Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, kingullermik Inatsisartut inatsisaatigut nr. 5, 21. maj 2002-meersukkut allannguuteqartinneqartumi, § 10 a, § 13, imm. 2, § 33, imm. 2 aamma § 34, imm. 3 naapertorlugit aalajangersarneqarput:

Atuuffia

§ 1. Nalunaarut nipisanniarnernut tamanut imartani Kalaallit Nunaata aalisarnikkut oqartussaaffigisaani ingerlanneqartunut atuuppoq.

Nassuiaatit

§ 2. Nalunaarummi matumani "Imartat Kalaallit Nunaata aalisarnikkut oqartussaaffigisai" paasineqassapput, imartat Kalaallit Nunaata aalisarnikkut oqartussaaffigisai pillugit statsministeriaqarfiup nalunaarutaani aalajangersarneqartut.

§ 3. Nalunaarumi matumani "inuussutissarsiutigalugu piniarnermut allagartatut" paasineqassaaq, uppernarsaat qaqugukkulluunniit Kalaallit Nunaanni inuussutissarsiutigalugu piniarnermut allagartat pillugit nalunaarummi inatsisitigut tunngavissalimmik tunniunneqartoq.

§ 4. Nalunaarummi matumani "inuussutissarsiutigalugu" aalisarnertut paasineqassaaq, aalisarneq inunnit akuersissuteqarluni imaluunniit inuussutissarsiutigalugu piniarnermut allagartaqarluni pisanik tunisaqarnissaq siunertaralugu ingerlanneqartoq.

§ 5. Nalunaarummi matumani "inuussutissarsiutiginagu" aalisarnertut paasineqassaaq, aalisarneq inunnit akuersissuteqanngitsunit imaluunniit inuussutissarsiutigalugu piniarnermut allagartaqanngitsunit ingerlanneqartoq.

Inuussutissarsiutigalugu nipisanniarnermi piumasaqaatit

§ 6. Inuussutissarsiutigalugu nipisanniarsinnaanissamut piumasaqaataavoq aalisarsinnaanermut akuersissummik imaluunniit inuussutissarsiutigalugu piniarnermut allagartamik atuussinnaasumik pigisaqarnissaq.
Imm. 2. Inuussutissarsiutigalugu piniarnermut allagartamik pigisaqartoqassanngikkaluarpat, qaqugukkulluunniit Kalaallit Nunaanni aalisarneq pillugu inatsit naapertorlugu Aalisarnermut Piniarnermullu Pisortaqarfimmut akuersissummik qinnuteqaateqartoqarsinnaavoq.

§ 7. Ukioq 2006 aallarnerfigalugu piffissami 1. julimiit 28. februarimut inuussutissarsiutigalugu nipisanniarneq inerteqqutaalissaaq.

Inuussutissarsiutiginagu nipisanniarneq

§ 8. Nammineq atugassanik nipisanniarneq danskit naalagaaffianni innuttaassusilinnut tamanut Kalaallit Nunaanni najugaqartunut inerteqqutaanngilaq. Danmarkimiunngitsoq naalagaaffinni allani innuttaassusillit, aalajangersimasumik Kalaallit Nunaanni najugaqartut ukiullu marluk ingerlatiinnarlugit najugaqarsimasut, danskit naalagaaffianni innuttaassusilittut pineqassapput.

Pineqaatissiissutit

§ 9. § 6, imm. 1-imik, § 7-imik aamma § 8-mik unioqqutitsinerit akiliisitsinermik pisanillu arsaarinnissuteqarnermik kinguneqarsinnaapput.

Atuutilerfia

§ 10. Nalunaarut atuutilerpoq ulloq 1. juni 2005.

Namminersornerullutik Oqartussat, ulloq 13. maj 2005

Rasmus Frederiksen

/

Amalie Jessen