Inatsisartut inatsisaat nr. 12, 3. december 2012-imeersoq aqqutigalugu kingullermik allanngortinneqartumi Aalisarneq pillugu Inatsisartut inatsisaanni nr. 18, 31. oktober 1996-imeer-sumi § 10 a, § 13, imm. 2, § 23, imm. 1, § 33, imm. 2, aamma § 34, imm. 3 naapertorlugit aalajangersarneqarput:

Atuuffia

§ 1.  Nalunaarummi pineqarpoq tunngaviusumik killeqarfiup avataani milit 3-t akornanniittumi imaani Kalaallit Nunaata aalisarnikkut oqartussaaffigisaani nipisanniarneq.

Nassuiaatit

§ 2.  Nalunaarummi matumani Kalaallit Nunaata imartaq aalisarnikkut oqartussaaffigisaa tassaavoq Kalaallit Nunaanni aalisarnikkut oqartussaaffigisassaq pillugu kunngip peqqussineratigut Statsministeriaqarfiup nalunaarutaani aalajangersagaasoq.

§ 3. Nalunaarummi matumani inuussutissarsiutigalugu aalisarneq pisat tamarmiusut taakkualuunniit ilaasa tunineqarnissaat siunertaralugu aalisarnertut paasineqassaaq.

§ 4.  Nalunaarummi matumani inuussutissarsiutiginagu aalisarneq nammineq pisat atornissaat siunertaralugu aalisarnertut paasineqassaaq.

Inuussutissarsiutigalugu nipisanniarnissamut piumasaqaatit

§ 5.  Inuussutissarsiutigalugu nipisanniarniaraanni akuersissuteqartariaqarpoq, taanna Aalisarnermut, Piniarnermut Nunalerinermullu Naalakkersuisoqarfimmut qinnuteqaateqarnikkut tunniunneqassaaq.

§ 6.  Aalisarsinnaanermut akuersissutit sivisunerpaamik ukiunut marlunnut atuuttussanngorlugit tunniunneqartarput.
Imm. 2.  Akuersissutip aalajangersakkat makku imarisinnaavai, qassutit qassit akuersissummi ataatsimi atorneqarsinnaanerat, sumiiffimmi sorlermi aalisartoqarsinnaanersoq aamma aalisarfinni ataasiakkaani piffissap qanoq ilinerani aalisartoqarsinnaanersoq. 

§ 7.   Piffissaq 16. juli - 28. februar inuussutissarsiutigalugu nipisanniarnissaq inerteqqutaavoq.

Pisassat annertussusissaat aamma ullut qassit annerpaamik aalisartoqaqqusaanersoq.

§ 8.  Inuussutissarsiutigalugu nipisanniarneq pisassiissutinik tunngaveqartumik aamma ullunik aalisarfissanik tunngaveqartumik ingerlanneqassaaq, tassa ukiunut ataasiakkaanut ullut aalisarfissat amerlassusissaat pisassiissutillu aalisarnermik ingerlatsinissaq pillugu pilersaarut Naalakkersuisut akuerisaat naapertorlugu aalajangersarneqartarmata.

§ 9.  NAFO-p suliassaqarfiinut ataasiakkaanut tunngatillugu inuussutissarsiutigalugu nipisanniarnissaq qaqugukkut aallartinneqassanersoq qaqugukkullu unitsinneqassanersoq najukkami tunitsiviit aalisartullu kattuffiisa sinniisuutitaasa isumaqatigiissuteqarfigissavaat.
Imm. 2.  Imm. 1 malillugu isumaqatigiissutigineqartut NAFO-p suliassaqarfiani kingusinnerpaamik sapaatip akunnera ataaseq sioqqullugu nipisanniarnissap aallartinnginnerani Aalisarnermut, Piniarnermut Nunalerinermullu Naalakkersuisoqarfimmut nalunaarutigineqassapput.
Imm. 3. Piffissap aalajangersimasup § 9, imm. 1 naapertorlugu aalajangersarneqartup avataatigut inuussutissarsiutigalugu nipisanniarneq inerteqqutaavoq.

