Kommunit aqunneqarnerat pillugu Inatsisartut inatsisaat nr. 22, 18. november 2010-meersoq, Inatsisartullu inatsisaatigut nr. 6, 29. november 2013-imeersutigut allanngortinneqartumi § 67a, imm. 1, malillugu aalajangersarneqarpoq:

§ 1. Inuk 1. maj 2013 sioqqullugu borgmesteritut sulisoq nammineq pensionisianik pisinnaatitaavoq §§ 2-6-imi malittarisassat malillugit. Tamanna aamma atuuppoq inummut Kommunit aqunneqarnerat pillugu Inatsisartut inatsisaanni § 67a, imm. 3 malillugu §§ 2-6-imi malittarisassanut ilanngunneqarnissamik toqqaasimasumut.
Imm. 2. §§ 2-4-mi malittarisassat atorneqarpata piffissat inuup §§ 10 aamma 11-mi malittarisassanut ilanngunneqartut ilanngunneqarfigisai isigineqassanngillat.
Imm. 3. Inuup aapparisaa meeraaluunniit imm. 1-imut ilanngunneqartut § 7-imi malittarisassat malillugit aappaasumut meeraasumullu pensionisianik tunineqartussaapput.

Nammineq pensionisiat

§ 2. Borgmesteriusimasumut nammineq pensionisiat pineqartup pensionisiaqalernissamut ukiui borgmesteritullu sulinermiit soraarnermi pensionisiaqaatigalugit akissarsiai malillugit aalajangersarneqarput.

§ 3. Nammineq pensionisianik tunniussinermi ikinnerpaamik ukiuni 8-ni atuuffeqarsimanissaq piumasarineqarpoq, taamaattoq takuuk imm. 4.
Imm. 2. Atuuffiusimasoq tassaavoq atuuffik pineqartup borgmesteritut suliffigisimasaa.  Borgmesteritut sulinermi arlalinni atuuffiit katinneqassapput.
Imm. 3. Atuuffiusimasoq ukiunut ilivitsunut ukiunullu atuuffinnut aallartittunut naatsorsorneqarpoq.
Stk. 4. Borgmesteri napparsimaneq, nakorsap uppernarsaaneratigut borgmesteritut suliap isumaginissaanut akornutaasoq pissutigalugit kommunalbestyrelsimit akuerineqarluni atorfimminit tunuarpat atuuffiusimasoq qinigaaffik tamakkerlugu tunuarnissap tungaanut ilanngullugu naatsorsorneqassaaq.

§ 4. Borgmesterip pensionisiaqalernissaanut ukiui borgmesteritut atuuffia malillugu naatsorsorneqassaaq imaalillugu:
Atuuffik                                                                           Pensionisiaqalernissamut ukiut
Ukiut 8-nit 10-nut naatsorsorneqassapput..................................            ukiunut 28-nut
Ukiut 10-nit 12-nut naatsorsorneqassapput................................            ukiunut 30-nut
Ukiut 12-nit 14-inut naatsorsorneqassapput...............................            ukiunut 31-nut
Ukiut 14-init 16-inut naatsorsorneqassapput..............................             ukiunut 33-nut
Ukiut 16-init 18-inut naatsorsorneqassapput..............................             ukiunut 34-nut
Ukiut 18-init 20-nut naatsorsorneqassapput...............................            ukiunut 36-nut
Ukiut 20-nit qummut naatsorneqassapput..................................             ukiunut 37-nut

§ 5. Nammineq pensionisianik tunniussineq aallartissaaq siusinnerusukkut borgmesteriusimasoq 60-inik ukioqalerpat, borgmesteritullu sulinerminut ilaasortaajunnaarnersiutinik tunineqartarunnaarpat.
Imm. 2. Pensionisianik tunniussisarneq unitsikkallarneqartarpoq pineqartoq borgmesteritut qinerneqaqqissimappat.

§ 6. Nammineq pensionisiat Kalaallit Nunaanni tjenestemandinut malittarisassat atuuttut malillugit tunniunneqarfianni naatsorsorneqarlutillu akinut iluarsineqartarput. 

Aappaasumut meeraasumullu pensionisiat

§ 7. Aappaasumut meeraasumullu pensionisiat Kalaallit Nunaanni tjenestemandinut malittarisassat atuuttut malillugit tunniunneqartarput.
Imm. 2. Taamaattoq aappaasoq aappaasumut pensionisianik nalunaarut manna malillugu pisinnaajuassaaq, borgmesteritut sulinerup kingornagut katissimagaluarpalluunniit. Assinganik meeqqat meeqqanut pensionisianik pisinnaatitaapput, borgmesteritut sulinerup kingornagut inunngorsimagaluarpataluunniit.

