Nunami inuussutissarsiutinut tunngatillugu inuussutissarsiornermik siuarsaaneq pillugu Inatsi-sartut inatsisaanni nr. 20, 3. december 2012-imeersumi § 6, § 8, imm. 3 aamma § 9, imm. 3 naapertorlugit aalajangersarneqarpoq:

 

Kapitali 1
Nioqqutissianik ineriartortitsinernut tapiissutit

Tapiissutit annertussusiat

  § 1.  Nioqqutissianik ineriartortitsinermut aningaasartuutinut tapiissuteqartarneq pisassaaq tapiissuteqarnissamut neriorsuummi procenti aalajangerneqartoq tunngavigalugu. Tapiissuteqartoqarsinnaavoq aningaasanngorlugu annerpaamik 300.000 kr.-nut.
  Imm. 2.  Neriorsuut imm. 1 naapertorlugu ilassuserneqarsinnaanngilaq tapiissuteqarnissamut neriorsuummik § 3, § 9 imaluunniit § 12 naapertorlugit.

Neriorsuutip atuuffia

  § 2.  Nioqqutissianik ineriartortitsinermut tapiissuteqarnissamut neriorsuut nammineerluni atorunnaassaaq neriorsuummi ulluliussap qaangiunnerani.

 

Kapitali 2
Avammut niueruteqarnermik siuarsaasarnermi suliniutinut tapersiineq

  § 3.  Ukiumoortumik aningaasanut inatsimmi aningaasaliissutissatut aalajangersarneqarsima-sut iluanni avammut niueruteqarnermik siuarsaaniarnermik suliniutinut tapiissuteqarnissamut neriorsuisoqarsinnaavoq, tamatumani aamma avammut niuernermut siunnersuisoqatigiinniit, handelskammerimiit il.il., kiisalu nioqqutissanik sassartaarussinernut atorneqartussanik.
  Imm. 2.  Piffissami ukiunik pingasunik sivisussusillip iluani annerpaamik neriorsuutinik marlunnik nalunaaruteqartoqarsinnaavoq inummut pineqartumut imaluunniit ingerlatseqatigiiffimmut.
  Imm. 3.  Neriorsuut imm. 1 naapertorlugu ilassuserneqarsinnaanngilaq tapiissuteqarnissamut neriorsuummik § 1, § 9 imaluunniit § 12 naapertorlugit.

Tapiissutit annertussusiat

  § 4. Aningaasartuutinik taarsiilluni tapiissuteqarnermi avammut niuernikkut siuarsaanermut suliniutinut aningaasartuutit tamakkiisumik matussuserneqassapput, taamaattoq annertunerpaamik 50.000 kr.-it. 

Neriorsuutip atuuffia

  § 5.  Avammut niuernikkut siuarsaataasussanik suliniutinut tapiissuteqarnissamik neriorsuineq nammineerluni atorunnaassaaq neriorsuuteqarnermi piffissaliussaasoq qaangiuppat.

 

Kapitali 3
Qiortakkat - siunnersortimit professionel-iusumit ikiorserneqarnissamut  tapersersuineq

  § 6.  Piffissap ukiuni pingasunik sivisussusillip iluani annerpaamik neriorsuutinik marlunnik nalunaaruteqartoqarsinnaavoq aalajangersimasunik annertussusilinnik aningaasartalinnik, siunnersortimit professionel-iusumit ikiorserneqarnissamut inummut pineqartumut tassunga ingerlatseqatigiiffimmulluunniit.
  Imm. 2.  Neriorsuut imm. 1 naapertorlugu ilassuserneqarsinnaanngilaq tapiissuteqarnissamut neriorsuummik § 1, § 3, § 9 imaluunniit § 12 naapertorlugit. 

Tapiissutit annertussusiat

  § 7.  Professionel-iusumik siunnersortinut aningaasartuutinut taarsiilluni tapiissuteqarnermi aningaasartuutit tamakkiisumik matussuserneqassapput, taamaattoq annertunerpaamik 25.000 kr.-nut, professionel-iusumik siunnersortinut aningaasartuutinut, suliffeqarfimmik pilersitsinermut. 

Neriorsuutip atuuffia

  § 8.  Tapiissuteqarnissamut neriorsuut professionel-iusumik siunnersortinit ikiorserneqarnissamut (qiortagaq) nammmineerluni atorunnaassaaq neriorsuuteqarnermi piffissaliussaasup qaangiunnerani.

