§ 1

Aningaasarsianit akileraarutit pillugit Inatsisartut inatsisaanni nr. 12, 2. november 2006-imeersumi, Inatsisartut inatsisaanni nr. 2, 26. april 2007-imeersukkut allanngortinneqartumi, makkua allanngortinneqarput.

1. § 4 imatut oqaasertaqartinneqarpoq:
"§ 4. Aappariit isertitaminnit tamarmik immikkut akileraaruserneqassapput.
Imm. 2. Aappariinnut inooqatigiittunut tamarmik Kalaallit Nunaannut akileraartussaatitaasunut, aningaasarsianit akileraarutit pillugit inatsimmi malittarisassat malillugit isertitaannik akileraaruteqaataasussanik naatsorsuineqassaaq.
Imm. 3. Aappariit inooqatigiittut averuserneranni avinneranniluunniit inooqatigiinneq akileraartarnermut tunngatillugu averusernerup avinnerulluunniit pineraniit atorunnaartutut isigineqarpoq.
Imm. 4. Inooqatigiinnerup averusernertaqanngitsumik avinnerunngitsumilluunniit atorunnaarnerani, inooqatigiinneq akileraartarnermut tunngatillugu ukiup aningaasarsiorfiusup inooqatigiikkunnarfiusup naanerani atorunnaartutut isigineqarpoq.
Imm. 5. Aappariit averusernerup inooqatigiikkunnaarnerulluunniit kingunerisaanik inooqatigiikkunnaarsimanerup kingornatigut inooqatigeeqqilerpata, akileraartarnermut tunngatillugu piffissami inooqatigeeqqilerfiusumi inooqatigiinneq ingerlanneqaqqilersutut isigineqassaaq.
Imm. 6. Aappariit arlaata akileraartussaanermut pisussaaffia atorunnaarpat, akileraartarnermut tunngatillugu inooqatigiinneq akileraarnissamut pisussaaffeqarnerup atorunnaarneraniittaamaatinneqartutut isigineqassaaq."

2. § 4-p kingornatigut ilanngunneqassaaq:
"§ 4 a. Isertitatinuussutissarsiummik suliffeqarfimmut attuumassuteqartut, aappaasumi inuussutissarsiummik suliffeqarfimmik ingerlatsisuusumi akileraaruserneqassapput. Aappariit marluullutik ingerlatsinermi peqataappata, isertitat aappaasumi annertunerpaamik inuussutissarsiummik suliffeqarfimmik ingerlatsisuusumi ilanngunneqassapput.
Imm. 2. Aappariit marluullutik aapparisamit aappariinnilluunniit inussutissarsiummik suliffiutigineqartumi ingerlatsinermik peqataasut akornanni akissarsianik isumaqatigiissut, akileraartarnermi sunniuteqartinneqarsinnaavoq aatsaat, Inatsisartut inatsisaat manna aammalu sulisoqarnermut akitsuut pillugu Inatsisartut inatsisaanni pisussaaffiit eqqortinneqarpata. Akissarsianik isumaqatigiissut akileraartarnermut tunngatillugu sunniuteqartinneqalersinnaavoq taamaallaat isumaqatigiissutaasup isumaqatigiissutigineqarneraniit. Aapparisap annertunerpaamik inuussutissarsiummik suliffeqarfimmik ingerlatsisuunngitsup akissarsiai, aapparisap inuussutissarsiummik suliffeqarfimmi sulineranut naleqqutinngitsumik inissisimassanngillat. Aapparisaq imm. 1 malillugu inuussutissarsiummik suliffeqarfimmut tunngasunik isertitanik ilanngussisussaq, aningaasarsianit akileraarutit pillugit inatsimmi malittarisassat malillugit sulisitsisutut pisussaaffinnik pisussaaffeqartutut isigineqassaaq. Tamatumani pineqartumut aappaasoq akissarsiortutut isigineqassaaq.
Imm. 3. Aappariit tamarmik aappaasumit aappariinnilluunniit inuussutissarsiummik suliffeqarfimmik ingerlanneqartumi ingerlatsinermi peqataappata, aappariillu suliffeqarfiup pisussaaffiinut assigiimmik akisusaasuuppata, aappariit ataatsimoortumik qinnuteqarneq malillugu inuussutissarsiummik suliffeqarfiup angusarisai akunnerminni avissinnaavaat, avitsineq inuussutissarsiummik suliffeqarfiup ingerlanneqarnerani tunngavissaqartinneqarnera naapertorlugu. Peqataaneq akisussaaffillu allannguuteqaratik ukioq aningaasarsiorfik naallugu atuutsissapput. Akileraarusigaasussanik isertitat naatsorsorneqarneranni inuussutissarsiummik suliffeqarfiup pigisai akiitsuilu aappariit akornanni avinneqassapput, inuussutissarsiummik suliffeqarfiup angusarisaasa aappariinni avinneqarnerisa annertussusiligaaneranut naapertuuttumik.
Imm. 4. Aappariit imm. 3-mi malittarisassamik atuiniarnerminnik aalajangernertik allanngortissinnaavaat tamanna aappariinnit tamanit ukiup aningaasarsiorfiusup naannginnerani akileraaruseriffimmut nalunaarutigineqarpat."