Pensionisiat il.il. naatsorsornerat tunniuneqarnerallu

§ 8. Pensionisiat nalunaarut manna naapertorlugu imaluunniit borgmesterinut taakkuluunniit aappaannut meeraannullu pensionisiaqartitsineq pillugu malittarisassat atuuttut malillugit tunniunneqartut naatsorsornerat tunniuneqarnerallu kommunalbestyrelsimit kommunimi siusinnerusukkut borgmesterip kingullermik borgmesteritut suliffigisimasaani isumagineqarput.
Imm. 2. 1. januar 2009 tikillugu borgmesteri kommunimi borgmesteritut suliffeqarsimappat kommunimi kingullertut suliffigisimasami kommunalbestyrelsi borgmesteriusimasumut imaluunniit taassuma aappaanut meeraanullu pensionisiassanik naatsorsuissaaq tunniussillunilu.

§ 9. Borgmesteritut nammineq pensionisiat kommunimut ataasiinnaanngitsumut tunngassuteqartut kommuninit pineqartunit tapitut tunniunneqassapput.  Tamanna aamma atuuppoq aappaasumut meeraasunullu pensionisiat una nalunaarut malillugu tunniunneqartartussat.        

Inummut namminermut pensionisianut aaqqissuussinerit

§ 10. Inunnut 1. maj 2013-mi kingusinnerusukkulluunniit borgmesteritut sulilersunut aamma Kommunit aqunneqarnerat pillugu Inatsisartut inatsisaanni § 67a, imm. 3 malillugu uani nalunaarummi §§ 2-6-imi malittarisassanut ilanngunneqarumanatik toqqaasimasunut pensionisianut aningaasaateqarfimmik naafferartumik pensionisiat imaluunniit inuuneq naallugu pensionisiat aqqutigalugit Kalaallit Nunaanni nalunaarsorsimasumik inummut namminermut pensionisianut aaqqissuussinermik pilersitsoqassaaq.
Imm. 2. Pensionisianut aaqqissuussinerit, tak. imm. 1, pensionisianut aningaasaateqarfimmi Inatsisartuni Naalakkersuisunilu ilaasortatut sulinermut atatillugu inummut namminermut pensionisianut aaqqissuussinernut atorneqartartumi pilersinneqassapput.
Imm. 3. Akissarsiat borgmesteritut sulinerup isumagineranut tunniunneqartartut 10 %-iinik imm. 1-imi pensionisianut aaqqissuussinermut taaneqartumut pensionisianut tapiissutinik ingerlaavartumik tunniussisoqartarpoq. Aammattaaq akissarsiat borgmesteritut sulinerup isumagineranut tunniunneqartartut 5 %-iinik ingerlaavartumik uninngatitsisoqartarpoq. Aningaasat uninngatinneqartut borgmesterip nammineerluni imm. 1-imi pensionisianut aaqqissuussinermut taaneqartumut tapiissutigisartagaanut naapertuupput. Pensionisianut tapiissutit borgmesteritut sulinermi tunuarnerup kingorna ilaasortaajunnaarnersiutitut tunniunneqartartut assigalugit tunniunneqarlutillu uninngatinneqartarput.
Imm. 4. Inunnut imm. 1-mut ilanngunneqartunut kingusinnerpaamillu ullormi borgmesteritut sulilernermi 50-inik ukioqalersimasunutpensionisianut tapiissutinik imm. 3-mi taaneqartunik nalinginnaasumik aningaasarsiatut akileraaruteqaataasussanik tunineqarnissi toqqarsinnaavaa.

§ 11. Kommunalbestyrelsip nakkutigissavaa borgmesterip § 10, imm. 1 malillugu pensionisianut aaqqissuussinermik pilersitsinissaa. Pensionisianut aaqqissuussineq ulloq borgmesterip suliffimmini atuutilerfia aallarnerfigalugu pilersinneqassaaq. Taamatuttaaq borgmesterinut ulloq1. maj 2013-imi imaluunniit kingusinnerusukkut suliffimmi atuutilersunut, pensionisianut aaqqissuussinerit siusinnerpaamik 1. januar 2014 aallarnerfigalugu pilersitsisoqassaaq.
Imm. 2. Borgmesterimut pensionisianut aaqqissuussineq pilersinneqarpat pensionisianut tapiissutit pensionisianut aningaasaateqarfimmut akilerneqarnissaat kommunalbestyrelsimit isumagineqassaaq, tak. § 10, imm. 3. Borgmesteritut sulinerup isumagineranut akissarsiat tunniunnerat peqatigalugu qaammatikkaartumik tunniussisoqartassaaq.

Atortuulersitsinermut aalajangersakkat

§ 12. Nalunaarut 1. januar 2014-imi atuutilerpoq.
Imm. 2. Peqataanik Borgmesterit pensionisiaat soraarnerussutisiaallu qinigaajunnaarnersiutaallu aammalu taakkua aappaasa meeraasalu taakkuninnga pissarsisinnaaneri pillugit Namminersorlutik Oqartussat nalunaarutaat nr. 8, 24. maj 2012-imeersoq atorunnaarsinneqarpoq.

Kalaallit Nunaanni Namminersorlutik Oqartussat, ulloq 30. december 2013

Vittus Qujaukitsoq

/

Peter Hansen