Pinngortitamik illersuineq pillugu Inatsisartut inatsisaanni nr. 29-imi, 18. december 2003-meersumi § 5, imm. 1, nr. 1-5-mut aamma § 60, imm. 2, Piniarneq aallaaniarnerlu pillugit Inatsisartut Inatsisaanni nr. 12-mi, 29. oktober 1999-imeersumi, § 2, imm. 4, § 7, imm. 4, § 8, imm. 1 aamma 3, §§ 12-13 aamma § 17, imm. 2, Inatsisartut inatsisaatigut nr. 1-ikkut, 16. maj 2008-meersukkut kingullermi allanngortinneqartumi naapertorlugit kiisalu Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni nr. 18-imi, 30. oktober 1998-imeersumi § 3, imm. 2, Inatsisartut inatsisaatigut nr. 23-kkut, 22. november 2011-imeersukkut allanngortinneqartumi, naapertorlugit aalajangersarneqarpoq:

Kapitali 1
Atuuffii

§ 1.  Nalunaarut manna Kalaallit Nunaanni umimmaat (Ovibos moschatus) illersugaanerat piniagaanerallu pillugu atuuppoq.

Kapitali 2
Eqqissisimatitsineq

§ 2.  Umimmaat nuna tamakkerlugu eqqissisimatitaapput, taamaattoq takukkit § 3 naapertorlugu piniarneqarsinnaaneri pillugit aalajangersakkat taaneqartut.
Imm. 2.  Akiliuteqarluni aallaaniarneq aalisarnerlu pillugit nalunaarummi akiliisitsilluni umimmanniarnermut piumasaqaatit immikkut malittarisassaqartitaapput.

Kapitali 3
Pisassiissutit, piffissat piniarfiusussat kiisalu piniarfiusussat

Pisassiissutinik aalajangersaaneq aamma agguaassineq

§ 3.  Uumassusilinnik misissuisunik siunnersuuteqareernerup kingorna Piniarnermut Naalakkersuisoq umimmannik piniarsinnaanermut pisassiissutinik aalajangersaassaaq.
Imm. 2.  Piniarnermut Naalakkersuisoq nunap ilaanut pisassiissutinik aalajangersakkanik agguaassissaaq.
Imm. 3.  Piniarneq pillugu Siunnersuisoqatigiit aamma Kattuffiit allat suliamut attuumassuteqartut apeqqutini imm. 1-mut 2-mullu tunngassuteqartuni tusarniarneqassapput.
Imm. 4.  Sumiiffinni umimmannik pisassiissutinik agguaassinermi aqutsiveqarfinni pineqartuni Kattuffiit attuumassutillit tusarniarneri kommunimi oqartussat ingerlattarpaat.
Imm. 5.  Kommunimi oqartussat Piniarnermut Naalakkersuisoqarfimmut pisassiissutinik agguaassinermi angusat inerneri pillugit imm. 4 naapertorlugu allakkatigut nalunaaruteqassapput.

Piffissanik piniarfiusussanik aalajangersaaneq

§ 4.  Uumassusilinnik misissuisunik siunnersuuteqareernerup kingorna Piniarnermut Naalakkersuisoq pisassiissutinik piniarnissamut aamma akiliuteqartitsilluni umimmanniarnissamut piffissamik aalajangersaassaaq.
Imm. 2.  Imm. 1-imi piffissat piniarfiusussat taamaallaat piffissap 1. augustimip aamma 15. aprilip iluani aalajangersaaffigineqarsinnaapput.
Imm. 3.  Piniarneq pillugu Siunnersuisoqatigiit aamma Kattuffiit allat suliamut attuumassuteqartut apeqqutini imm. 1-mi aamma 2-mi tunngassuteqartuni tusarniarneqassapput.
Imm. 4.  Sumiiffinni ataasiakkaani umimmanut  piffissanik piniarfiusussat aqutsiveqarfimmi pineqartumi Kattuffiit attuumassutillit tusarniarneri kommunimi oqartussat ingerlattarpaat.
Imm. 5.  Kommunimi oqartussat Piniarnermut Naalakkersuisoqarfimmut piffissat piniarfiusussat inerneri pillugit imm. 4 naapertorlugu allakkatigut nalunaaruteqassapput.