§ 4 b. Pisuussutitigut isertitat aapparisap, aappariinneq pillugu inatsiseqartitsinermi pisuussutinik pineqartunik atuisinnaasup imaluunniit, aningaasartuutinut ilanngaatigineqarsinnaasunut tunngatillugu, akiligassamik akiliisussaasup, isertitaanik naatsorsuinermi ilanngunneqassapput. Aappariinni sorlermut akileraarutaasussanik isertitat tunngasuunersut aalajangerneqarsinnaanngippat, aappariit isertitat avissavaat.

§ 4 c. Pigisat nalillit akileraarutitigut nalikilliliissutigineqartut, aappaasumit katissimasamit inuussutissarsiummik suliffeqarfimmi ingerlatsinermi atorneqartut, aappaasumit pineqartumit nalikilliliinerit ingerlanneqassapput, pigisat pineqartumit imaluunniit pineqartup aapparisaanit inooqatigisaanit pigineqarnerat apeqqutaatinnagu.
Imm. 2. Aapparisap pigisat taassuma inuussutissarsiummik suliffeqarfiutaani atugassatut tunniuppagit nuuppagilluunniit, iluanaarutit annaasaqaatilluunniit tamatumuuna pinngortut, aapparisap siulliullugu taaneqartup akileraarutaasussanik isertitaasa naatsorsorneranni ilanngunneqassanngillat. Tunniussinerup nuussinerulluunniit kingornatigut pigisat akileraartarnermi nalikilliliinernut tunngatillugu, aapparisamit kingulliullugu taaneqartumit pissarsiarineqarneranni piffissaq akigisimasaalu tungavigalugit pissarsiarineqarsimasutut, siusinnerusukkullu nalikilliliinerusimasinnaasut, pineqartumit atuutsinneqarsimasutut ilanngullugit isigineqassapput.
Imm. 3. Malittarisassat matuma siuninnguatigut allaaserineqartut nioqqutissanik, aapparisap tunniussisuusup inuussutissarsiummik suliffeqarfimmik ingerlataanut atasuusunik, tunniussinermi atuutinngillat.
Imm. 4. Imm. 2-mi malittarisassat aappaasumit pigisanik aapparisamut tunniussinermi imaluunniit pigisanik nuussinermi atuutinngillat, taassuma pigisanik nalilinnik atuutsitsinermi tamakkiisumik inuussutissarsiutitut ingerlanneraniit atorneqarneri inuttut namminerisamik atugassatut allanngortippagu imaluunniit inuttut namminerisamik atukkatut tamakkiisumik inuussutissarsiutitut allanngortillugu atulissagaluarpagit.

