Suliassaqartitsiniarnermik inunnillu isumaginninnermik Kalaallit Nunaannut Inatsimmi nr. 580-imi, 29. november 1978-imeersumi § 2 naapertorlugu makku aalajangersarneqarput:

Kapitel 1
Siunertaq inuttullu ataasiakkaatut akisussaaffik

§ 1. Peqqussummi matumani siunertarineqarpoq inunnut Kalaallit Nunaanniittunut allatut iliornikkut imminnut pilersorsinnaanngitsunut tamanut aningaasaqarnikkut isumannaallisaaviginninnissaq. Inuit imminnut ilaquttaminnillu pilersuisinnaanngitsut pilersuinermut akiligassanullu aalajangersimasunut aningaasatigut ikiorserneqarnissaat peqqussutikkut aamma isumagineqassaaq.

§ 2. Inatsisartut peqqussutaat una naapertorlugu kialuunniit pisussaaffigaa imminut, katissimallugu aapparisaminik qitornaminillu 18-it inorlugit ukiulinnik pilersuinissani.
Imm. 2. Katissimallugu aapparmik pilersuisussaatitaaneq atuukkunnaartarpoq averusernikkut imaluunniit avinnikkut.
Imm. 3. Qitornamik pilersuisussaatitaaneq makku pissutigalugit atuukkunnaartarpoq
1) qitornaq nammineq katissimallugu aapparminik imaluunniit qitornaminik pilersuisussaatitaaleraangat, imaluunniit
2) paniusoq naartunerminut atatillugu pisortanit ikiorsiissutisiaqaleraangaat.

Kapitel 2
Piumasaqaatit nalinginnaasut

§ 3. Kinaluunniit Kalaallit Nunaanniittoq tassanngaannartumik pisariaqavissumik pissaaleqilernermi pisortanit ikiorserneqartussaatitaavoq, tamatumani imminut ilaquttaminillu pilersuisinnaanngikkuni.

§ 4. Pilersuinermut akiligassanullu aalajangersimasunut kiisalu immikkut ittumik pisoqartillugu pisortanit ikiorsiissutinik pisinnaanermut piumasaqaataapput qinnuteqartup Kalaallit Nunaanni najugaqartuunissaa inuillu allattorsimaffiannut nalunaarsimanissaa makkuninngalu naammassinnissimanissaa:
1) danskit nalagaaffianni innuttaanissamik,
2) danskit naalagaaffianni innuttaasumut katissimanissaa imaluunniit kingullermik katikkami danskit naalagaaffianni innuttaasumut katissimanissaa imaluunniit
3) nunanut allanut imaluunniit nunat tamalaat akornanni kattuffinnut isumaqatigiissutini, danskit nalagaaffianni innuttaanngitsut Kalaallit Nunaanniinnerminni ataavartumik pilersuinermut akiligassanullu aalajangersimasunut ikiorsiissutisisinnaatitaanerannik imalinni, ilaanissaa.
Imm. 2. Inatsisartut peqqussutaat una naapertorlugu pisortanit ikiorsiissutinik tunniussisoqarsinnaavoq, pisariaqartitsineq ikiorsiissutit allat atorlugit pisinnaanngikkaangat.

§ 5. Katinnikkut aappariinneq pillugu inatsit naapertorlugu imaluunniit meeqqat inatsisitigut illersugaanerat pillugu inatsit naapertorlugu pineqartoq allamut ikiorsiissutinik pisartagaqartumut akilersuuteqartussaatitaappat, pisortat akilersuuteqartussaatitaasumut piumasaqaataasunut atatillugu piumasaqaateqartussaatitaalissapput ikiorsiissutigineqartartut nalingat tikillugit annertussuseqarsinnaasunik, tamatumani pilersuisussaatitaaneq § 2-mi maleruagassat naapertorlugit atorunnaareersimagaluarpalluunniit.
Imm. 2. Pisortat akilersuutit aalajangersarneqarnissaannik qaffanneqarnissaannilluunniit piumasaqaateqarsinnaasussanngussapput.

