Nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut peqqussutaanni nr. 17-imi, 20. november 2006-imeersumi § 21 naapertorlugu aalajangersarneqarpoq:

Maalaarutinik tunniussisarneq

§ 1.  Nalunaarasuartaateqarneq pillugu Maalaaruteqartarfik suliani, Nalunaarasuartaateqarnermut Aqutsisoqarfiup aalajangiineri suliaalu pillugit maalaarutinut, aammalu inatsisit tunngavigalugit inat­sisiliat peqqussusiallu malillugit Nalunaarasuartaateqarneq pillugu Maalaaruteqartarfimmut tunngasunut allaffissornikkut inaarutaasumik aalajangiisarpoq.

§ 2.  § 1, imm. 1 naapertorlugu maalaarutit Nalunaarasuartaateqarnermut Aqutsisoqarfiup suliami aalajangiineraniit kingusinnerpaamik sapaatit akunnerisa arfineq pingasut qaangiunnerini Nalunaarasuartaateqarneq pillugu Maalaaruteqartarfimmit tiguneqarsimassapput.
Imm. 2.  Aalajangiinermut atatillugu oqartussaasut suliarinninneranut maalaarut siusinnerpaamik aalajangiinerup pinerani Nalunaarasuartaateqarneq pillugu Maalaaruteqartarfimmut tunniunneqarsinnaavoq. Aalajangiisoqarsimatinnagu oqartussaasut suliarinninnerannut maalaarutit Nalunaarasuartaateqarneq pillugu Maalaaruteqartarfimmut ingerlaavartumik tunniunneqarsinnaapput.
Imm. 3.  Nalunaarasuartaateqarneq pillugu Maalaaruteqartarfiup allattoqarfiata maalaarut tigujumanngissinnaavaa,
1)  kingusinaarluni tunniunneqarsimappat, taamaattorli tak. imm. 5,
2)  Nalunaarasuartaateqarneq pillugu Maalaaruteqartarfiup aalajangiisinnaatitaaffiinut ilaanngippat, imaluunniit
3)  maalaaruteqarnissamut pisinnaatitaaffeqanngitsumit tunniunneqarsimappat.
Imm. 4.  Nalunaarasuartaateqarneq pillugu Maalaaruteqartarfiup allattoqarfiata imm. 3 imaluun­niit § 3, imm. 3 naapertorlugu maalaarummik tigusiumannginnermut peqatigitillugu maalaaruteqartumut ilisimatitsissutigissavaa, tigusiumannginnermik aalajangiinermiit kingusinnerpaamik sapaatit akunnerisa arfineq pingasut qaangiunnerini tigusiumannginnermik aalajangiineq Nalunaarasuartaateqarneq pillugu Maalaaruteqartarfimmut maalaarutigineqarsinnaasoq.
Imm. 5.  Pisuni immikkut ittuni Nalunaarasuartaateqarneq pillugu Maalaaruteqartarfiup siulit­taa­suata imm. 1-imi piffissarititaasumik uniuinissaq immikkut ittumik akuersissutigisinnaavaa, tassunga ilanngullugu pingaartumik piffissarititaasumik qaangiinissaq peqqutissaqartutut nalilerneqarpat.

Maalaaruteqarnermut akitsuummik akiliisarneq

§ 3.  Maalaaruteqartup akitsuut 6.500 koruuniusoq akilertussaavaa. Maalaaruteqartoq inuinnaappat, aammalu maalaarut maalaaruteqartuinnarmut tunngasuuppat, akitsuut 150 koruuninut appartinneqassaaq.
Imm. 2.  Imm. 1-imi allassimasoq apeqqutaatinnagu maalaarutinut, taamaallaat pisortat ingerlatsinerat pillugu Inatsisartut inatsisaat imaluunniit ingerlatsineranni suliassanik suliaqartarneq pillugu Inatsisartut inatsisaat naapertorlugu allagaatinik takusaqarsinnaanissamut itigartitsinermut tunngasunut akitsuummik akiliisitsisoqassanngilaq.
Imm. 3.  Akitsuut taaneqartoq maalaarummut ilanngullugu tiguneqanngippat, imaluunniit allattoqarfimmit piffissaliussap naammaginartumik sivisussuseqartup iluani akitsuut akilerneqanngippat, Nalunaarasuartaateqarneq pillugu Maalaaruteqartarfiup suliaq tigujumanngittussaavaa.
Imm. 4.  Nalunaarasuartaateqarneq pillugu Maalaaruteqartarfiup siulittaasuata akitsuutip akilerneqartup utertinneqarnissaa aalajangissavaa,
1)  Nalunaarasuartaateqarneq pillugu Maalaaruteqartarfiup maalaaruteqartoq maalaarummi tunniunneqartumi tamakkiisumik ilaannaasumilluunniit taperserpagu,
2)  oqartussaasut maalaarummut aalajangiisimasut Nalunaarasuartaateqarneq pillugu Maalaaruteqartarfiup suliamut aalajangiinissaa sioqqullugu suliaq qaqeqqippassuk, imaluunniit
3)  Oqartussaasut maalaarummut aalajangiisimasut maalaaruteqartup tunngavigisaa naapertorlugu aalajangiinertik allanngortippassuk.
Imm. 5.  Nalunaarasuartaateqarneq pillugu Maalaaruteqartarfiup § 2, imm. 3 naapertorlugu maalaarut tigujumanngippagu, § 2, imm. 4-mi Nalunaarasuartaateqarneq pillugu Maalaaruteqartarfiup tigusiumannginneranik suliakkiinissamut piffissaliussap naanerani akitsuut utertillugu akilerneqassaaq.