§ 4 d. Aappariit tamarmik immikkut akileraarutaasussanik isertitaat tunngavigalugit isertitaannit akileraarutissaat naatsorsorneqassapput.
Imm. 2. Aappariit arlaata akileraarutaasusssanik isertitai amigartooruteqarfiuppata aappariillu ukiup aningaasarsiorfiusup naanerani inooqatigiippata, amigartoorutit sapinngisamik annertunerpaamik aapparisap aappaata akileraarutaasussanik isertitaanit ilanngaatigineqassapput. Ilanngaasiineq pissaaq, aapparisap aappaata § 30, imm. 1 naapertorlugu ukiumi aningaasarsiorfimmi siusinnerusumi aningaasarsiat amigartoorutaasut atunngitsuukkat ilanngaatigereernerata kingorna. Tamatumunnga atatillugu aappariit akileraarutaasussanik isertitaanik naatsorsuinermi isertitat nunani allani nunamilu maaniunngitsoq akileraarusigaasut ilanngunneqassanngillat. Oqaaseqatigiinnili siulliit tulliini aalajangersagaq, isertitanit akileraarutit § 69 naapertorlugu isertitanit akileraarutinit appartinneqarsimappata, atuutsinneqassanngilaq."

§ 4 e. Katissimallugu aapparisaminik ukiup aningaasarsiorfiusup naanerani inooqateqartup inummut ilanngaat tamakkiisumik atorsinnaanngippagu, ilanngaatip atorneqanngitsortaa aapparisaasup akileraarutaasussanik isertitaanik appartitsinermut atorneqassaaq.
Imm. 2. Katissimalluni aappaqartoqaapparisaminilluinooqateqartoq ukiup isertitaqarfiusup naanerani § 20 naapertorlugu akileraarutaasussaanngitsunik B-nik isertitaqarnissamut periarfissamik iluaquteqarsinnaasimanngippat, iluaqutigineqanngitsortai aappaasup B-nik isertitaanit ilanngaatissatut nuunneqassapput. Taamaattorli akileraaruteqaataasussaangitsut nuutat aapparisap B-nik isertitaanut amigartooruteqaataasinnaanngillat."

3.  § 10 imm. 1 imatut oqaasertaqartinneqarpoq:
"Aappariinnermi toqukkut qimagaasup ataatsimut pigisat kingornussassanik agguaassinertaqanngitsumik pigiinnarpagit, qimagaasoq toqukkut qimaguttup akileraartarnermut tunngatillugu inissisimanerani taarsissavaa."

4. § 11 imm. 1 imatut oqaasertaqartinneqarpoq:
"Pigisanik qimatat toqukkut qimaguttoqarneranut atatillugu agguaanneqarpata imaluunniit aappariinnermi qimagaasumit kingornussarsianik agguaassinertaqanngitsumik pigiinnarneqarpata, toqukkut qimaguttup ukiumi aningaasarsiorfiusumi toqukkut qimaguffigisaani akileraarutigisassai, isertitanit akileraarutaasutut, toqukkut qimagunneq sioqqullugu akilerneqartussanngortut, imaluunniit isertitanit tamanna sioqqullugu pissarsiarisimasanit ilanngaatigineqartussat, akilerneqarneratigut inaarutaasumik aalajangiivineqarput."

5. § 11, imm. 2-mi "4.000 kr."allanngortinneqarput "10.000 kr."-inut aammalu"500 kr.": "2.000 kr."-inut.

6. § 20, imm.1, oqaaseqatigiit aappaat ima allassimassaaq:
"Ukiumi aningaasarsiorfiusumi aappariit aappaata toqukkut qimagunneratigut aappariikkunnaarfiusumi, aapparisaq qimagaasoq akileraarutaasussaanngitsunik imm. 2-mi aningaasat aalajangerneqartut marloriaataannik ilanngaaserneqarnissamut akuerineqassaaq."

7. § 21, imm.1, oqaaseqatigiit aappaat ima allassimassaaq:
"Ukiumi aningaasarsiorfiusumi aappariit aappaata toqukkut qimagunneratigut aappariikkunnaarfiusumi, aapparisaq qimagaasoq aalajangersimasumik ilanngaammik imm. 2-mi aningaasat aalajangerneqartut marloriaataannik ilanngaateqartinneqassaaq."

8.  § 34, imm. 1, nr. 3-mi „aappariit ataatsimut akileraarusigaasut" allanngortinneqassaaq „aappariit inooqatigiittut"-nut

9. § 36, imm.1 atorunnaarsinneqassaaq aammalu imm. 3 imm. 2-nngortinneqartumi "imm. 2" allanngortinneqassaaq ima "imm. 1".