Piniarfiussussanik aalajangersaaneq

§ 5.  Uumassusilinnik misissuisunik siunnersuuteqareernerup kingorna Piniarnermut Naalakkersuisoq sumiiffinnik piniarfiusussanik killilersukkamik umimmanniarfiusussanik aalajangersassaaq.
Imm. 2.  Piniarneq pillugu Siunnersuisoqatigiit aamma Kattuffiit allat suliamut tunngassuteqartunut attuumassuteqartut apeqqutit imm. 1-mi pineqartuni tusarniarneqassapput.
Imm. 3.  Sumiiffinni ataasiakkaani umimmanut sumiiffinnik piniarfiusussat aqutsiveqarfimmi pineqartumi Kattuffiit attuumassutillit tusarniarneri kommunimi oqartussat  ingerlattarpaat.
Imm. 4.  Kommunimi oqartussat Piniarnermut Naalakkersuisoqarfimmut sumiiffiit piniarfiusussat aalajangersaaneri pillugit imm. 3 naapertorlugu allakkatigut nalunaaruteqassapput.

Kapitali 4
Pisassiissutinik piniarnermi piumasaqaatit

§ 6.  § 8 malillugu inuit akuersissutinik pisimasut aamma piniarsinnaanermut allagartamik atuuttumik pigisaqartut kisimik umimmanniaqqusaapput.
Imm. 2.  Akuersissut inummut atiatigut taasamut taamaallaat atuuppoq allanullu tunniunneqaranilu tunineqarsinnaanani.
Imm. 3.  Akuersissummi takuneqarsinnaavoq, sumi aamma qassinik umimmattoqarsinnaanersoq.
Imm. 4.  Piniarnermut allagartaq 1. maj nallertinnagu akilerneqarsimassaaq, § 25-li takuuk. 

§ 7.  Inuussutissarsiutigalugu umimmanniarsinnaanermut akuersissummi piumasarineqarsin-naavoq umimmammik ilivitsumik ilaanilluunniit tunisinissaq uumasut nakorsaqarfianiit akuerineqarsimasunut neqaarniarfinnut tunitsivinnulluunniit pissasoq imaluunniit inuussu-tissarsiutigalugu piniartoq tunisinissamut akuersissummik atuuttumik peqassasoq.
Imm. 2.  Kommunit ataasiakkaat sunngiffimmi aallaaniartartunut ”kalaalimineerniarfimmi” tunisineq tuniniaanerlu pillugit aalajangersaassapput.
Imm. 3.  ”Kalaalimineerniarfinni” umimmannik tunisineq inuussutissalerinermut tunngasuni nalunaarummi atuuttumi piumasaqaatit malillugit ingerlanneqassaaq tuniniaanerlu taamaal-laat piffissani piniarfiusuni aamma piffissap piniarfiusup qaangiunneranit amerlanerpaamik ulluni pingasuni atuuppoq.

Kapitali 5
Piniakkanik killilersukkanik piniarnissamut akuersissutinik agguaassineq tunniussinerlu

§ 8.  Kommunit pineqartut qinnuteqartunut piniarnermut atuuttumik allagartaqartunut aamma sumiiffimmi aqutsiviusumi inuit nalunaarsorsimaffianni najugaqartutut nalunaarsorsimasunut akuersissutinik tunniussissapput.
Imm. 2.  Imm. 1-imi aalajangersagaqaraluartoq, aqutsiviusuni allani najugaqartut sumiiffimmi aqutsiviusumi piniarnissaat Piniarnermut Naalakkersuisoqarfiup akuerisinnaavaa tamannalu ingerlatsiviusumi pineqartumi ammasumik pisassiisoqartillugu aatsaat pisinnaavoq.
Imm. 3.  Akuersissutinik qinnuteqartut qinnuteqarnerminni 16-inik ukioqalereersimassapput.

