Aalisarneq pillugu Inatsisartut Inatsisaanni nr. 18, 31. oktober 1996-imeersumi § 25 aamma § 33 imm. 2, kingullermik Inatsisartut Inatsisaanni nr. 12, 3. december 2012-imeersumi allanngortinneqartoq naapertorlugu, aalajangersarneqarpoq:

Atuuffia

  § 1.  Kalaallit Nunaata aalisarnikkut imartami oqartussaaffigisaani inuussutissarsiutigalugu aalisarnermut nalunaarut atuuppoq, kiisalu taamatut oqartussaaffiup avataani kalaallit inuussutissarsiutigalugu angallatinik ataani taaneqartunik aalisariuteqarlutik aalisarnerinut atuulluni:
1) Aalisariutit avataani aalisarnissamut akuersissuteqartut.
2) Aalisariutit sinerissamut qanittumi kinguppannik aalisarnissamut akuersissuteqartut.
3) Aalisariutit sinerissamut qanittumi qaleralinnik aalisarnissamut angallammut akuersissuteqartut.

Aalisarnermit paasissutissanik nalunaarutiginnittarneq

  § 2. Ingerlatseqatigiiffimmit § 1-imi ilaatinneqartumik ingerlatsisoq, ukiut tamaasa ulloq 1. juni nallertinnagu akileraartarnermi ingerlatsivimmut ukiumi qaangiuttumi aalisariummi tunisassiornikkut aningaasaqarnikkullu pissutsit pillugit paasissutissanik nalunaaruteqartassaaq. Paasissutissat nalunaarutigineqannginnerini Kukkunersiuisumit nalunaarsorneqarsimasumit imaluunniit naalagaaffimmit akuerineqarsimasumit uppernarsarlugit atsiorneqarsimassapput.
  Imm. 2.   Nalunaarut paasissutissanik ilanngussaq 1-imi imaluunniit ilanngussaq 2-mi taaneqartunik imaqassaaq.
  Imm. 3. Paasissutissat ukiunut 2012, 2013 aamma 2014-imut tunngasut akileraartarnermi ingerlatsivimmut ulloq 1. september 2015 nallertinnagu nalunaarutigineqassapput.

  § 3. Paasissutissat elektronik atorlugu akileraartarnermi ingerlatsivimmut nalunaarutigineqassapput.
  Imm. 2. Akileraartarnermi ingerlatsivik aalajangiussanut, ilutsinut, paasissutissat tulleriiaarsimanissaannut aamma pissutsinut allanut akileraartarnermi ingerlatsiviup nalunaarummik elektronik atorlugu suliarinninneranut pingaaruteqartunut piumasaqaateqarsinnaavoq.
  Imm. 3. Akileraartarnermi ingerlatsivik aalisarnermit paasissutissanik nassiussisarnermut sukumiinerusunik malittarisassanik aalajangersaasinnaavoq.

Pineqaatissiinerit

  § 4. Piaaraluni mianersuaalliorujussuarluniluunniit § 2, imaluunniit § 3, imm. 1-imit unioqqutsitsisoq Kalaallit Nunaanni Pinerluttulerinermik inatsimmi maleruagassat naapertorlugit akiliisitaanermik pineqaatissinneqarsinnaavoq.
  Imm. 2.  Inatsisitigut pisinnaatitaasutut pisussaatitaasutullu isigineqarsinnaasoq unioqqutitsisimappat, Kalaallit Nunaanni Pinerluttulerinermik inatsimmi maleruagassat naapertorlugit pinerluutinut akisussaatitsisoqarsinnaavoq
  Imm. 3. Akiliisitsissutit imm. 1-2 malillugit pineqaatissiissutigineqartut Nunatta Karsianut pisassanngortinneqassapput.

Atortuulersitsineq

  § 6. Nalunaarut ulloq 1. juli 2015-imi atuutilerpoq.
  Imm. 2. Peqatigitillugu Aalisarnermit paasissutissat nassiuttarneri pillugu Namminersorlutik Oqartussat nalunaarutaat nr. 10, 19. august 2014-imeersoq atorunnaarsinneqarpoq.

Namminersorlutik Oqartussat, ulloq 18.06.2015

Andreas Uldum                                         

/

Peter Hansen