Aalisarneq pillugu Inatsisartut Inatsisaanni nr. 18, 31.oktober 1996-imeersumi § 25 a aamma § 33 imm. 2 aamma imm. 3, kingullermik Inatsisartut Inatsisaanni nr. 12, 3. december 2012-meersumi allanngortinneqartoq tunngavigalugu, aalajangersarneqarpoq:

Atuuffii aamma nassuiaatit

§ 1.  Nalunaarut atuuppoq suliffeqarfinnut, Kalaallit Nunaanni aalisarnermik inuussutissarsiutigalugu ingerlaqartunut, tassunga atatillugu aalisariut atorneqartoq piumasaqaatit makku ilaanni ataatsimik naammassinnissimatillugu:
1)  Aalisariutit avataani aalisarnissamut akuersissuteqartut.
2)  Aalisariutit sinerissamut qanittumi kinguppannik aalisarnissamut akuersissuteqartut.
3)  Aalisariutit sinerissamut qanittumi qaleralinnik aalisarnissamut angallammut akuersissuteqartut.

§ 2.  "Aalisarnermit paasissutissat" nalunaarummi uani isumaqartinneqarput tassaasut tunisassiornermit naatsorsuuserinermillu paasissutissat, aalisariummut §-1-imi ilanngunneqartumut, ilanngussaq 1-imi aamma ilanngussaq 2-mi itinerusumik allattorsimasumut, tunngassuteqartut.

Aalisanermit paasissutissat nassiunneri

§ 3.  Suliffeqarfiit tamarmik § 1-imi ilaatinneqartut ukiut tamaasa kingusinnerpaamik 1. juni aalisarnermit paasissutissat akileraartarnermut ingerlatsivimmut nassiuttassavai, tassani ukioq aningaasarsiorfiusup siulia tamakkerlugu aalisarnermit paasissutissat nassiuneqassallutik. Taamaattoq 2014-imi ukiut aningaasarsiorfiusut 2011, 2012 aamma 2013 pillugit aalisarnermit paasissutissat nassiunneqassapput.

§ 4.  Suliffeqarfiup suulluunniit § 1-imi ilaatinneqartup aalisariutaatini § 1, nr. 1 aamma 2-mi taaneqartut pillugit aalisarnermit paasissutissat immersugassaq ilanngussaq 1-imiittoq atorlugu Akileraartarnermut Aqutsisoqarfimmut nassiutissavai. Immersugassaq kukkunersiuisumit nalunaarsorneqarsimasumit imaluunniit naalagaaffimmit akuerisaasumit atsiorneqarsimassaaq.
Imm. 2.  Suliffeqarfit tamarmik § 1-imi ilanngunneqarsimasut aalisariutaatiminut tunngatillugu § 1, nr. 3-mi taaneqartut pillugit aalisarnermit paasissutissat, ilanngussaq 2-mi immersugassaq atorlugu, Akileraartarnermut Aqutsisoqarfimmut nassiutissavai. 
Imm. 3.  Aalisariutit § 1-imi ilaasut tamarmik immikkut immersugassamik immersuisimassapput, tak. imm. 1 aamma 2.
Imm. 4.  Aalisarnermit paasissutissat nassiunnissaannut, qarasaasiatigut nassiunnissaat ilanngullugu, ilitsersuutitut najoqqutassat Aalisarnermut, Piniarnermut Nunalerinermullu Naalakkersuisoqarfiup aalajangissavai.

Pineqaatissiissutit

§ 5.  § 3-mik, § 4, imm. 1-imik, § 4, imm. 2-mik imaluunniit § 4, imm. 3-mik unioqqutitsinerit, Pinerluttulerinermut Inatsimmi Kalaallit Nunaannut atuuttumi maleruagassat malillugit akiliisitsinermik malitseqarsinnaapput.
Imm. 2.  Pinerluttulerinermut Inatsimmi Kalaallit Nunaannut atuuttumi maleruagassat malillugit inuk inatsisit malillugit akisussaatinneqartoq akiliisinneqarsinnaavoq.

Atuutilersitsineq

§ 6. Nalunaarut ulloq 25. august 2014-imi atuutilerpoq.

Namminersorlutik Oqartussat, ulloq 19. august 2014

Finn Karlsen                       

/ 

Jørgen Isak Olsen