§ 9.  Akuersissutinik tunniussineq ima pisassaaq, qinnuteqartut ataasiakkaat akuersissutinik sapinngisamik amerlaqatigiinnik pissarsinissaat sumiiffiup aqutsisviusup iluani anguneqartassalluni.
Imm. 2.  Akuersissutinit amerlanerusunik qinnuteqartoqarpat, agguaassineq makitsinikkut ingerlanneqassaaq. Akuersissutinik sinneruttunik agguaaneq aamma makitsinnikkut ingerlanneqassaaq.
Imm. 3.  Sumiiffinni aqutsiviusuni isorartuuni, piniartumut ataatsimut akuersissutit arlallit tunniunneqarsinnaapput umimmanniarneq imminut akilersinnaatinniarlugu.
Imm. 4.  Makitsinermut atatillugu akuersissutinik agguaassisussaatitaasup utaqqisut allattorsimaffiat tulleriiaarinertalik pilersissavaa, taannalu akuersissutinik agguaasseqqinnermi atuutilissaaq,  takuuk § 10, imm. 2.
Imm. 5.  Innuttaasut kikkulluunniit makitsinerup ingerlanneqarneranut malinnaasinnaatitaassapput. Akuersissutinik agguaassisussaatitaasup makitsinissaq, akuersissutinullu tunniunneqartussanut piffissaliussap aamma sumi pinissaa, kingusinnerpaamik sapaatip akunneramik sioqqutsilluni tamanut nalunaarutigissavaa.

§ 10.  Akuersissutinik agguaassisussaatitaasup akuersissutit tunniunneqartut aaneqarnissaannut piffissaliussaq aalajangissavaa. Inuit akuersissummik tunineqarsimasut akuersissummilli atuisinnaanngitsut imaluunniit atuerusunngitsut piaarnerpaamik akuersissut atorneqanngitsoq akuersissutinik agguaassisussaatitaasumut utertissavaat.
Imm. 2.  Akuersissutit atorneqanngitsoortut utertinneqartullu agguaateqqinneqassapput.  Umimmanniarnerup uninnissaa sapaatip akunnerinik sisamanik sioqqullugu, akuersissutinik pinissamik utaqqisut tulleriaakkat allattorsimanerat malillugu agguaasseqqinneq piaarnerpaamik aatsaat pisinnaavoq.

Kapitali 6
Piniariaatsit aamma piniarnermi ileqqorissaarneq

§ 11.  Umimmanniarnermi qoorortuut  pisissillu atorneqaqqusaapput.
Imm. 2.  Qoorortuut pisassiissutinik piniarnissamut atorneqarsinnaatitaasut sullukinnersaat 6,5 x 55 kaliberiuvoq (aqerlup diameteria 6,5 mm). Imassat nammineq qinerneqassapput.
Imm. 3.  Qoorortuut eqittaannartakkat nutsuinnartakkallu umimmanniarnermi atorneqarnissaat inerteqqutaavoq.   
Imm. 4.  Aallaat sunaluunniit imm. 2 naapertorlugu piniarnermut atorneqaqqusaasoq nakersarneqarsimassaaq pitsaasuussallunilu.
Imm. 5.  Pisisseq atorlugu umimmanniarneq inunnit Kalaallit Nunaanni, Danmarkimi imaluunniit nunani allani pisissimik piniarnermut misilitsinnermi takussutissartalimmik angusaqarsimasunit ingerlanneqarsinnaavoq.
Imm. 6.  Pisisseq atorlugu umimmanniarnermi piumasaqaatit ukuupput:
1)  Pisisseq Compound-iussaaq (katitigaq / nutaaliaasoq), pisisseq aaqqinneqarsinnaasumik umerfeqassaaq / nalunaaqutaqassaaq minnerpaamillu 60 pund-inik (28 kg.-inik) nusutsisin-naassuseqarluni.
2)  Qarsui minnerpaamik 525 grains-inik (34 gr.-inik) oqimaassuseqassapput.
3)  Qarsut naqqui mekaniskiusut atorneqaqqusaanngillat.

§ 12.  Umimmaap pisarineqartup neqaa tamaat pisaqarfimmiit nassarneqassaaq. Pisap sinneri  sapinngisamik pisaqarfiup qimalernerani nassarneqassapput imaluunniit  tupeqarfiit, illuaqqat akiliuteqarluniluunniit aallaaniarnerup ingerlanneqarneranut akornusiinatik inissineqassallutik.