 

Kapitali 4
Kalaallit nerisassiaannik atuinerup inerisarneqarnissaanut kiisalu sermimit imermillu suliniutinut tapersiineq

  § 9. Ukiumoortumik aningaasanut inatsimmi aningaasaliissutissatut aalajangersarneqarsi-masut iluanni Kalaallit nerisassiaannik atuinerup inerisarneqarnissaanut aamma sermimut imermullu tunngasumik suliniutinut tapiissuteqarsinnaanermut neriorsuisoqarsinnaavoq.
  Imm. 2.  Tapiissuteqarnissamut neriorsuut tunniunneqarsinnaavoq kalaallit nerisassiaannik aamma sermimit imermillu nioqqutissianik ineriartortitsinernut tunngatillugu.
  Imm. 3.  Neriorsuuteqarneq imm. 1 naapertorlugu akulerussilluni ilaqqinneqarsinnaanngilaq § 1, § 3 imaluunniit § 12 naapertorlugit.

Tapiissutit annertussusiat

  § 10. Kalaallit nerisassiaannik atuinerup inerisarneqarnissaanut aamma sermimit imermilluunniit nioqqutissiassanut aningaasartuutinik taarsiilluni matussusiineq tunniunneqarsinnaavoq tapiissuteqarnissamut neriorsuutaasumi aningaasartuutaasut 50 %-iattut akiliuteqarnikkut. Tapiissuteqartoqarsinnaavoq aningaasanngorlugu annerpaamik 300.000 kr.-nut.

Neriorsuutip atuuffia

  § 11.  Tapiissuteqarnissamut neriorsuut kalaallit nerisassiaannik atuinerup ineriartortinneqarnissaanut aamma sermimit imermilluunniit suliniummut nammineerluni atorunnaassaaq neriorsuuteqarnermi piffissaliussaasup qaangiunnerani.

 

Kapitali 5
Takornariartitsinermi suliniummut tapersiineq

  § 12. Ukiumoortumik aningaasanut inatsimmi aningaasaliissutissatut aalajangersarneqarsi-masut iluanni takornariartitsinermut tunngasumik suliniutinut tapiissuteqarsinnaanermut neriorsuisoqarsinnaavoq. 
  Imm. 2.  Tapiissuteqarnissamut neriorsuut tunniunneqarsinnaavoq takornariartitsinermi nioqqutissianik ineriartortitsinernut ussassaarinernullu tunngatillugu.
  Imm. 3.  Neriorsuuteqarneq imm. 1 naapertorlugu akulerussilluni ilaqqinneqarsinnaanngilaq § 1, § 3 imaluunniit § 9 naapertorlugit.

Tapiissutit annertussusiat

§ 13.  Takornariartitsinermik nioqqutissianut aningaasartuutinik taarsiilluni matussusiineq tunniunneqarsinnaavoq tapiissuteqarnissamut neriorsuutaasumi aningaasartuutaasut 50 %-iattut akiliuteqarnikkut. Tapiissuteqartoqarsinnaavoq aningaasanngorlugu minnerpaamik 10.000 kr.-nut, annerpaamillu 300.000 kr.-nut.

Neriorsuutip atuuffia

  § 14.  Takornariartitsinermik nioqqutissiamut tapiissuteqarnissamut neriorsuut nammineerluni atorunnaassaaq neriorsuuteqarnermi piffissaliussaasup qaangiunnerani.

 

Kapitali 6
Ataatsimut aalajangersakkat

  § 15. Tapiissutit ataatsimoortillugit akilerneqarsinnaapput, tamakkiisumik tapiissutinik tunniussisoqarsinnaaneranut aningaasartuutit akilerneqarsimanerisa uppernarsarneqareernerisigut.
  Imm. 2.  Tapiissutinik tunniussisarnermi tunngaviuvoq aningaasartutit toqqaannartumik siunertanut qinnuteqaammi nalunaarneqartunut tunngasuunerat.
  Imm.3. Tapiissutinik tunniussisoqarsinnaanngilaq aningaasartuutinut tapiissuteqarsinnaa-nermut neriorsuummik tunniussisoqarnera sioqqullugu akilerneqarsimasunut.

Nalunaarusiortarneq

  § 16.  Tapiissutinik tigusisussap uppernarsaatip ilaatut nalunaarut suliarissavaa suliniummut tamarmiusumut tunngatillugu, kiisalu aamma aningaasaliissutit qanoq atorneqarsimanerat pillugu.
  Imm. 2.  Nalunaarusiaq skemamut nalunaarusiorfissamut allanneqassaaq, nassiunneqassallu-nilu tapiissutissat tunniunneqarnissaannut qinnuteqaammut ilanngullugu.

Atortuulerfia

  § 17.  Nalunaarut una atortuulerpoq 1.juuli 2016. Ilutigitillugu atorunnaarpoq Tunisassianik ineriartortitsinermut, ingerlatanut avammut tuniniaanissamik siuarsaasunut, kalaallit nerisassiaannik atuinermik siuarsaasunut aamma inuussutissarsiutigalugu siunnersortinit ikiorneqarnissamut tapersiissuteqartarneq pillugu Namminersorlutik Oqartussat nalunaarutaat nr. 3, 17. februar 2014-imeersoq.

Namminersorlutik Oqartussat, ulloq 27. juuni 2016

Vittus Qujaukitsoq

/

Jørn Skov Nielsen