Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaanni nr. 20, 3. december 2012-imeersumi § 6, § 8, imm. 3 aamma § 9, imm. 3 malillugit aalajangersarneqarpoq:

Kapitali 1
Tunisassianik ineriartortitsinermut tapersiisarneq

Tapersiissutip annertussusaa

§ 1.  Tunisassianik ineriartortitsinermut aningaasartuutinik utertitsineq, tapersiinissaq pillugu neriorsuutaasumi aalajangersagaasumik procentinngortitamik annertussusilerlugu tunniunneqassaaq. Aningaasartai minnerpaamik 50.000 koruuniutillugit aamma aningaasartai annerpaamik 300.000 koruuniutillugit tapersiissuteqartoqarsinnaavoq.

Neriorsuutaasup sivisussusaa

§ 2.  Tunisassianik ineriartortitsinermut tapersiissuteqarnissamik neriorsuutaasoq, tunniussinissaq pillugu qinnuteqaammik tunniussinissamut piffissaliussap neriorsuutaasumi aalajangersagaasup naanerani ingerlaannartumik atorunnaassaaq.

Kapitali 2
Ingerlatanut avammut tuniniaanissamik siuarsaataasunut tapersiisarneq

§ 3.  Aningaasat ukiumoortumik aningaasanut inatsimmi immikkoortinneqartut iluanni, ingerlatanut avammut tuniniaanissamik siuarsaataasunut tapersiinissaq pillugu neriorsuuteqartoqarsinnaavoq, ilanngullugit avammut tuniniaasarnermut siunnersuisooqatigiinnit, niuertut peqatigiiffiannit ilaalu ilanngullugit siunnersorneqarnissamik pisinerit, kiisalu nittarsaassineq. § 6 naapertorlugu.
Imm. 2.  Piffissap ukiunik pingasunik sivisussuseqartup iluani, inummut imaluunniit ingerlatseqatigiiffimmut ataatsimut annerpaamik neriorsuutit marluk nalunaarutigineqarsinnaapput.

Tapersiissutip annertussusaa

§ 4.  Ingerlatanut avammut tuniniaanissamut siuarsaataasunut aningaasartuutinik utertitsineq, procentiliussaq tapersiissuteqarnissamik neriorsuutaasumi aalajangersagaasoq malillugu tunniussivigineqassaaq, taamaattorli annerpaamik 50.000 koruuniussalluni. § 6 naapertorlugu.

Neriorsuutaasup sivisussusaa

§ 5.  Ingerlatanut avammut tuniniaanissamut siuarsaataasunut tapiissuteqarnissamik neriorsuutaasoq, piffissaliussap neriorsuutaasumi aalajangersagaasup naanerani ingerlaannartumik atorunnaassaaq

Kapitali 3
Kalaallit nerisassiaannik atuinermik siuarsaanermut tapersiisarneq

§ 6.  Aningaasat ukiumoortumik aningaasanut inatsimmi immikkoortinneqartut iluanni, kalaallit nerisassiaannik atuinermik siuarsaanermut tapersiinissaq pillugu neriorsuuteqartoqarsinnaavoq.
Imm. 2.  Tapersiinissamik neriorsuuteqarneq kalaallit nerisassiaannik tunisassianik ineriartortitsinermut nittarsaassinermullu tunniunneqarsinnaavoq.
Imm. 3.  Imm. 1 malillugu neriorsuuteqarneq, § 1 aamma § 4 malillugit tapersiinissamik neriorsuuteqarnermut ataqatigiissinneqarsinnaanngilaq.

Tapersiissutip annertussusaa

§ 7.  Kalaallit nerisassiaannik atuinermik siuarsaanermut aningaasartuutinik utertitsineq, procentiliussaq tapersiissuteqarnissamik neriorsuutaasumi aalajangersagaasoq malillugu tunniussivigineqassaaq. Aningaasartai minnerpaamik 25.000 koruuniutillugit aammalu aningaasartai annerpaamik 200.000 koruuniutillugit tapersiissuteqartoqarsinnaavoq.