Tamatuma kingorna imm.2-miit 5-imut imm.1-imiit 4-nngorput.

10.  § 36-p kingornagut ilanngunneqassaaq:
"§ 36 a. Aningaasarsianit akileraaruteqaataasussanit naatsorsuinermi, akileraartus-saatitaasut
1) inunnit inatsisitigulluunniit akisussaassuseqartumit aalajangiisuusumik sunniuteqarfigineqartuusut, matumani ilanngullugit selskabit aamma peqatigiiffiit il.il. Kalaallit Nunaanni akileraartarnermut inatsit naapertorlugu akileraartussaatitaasutut taasaanngippata kisiannili pissutsit selskabit ingerlatsineranni maleruagassanut aalajangersarneqarpata, selskabit isumaqatigiissutaasigut imaluunniit peqatigiiffiit maleruaqqusaannut sunniuteqartinneqarpata, imaluunniit
2) imaluunniit inatsisitigut akisussaassuseqartuusunut aalajangiisuusumik sunniuteqartuusut imaluunniit
3) inummik inatsisitigut akisussaassuseqartumik suliffeqarfissuarmut attaveqartut,
4) nunani allani aalajangersimasumik ingerlatsiviutilik, imaluunniit
5) inuk inatsisitigulluunniit akisussaasuusoq nunami allamioq Kalaallit Nunaanni aalajangersimasumik ingerlatsiveqartoq il.il, takuuk § 2, imm. 1, nr. 10-miit 12-imut,
matuma inummik inatsisitigulluunniit akisussaassuseqartumik aalajangersimasumillu ingerlatsivinnik niuernikkut aningaasatigullu iliuuseqarfigisaqarnermi (nakkutigisaasumik iliuutsit) il.il. akit tunngavissarisallu, niueqatigiinnerit attaviitsuusut illuatungeriit akornanni naammassineqarsimagaluarpata angusarisimasinnaasassat, atussavai.
Imm. 2. Aalajangiisuusumik sunniuteqarneq matumani paasineqassaaq piginnittuuneq taasisinnaanermulluunniit pisinnaatitaanermik atuisinnaaneq, tamatumuuna toqqaannartumik toqqaannartuunngitsumilluunniit aktiatigut aningaasaatigisat 50 procentii sinnerlugit pigineqarlutik imaluunniit taasisinnaanerit 50 procentii sinnerlugit taasisinnaassuseqarneq. Akileraartussaatitaasup inummut inatsisitigut akisussaassuseqartuusumut nakkutilliisutut isigineqassaneranik, imaluunniit akileraartussaatitaasoq inummit inatsisitigut akisussaassuseqartuusumit imaluunniit inummit aalajangiisuusumik nakkutigineqarnersoq naliliiffiginninnermi makku ilanngunneqassapput:
1) aktiat taasisinnaanermullluunniit pisinnaatitaanerit, suliffeqarfissuarmut atasuusunik selskabinit, imm. 3 naapertorlugu taasat, aamma
2) inunnit aktiaateqartuusunit qanigisaannillu,
3) aningaasaateqarfimmit imaluunniit selskabinit kattusseqatigiiffimmit piginnittuusumit namminermit pilersinneqartumit imaluunniit selskabinit suliffeqarfissuarmut atasuusunit taaneqartunit, qanigisanit il.il. imaluunniit aningaasaateqarfinnit taakkuninnga pilersinneqartunit pigineqartut ilanngullugit naatsorsuutigineqassapput,
4) taamatuttaaq piginneqataassutsit taasisinnaanermullu pisinnaatitaanerit, selskabimi peqataasunit allanit, selskabimi peqataasup atuinissamik nakkutilliinissamillu isumaqatigiissuteqarfigisimasaanit, pigineqartut naatsorsuutigineqassapput, aamma
5) inummut § 1-imi pineqartumut ilaasumut qanigisat imaluunniit aningaasaateqarfik kattusseqatigiiffiit tamakkuninnga pilersinneqartut peqatigalugit piginneqataassutsit taasisinnaanermullu pisinnaatitaanerit naatsorsuutigineqassallutik.
Imm. 3. Qanigisatut isigineqarput akileraartussaatitaasup katissimallugu aapparisaa, angajoqqaavi aanakkui aatakkui taamatullu meeqqat ernguttallu tamakkualu katissimallugit aapparisaat imaluunniit inuit taagorneqartut toqukkut qimagunneranni pigisanik qimatat. Meerarsiat meeravissiartaallu toqqartumik qanigisarisanut ilaatinneqarput.
Imm. 4. Selskabit suliffeqarfissuarmut atasuusut tassapput:
1) selskabit peqatigiiffiillu il.il. aktiaateqartuusut taakkuusut, pisassarisap pissarsiarineqarnerani kingusinnerusukkulluunniit toqqaannartumik toqqaannanngitsumilluunniit selskabini ataasiakkaani taasisinnaanernik 50 procentii sinnerlugit piginnittuuffigisaat.
2) selskabit peqatigiiffillu il.il., aktiaateqartuusut taakkuusut pisassarisap pissarsiarineqarnerani kingusinnerusukkulluunniit toqqaannartumik toqqaannanngitsumilluunniit selskabini ataasiakkaani taasisinnaanernik 50 procentii sinnerlugit atuisinnaaffigisaat.
3) aningaasaateqarfik selskabillu, aningaasaateqarfiup pisassarisap pissarsiarineqarnerani kingusinnerusukkulluunniit toqqaannartumik toqqaannanngitsumilluunniit selskabini ataasiakkaani tamani aktiatigut aningaasaatit 50 procentii sinnerlugit pigisaqarfigisai, imaluunniit
4) aningaasaateqarfik selskabillu, aningaasaateqarfiup pisassarisap pissarsiarineqarnerani kingusinnerusukkulluunniit toqqaannartumik toqqaannanngitsumilluunniit selskabini ataasiakkaani tamani taasisinnaanerit 50 procentii sinnerlugit atuisinnaaffigisai.
Imm. 5. Aktiaateqartuusut imm. 2, oqaaseqatigiit sisamaanni taaneqartut aktiaateqartuusut naliliiffigineqarneranni aktiaatilittut ataasiusutut isigineqarput. Taasisinnaassutsinik piginneqataassutsit naatsorsorneqarneranni taasisinnaanerit, taasisinnaanermik aktianik qularnaveeqqusiilluni nuussinermut atatillugu pissarsiarineqartut kisimik, naatsorsuutigineqassanngillat.
Imm. 6. Inatsisitigut akisussaassuseqartuusoq inulluunniit nunami allamiutut isigineqassaaq, inuk naalagaaffimmi allami, Danmarkimi Savalimmiuniluunniit, nunaqartuuguni, tamatumani aamma marloriaammik akileraannginnissaq pillugu isumaqatigiissummi aalajangersakkat malillugit
Imm. 7. Akileraarusigaasussanik isertitat annertussusiliiffigineqarnerisa imm. 1 malillugu allanngortinneqarnerini, akileraartussaatitaasup annertunerusumik malitseqartitsinikkut allannguinerit (malitsigisatut iluarsiinerit) pinngitsoortissinnaavai, imm. 1-imi akit piumasaqaatillu naapertorlugit akiliinissamut pisussaalernermigut. Imm. 1 taamaallaat atorneqassaaq nakkutigisaasumik iliuutsimi § 36 b-mi pineqartumik pisoqartillugu, akileraartarnermut oqartussaasoq nunami allamioq pineqartoq akileraarusiissappat, akileraarutaasussanik isertitat imm. 1 naapertorlugu annertussusilerneqarneranni akit piumasaqaatillu tunngavigineqartut naapertorlugit.