§ 6. Pilersuinermut akiligassanullu aalajangersimasunut, takuuk § 13, kiisalu immikkut ittumik pisoqartillugu, takuuk § kapitel 6, pisortanit ikiorsiissutinik qinnuteqaat najugaqarfigalugu kommuunimi kommunalbestyrelsimut tunniunneqassaaq.
Imm. 2. Tassanngaannartumik ikiorsiissuteqartoqarnissaanik qinnuteqaat, takuuk § 3, najugaqarfigalugu kommuunimi kommunalbestyrelsimut tunniunneqassaaq.

Kapitel 3
Pisortanit ikiorsiissutinik pissarsinissamut piumasaqaatit

§ 7. Kommunalbestyrelsi tassanngaannartumik pisariaqavissumik pissaaleqilernermi pisortanit ikiorsiissuteqarsinnaavoq qinnuteqartoq
1) inooqatigiinnermi pisimasumik, soorlu nappaammik, erninermik, suliffissaarunnermik inooqatigiikkunnaarnermilluunniit nalaataqarsimappat, aamma
2) imminut ilaquttaminillu pilersuinermut akiligassanullu aalajangersimasunut pisariaqartitaminik pissarsisinnaanngippat.

§ 8. Kommunalbestyrelsi pilersuinermut akiligassanullu aalajangersimasunut kiisalu ataasiartumik aningaasartuutinut pisortanit ikiorsiissuteqarsinnaavoq, qinnuteqartup § 7-imi piumasaqaatit naammassisimappagit kiisalu
1) suliffissaqanngikkuni suliffissaminillu naammaginartumik neqeroorfigineqarsimanngikkuni pimoorullugulu suliassarsiortuunngikkuni
2) sungiussiniarnermigut ajornartorsiornini, peqqinnginnini assigisaallu pissutigalugit sulisinnaanngitsutut nalilerneqaruni imaluunniit
3) napparsimaguni imaluunniit erninermut atatillugu sulinngiffeqaruni taamalu sulisinnaanani.
Imm. 2. Naalakkersuisut pilersuinermut akiligassanullu aalajangersimasunut kiisalu ataasiaannartumik aningaasartuutissanut pisortanit ikiorsiissutisisinnaanermut piumasaqaatit pillugit maleruagassanik aalajangersaasinnaapput, tassunga ilanngullugu sulilernissamut piareersimanissamut piumasaqaatinik qaqugukkullu qinnuteqartoq sulisinnaanngitsutut nalilerneqartassanersoq.

Kapitel 4
Innersuussineq, siunnersuineq, iliuusissanik pilersaarusiaq malittarinninnerlu

Innersuussineq aamma siunnersuineq

§ 9. Kommunalbestyrelsi pilersuinermut akiligassanullu aalajangersimasunut pisortanit ikiorserneqarnissamik qinnuteqartoqaraangat innersuussisassaaq, qinnuteqartup pisortanit ikiorsiissutisisartussatut, suliffeqarnermi tapiissutisisartussatut allatulluunniit attuumassuteqartumik ikiorserneqarnissaa siunertaralugu.