Kinguartitsinermik sunniuteqartitsisarneq

§ 4.  Nalunaarasuartaateqarnermut Aqutsisoqarfiup aalajangiinera pillugu maalaarut, Nalunaarasuartaateqarneq pillugu Maalaaruteqartarfiup kinguartitsinissamik sunniuteqalersissinnaanngilaa.

Suliassanik suliaqartarneq

§ 5.  Suliassap piareersarneqarnera Maalaaruteqartarfiup allattoqarfiata isumagissavaa. Allattoqarfiup suliassaa Maalaaruteqartarfiup siulittaasuanit aaqqissuunneqassaaq.

Maalaaruteqartarfimmut ataatsimiigiaqqusisarnerit

§ 6.  Nalunaarasuartaateqarneq pillugu Maalaaruteqartarfiup siulittaasuata Maalaaruteqartarfiup ataatsimiinnissaanut piffissaq sumiiffissarlu aalajangissavai.
Imm. 2.  Nalunaarasuartaateqarneq pillugu Maalaaruteqartarfimmut ilaasortat nalinginnaasumik sapaatit akunnerat ataaseq sioqqullugu aggersarneqartussaapput. Pissutsilli immikkut itsillugit piffissarititaasoq taanna saneqqunneqarsinnaavoq.
Imm. 3.  Ataatsimiigiaqqusissummut Maalaaruteqartarfiup ataatsimiinnerani oqaluuserisassat, aammalu allattoqarfiup suliassanut ataatsimiinnermi suliarineqartussanut ilisarititsissusiai ilanngullugit nassiunneqassapput. Najoqqutassat atortut elektroniskiusut atorlugit nassiunneqarsinnaanersut, allatulluunniit atortut elektroniskiusut atorlugit takuneqarsinnaalersinneqarsinnaanersut Na­lunaarasuartaateqarneq pillugu Maalaaruteqartarfiup isumaqatigiissutigisinnaavaa.

Maalaaruteqartarfimmi ataatsimiittarnerit

§ 7.  Ilaasortat ikinnerpaamik affaat najuuppata, Nalunaarasuartaateqarneq pillugu Maalaaruteqartarfik aalajangiisinnaatitaavoq.
Imm. 2.  Nalunaarasuartaateqarneq pillugu Maalaaruteqartarfimmi aalajangigassat nalinginnaasumik amerlanerussuteqartoqarneratigut aalajangiiffigineqartassapput. Taasisut naligiinnerini siulittaasup taasinera aalajangiisuussaaq.
Imm. 3.  Ataatsimiinnerit imaqarniliorneqassapput. Ilaasortaq ataaseq aalajangiinermut isumaqataanngippat, taassuma isummami imaqarniliamut allanneqarnissaa pisinnaatitaaffigaa. Imaqarniliaq Maalaaruteqartarfiup ataatsimiinnerani tullermi akuerineqassaaq.
Imm. 4.  Nalunaarasuartaateqarneq pillugu Maalaaruteqartarfiup ataatsimiinneri tamanut ammasuunngillat.

Maalaaruteqartarfiup aalajangiinerisa suliarineqartarneri

§ 8.  Nalunaarasuartaateqarneq pillugu Maalaaruteqartarfiup aalajangiineri siulittaasumit oqaasertaliorneqassapput.
Imm. 2.  Taasinerit ikinnerussuteqarnerat aalajangiinermut tunngavilersuutitalerlugu allanneqassaaq. Kiisalu isummernerni taasisut amerlassusii, kiisalu siulittaasoq ikinnerussuteqartunut taaseqa­taasimanersoq allanneqassaaq.
Imm. 3.  Nalunaarasuartaateqarneq pillugu Maalaaruteqartarfiup aalajangiinerisa piaartumik illuatungiliuttumut ilisimatitsissutigineqarnissaat Nalunaarasuartaateqarneq pillugu Maalaaruteqartarfiup siulittaasuanit isumagineqassaaq.

Ukiumoortumik nalunaarut

§ 9.  Ukiut tamaasa apriilip ulluisa aallaqqaataata nallinnginnerani qaammatisiutit malillugit ukiumi ilivitsumi qaangiuttumi Nalunaarasuartaateqarneq pillugu Maalaaruteqartarfiup suliai pillugit Nalunaarasuartaateqarneq pillugu Maalaaruteqartarfik nalunaarusiussaaq. Nalunaarut Naalakkersuisunut nassiunneqassaaq.

Atuutilerfia

§ 10.  Nalunaarut 1. marts 2014-imi atuutilerpoq.

Namminersorlutik Oqartussat,ulloq 4. november 2013

Steen Lynge

/

Ann Birkekær Kjeldsen