§ 36 b. Akileraartussaatitaasut § 36 a-mi pineqartut nammineerluni nalunaarummi, § 36 a-mi taaneqartunik inunnik inatsisitigullu akisussaasuusunik aalajangersimasumillu ingerlatsiviusunik illuatungeqarluni niuernikkut imaluunniit aningaasatigut ingerlatitsinerit (nakkutigisaasunik iliuutsit) suuneri annertussusiilu pillugit, paasissutissanik tunniussissapput.
Imm. 2. Akileraartussaatitaasut nakkutigisaasunik iliuutsinut akit piumasaqaatillu qanoq aalajangerneqarsimanerannut allakkatigut uppernarsaatinik sanassapput toqqortaralugillu. Allakkatigut uppernarsaatit ukioq naatsorsuuseriffiusup suliami pineqartumi attuumassuteqartup naaneraniit ukiuni tallimani isumannaatsumik toqqortarineqassapput. Allakkatigut uppernarsaatit akileraartarnermi oqartussaasut qinnuteqarneratigut tassunga takutinneqassapput, imaattuusariaqarlutillu akit piumasaqaatillu, iliuutsit illuatungeriit attaviitsuusut akornanni naammassineqarsimagaluarunik atuuttuusimasussanut naapertuunnersut naliliinissamut tunngavissaasinnaassallutik.
Imm. 3. Akileraartussaatitaasoq imm. 2 malillugu uppernarsaammik sanasimanngippat, akileraaruserinermik ingerlatsineq pillugu inatsimmi § 19, atuutsinneqassaaq.

