, aatsaat suliassat inuiaqatigiinni soqutigisat annertuut eqqarsaatigalugit pisariaqartutut isumaqarfigineqarpata akuersissummik nalunaaruteqartoqarsinnaavoq imaluunniit kommunimut pilersaarut akuerineqarsinnaavoq.

 

  § 12.  Akuersissut tunniunneqarpat, imaluunniit kommunimut pilersaarut akuerineqarpat, kommunimut pilersaarummi imaluunniit akuersissummi piumasaqaatinik, pinngortitamut uumasunullu sunniutinik annikillisitsisussanik aalajangersaasoqarsinnaavoq. Atugassarititaasut kommunalbestyrelsip attuumassuteqartup oqaaseqaataanik piniareernerup kingorna Pinngortitamut, Avatangiisinut Nukissiuuteqarnermullu Naalakkersuisoqarfimmit aalajangersarneqassapput. 
  Imm. 2.  Pinngortitamut, Avatangiisinut Nukissiuuteqarnermullu Naalakkersuisoqarfiup pisariaqartikkuniuk, akuersissutaasinnaasumik tunniussaqannginnermini imaluunniit kommunimut pilersaarutip akuerineqarneranik nalunaaruteqartoqannginnerani kikkulluunniit oqaaseqarnissaannik periarfississinnaavai.
  Imm. 3.  Pinngortitamut, Avatangiisinut Nukissiuuteqarnermullu Naalakkersuisoqarfiup Pinngortitaleriffik § 11, imm. 2 naapertorlugu naliliinermut aamma imm. 1 naapertorlugu piumasaqaatinik aalajangersaanermut oqaaseqartissinnaavaa.

Suliat allat

 

   § 13.  Sumiiffinni Ramsar-eqarfiusuni timmissat imarmiut nerisatigut tunngavissaasa qularnaarneqarnissaat eqqarsaatigalugu qalut puttasut, qalut natersiutit kiliortuutillu uiluinniutit atorlugit aalisarneq inerteqqutaavoq.
  Imm. 2.  Sumiiffinni Ramsar-eqarfiusuni juulip ulluisa aallaqqaataanniit septembarip ulluisa 30-annut qassutit atorlugit aalisarneq inerteqqutaavoq.
  Imm. 3.  Sumiiffinni Ramsar-eqarfiusunik qeqqussanik killuinissaq inerteqqutaavoq.

 

  § 14.  Sumiiffinni Ramsar-eqarfiusuni nunalerineq, uumasuuteqarneq, naatitsineq imaluunniit naasortarneq inerteqqutaavoq.

 

  Kapitali 3
Nakkutilliineq aqutsinerlu

 

  § 15.  Kommunalbestyrelsip attuumassuteqartup nalunaarut manna malinneqarnersoq nakkutigissavaa.
  Imm. 2.  Pinngortitamut, Avatangiisinut Nukissiuuteqarnermullu Naalakkersuisoqarfiup sumiiffinni Ramsar-eqarfiusuni, kommunit aggornerisa avataanniittuni nalunaarut manna malinneqarnersoq nakkutigissavaa.

 

  § 16.  Pinngortitamut, Avatangiisinut Nukissiuuteqarnermullu Naalakkersuisoqarfik kommunalbestyrelsinut attuumassuteqartunut tusarniaareernermini sumiiffinni Ramsar-eqarfiusuni ingerlatsinissamut pilersaarusiorsinnaavoq.

Pineqaatissiissutit

 

  § 17.  § 6, imm. 1-imik, § 7, imm. 1-imik, § 8, imm. 1-imik, § 9-mik, § 13-imik aamma § 14-imik unioqqutitsinerit akiliisitsinermik kinguneqarsinnaapput, takuuk pinerluttulerinermut inatsimmi kapitali 26 aamma 37.
  Imm. 2.  Piumasaqaatinik § 6, imm. 3, § 8, imm. 3 aamma § 12, imm. 1 naapertorlugit aalajangersarneqartunik unioqqutitsinerit akiliisitsinermik kinguneqarsinnaapput, takuuk pinerluttulerinermut inatsimmi kapitali 26 aamma 37.
  Imm. 3.  Pinerluttulerinermut inatsimmi kapitali 5-imi maleruagassat malillugit inuit pisinnaatitaasut pisussaatitaasullu akiliisussanngortinneqarsinnaapput.
  Imm. 4.  Nalunaarut manna naapertorlugu akiliisitsissutaasut Nunap Karsianut tutsinneqassapput.

 

  § 18.  Pinngortitamut, Avatangiisinut Nukissiuuteqarnermullu Naalakkersuisoqarfiup nalunaarummik imaluunniit nalunaarut naapertorlugu maleruagassianik unioqqutitsisoqarneranut atatillugu akuersissutit, nalunaarut manna imaluunniit nalunaarut naapertorlugu maleruagassiat naapertorlugit tunniunneqartut, utertissinnaavai.

Atuutsitsilernermut aalajangersakkat

 

   § 19.  Nalunaarut manna 1. septembari 2016-mi atuutilerpoq.

 

 

Namminersorlutik Oqartussaq, 1. juni 2016.

 

 

Mala Høy Kúko

/

Mette Skarregaard Pedersen