Suliffeqarnermi innersuussisarneq il.il. pillugit Inatsisartut peqqussutaat nr. 10, 18. december 2003-meersumi § 7, imm. 2 naapertorlugu aalajangersarneqarpoq:

Nassuiaatit pillugit aalajangersakkat

§ 1. Najukkatut angerlarsimaffigisatut paasineqassaaq Kalaallit Nunaanni illoqarfik nunaqarfilluunniit sulinermik inuussutissarsiuteqartup najugaqarfigisaa inuillu allattorsimaffianni nalunaarsorsimaffigisaa.
Imm. 2. Aappariittut katissimasutut inooqatigiinnertut naligiissinneqarput inooqatigiittut, 18-inik ukioqalereernermik kingorna, ukiumi ataatsimi aappariittut inooqatigiittut peqatigiillutillu inuit allattorsimaffianni nalunaarsorneqarsimasut.
Imm. 3. Sulinermik inuussutissarsiuteqartutut paasineqassaaq suliffissaaleqisoq suliffeqarnermi innersuussisarfimmut nalunaarsimasoq atorfimmullu innersuunneqartumut sulisitsisumit atorfinitsinneqartoq, taamatullu sulisitsisup ilitsersuussisussaatitaaneranut malitassaqartinneqartoq.

Atuuffik

§ 2. Aningaasanut inatsimmi aningaasaliissutigineqartut iluanni nuttarnerulersitsiniarluni tapiissutinik aningaasaliissuteqartoqartarpoq sulinermik inuussutissarsiuteqartunut suliffimmik innersuunneqarnerminni isumaqatigiissut sulinermik inuussutissarsiuteqartunut pineqartunut atuuttoq naapertorlugu atorfininnermut angalanissamut pigisallu nuunneqarnissaannut akiliunneqarsinnaanngitsunut.

§ 3. Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfik suliffeqarnermi kommunini innersuussisarfiit suliffinnik innersuussisarnerannut atatillugu atorfininnermut angalanissamut pigisallu nuunneqarnissaannut aningaasaliissuteqarsinnaavoq, tamatumani
1) sulinermik inuussutissarsiuteqartoq najukkatut angerlarsimaffigisami avataani suliffissamik innersuunneqarpat,
2) sulinermik inuussutissarsiuteqartoq ataavartumik atorfeqalernissaq siunniullugu atorfinitsinneqarpat, aamma
3) piffissami qaninnerusumi naatsorsuutigineqarsinnaanngippat suliffik najukkami sulisartunit najugaqartunit inuttalerneqarsinnaassasoq.

Tapiissutit annertussusiat

§ 4. Sulinermik inuussutissarsiuteqartumut, taamaattoqarpallu taassuma aapparisaanut qitornaasunullu 18-it inorlugit ukiulinnut angerlarsimaffimmilu suli najugaqartunut atorfininnermut angalanissamut akiliuteqartoqassaaq. Atorfininnermut angalanissaq sapinngisamik ataatsimoorluni ingerlanneqassaaq najukkamut angerlarsimaffigiligassamut angallavissaq tamanit atorneqarsinnaasoq akikinnerpaaq atorlugu.
Imm. 2. Atorfininnermut angalanermi pineqarput bilitsinut aningaasartuutinik tamakkiisumik akiliussineq.
Imm. 3. Angalariaaseq alla atorneqarpat taassumunnga aningaasartuutit uppernarsaasikkat matussuserneqassapput, taamaattorli angallavissamut tamanit atorneqarsinnaasumut akikinnerpaamut bilitsip akia qaangernagu.