§ 10. Kinaluunniit pilersuinermut akiligassanullu aalajangersimasunut pisortanit ikiorsiissutinik qinnuteqartoq kommunalbestyrelsimit siunnersorneqarnissamik piumasaqarsinnaavoq, tassanngaannartumik imaluunniit nalaakkumaakkaminik aningaasatigut ajornartorsiulissaguni sapinngisamik nammineerluni qaangiiniarnissaminut, ungasinnerusorlu isigalugu imminut ilaquttaminillu pilersuisinnaanissaminut.
Imm. 2. Siunnersuinermi inuup atugai ataatsimut isigalugit isummerfigineqassapput pilersuisinnaannginnermut tunngaviusoq kisiat isiginagu. Siunnersuineq saaffigisinnaasamut allamut attaveqalernissamut ikiuinerusinnaasinnaavoq, soorlu suliffissarsiuussisarfimmut, atornerluinermik katsorsaasarfimmut, peqqinnissaqarfimmut inissiaatileqatigiinnulluunniit. Siunnersuineq inunnut ataasiakkaanut ataatsimoortunulluunniit ingerlanneqarsinnaavoq.
Imm. 3. Kisimiillutik pilersuisut ilaqutariillu meerartallit pisortanit ikiorsiissutisiaqalernerannut atatillugu sapinngisamik piaarnerpaamik siunnersuineq neqeroorutigineqartassaaq, tamannalu meeqqanik inuusuttunillu kommunalbestyrelsip ilitsersuillunilu nakkutilliisussaatitaaneranut atasutut isigineqassaaq.

Iliuusissanik pilersaarusiaq

§ 11. Pilersuinermut akiligassanullu aalajangersimasunut pisortanit ikiorsiissutisisartut imminut tunngasumik iliuusissatut pilersaarusiuunneqarnissamut pisinnaatitaavoq kommunalbestyrelsi suleqatigalugu, takuujulli imm. 3.
Imm. 2. Iliuusissatut pilersaarusiaq siunnersuisimanermik aallaaveqassaaq aammalu makku pillugit ilitsersuutinik imaqassalluni:
1) Atornerluinermik katsorsarneqarneq.
2) Inuttut ineriartorneruneq.
3) Pisinnaanngorsarneq.
4) Ilinniartitaaneq.
5) Sulilersitaaneq.
6) Suliffimmik attassisinnaaneq.
7) Piginnaanngorsaaqqinneq
8) Ilinniarteqqinneqarneq.
Imm. 3. Inuit pilersuinermut akiligassanullu aalajangersimasunut pisortanit ikiorsiissutinik piniarlutik saaffiginninnerminni annerpaamik ullunik 14-inik sivisussusilimmik ikiortinniartut imminerminnut tunngasumik iliuusissatut pilersaarusiuunneqartassanngillat.
Imm. 4. Imminut tunngasumik iliuusissatut pilersaarut malinnaatinneqartassaaq pilersuinermut akiligassanullu aalajangersimasunut pisortanit ikiorsiissutinik pisoq inatsisiliorneq alla naapertorlugu allatut ikiorneqalerpat, imminut tunngasumik iliuusissatut pilersaarusiortoqarnissaanik imaluunniit piginnaanngorsaaqqinnermut pilersaarusiortoqarnissaanik piumasaqaateqartoqarluni. Inatsisiliorneq alla naapertorlugu taamatut pisoqassappat iminnut tunngasumik iliuusissatut pilersaarusiaareersoq imaluunniit piginnaanngorsaaqqinnermut pilersaarusiaareersoq najoqqutassatut aallaaviusinnaavoq.
Imm.5. Pisortanit ikiorsiissutinik pisartagalik imminut tunngasumik iliuusissatut pilersaarusiorfigineqareerluni kommuunimut allamut nuuppat nuuttutullu nalunaarluni, kommuunip nuuffigisaata kommuunimit nuuffigineqartumit piniassavaa iliuusissatut pilersaarusiaq.
Imm. 6. Naalakkersuisut pineqartumut imminut tunngasumik iliuusissat suliarineqartarnerat pillugu maleruagassanik aalajangersaasinnaapput.

Malittarinninneq

§ 12. Kommunalbestyrelsip iliuusissatut pilersaarut naliliiffigeqqissinnaavaa iluarsiiffigalugulu, takuuk § 11, pisariaqartitsineq naapertorlugu, taamaaliornikkut qulakkeerniarlugu pilersuinermut akiligassanullu aalaajangersimasunut pisortanit ikiorsiissutisinissamut piumasaqaatit suli naammassineqarsinnaanersut.
Imm. 2. Annikillisamik § 13, imm. malillugu ikiorsiissutisiaqartitsisoqarpat, kommunalbestyrelsi qaammatip ataatsip qaangiunnerani naliliissaaq suli nammineq pisuussutigisamik pissaaleqisoqarnersoq.