§ 36 c. Ernianut aningaasartuutit nalitigullu annaasaqaatit, nakkutigisaasumik akiitsut sinneruttortaanut tunngasut taakkua nakkutigisaasunik iliuuseqarnikkut akiitsut pillugit sinneqartoorutineersuutillugit taakkualu selskabinit peqatigiiffiilluunniit il.il. pigippatigit, taava piginnittuusut ilanngaasiisinnaanngillat
1) selskabi imaluunniit peqatigiiffik § 1, imm.1-imi, nr. 3-mit 14-imut pineqartunut ilaappat
2) selskabi imaluunniit peqatigiiffik inatsisitigut akisussaassuseqartuusumut nunami allamiumut § 36 a, imm. 1-imi (nakkutigisaasumik akiitsut) taaneqartumut akiitsoqarpat aamma
3) selskabip peqatigiiffiulluunniit allanit aningaasaliiffigineqarnerata (akiitsui) ukiup aningaasarsiorfiusup naanerani selskabip namminerisanik aningaasaataanut sanilliullugit 2:1-mut annertunerusumik annertussuseqarpata.
Imm. 2. Imm. 1 naapertorlugu nalitigut annaasaqaatit taarsigassarsiani pineqartuni nalitigut annaasaqaatit ukiumi aningaasarsiorfiusumi tulliusumi iluanaarutinit ilanngaatigineqarsinnaapput.
Imm. 3. Allanit atukkat, aalajangiisuusuullutik piginnittut imaluunniit tamatumuuna suliffeqarfissuarmut atasunit selskabinit toqqaannartumik toqqaannartuunngitsumilluunniit qularnaveeqqusigaasimasut, nakkutigisaasumik akiitsutut isigineqarput.
Imm. 4. Ilanngaasiisinnaanermut killiliineq, selskabip peqatigiiffiulluunniit, selskabimut piginnittuusumut, tamatumuunalu aamma suliffeqarfissuarmut atasuusunik selskabinut, aningaasaliinerup assingusup atuuttuuneranik uppernarsaasiinera naapertorlugu atuutissanngilaq.
Imm. 5. Ilanngaasiisinnaanermut killiliineq nakkutigisaasumik akiitsut 5 mio. koruunit sinneqqappatsigit aatsaat pisinnaavoq. Ilanngaasiisinnaanermut killiliineq aamma nakkutigisaasumik akiitsut namminerisamik aningaasaatinut, ukiup aningaasarsiorfiusup naanerani allanit aningaasaliissutit (akiitsut) namminerisamillu aningaasaatinut sanilliullugit 2:1-imut nikingassuseqartinniarlugit, nuunneqartortaannut taamaallaat atorneqassaaq. Suliffeqarfissuup iluani nakkutigisaasunik akiitsoqarlunilu nakkutigisaasunik allanut akiitsoqarpat, ilanngaateqarnermik killiliineq suliffeqarfissuup iluani nakkutigisaasunik akiitsunut siullermik atorneqassaaq tulliullugulu nakkutigisaasunik allanut akiitsunut.
Imm. 6. Akiitsutut isigineqarput pisassarisanut § 17, imm. 1-imi aamma § 18, imm. 1-imi pineqartunut tunngatillugu aammalu obligationinut nuunneqarsinnaasunut akiitsut. Akiitsut ukiup aningaasarsiorfiusup naanerani nalitigut naligititaasutut naatsorsorneqassapput.
Imm. 7. Namminerisanik aningaasaatit ukiup aningaasarsiorfiusup naanerani pigisat niuernermi naliusumut naatsorsukkatut, imm. 6 malillugu akiitsunik ilanngaaserlugit naatsorsorneqassapput. Namminerisanik aningaasaatigisat piginnittuusunit aningaasaliissutaasut, sivikinnerpaamik ukiuni marlunni selskabimiittussaasut kisimik ilanngunneqassapput.
Imm. 8. Kalaallit suliffeqarfissuarmut atasunik selskabiutaat arlaqartut aqunneqarpata, takuuk § 36 a, imm. 4, selskabini taakkunani pigisanut akiligassanullu imm. 1-7 ataatsimoortillugit atorneqassapput, kalaallillu selskabiisa selskabini allani, naatsorsuinermi tamarmiusumi ilaatinneqartuni, aktiaataat ilanngunneqassanngillat, aammalu taakkua akornanni akiitsut pisassarisallu.
Imm. 9. Imm.1-miit 8-mut taamatuttaaq atuupput akileraartussaatitaasunut § 2, imm. 1, nr. 10-mi ilaatinneqartunut. Akiitsut namminerisanillu aningaasaatit 1mm. 2 aamma 3 malillugit naatsorsorneqarneranni, pigisat akiitsullu nalingi aalajangersimasumik ingerlatsivimmut attuumassuteqartut taamaallaat ilaassapput. Allanit atukkat nakkutigisaasumik akiitsutut isigineqarput, qitiusumik allaffik akiitsunut akiliisussaasuuppat.