Neriorsuutaasup sivisussusaa

§ 8. tapersiissuteqarnissamik neriorsuutaasoq, piffissaliussap neriorsuutaasumi aalajangersagaasup naanerani ingerlaannartumik atorunnaassaaq.

Kapitali 4
 Kittaartagaq – Inuussutissarsiutigalugu siunnersortinit ikiorneqarnissamut tapersiisarneq   

§ 9.  Piffissap ukiunik pingasunik sivisussuseqartup iluani, inummut imaluunniit ingerlatseqatigiiffimmut ataatsimut inuussutissarsiutigalugu siunnersortinit ikiorneqarnissamut aningaasanik aalajangersimasumik annertussusilinnik tapersiivigineqarnissamut annerpaamik neriorsuutit marluk tunniunneqarsinnaapput.

Tapersiissutip annertussusaa

§ 10.  Inuussutissarsiutigalugu siunnersortinit ikiorneqarnermut aningaasartuutinik utertitsinermi, aningaasartuutit tamakkiisut tunniunneqassapput, taamaattorli suliffeqarfimmik Kalaallit Nunaanni tuniniaasussamik sullissisussamillu pilersitsinermut tunngatillugu inuussutissarsiutigalugu siunnersortinit ikiorneqarnermut aningaasartuutinut annerpaamik 12.000 koruunit.

Neriorsuutaasup sivisussusaa

§ 11.  Inuussutissarsiutigalugu siunnersortinit ikiorneqarnissamut (kittartagaq) neriorsuutaasoq, tunniussinissaq pillugu qinnuteqaammik tunniussinissamut piffissaliussap neriorsuutaasumi aalajangersagaasup naanerani ingerlaannartumik atorunnaassaaq.

Kapitali 5
Aalajangersakkat nalinginnaasut

§ 12.  Aningaasartuutit tapersiissutaasup aningaasartaannik tamakkiisunik tunniunneqarnissaannik pisinnaatitaaffiliisut aningaasartuutigineqareersimappata uppernarsarneqarlutillu, tapersiissutaasoq ataatsimoortillugu tunniunneqarsinnaavoq. Aningaasartuutit tapersiissutaasup aningaasartaasa tamakkiisut ilaasa tunniunneqarnissaannik pisinnaatitaaffiliisut aningaasartuutigineqareersimappata uppernarsarneqarlutillu, tapersiissutaasoq ilaannakortumik tunniunneqarsinnaavoq.
Imm. 2.  Tapersiissutaasumik tunniussinissamut piumasaqaataavoq, aningaasartuutit neriorsuutaasumi siunertatut allassimasumut toqqaannartumik tunngatinneqarsinnaassasut.
Imm.3. Tapersiissutaasoq aningaasartuutinut tapersiissuteqarnissaq pillugu neriorsuuteqarneq sioqqullugu aningaasartuutigineqarsimasunut tunniunneqarsinnaanngilaq.

Nalunaaruteqartarneq

§ 13.  Tapersiissummik tigusisussaq uppernarsaatip ilaatut suliassaq ataatsimoortoq pillugu aammalu aningaasanik atuinermut tunngatillugu nalunaarusiamik suliaqassaaq.
Imm. 2.  Nalunaarusiaq nalunaarusiamut immersugassaq immersorlugu tunniunneqassaaq aamma kingusinnerpaamik tapersiissummik tunniussinissamut qinnuteqaammut peqatigitillugu nassiunneqassalluni.

Atuutilerfia

§ 14.  Nalunaarut manna 18.februaari 2014 atuutilerpoq. Peqatigisaanik atorunnaarsinneqarpoq Takornariartitsisarnermik inuussutissarsiuteqarnermi nunamilu inuussutissarsiuteqarnermi tunisassianik ineriartortitsinermut kiisalu takornariartitsisarnermik inuussutissarsiuteqarnermi taarsigassarsianik allanngortitsisarnermut tapiissuteqartarneq pillugu Namminersornerullutik Oqartussat nalunaarutaat nr. 9, 5. april 2002-meersoq.

Namminersorlutik Oqartussat, ulloq 17. februaari 2014

Jens-Erik Kirkegaard

/

Jørn Skov Nielsen