Kapitel 5
Pilersuinermut akiligassanullu aalajangersimasunut pisortanit ikiorsiissutit tunniunneqartarnerat

Naatsorsorneqarnerat

§ 13. Pilersuinermut akiligassanullu aalajangersimasunut pisortanit ikiorsiissutisiat annertussusaat missiliuussinikkut aalajangerneqartarpoq qinnuteqartup maannamut inuuniarnikkut atugarisimasai, pilersuisutut pisussaaffii, katissimallugu aapparisap, nalunaarsorneqarsimasumik aapparisap imaluunniit naligisatut inooqatigisap isertitai, akiligassat aalajangersimasut najukkamilu pissutsit tunngavigalugit.
Imm. 2. Taamaallaat pisartagaqartumut taassumalu ilaqutaanut pisariaqavissutigut pilersornissaannut ikiorsiissutinik tunniussisoqarsinnaavoq aammalu ineqarnermut akiliummut, atuinermut aningaasartuutinut aningaasartuutinullu aalajangersimasunut allanut matussutissanik naleqquttunik.
Imm. 3. Aningaasartuutiviusut tunngavigalugit kiisalu najugaqatigiissinnaanermi iluaqutissat aallaavigalugit aningaasat aalajangersarneqassapput. Pilersuinermut aningaasartuutinullu aalajangersimasunut pisortanit ikiorsiissutit annerpaamik SIK-p Naalakkersuisullu akornanni isumaqatigiissutit naapertorlugit ilinniarsimanngitsumut aningaasarsiarititat ikinnerpaaffiisa 65%-erisinnaavaat, taamaattorli imm. 4 takuuk.
Imm. 4. Pisuni immikkut ittuni SIK-p Naalakkersuisullu isumaqatigiissutaat naapertorlugu suliamik ilinniagaqarsimanngitsut aningaasarsiaasa minnerpaat 65%-iat sinnerlugu ikiorsiissutinik tunniussisoqarsinnaavoq, tamanna pisariaqavissappat qinnuteqartup ilaqutaasalu pilersorneqarnissaannut akiligassanullu aalajangersimasunut, naleqquttumillu ineqarniarnermikkut atugaqaannarnissaannut.
Imm. 4. Pissaaleqilerneq nammineq pisuussutigisamik pinngorsimappat, pilersuinermut akiligassanullu aalajangersimasunut pisortanit ikiorsiissutisiaasussat affaannaat kisimik tunniunneqarsinnaapput. Ikiorsiissutit aningaasanngornagit tunniunneqassapput.
Imm. 5. Nammineq pisuussutigisamik pissaaleqisoqarpat aallaavittut taamaallaat tunniunneqarsinnaapput pilersuinermut akiligassanullu aalajangersimasunut pisortanit ikiorsiissutissat affaannai. Pilersuinermut ikiorsiissutit aningaasanngornagit tunniunneqassapput. Kommunalbestyrelsip naliliinermini immikkut isiginiartussaavai meerartaasinnaasut pisariaqartitaat isiginiarneqarsimanersut.
Imm. 6. Naligalugu inooqatigisaq peqqussummi matumani paasineqassaaq katissimanagu inooqatigisatut, pisortanit ikiorsiissutinik qinnuteqarnermi pisartagaqartup inooqatigisaa, tamannalu sioqqullugu sivikinnerpaamik ukiumi ataatsimi inuit nalunaarsorneqartarfianni najugaqatitut nalunaarsorneqarsimasussaq.
Imm. 7. Pilersuinermut akiligassanullu aalajangersimasunut kiisalu immikkut ittumik pisortanit ikiorserneqarsinnaanermut Naalakkersuisut malittarisassanik aalajangersaasinnaapput.