§ 36 d. § 1 imaluunniit § 2, imm. 1, nr. 10-miit 12-imut malillugit akileraartussaatitaasoq§ 36a, imm. 2 naapertorlugu annikitsumik akileraarusigaasumik inatsisitigut akisussaassuseqartumik (ingerlatseqatigiiffik pigineqartoq), takuuk § 36 a, imm. 6, aningaasaliinertigut pigisat agguaqatigiissitsinermi selskabip pigisaanit tamarmiusunit 10 procenti sinnerlugu amerlassuseqarfigisaanni, akileraartussaatitaasup aningaasarsiai akileraaruteqaataasussat naatsorsorneqarneranni ingerlatseqatigiiffiup pigineqartup CFC-mik isertitai ilanngutissavai.
Imm. 2. Nunami allami selskabi pigineqartoq annikitsumik akileraarusigaasutut isigineqassaaq, nunami allami akileraarusiineq Kalaallit Nunaanni malittarisassaat malillugit annertuumik appasinneruppat akileraarusiinerluunniit Kalaallit Nunaanni malittarisassaanut sanilliussinermi annertuumik illuartinneqarpata.
Imm. 3. Ingerlatseqatigiiffiup pigineqartup pigisaanik imm. 1 malillugu naatsorsorneqarnerat naatsorsuutini naligititaasut tunngavigalugit ingerlanneqassaaq, tigussaasuunngitsunut niuernermi akigitinneqartut malillugit nalingi tunngavigalugit ilanngunneqassallutik.
Imm. 4. CFC-mik isertitat selskabip pigisap isertitaanut, akileraartussaatitaasup selskabip pigineqartup ukiumi aningaasarsiorfiusup pineqartup ingerlanerani aktiatigut aningaasaataanit tamarmiusunit akileraartussaatitaasumit piginneqataassutaanit annertunerpaajusut amerlaqataat, ilaasutut naatsorsorneqassapput. Selskabilli pigineqartup ukiup aningaasarsiorfiusup ilaani, imm. 1-imi piumasaqaatit naammassine-qarfigisaasa nalaani isertitanik katersorsimasai, kisimik ilanngunneqassapput.
Imm. 5. CFC-mik isertitat, Inatsisartut inatsisaat manna tunngavigalugu naatsorsorneqassapput makkua katinnerattut:
1) Akileraarutaasussanik ernianik isertitat ilanngaatigineqarsinnaasunillu ernianut aningaasartuutit.
2) Pisassarisanit, akiligassanit imaluunniit aningaasaliinermut tunngasunik isumaqatigiissutitigut akileraarutaasussanik iluanaarutit ilanngaatigineqarsinnaasunillu annaasaqaatit.
3) Sullissinermut ernialiuttakkat (provision) assigisaallu, ilanngaatigineqarsinnaasat.
4) Aktianik tunisinerni akileraarutaasussanik iluanaarutit ilanngaatigineqarsinnaasunillu annaasaqaatit.
5) Aktianik tunisinerni akileraarutaasussanik iluanaarutit ilanngaatigineqarsinnaasunillu annaasaqaatit.
6) Akiliutit qanorluunniit ittut, tigussaasuunngitsunik pigisanik atuinermut atuisinnaanermulluunniit akiliutitut pissarsiarineqartut. Oqaaseqatigiilli siulliit atuutinngillat, selskabinit, selskabimik pigineqartumut suliffeqarfissuarmut atasuunngitsumit, § 36 a, imm. 1 naapertorlugu, selskabip pigineqartup nammineq ilisimatuutut misissuinermik ineriartortitsinermillu ingerlataqarneranik patsiseqartumik tigussaasuunngitsunik pigisanik atuinermut atuisinnaanermulluunniit akiliutinut tunngatillugu. Tigussaasuunngitsunik pigisanut ilaapput suulluunniit atuakkamut, eqqumiitsuliornikkut ilisimatuussutsikkulluunniit sulianut, tamatumani aamma filminut aammalu radiomut fjernsynikkulluunniit aallakaatitassiatut filminut, piginnittussaanerit, patentit tamarmik, nioqqutissanut meqqi, allaq iluserluunniit, titartagaq, formeli isertuussaq imaluunniit sanariaaseq isertuussaq suliffissuaqarnermulluunniit tunngasumik paasissutissaq, aningaasarsiornikkut ilisimatuussutsikkulluunniit misilittakkat.
7) Akileraartarnermi ilaanngaatit, nr. 1-imiit 6-imut taagorneqartunik isertitanut tunngasut Akileraarusigaasussanik attartornermut aningaasaliinikkut isertitat.
8) Pigisanik, aningaasaliinikkut attortornermut atugaasimasunik tunisaqarnermi iluanaarutit annaasaqaatillu, aamma ilanngunneqassapput.
9) Akileraarutaasussanik sillimmasiinermik ingerlatsinermut atatillugu, aningaaserivittut realkreditinstitutionitut imaluunniit allatigut aningaasaliinernik ingerlatsinikkut isertitat.
Imm. 6. CFC-mik isertitat naatsorsorneranni CFC-mik isertitat amigartoorutitaat § 30-mi malittarisassat naapertorlugit selskabip pigineqartup isertitaanit ilanngaatigineqarsinnaapput.
Imm. 7. Nunani allani akileraarutinik akilikkanik appaateqartitsineq § 69 malillugu pissaaq."

