§ 1

Aalisarnermut aningaasaliissutinut immikkoortitat pillugit Inatsisartut inatsisaanni nr. 15, 20. november 2006-imeersumi Inatsisartut inatsisaatigut nr. 13, 2. december 2009-imeersukkut allanngortinneqarneranik Inatsisartut inatsisaat nr. 22, 22. november 2011-imeersoq kingusinnerusukkullu Inatsisartut inatsisaatigut nr. 8, 3. december 2012-imeersukkut makkua allan­nguuteqartinneqarput:

1.  § 1, imm. 1, imatut oqaasertalerneqassaaq:
”§ 1.  Inatsisartut inatsisaanni siunertaavoq aalisarnermik inuussutissarsiutip siuarsaaviginissaanut tapiissuteqartarnissaq, tassunga ilanngullugit ingerlatserusuttunut nutaanut piuminarnerusumik periarfissiisoqarnissaa kiisalu aalisariutit nutarteriffigineqarnissaannut tapersiisarnissaq.”

2.  § 14 imatut oqaasertalerneqassaaq:
”§ 14.  Naalakkersuisut sinerissap qanittuani aalisarnermi aalisariutinik isaterinermut tapiissuteqarsinnaapput, siunertamut tamatumunnga ukiumi aningaasanut inatsisikkut tamakkiisumik aningaasaliissutaasutut killiliussami immikkoortinneqarsimasunit.
  Imm. 2.  Tapiissuteqartoqarsinnaavoq angallammut tunngasut uku atuuppata:
1)  Aalisariutinik Nalunaarsuiffimmi nalunaarsorsimappat imaluunniit Angallatinik Nalunaarsuiffimmiippat aammalu Aalisarnermut, Piniarnermut Nunalerinermullu Naalakkersuisoqarfiup angallatinut aalisarnermik inuussutissarsiornermut akuersissutillit nalunaarsuiffianni nalunaarsorsimappat,
2)  angallatip allagartaa malillugu angissusaa 5 BRT/ 8 BT qaangersimappagu taamaattorli 75 BRT/120 BT ataallugu angissuseqarpat,
3)  ukiunik 25-nik pisoqaassuseqarpat pisoqaanerulluniluunniit,
4)  nunatsinni aalisarnermi aalisaqataasarsimappat, aamma
5)  piffissaq qinnuteqarfiusoq sioqqullugu ukiumi qaammatisiuteqarfiusumi ukiuni marlunni pisassiissutinik nammineq pigisanit nuussinikuusimanngippat. Tamatumani aamma pineqarput pisassiissutinit pigisat tamakkerlugit taassumaluunniit ilaannaanit nuussisoqarsimappat.
  Imm. 3.  Angallammut pisortat taarsigassarsisimassagaluarpata tapiissuteqarsimassagaluarpataluunniit, imm. 1 naapertorlugu tapiissutit aatsaat pisortat taarsigassarsisitsisimanerisa tapiissuteqarsimanerisalu kingorna ukiut qulit qaangiuppata tunniunneqarsinnaapput.
  Imm. 4.  Qaqugukkulluunniit qinnuteqaat tunniunneqarsimagaluarpat imaluunniit isaterinissamut tapiiffigineqarsinnaanermut piumasaqaatit qinnuteqaateqartunit arlalinnit tamarmiusunilluunniit eqquutitinneqarsimagaluarpataluunniit, § 17, imm. 1-imi ataatsimiititaliap taaneqartup qinnuteqaateqartut salliutinneqarnissaannut erseqqissumik naliliinerit aallaavigalugit aningaasat tapiissutaasinnaasut pissusissamisoortuunersullu naliliiffigissavai.
  Imm. 5.  Imm. 4-mi pingaarnersiuineq taaneqartoq piumasaqaatit tulliuttuni taaneqartut tunngavigalugit ingerlanneqassaaq:
1)  Angallatip pisoqaassusaa usisinnaassusialu,
2)  angallatip pisarisimasai,
3)  nunap immikkoortuata ilaani angallatit akuersissutilluunniit qassiuneri, aammalu
4)  qinnuteqartup angallammik piginnittuunerata sivisussusia.”

3.  § 15 imatut oqaasertalerneqassaaq:
”§ 15.  Tapiissutit annertussusissaat Naalakkersuisut aningaasat tunngavissatut aalajangersagaat aallaavigalugit angallatillu angissusaat BRT imaluunniit BT aallaavigalugit naatsorsorneqassapput. Angallat ukiunit 25-nit pisoqaaneruppat tapiissutigineqartartut angallatip pisoqaliartornera malillugu ukiumut 5%-imik appartinneqartassapput, taamaattorli annerpaamik 50 %-imik.
  Imm. 2.  Isaterinissamut tapiissutit annertunerpaamik angallatip nalingata 100 %-ianik angissuseqarsinnaapput.
  Imm. 3.  Angallatip nalinga nalilersuisartumit arlaannaannulluunniit attuumassuteqanngitsumit Aalisarnermut, Piniarnermut Nunalerinermullu Naalakkersuisoqarfimmit toqqarneqartumit aalajangersarneqassaaq. Nalilersuisitsinermi aningaasartuutit qinnuteqartup akilertassavai.
  Imm. 4.  Angallammik isaterinissamut qinnuteqarnissaq ukiumik ataatsimik sioqqullugu angallatip motorilluunniit ajoqusersimanera pissutigalugu sillimmasiisarfimmiit akiliutigineqartut, angallammik iluarsaassinermut sillimmasiisarfiup akiliutai atorneqarsimanngippata tapiissuteqarnermi taakkua ilanngaatigitinneqassapput. Aammattaaq sillimmasiissutit qinnuteqarnerup kingorna ajutoorneq pissutigalugu sulili tapiissutit tunniunneqanngitsut akiliutigineqartut, ilanngaatigitinneqassapput."

4.  § 16 imatut oqaasertalerneqassaaq:
”§ 16.  Isaterinissamut tapiissutit tunniunneqartinnagit angallat piviusumik isatereerneqarsimassaaq.
  Imm. 2.  Isaterineq isaterivissatut Aalisarnermut, Piniarnermut Nunalerinermullu Naalakkersuisoqarfimmit akuerisaasumit ingerlanneqassaaq.
  Imm. 3.  Tapiissutit tunniunneqartinnagit angallatip aalisariutinik nalunaarsuiffimmit imaluunniit Angallatinik nalunaarsuiffimmi aammalu Aalisarnermut, Piniarnermut Nunalerinermullu Naalakkersuisoqarfiup angallatinut aalisarnermik inuussutissarsiornermut akuersissutilinnut nalunaarsuiffiani nalunaarsorsimanera peerneqassaaq.
  Imm. 4.  Isaterinissamut tapiissutinik pissarsisut pisassiissutinik pigisassanit peqartut tapiissutissanik aningaasaliissuteqarnermi piumasaqaataavoq, piffissami aningaasaliiffiusup kingorna ukiuni tallimani pisassiissutinit pigisanit tamakkerlugit taassumaluunniit ilaannaanit nuussisoqarsimannginnissaa. Piffissap pineqartup iluani tapiissutisisup pisassiissutinit pigisani tuniniarsimagunigit, inatsimmi § 12 imm. 1 nr. 4 naapertorlugu tapiissutit Naalakkersuisunit uterteqquneqarsinnaapput."

§ 2

Inatsisartut Inatsisaat 1. januar 2016-imi atuutilissaaq.

Namminersorlutik Oqartussat, ulloq 9. december  2015

Kim Kielsen