Kapitali 7
Akiliuteqarluni aallaaniarnermi immikkut piumasaqaatit

§ 13.  Piniarnermut Naalakkersuisoq pisassiissutinik piniarnissap aamma akiliuteqarluni aallaaniarnissap akornanni pisassiissutinik agguaassinissamut aalajangersaassaaq.
Imm. 2.  Akiliuteqarluni aallaaniarnissamut pisassiissutigineqartut, umimmanniarnissamut pisassiissutinit tamarmiusunit tiguneqassapput, takuuk § 3, imm. 1.
Imm. 3.  Naak § 4, imm. 2-mi aalajangersagaqaraluartoq, Piniarnermut Naalakkersuisoq akiliuteqarluni aallaaniarnermut ukioq kaajallallugu tigganniarnissamut piffissamik piniarfiusus-samik aalajangersaasinnaavoq.
Imm. 4.  Arnavissamik piaqqamillu akiliuteqarluni aallaaniarneq piffissami 1. marts-miit - 31. julimut inerteqqutaavoq.
Imm. 5.  Akiliuteqarluni aallaaniarnermi qoorortuut sullukinnersaat 7,62 x 63 kaliberiuvoq (aqerlup diameteria 7,62 mm) soorlu 30-06 aamma 308. Imassat nammineq qinerneqassapput.
Imm. 6.  Pisisseq atorlugu akiliuteqarluni umimmanniarneq inunnit Kalaallit Nunaanni, Danmarkimi imaluunniit nunani allani pisissimik piniarnermut misilitsinnermi takussutissartalimmik angusaqarsimasunit ingerlanneqarsinnaavoq.
Imm. 7.  Pisisseq atorlugu umimmanniarnermi piumasaqaatit ukuupput:
1)  Pisisseq Compound-iussaaq (katitigaq / nutaaliaasoq), pisisseq aaqqinneqarsinnaasumik umerfeqassaaq / nalunaaqutaqassaaq minnerpaamillu 60 pund-inik (28 kg.-inik) nusutsisinnaassuseqarluni.
2)  Qarsui minnerpaamik 525 grains-inik (34 gr.-inik) oqimaassuseqassapput.
3)  Qarsut naqqui mekanisk-iusut atorneqaqqusaanngillat.
Imm. 8.  § 20-imi aalajangersagaqaraluartoq akiliuteqarluni aallaaniarnermi umimmattat PINIARNEQ-mut nalunaarutigineqassapput. Akiliuteqarluni piniartitsinermik aaqqissuisut Piniarnermut Naalakkersuisoqarfimmut nalunaarusiortassapput. Tamatuma kingornatigut paasissutissat katersorlugit PINIARNEQ-mut nassiunneqassapput.

Kapitali 8
Umimmanniarnermut atatillugu assartuutinik atuineq

§ 14.  Umimmannik malersuinermi ungusinermilu assartuutit atorneqaqqusaanngillat, § 15-ili takuuk.
Imm. 2.  Assartuutit taamaallaat piniarfimmut piniarfimmiillu assartuinermut atorneqaqqu-saapput nunamilu assartuutinik ingerlaarnermut atatillugu umimmannut uumasunut minner-paamik 500 meterinik ungasissusissaq malinneqassaaq.
Imm. 3.  Umimmanniarnermi qimmit nassatareqqusaanngillat, imm. 4-5-imili pineqartut pineqanngillat.
Imm. 4.  Allorniusami kangimukartup 44^o W-mi avannamukartullu 66^o N-mi qimmeqarfinni qimussit assartuutitut atorneqaqqusaapput.
Imm. 5.  Sumiiffimmi piniarfiusumi qimmit qimuttut qimaannaqqusaanngillat. Qimmit qima-taasut tiguneqarsinnaanngitsullu sapinngisamik ajornanngippat aallaaneqassapput. Qimmip toqungasup timaa sumiiffimmi piniarfiusumi qimaannarneqaqqussanngilaq. Kingusinnerpaamik piniarnerup naammassinerata kingornatigut qimmit qimmeersiutaasut politiinut nalunaarutigineqassapput.

