Kommunit aqunneqarnerat pillugu Inatsisartut inatsisaanni nr. 22, 18. november 2010-meersumi § 67 imm. 1 naapertorlugu aalajangersarneqarpoq:
§ 1. Borgmesteri nammineq soraarnerussutisiaqarnissaminut qinigaajunnaarnersiuteqarnissaminullu §§-ini 2-miit 7-imut aammalu 9-miit 10-mut malittarisassat naapertorlugit pisinnaatitaaffeqarpoq.
Imm. 2. Aappaasoq meeqqallu borgmesterip toqukkut peerunneratigut qimataasut §§-ini 8-mi 11-milu malittarisassat naapertorlugit soraarnerussutisianut qinigaajunnaarnersiutinullu pisinnaatitaaffeqarput.
Nammineq soraarnerussutisiat
§ 2. Borgmesterip tunuarnermini nammineq soraarnerussutisiassai ukiut soraarnerussutisiassaqarfîssai akissarsiaalu soraarnerussutisiaqaatissat naapertorlugit aalajangersarneqartassapput.
§ 3. Nammineq soraarnerussutisiassaqalernissamut ikinnerpaamik ukiuni arfineq-pingasuni sulereersimanissaq piumasaqaataavoq, takuulli imm. 4.
Imm. 2. Piffissaq suliffiusoq tassaavoq piffissaq pineqartup borgmesteritut suliffîgisaa aammalu ukiuni qinigaaffinni arlalinni borgmesteritut sulisarsimanerit ilanngunneqartassallutik.
Imm. 3. Piffissaq suliffiusoq ukiunut ilivitsunut aammalu ukiup sulilerfiup aallartiffianit naatsorsorneqartassaaq.
Imm. 4. Borgmesteri nappaammik nakorsap uppernarsaasiinera naapertorlugu borgmesteritut suleqqinnissaminut akornuserneqarluni kommunalbestyrelsip akuersineratigut tunuarpat piffissaq suliffiusoq piffissamut tunuarnerup nalaani qinigaaffimmut tamakkiisumut naatsorsorneqartassaaq.
§ 4. Ukiut borgmesterip soraarnerussutisiassaqarfissai piffissap suliffiusup naatsorsorneqartarnera naapertorlugu ima naatsorsorneqartassapput:
|
Piff. borgmesteriuffik:
|
Ukiut soraarnerussutisiassaqarfissat:
|
|
Ukiut 8-nit 10-nut
|
Ukiunut 28-nut naatsorsorneqassapput
|
|
Ukiut 10-nit 12-inut
|
Ukiunut 30-nut naatsorsorneqassapput
|
|
Ukiut 12-init 14-inut
|
Ukiunut 31-nut naatsorsorneqassapput
|
|
Ukiut 14-init 16-inut
|
Ukiunut 33-nut naatsorsorneqassapput
|
|
Ukiut 16-init 18-inut
|
Ukiunut 34-nut naatsorsorneqassapput
|
|
Ukiut 18-init 20-nut
|
Ukiunut 36-nut naatsorsorneqassapput
|
|
Ukiut 20-it sinnerlugillu
|
Ukiunut 37-nut naatsorsorneqassapput
|
§ 5. Borgmesteri nammineq soraarnerussutisisalissaaq borgmesteritut tunuarnermi nalaani nalinginnaasumik soraarnerussutisisalersussatut 60-inik ukioqalereersimaguni imaluunniit ullormit taama utoqqaatigilerfimminit.
§ 6. Nammineq soraarnerussutisiat tunuarnerup kingornagut tunniunneqartarnerisalu nalaani malittarisassat nunatsinni tjenestemandinut atuuttut naapertorlugit naatsorsorneqartarlutillu akit allanngorarnerinut iluarsiissuteqarfigineqartassapput.
§ 7. Nammineq soraarnerussutisiaqalernissaq aallartittarpoq § 9 naapertorlugu piffissaq qinigaanersiutaaruffik qaangiukkaangat.
Imm. 2. Pineqartoq borgmesteritut qinigaaqqippat soraarnerussutisiaqartitsineq unitsinneqassaaq.
Aappaasup meeqqallu soraarnerussutisiaqartitaanerat
§ 8. Aappaasoq meeqqallu soraarnerussutisiaqartinneqartassapput malittarisassat nunatsinni tjenestemandinut atuuttut naapertorlugit.