§ 5. Pigisat nuunneqarnissaannut tapiissuteqartoqartarpoq imm. 2-miit 6-imut aalajangersakkat malillugit, taamatullu aamma maleruagassat tjenestemandinut atuuttut malillugit.
Imm. 2. Kisimiittut pigisaasa nuunneqarnissaannut tapiissuteqartoqartarpoq 15 m3-it nalingi angullugit. Imaatigut assartuinermut assartuussinermullu nalinginnaasumik sillimmasiisoqartarpoq sillimmasiussat nalingi 182.500 kr.-nit angullugit.
Imm. 3. Aappariit pigisaasa nuunneqarnissaannut tapiissuteqartoqartarpoq 30 m3-it nalingi angullugit. Imaatigut assartuinermut assartuussinermullu nalinginnaasumik sillimmasiisoqartarpoq sillimmasiussat nalingi 364.800 kr.-nit angullugit.
Imm. 4. Qitornarisamut ataatsimut pigisat nuunneqarnissaannut tapiissuteqartoqartarpoq ilassutit 5 m3-it angullugit. Imaatigut assartuinermut assartuussinermullu nalinginnaasumik sillimmasiisoqartarpoq sillimmasiussat nalingi ilassutit 60.800 kr.-nit angullugit.
Imm. 5. Pigisat nuunneqarnissaannut ilaapput pigisat poortorneri, poortuutissat, assartorneri puuiarneqarnerilu. Pigisat nuunneqarnerannut ilaanngillat nussuinerit nalinginnaasut saniatigut pigisanik toqqorsivinniititsigallartarnerit.
Imm. 6. Pigisat nuunneqarnissaannut aningaasaliissuteqartoqareerpat pigisalli atorfininnermut angalanissamut attuumasumik umiarsuartigut assartorneqariaannaanngippata, tamanna pissusissamisoortumik uppernarsaasereerlugu, nassatat inummut ataatsimut 10 kiilut angullugit qaangerneqarsinnaanissaannut matussusiisoqarsinnaavoq.

Aqutsineq aamma akiliuteqartarneq ilaalu ilanngullugit

§ 6. Kommunit najukkani suliffissarsiuussisarfii Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfimmut qinnuteqaatinik nassiussissapput sulinermik inuussutissarsiuteqartup aamma sulisitsisup akornanni atorfininnermut isumaqatigiissuteqartoqaleriarpat.
Imm. 2. Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfik aalajangiissaaq nuttarnerulersitsiniarluni tapiissutinik aningaasaliisoqassanersoq. Aalajangiineq pissaaq najukkami, sulinermik inuussutissarsiuteqartup innersuunneqarfigisaani, sulisartunik piginnaasalinnik pisariaqartitsinermik ataatsimut naliliineq tunngavigalugu.
Imm. 3. Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfik qinnuteqarnissamut immersuiffilianik suliaqarsinnaavoq suliffissarsiuussisarfiit nuttarnerulersitsiniarluni tapiissutitut aningaasaliissutinik qinnuteqartarnissaminnut atatillugu atugassaannik.

§ 7. Kommunini najukkani suliffissarsiuussisarfiit nuttarnerulersitsiniarluni tapiissutinik qinnuteqaatit suliarinissaannut atasumik paasissutissat pisariaqartinneqartut tamaasa Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfimmut nalunaarutigisassavai, ilanngullugit paasissutissiissutigineqareersut pillugit allannguinerit.

§ 8. Kommunip sulinermik inuussutissarsiuteqartup najukkatut angerlarsimaffigisaata aningaasartuutit tapiissutitut aningaasaliissutigineqartut naapertorlugit akilertassavai.
Imm. 2. Kommunip aningaasartuutit Inuusutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfimmit utertitsitsissutigissavai aningaasartuutit pineqartut aningaasaliissutigineqartut naapertorlugit atorneqareerpata.

§ 9. Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfiup aalajangersinnaavaa nuttarnerulersitsiniarluni tapiissutit utertillugit akiliutigineqassasut, tamatumani
1) sulinermik inuussutissarsiuteqartoq tapiissutit aningaasaliissutigineqarnissaannut sunniuteqartumik paasissutissanik eqqunngitsunik mianersuaalliorluni tunniussaqarsimappat,
2) sulinermik inuussutissarsiuteqartoq tapiissutit aningaasaliissutigineqarnissaannut sunniuteqartumik paasissutissanik piaaraluni isertuussisimappat, imaluunniit
3) sulinermik inuussutissarsiuteqartoq nutaamik atorfinitsitaaffigisaminit atorfininnermi kingorna qaammatit arfinillit ingerlaneranni pisussaaffigisaminik sumiginnaasimanini pissutigalugu soraarsitaasimappat.

Naammagittaalliuteqartarneq

§ 10. Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisoqarfiup matumani nalunaarut naapertorlugu aalajangiineri pillugit aqutsinikkut oqartussanut allanut naammagittaalliuutigineqarsinnaanngillat.

§ 11. Nalunaarut atuutilerpoq ulloq 15. september 2008, atuutissallunilu nuttarnerulersitsiniarluni tapiissutit pillugit ullup taassuma kingorna qinnuteqaatinut.
Imm. 2. Matuma peqatigisaanik nuttarnerulersitsiniarluni aningaasaliissutit pillugit Namminersornerullutik Oqartussat Nalunaarutaat nr. 6, 15. marts 2008-meersoq atorunnaarpoq.

Siverth K. Heilmann

/

Bent Sørensen