§ 10.  Ullut aalisarfissat amerlanerpaaffissaattut akuerisat NAFO-llu suliassaqarfiinit ataasiakkaani pisassatut akuerisat 85 %-ii pillugit nalunaarutit tusagassiorfiit aqqutigalugit aamma Namminersorlutik Oqartussat nittartagaat aqqutigalugu nalunaarutigineqassapput. Pisassattaaq tamarmik pisarineqarnerat nalunaarutigineqartassaaq.
Imm. 2.  Piffissarititap § 6, imm. 1-imi oqaatigineqartup ingerlanerani allannguisoqarsinnaavoq, tak. aalisarneq pillugu Inatsisartut inatsisaanni § 10.

Nipisanniarnermi atortut

§ 11.  Nigartat angissusissaat atortullu nalunaaqutsernissaat eqqarsaatigalugit Piujuartitsineq siunertaralugu aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutaanni § 7, imm. 7-imi aamma § 17-imi aalajangersakkat atorneqassapput.

§ 12.  Aalisarneq unitsinneqarpat aalisartoq pisussaavoq nammineq atortuminik pissutissaqanngitsumik uninnganngikkaluarluni piiaanissamut.

Nalunaarutiginninneq

§ 13.  Nalunaarut manna naapertorlugu akuersissutaatillit, Sinerissamut qanittumi aalisarnermit pisanik nalunaarutiginnittarneq pillugu Namminersorlutik Oqartussat nalunaarutaat nr. 15, 22. december 2011-meersumi § 3 aamma § 4 naapertorlugit nalunaaruteqartussaapput.

Inuussutissarsiutigalugu nipisanniarnerup unitsinneqarnera

§ 14.  Ullut aalisarfissat pisassallu naammatsippata § 8 eqqarsaatiginagu nipisanniarneq ingerlaannaq unitsinneqassaaq.

Inuussutissarsiutiginagu nipisanniarneq

§ 15.  Nammineq atugassatut nipisanniarneq danskit naalagaaffianni innuttaasunut Kalaallit Nunaanni najugaqavissunut tamanut atuuppoq. Nunani allani innuttaassuseqartut Danmarkimeersuunngitsut Kalaallit Nunaanni najugaqavissut aammalu ukiuni marlunni ataannartumik najugaqareersut danskit naalagaaffianni innuttaassuseqartunut naligitinneqassapput. 

Imm. 2.  Inuussutissarsiutiginagu nipisanniarnermut atatillugu annerpaamik qassutit marluk atorneqassapput. 

Pineqaatissiissutit

§ 16.  § 5-imik, § 6, imm. 2-mik, § 7-imik, § 9, imm. 3-mik, § 11-mik, § 12-imik, § 13-imik, § 14-imik aamma § 15, imm. 2-mik unioqqutitsinerit akiliisitsinermik kinguneqarsinnaapput.
Imm. 2.  Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik imaluunniit piginneqatigiilluni umiarsuaatileqatigiiffik unioqqutitsisuuppat, ingerlatseqatigiiffik immini akiliisussanngortinneqarsinnaavoq.
Imm. 3.  Pinerluttulerinermi inatsimmi arsaarinnittarneq pillugu malittarisassat taamatuttaaq atorneqarsinnaapput.

Atuutilersitsineq

§ 17.  Nalunaarut ulloq 1. juni 2014 atuutilerpoq.
Imm. 2.  Ilutigalugu Nipisanniarneq pillugu Namminersornerullutik Oqartussat nalunaarutaat nr. 13, 13. maj 2005-imeersoq atorunnaarsinneqarpoq. 
Imm. 3. Ingerlatseqatigiiffiit inuillu nalunaarummi matumani pineqartut § 5-imi piumasaqaatit naammassisimassavaat kingusinnerpaamik ulloq 1. januar 2015.

Namminersorlutik Oqartussat, ulloq 20. maj  2014

Finn Karlsen

/

Jørgen Isak Olsen