§ 14. Qinnuteqartoq piffissap pilersuinermut akiligassanullu aalajangersimasunut pisortanit ikiorsiissutisisarfiusup iluani ulluni ataasiakkaani aningaasarsisarsimappat pilersuinermut akiligassanullu aalajangersimasunut pisortanit ikiorsiissutisiat annikillineqassapput. Qinnuteqartumut suna pitsaanerutinneraa naapertorlugu pilersuinermut akiligassanullu aalajangersimasunut pisortanit ikiorsiissutisiat annikillineqarsinnaapput
1) ullut aningaasarsiaqarfiusut ilanngaatigalugit, imaluunniit
2) aningaasat tunniunneqarsimasut ilanngaatigalugit.

§ 15. Pilersuinermut akiligassanullu aalajangersimasunut pisortanit ikiorsiissutisiat pikkorissarnermi, katsorsartinnermi imaluunniit fagini ataasiakkaani atuartitsinermut peqataanermi atuukkunnaarneq ajorput.

Tunniussineq

§ 16. Pilersuinermut akiligassanullu aalajangersimasunut piumasaqaatit § 8-imi allassimasut atuutilerneranniit pisortanit ikiorsiissutit tunniunneqartassapput ulloq saaffiginniffik aallarnerfigalugu.

§ 17. Pilersuinermut akiligassanullu aalajangersimasunut pisortanit ikiorsiissutisiat aningaasanngorlugit qinnuteqartumut tunniunneqarsinnaapput, aningaaserivimmut assigisaannullu ikineqarsinnaapput, taamaattoq takuuk imm. 2.
Imm. 2. Pilersuinermut akiligassanullu aalajangersimasunut pisortanit ikiorsiissutisiat aningaasanngornagit tunniunneqarsinnaapput imaluunniit akiligassamik nassitsisumut toqqaannartumik tunniunneqarsinnaapput, pissutsit immikkut ittut tamanna pisariaqalersippassuk.

§ 18. Pilersuinermut akiligassanullu aalajangersimasunut pisortanit ikiorsiissutisiat siumoortumik ullut 14-ikkaarlugit tunniunneqartassapput. Taamaattoq akiligassanut aalajangersimasunut pisortanik ikiorsiissutit tunniunneqarsinnaapput piffissami akiligassat akilerneqarfissaasa nalaani.
Imm. 2. Kommunalbestyrelsi qaqutigoorluinnartumik piffissamut sivikinnerusumut tunniussisinnaavoq, qinnuteqartup ikiorsiissutit nammineerluni aqussinnaanngikkai naliliisoqarpat. Kommuunip naliliinerminut atatillugu immikkut ilaqutariinni meeqqat pisariaqartitaasa iluaquserneqarnissaat pingaartissavaa.
Imm. 3. Pisortanit ikiorsiissutit tunniunneqartarnerat pillugu Naalakkersuisut malittarisassanik aalajangersaasinnaapput, tassunga ilanngullugu uppernarsaatinik tunniussinissamut malittarisassanik.