11. § 41, imm.1, oqaaseqatigiit siulliit tullii allanngortinneqarput "aappariit ataatsimut akileraarusigaasut imaluunniit nalunaarsugaasumik inooqatigiit" imaalillugu: "inooqatigiillutik aappariit imaluunniit nalunaarsugaasumik inooqatigiillutik najugaqatigiit".

12. § 67, imm. 2. oqaaseqatigiit siulliit atorunnaarsinneqarput

13. § 68, imm. 4, atorunnaarsinneqarpoq.

14. § 96 atorunnaarsinneqarpoq.

§ 2

Imm. 1. Inatsisartut inatsisaat 1. januar 2008 atuutilerpoq ukiorlu aningaasarsiorfiusoq 2008 aallarnerfigalugu sunniuteqalerluni, taamaattorli takuuk imm. 2.
Imm. 2. § 1, nr. 9 aamma 10, 1. maj 2007-imiit atuutilerput. Aningaasarsianit akileraarutit pillugit Inatsisartut inatsisaanni § 36, imm. 1-imi aalajangersagaq, inatsimmilu matumani § 1, nr. 9-kkut atorunnaarsinneqartoq 1. maj 2007 sioqqullugu nuussinernut atuutiinnassaaq.

Hans Enoksen

/

Aleqa Hammond