Imm. 2. Naak borgmesteritut sulinerup qaangiutereerneratigut aappariilersoqaraluartoq nalunaarut manna malillugu aappaasoq aappaasutut tamatigut soraarnerussutisiaqarsinnaatitaavoq. Taamatuttaaq meeqqat meerarisatut soraarnerussutisiaqarsinnaatitaapput naak borgmesteritut sulinerup qaangiutereerneratigut inunngoraluarlutik.
Qinigaajunnaarnersiutit
§ 9. Borgmesteri qinigaajunnaarnersiuteqartinneqartassaaq qaammammut pineqartup ukioq kingulleq sulinermini akissarsiaasa 1/12-iannik. Ukiut aallartinneqartut pineqartup borgmesteritut suliffigisai tamarmik qaammatip aappaata affaanik sivisussusilimmik qinigaajunnaarnersiuteqaatissaapput. Piffissarli qinigaajunnaarnersiuteqarfissaq sivisunerpaamik qaammatinik 12-inik sivisussuseqarsinnaavoq.
§ 10. Borgmesterip tunuarnera pinerluttulerinermi inatsit naapertorlugu peqqussuteqarnermik nakkutigineqartussaanermilluunniit pissuteqarluni qinigaasinnaajunnaarnermik kinguneqarsimappat kommunalbestyrelsip inassuteqareerneratigut naalakkersuisunit aalajangerneqassaaq borgmesteri nalunaarummi matumani malittarisassat naapertorlugit qinigaajunnaarnersiu-teqarsinnaatitaassanersoq.
Aappaasup meeqqalu qinigaajunnaarnersiutinik pissarsisinnaanerat
§ 11. Borgmesterip toqukkut peerunnini tikillugu borgmesteritut sulisup imaluunniit toqukkut peerunnini tikillugu borgmesterip qinigaajunnaarnersiutaanik pissarsisartup aappaa piffissap qinigaajunnaarnersiuteqarfiup sinnerani, sivisunerpaamilli borgmesterip imaluunniit borgmesteriusimasup toquneraniit qaammatini pingasuni, qinigaajunnaarnersiutinik pisartagaqarsinnaavoq.
Imm. 2. Borgmesteri toqukkut aappaminik qimataqanngippat qimataasorluunniit piffissap qinigaajunnaarnersiuteqarfiup qaangiutinnginnerani toqukkut peeruppat qinigaajunnaarnersiuteqarsinnaaneq borgmesterip meeraanut suli 18-iliisimanngitsunut, borgmesterip toqukkut peerunnerani tassannga angajoqqaatut oqartussaaffigisaasunut, pisinnaatitaaffinngussaaq.
Soraarnerussutisianik il.il. naatsorsuineq tunniussinerlu
§ 12. Soraarnerussutisianik qinigaajunnaarnersiutinillu naatsorsuineq, nalunaarut manna borgmesterinut soraarnerussutisiat imaluunniit taassuma aappaanut meeraanullu siusinnerusukkut malittarisassat atuuttut naapertorlugit tunniunneqartartut kommunimi borgmesteriusimasup kingullermik borgmesteriuffigisimasaani kommunimi kommunalbestyrelsimit isumagineqartassaaq.
Imm. 2. Imatut pisuni, tassani borgmesteri kingullermik borgmesteritut sulisimalluni kommunimi kommuniniluunniit 1. januar 2009 tikillugu kommuniusimasuni, kommunimi siusinnerusukkut kommuniusimasumi kommunalbestyrelsimit borgmesteriusimasumut imaluunniit taassuma aappaanut meeraanullu soraarnerussutisiat naatsorsorneqarnerat tunniunneqarnerallu isumagineqartassapput.
§ 13. Borgmesterimut soraarnerussutisiat qinigaajunnaarnersiutillu, kommunimi ataatsimik amerlanerusumi qinigaasimanermut tunngasut, kommuninit pineqartunit annertoqatigiiaartumik akissarsiatut tunniunneqartassapput.
Atortuulersitsinermut aalajangersakkat
§ 14. Nalunaarut una atuutilissaaq ulloq 1. juni 2012 1. januar 2011-miit atuutilersumik.
Imm. 2. Borgmesterit qinigaajunnaarnersiutaat soraarnerussutisiaallu aammalu taakkua aappaasa meeraasalu taakkuninnga pissarsisinnaaneri pillugit Namminersornerullutik Oqartussat nalunaarutaat nr. 23, 12. september 1997-imeersoq ilutigalugu atorunnaarsinneqarpoq 1. januar 2011-mi atuutilersumik.
Namminersorlutik Oqartussat, ulloq 24 . maj 2012
Kuupik Kleist
/
Hans-Erik Bresson