Kapitali 9
Umimmannik ungusineq

§ 15.  Piniarnermut Naalakkersuisoqarfik § 14, imm. 1-imik immikkut makkuninnga tunn-gaveqartunik akuersissuteqarsinnaavoq:
1)  Allakkatigut qinnuteqaammik tigusaqarsimaneq.
2)  Qinnuteqaat peqataasussat allattorsimaffiannik, kiisalu piffissaq aamma ungusinissap sumiiffissaa pillugu paasissutissanik imaqassasoq.
3)  Ungusineq qamuteralaat, ATV imaluunniit qulimiguulik atorlugit ingerlanneqassasoq.
Imm. 2.  Immikkut akuersissummi piumasaqaatinik nalunaarummik Piniarnermut Naalakkersuisoqarfiup peqataasullu akornanni allatamik isumaqatigiissusiortoqassaaq.
Imm. 3.  Umimmannik ungusisinnaanermut immikkut akuersissut taamaallaat inunnut inuussutissarsiutigalugu piniarsinnaanermut allagartalinnut tunniunneqarsinnaassaaq.

Kapitali 10
Umimmammik pissatamik toqutsineq

§ 16.  Piniartoq pisussaavoq umimmaap eqqorneqarnermi kinguninnguagut toqusimanera qularnaassallugu.
Imm. 2.  Piniarnermi umimmammik pissaasoq, pisussaavoq umimmak pissatani sapinngisamik piaarnerpaamik toqussallugu.
Imm. 3.  Umimmak pissataq nanineqanngippat toqunneqaranilu, piniartup piniarnerup naammassineqarneranut atatillugu pissutsit piviusut pillugit Piniarnermut Naalakkersuisoqarfik imaluunniit piniarnermut aallaaniarnermullu nakkutilliisoq ilisimatissavaa.
Imm. 4.  Umimmammik pissatamik sulilu uumasumik takunnittup sapinngisamik ajornanngippat umimmak toqussavaa. Pisarinninneq piffissap piniarfiusup avataani pippat, umimmak summiffianut qimanneqassaaq. Pisarinnittup pisussaaffittut akisussaaffigaa, pisup qanoq ingerlasimanera Piniarnermut Naalakkersuisoqarfimmut imaluunniit piniarnermut aallaaniarnermullu nakkutilliisumut nalunaarutigissavaa.
Imm. 5.  Umimmak toqungasoq takusaq takunniffimmut qimaannarneqassaaq.

Kapitali 11
Uumatillugit tigusinerit nuussinerillu

§ 17.  Piniarnermut Naalakkersuisoq akuersiteqqaarsimatinnagu umimmannik tigusineq imaluunniit nuussineq kiisalu soriarsinnaajunaarlugit ungalusat iluiniititsinissaq inerteqqutaapput.

Kapitali 12
Kommunimi ileqqoreqqusaq

§ 18.  Kommunimi ileqqoreqqusakkut kommunalbestyrelsi nalunaarut manna naapertorlugu, nalunaarummi maani aalajangersakkanik § 3, imm. 2-3-mit, § 4, imm. 2-3-mit aamma § 14, imm. 1-2-mit, sakkortunerusunik piumasaqaateqarsinnaavoq.
Imm. 2.  Kommunimi ileqqoreqqusaq, Piniarnermut Naalakkersuisumit atulersinneqassaaq.

Kapitali 13
Najukkami aqutsineq

§ 19.  Piniarneq pillugu Siunnersuisoqatigiinnik aamma kattuffinnik allanik attuumassuteqartunik tusarniaareernikkut Piniarnermut Naalakkersuisup, nunap immikkoortuinik killilikkanik ilivitsunik taakkuluunniit ilaanik aqutsinissamut agguaassisinnaavoq.
Imm. 2.  Taakkununnga piumasaqaatit allaganngorlugit Piniarnermut Naalakkersuisup imaluunniit Naalakkersuisumit tamatumunnga toqqarneqarsimasumit aamma akuersissutinik agguaassisussaatitaasunit atuuttunit isumaqatigissutigineqassapput.

Kapitali 14
Pinngortitami uumassusilinnik misissuinermut nalunaaruteqartarneq

§ 20.  Pisanik nalunaaruteqarneq imaluunniit pisanut nalunaarsuutinik kommunimut tunniussineq piniarnerup naammassineqarnerata kingornatigut kingusinnerpaamik sapaatip akunnerisa marluk qaangiunneranni pissaaq. Tamatuma kingornatigut paasissutissat ataatsimoortillugit piniarnerup naammassinerata kingornatigut kingusinnerpaamik sapaatip akunnerisa sisamat qaangiunneranni kommunimit Pinngortitaleriffimmut nassiunneqassapput.
Imm. 2.  Pisanik nalunaaruteqarnermi immersuiffissiaq akuersissutip tunuaniittoq kingusinnerpaamik, pisap angallammut piniarnermut atatillugu assartuutaasumut ikineqarnerani immersorneqassaaq.

