Kapitali 1
Siunertaq nassuiaatitaalu

§ 1.  Inatsisartut inatsisaanni siunertarineqarpoq nunap matuma oqaatsinut politikkianut sinaakkutissat erseqqissut qularnaassallugit, tamatumunnga ilagitillugu oqaatsitigut akuunerulersitsineq, makku aqqutigalugit
1) kalaallit oqaasiisa oqaatsitut tamakkiisutut inuiaqatigiinnilu atugaasutut qularnaarnerisigut,
2) kalaallit oqaasiisa taakkualu ilitsoqqussaralugu oqaatsitut allamiutullu oqaatsitut ineriartornerisa nukittorsarnerisigut,
3) oqaatsitigut aporfiusartut pinaveersaarnerisigut peerniarnerisigullu, tamatumuuna marlunnik arlalinnillu oqaaseqarneq nukittoqutaallunilu pisuussutinngoqqullugu, aamma
4) Kalaallit Nunaat nalunngisaqarfiusumik inuiaqatigiiffittut nukittorsarniarlugu oqaasertusarnerup inuiaqatigiinni siuarsarneratigut.

§ 2.  Oqaatsitigut akuunerulernissaq inunnut immikkoortunut pingasunut sammitinneqarpoq
1) kalaallisut ilikkarnissamik pisariaqartitsisunut,
2) danskisut tuluttulluunniit ilinniarnissamik pisariaqartitsisunut,
3) kalaallit kulturiannik, oqaluttuarisaanerannik inuiaqatigiinnilu pissutsinik ilinniartinneqarnissamik pisariaqartitsisunut.
Imm. 2.  Oqaatsitigut akuunerulernissamik oqarneq paasineqassaaq pineqartuni taakkunani pingasuni oqaatsitigut aporfiusartut peerniarnissaat inunnullu imm. 1-imi taaneqartunut oqaasertusaanissap nukittorsarnissaa, innuttaasut inuiaqatigiinni peqataasinnaanerat pitsanngorsarniarlugu nunatsinnilu ataatsimoornermik misigisimaneq kinaassuserlu patajaallisarniarlugit.

Kapitali 2
Oqaatsinut politikki

§ 3.  Kalaallit oqaasii tassaapput Kalaallit Nunaanni pisortatigoortumik oqaasiusut pisortatigullu ingerlatsinermi atugaasut.
Imm. 2.  Kalaallit oqaasii sumiorpaluutinik pingaarnernik pingasunik pinnguuteqarput. Sumiorpaluutit Avanersuarmi, Tunumi aamma Kitaani atorneqartut.
Imm. 3.  Danskit oqaasii pisortatigut ingerlatsinermi atorneqarsinnaapput.
Imm. 4.  Tuluit oqaasii allamiullu oqaasii allat pisariaqartitsineq malillugu atorneqarsinnaapput.

§ 4.  Namminersorlutik ingerlatsisut minnerpaamik 10-nik sulisullit, aamma pisortat ingerlatsivii pisortatullu oqartussaasut oqaatsinut politikkimik ilusiliissapput.
Imm. 2.  Oqaatsinut politikkimi imaritinneqarsinnaapput
1) pisortatut oqartussaaffiup imaluunniit suliffeqarfiup oqaatsitigut piginnaaffiinik erseqqissaaneq,
2) allamiut oqaasiinut kulturikkullu piginnaaffinnik ersersitsineq,
3) pisortatut oqartussaaffiup imaluunniit suliffeqarfiup avataanit oqaatsitigut isigineqarnerata ersersinnera,
4) suliffiup iluani avammullu attaveqaqatigiinnermi najoqqutassiat, aamma
5) sulisut piginnaasassaannut anguniakkat.
Imm. 3.  Sulisitsisoq pisussaavoq sulisuminik immikkut pineqartumuinnaq oqaloqatiginnissalluni sulisup oqaatsinik aamma kalaallit kulturiannik, oqaluttuarisaanermik inuiaqatigiinnilu pissutsinik ilinniartitaanissamut pisariaqartitsinersoq.

Kapitali 3
Oqaasertusarneq

§ 5.  Kalaallit Nunaanni najugaqavissut tamarmik pisinnaatitaapput kalaallisut danskisullu, kiisalu nunani tamalaani oqaatsinik atugaasunik ilikkarnissamut, oqalunnikkut allannikkullu, tassuunakkut inuiaqatigiinni inuunermut peqataasinnaaqqullugit ilitsoqqussaralugulu oqaatsiminnik atuisinnaallutillu ineriartortitsisinnaaqqullugit.
Imm. 2.  Naalakkersuisut tamanna pillugu isumasioqatigeereernikkut suliffeqarfimmi kattuffiit susassaqartullu attuumassutillit allat peqatigalugit pisinnaatitaanerup imm. 1-imi taaneqartup piviusunngortinneqarnissaanut malittarisassiorsinnaapput, tassunga ilanngullugit pikkorissartitsinermik atuartitsinermillu neqeroorutit taakkununngalu peqataanissamut kiffaanngissuseqarneq pillugit.

Kapitali 4
Nakkutilliineq, kinguneqartitsinerit naammagittaalliuutillu

§ 6.  Naalakkersuisut suliffeqarfiit oqartussaasullu inatsimmik malinninnerannik nakkutilliissapput. Naalakkersuisut nakkutilliineq Namminersorlutik Oqartussani oqartussaasunut sullissiveqarfinnullu allanut tunniussinnaavaa.
Imm. 2.  Suliffeqarfiit namminersortut, pisortani oqartussaasut sullissiveqarfiillu § 4-mi taaneqartut nakkutilliisoqarfimmit qinnuigineqarnermikkut suliffeqarfiup, oqartussaasut sullissiveqarfiulluunniit oqaatsinut politikkianik nassiussissapput, kiisalu oqaloqatigiinnerit § 4, imm. 3-mi pineqartut pisimanerinut uppernarsaallutik. Nakkutilliisoqarfik suliffeqarfinni namminersortuni, pisortani oqartussaasuni sullissiveqarfinnilu § 4-mi taaneqartuni aamma paasissutissanik nakkutilliisussaatitaanerup isumagineqarnissaanut pisariaqartunik pissarsisinnaapput.
Imm. 3.  Inatsisartut suliffeqarfii nakkutilliisussaatitaanngillat.

§ 7.  § 4, imm. 1-imik aamma 3-mik unioqqutitsineq akiliisitaassutigineqarsinnaavoq.
Imm. 2.  Pisussaaffinnik § 6, imm. 2-mi taaneqartunik malinninnginneq akiliisitaassutigineqarsinnaavoq.

§ 8.  § 4, imm. 1 naapertorlugu oqaatsinut politikkiliorsimannginneq, kiisalu § 4, imm. 3-mi taaneqartutut oqaloqatigiissimannginneq pillugit naammagittaalliuutit nakkutilliisoqarfimmut tunniunneqarsinnaapput.

Kapitali 5
Atuutilersitsineq ikaarsaariarnermilu aalajangersakkat

§ 9. Inatsisartut inatsisaat ulloq 1. juli 2010 atuutilerpoq.
Imm. 2.  Suliffeqarfinni ataasiakkaani oqaatsinut politikki, tak. § 4, imm. 1, kingusinnerpaamik ulloq 1. oktober 2010 naammassineqareersimassaaq.

Namminersorlutik Oqartussat, ulloq 19. maj 2010

Kuupik Kleist

/

Mimi Karlsen