Pisuussutit

§ 19. Kommunalbestyrelsi pilersuinermut akiligassanullu aalajangersimasunut ikiorsiissutisiaqartitsisinnaanngilaq qinnuteqartoq imaluunniit katissimallugu aapparisaq imaluunniit naligalugu inooqatigisaq, takuuk §13, imm.6, pisuussuteqarpata aningaasatigut pisariaqartitanut matussutaasinnaasunik, taamaattoq takukkit imm. 2. aamma 3.
Imm. 2. Imm. 1.-imi aalajangersagaq atuutissanngilaq:
1) Pisuussutit ilaat, ineqarnikkut atukkat attatiinnarnissaannut imaluunniit ineqarniarnermi pisariaqavissut anguniarnerinut, imaluunniit qinnuteqartup ilaqutariillu inuussutissarsiornikkut ilinniartitaanikkullu periarfissaat eqqarsaatigalugit pigineqartariaqarpata.
2) Pisuussutilli ilaat annertunerunngitsut, taakku siunertanut aalajangersimasunut nassuiaasikkanullu pigiinnartariaqarpata pineqartup atugarisaanut najukkamilu ileqquliussaareersut malillugit naammaginartutut nalilerneqarpata.
3) Sulisinnaajunnaarneq pissutigalugu taartisiat, taakku tunniunneqartarpata inuup ajoqusersimanera una naapertorlugu
a) pinerlunnernik eqqugaasimasunut naalagaaffimmit taartisiaqarnissaq pillugu inatsisip Kalaallit Nunaanni atuutilernissaanut naalakkiut,
b) taarsiinissamut akisussaaffik pillugu inatsisip Kalaallit Nunaanni atuutilernissaanut naalakkiut,
c) sulinermi ajoqusernissamut sillimmateqarneq pillugu inatsisip Kalaallit Nunaanni atuutilernissanut naalakkiut.
4) Pisuussutit iluarsineqarsinnaanngitsumik aningaasarsiornerunngitsukkulli ajoqusernerup kingunerisaanik taartisiatut tunniunneqartut
Imm. 3. imm. 2-mi nr. 3 aamma 4-mi piumasaqaataavoq taartisiat pilersuinermut akiligassanullu aalajangersimasunut pisortanit ikiorsiissutinik pisartagaqartup pisuussutaanit allanit isertitaanillu immikkoortinneqassasut.

Kapitel 6
Immikkut ittumik pisoqartillugu ikiuutit

Ataasiaannartumik aningaasartuutit

§ 20. Kommunalbestyrelsi ataasiartumik aningaasartuutinut naammaginartumik nassuiaaserneqarsimasunut ikiorsiissuteqarsinnaavoq, qinnuteqartup § 4-mi imm.1 aamma § 8-imi piumasaqaataasut naammassisimappagit aammalu nammineerluni aningaasartuutini matuniassagunigit imminut ilaquttamilu siunissami napatinniarnerinut aalajangiisumik ajornartorsiulersussaappat. Nalinginnaasumik aatsaat ikiorsiisoqarsinnaavoq aningaasartuutissaq siumoortumik naatsorsuutigineqarsinnaanngitsumik pisariaqartinneqalersimappat. Taamaattoq ani-ngaasartuutinut siumoortumik naatsorsuutigineqareersinnaasunut kommunalbestyrelsi ataasiakkaatigut naliliinermigut qaqutigoortumik ikiorsiisinnaavoq, taamatut aningaasartuuteqarnissaq qinnuteqartup ilaqutariilluunniit inuuniarneranni pingaaruteqarluinnartuusimappat.
Imm. 2. Aatsaat immikkut illuinnartuni akiligassanut kinguaattoorutinut matussutissanik ikiorsiissutinik tunisisoqarsinnaavoq.
Imm. 3. Kommunalbestyrelsi aamma pisortanit ikiorsiisinnaavoq ilaquttat qanigisat napparsimaneranni aamma/imaluunniit toquneranni ilisaanerannilu angalanissamut aningaasartuutinut. Kommunalbestyrelsimit piumasarineqarpat nakorsamit uppernarsaammik tunniussisoqassasoq, uppernarsaammik piniarnermut aningaasartuutit kommunalbestyrelsip akilissavai.

Nuunnermi ikiorsiissutit

§ 21. Kommunalbestyrelsi nuunnermut qinnuteqartup imaluunniit ilaqutariit ineqarnikkut suliffissaqarnikkulluunniit atugaannut pitsaanerulersitsisumut ikiorsiissuteqarsinnaavoq, tamatumani qinnuteqartoq taassumaluunniit katissimallugu aappaa, akuerisaasumik aapparisaa naligaluguluunniit inooqatigisaa, takuuk § 13, imm. 6, aningaasartuutinik akiliisinnaanngippata kiisalu qinnuteqartup § 4-mi imm. 1-imi piumasaqaatit naammassisimappagit.
Imm. 2. Kommuunimut allamut nuuttoqarpat, kommuunimit nuuffiusussamit kommunalbestyrelsimit akuersissummik pissarsisoqaqqaassaaq nuunnermut ikiorsiinnginnermi. Taama pisoqanngippaat kommunalbestyrelsi nuunnermut ikiorsiissutinik tunisisoq kommuuniussaaq ukiuni marlunni akiliissussaq.