Kapitali 15
Nujuartanik pisanik nalunaarutiginninneq

§ 21.  Umimmannik pisat aamma pissatat tamarmik, naak § 20-imi aalajangersagaqaraluar-toq, PINIARNEQ-mi ukiumoortumik immersuiffissiami nalunaarutigineqassapput.

Kapitali 16
Nakkutilliineq

§ 22.  Kinaluunniit politiinit imaluunniit piniarnermik aallaaniarnermillu nakkutilliisunit umimmanniarsinnaatitaanini uppernarsaqqullugu piumaffigineqaruni, akuersissut atuuttoq aamma piniarnermut allagartaq atuuttoq takutissavai.

Kapitali 17
Immikkut akuersissuteqartarneq

§ 23.  Siunertanut ilisimatusarnermik ilinniartitaanermillu siunertaqartunut nalunaarummi aalajangersakkat Piniarnermut Naalakkersuisoqarfimmit immikkut akuersissuteqarfigineqar-sinnaapput, tassunga ilaalluni ilisimatusarnermut atatillugu umimmanniarsinnaanermut akuersineq.

§ 24.  Umimmaat ulorianartorsiortitsisut imaluunniit angallannermut atatillugu annertuumik akornusersuisut qimaatinneqarsinnaanngippata toqunneqarsinnaapput.
Imm. 2.  Umimmaat imm. 1 naapertorlugu toqunneqartut Namminersorlutik Oqartussanut pigisassanngortinneqassapput. Piniarnermut Naalakkersuisoqarfimmut piniarnerup ingerlasimanera nalunaarutigissallugu umimmannik pisaqarnermi akisussaasup pisussaaffigaa. Naalakkersuisoqarfiup umimmaap toqutap qanoq pineqarnissaa aalajangiiffigissavaa.

§ 25.  § 6 imm. 4-mi aalajangersagaqaraluartoq aqutsinermi periaatsit aallaavigalugit piniar-nermut allagartap 1. maj nallertinnagu akilerneqarsimanissaanik piumasaqaammit immikkut akuersissuteqartoqarsinnaavoq.

Kapitali 18
Pineqaatissiissutit

§ 26.  Nalunaarummi matumani aalajangersakkanik unioqqutitsinermi akiliisitsineq pineqaatissiissutaasinnaavoq kiisalu sunngiffimmi aallaaniarsinnaanermut allagartaqarsinnaaneq ima-luunniit inuussutissarsiutigalugu piniarnermut allagartaqarsinnaaneq arsaarinnissutaasinnaapput.
Imm. 2.  Nalunaarummi malittarisassanik unioqqutitsinermi umimmannit pisarineqartunit isertitat Kalaallit Nunaanni pinerluttulerinermi inatsisini malittarisassatigut aalajangersakkat naapertorlugit arsaarinnissutigineqarsinnaapput.
Imm. 3.  § 18 naapertorlugu, kommunimi ileqqoreqqusaliani kommunalbestyrelsi aalajangersaasinnaavoq, ileqqoreqqusaliani aalajangersakkanik unioqqutitsinerit Kalaallit Nunaanni pinerluttulerinermi inatsisini malittarisassatigut aalajangersakkat naapertorlugit akiliisitsinermik arsaarinnissummillu kinguneqassasut.

Kapitali 19
Atuutilerfia il.il.

§ 27.  Nalunaarut manna atuutilerpoq ulloq 27 juni 2013.
Imm. 2.  Peqatigitillugu Namminersorlutik Oqartussat umimmaat illersugaanerat piniagaanerallu pillugit nalunaarutaat nr. 9, 11. juli 2012-imeersoq atorunnaarsinneqarpoq.

Kalaallit Nunaanni Namminersorlutik Oqartussat, ulloq 27. juni 2013

Karl Lyberth

/

Jens K. Lyberth