§ 22. Qinnuteqartoq Kalaallit Nunaanni najugaqavissuunngitsoq angerlarniarluni angalanissamut aningaasartuutinik qinnuteqarpat qinnuteqartup kommuunimi najugaqarfigisaani kommunalbestyrelsi pisortanit ikiorsiissutinik tunniussisinnaavoq, qinnuteqartup aningaasartuutissat akilersinnaanngippagit.

Ilisinermi aningaasartuutit

§ 23. Kommunalbestyrelsi ilisinermut aningaasartuutinutnaleqquttunut matussutissanik pisortanit ikiorsiisinnaavoq, aningaasartuutit pigisanit akilerneqarsinnaasimanngippata toqusullu piumasaqaatit § 4-mi imm. 1 naammassisimappagu.

Napparsimasunut kaasarfimmiussissutit

§ 24. Pisortanit ikiorsiissutit napparsimasunut Nunatsinni Danmarkimillu napparsimmavinni uninngasunut kaasarfimmiussissutitut tunniunneqarsinnaapput.
Imm. 2. Napparsimasut Nunatsinni Danmarkimilu uninngasut kaasarfimmiussaannik pisortanik ikiorsiisoqarsinnaanerannut malittarisassanik Naalakkersuisut aalajangersaasinnaapput.

Kapitel 7
Paasissutissanik pissarsiniartarneq paasissutissiinissamullu pisussaaneq

§ 25. Kommunalbestyrelsip qinnuteqartoq pisussaaffilersinnaavaa suliassaq pillugu paasissutissanik pissarsinissamut peqataaqqullugu. Kommunalbestyrelsip pineqartup akuersineratigut inuit allat tassannga ilisimannittut paasissutissanik piniarfigisinnaavai.

§ 26. Pisortanit ikiorsiissutitisisartoq pisussaavoq kommunalbestyrelsi ilisimatissallugu pissutsit atukkani allanngorpata, ikiorsiissutip annikillineqarneranik, atorunnaarsinneqarneranik utertittariaqalerneranilluunniit kinguneqartumik.
Imm. 2. Inatsisit allat ajornartinngippassuk kommunalbestyrelsi pisinnaavoq pisortanit allanit paasissutissanik naliliiniarnermut atugassanik pissarsiniarnissaminut, matumani paasiniarneqarpat pisortanit ikiorsiissutisisartoq ikiorsiissutinik pisartagaqarnissaminut pisinnaatitaajunnaarsimanersoq.

Kapitel 8
Utertitsisarneq

§ 27. Kommunalbestyrelsip pisortanit ikiorsiissutinik tunniunneqartussaanngitsunik utertitsinissamik aalajangiissaaq, ikiorsiissutisisartoq:
1) Paasissutissanik kommuunalbestyrelsimut tunniussisussaalluni ilisimaarereerlugu tunniussisisimanngippat, takuuk § 26.
2) Taamaaliortussaanani ilisimaarereeraluarlugu pisinnaatitaaffiginngisaminik peqqussut manna naapertorlugu ikiorsiissutisisarsimappat.
3) Kingusinnerusukkut taarsiivigineqarpat, nalinginnaasunik akilersuutisisalerpat assigisaannilluunniit pissarsippat, piffissamut ikiorsiissutisiffigisimasaminut taassungalu assingusumik siunertalimmut.

§ 28. Aammattaaq kommunalbestyrelse pisortanit ikiorsiissutit utertinneqarnissaat pillugu aalajangiisinnaavoq:
1)  Inuup aningaasaqarnikkut sulinikkulluunniit mianersuaalliorluni iliuuseqarnera pissutigalugu pineqartoq ikiorneqartariaqarpat.
2)  Piffissami pisortanit ikiorsiissutisinissamik qinnuteqarfiusumi takuneqarsinnaappat qinnuteqartoq piffissap sivikitsup ingerlanerani pisortanit ikiorsiissutinik utertitsisinnaasoq.
Imm. 2. Kommunalbestyrelsi aalajangerpat pisortanit ikiorsiissutinik imm.1-imi nr. 2 naapertorlugu utertinneqartussanik, tamanna ikiorsiissutisisumut allakkatigut nalunaarutigineqassaaq kingusinnerpaamik pisortanit ikiorsiissutit tunniunneqarneranni. Kommunalbestyrelsi utertitsinissamik kinguartitsigallarnissamik akuersissuteqarsinnaavoq pisartagaqartoq aamma katissimallugu aapparisanilu imaluunniit naligalugu inooqatigisanilu pisortanit ikiorsiissutaannarnik pisartagaqarpata.
Imm. 3. Kommunalbestyrelsi immikkut pisoqartillugu ikiorsiissutisisalernermiit ukiup ataatsip qaangiunnerani aalajangiisinnaavoq ikiorsiissutisiap utertitassanngorsimanera atorunnaassasoq.

Kapitel 9
Angerlarsimaffimmi ikiorteqartitsineq

§ 29. Kommunalbestyrelsip kommuunimi angerlarsimaffinni ikiorteqartitsinissaq aaqqissuutassaraa, taamaalilluni angerlarsimaffinni suliassatigut ikiorsiinissamut suliamut naleqquttumik piginnaassuseqarsorisanik sulisoqarluni ikiorsiisoqarsinnaaqqullugu.
Imm. 2. Utoqqarnut, sanngiillisimasunut innarluutilinnullu kiisalu napparsimasoqartillugu atugarisatigullu ajornartorsiuteqartoqartillugu angerlarsimaffinni ikiorteqartitsisoqarsinnaavoq.
Imm. 3. Naalakkersuisut angerlarsimaffinni ikiorteqarnermik aaqqissuussinermut malittarisassanik aalajangersaasinnaapput, tassunga ilanngullugu angerlarsimaffinni ikiorteqartitsinermi akiliuteqartarnissaq.

Kapitel 10
Naammagittaalliorsinnaaneq

§ 30. Kommunalbestyrelsimit Inatsisartut matumani peqqussutaat malillugu aalajangiinerit Isumaginninnermut Naammagittaalliuteqartarfimmut naammagittaalliutigineqarsinnaapput inunnik isumaginninnerup aqunneqarnera aaqqissuussaaneralu pillugit Inatsisartut peqqussutaanni aalajangersakkat malillugit.

Kapitel 11
Aningaasalersorneqarnera

§ 31. Matumani peqqussut malillugu aningaasartuutit kommunalbestyrelsimit akilerneqartassapput.

Kapitel 12
Atuutilerfissaa

§ 32. Inatsisartut peqqussutaat 1. april 2007-imi atuutilerpoq.
Imm. 2. Tamatuma peqatigisaanik pisortanit ikiorsiissutit pillugit inatsisartut peqqussutaat nr.10, 1. november 1982-imeersoq atorunnaarsinneqarpoq.
Imm. 3. Maleruagassat pisortanit ikiorsiissutit pillugit inatsisartut peqqussutaat nr. 10, 1. november 1982-imeersoq tunngavigalugu aalajangersarneqarsimasut atuutiinnassapput, inatsisartut peqqussutaat manna imaluunniit inatsisartut peqqussutaat allat tunngavigalugit maleruagassanik aalajangersaanikkut taarserneqarnissaasaa imaluunniit atorunnaarsinneqarnissaasa tungaanut.

Namminersornerullutik Oqartussat, ulloq 20. november 2006

Hans Enoksen

/

Aleqa Hammond