Pisortanit ikiorsiissutit pillugit Inatsisartut Peqqussutaanni nr. 15, 20. November 2006-imeersumi § 8, imm. 2, § 11, imm. 6, § 13, imm. 7, § 18, imm. 3 aamma § 24 imm. 2 naapertorlugit aalajangersarneqarput:

 

Kapitali 1
Inuit pineqartut

§ 1. Nalunaarummit matuminnga inuit pineqartut tassaapput inuit pisortanit ikiorsiissutinik pisortanit ikiorsiissutit pillugit Inatsisartut peqqussutaanni malittarisassat naapertorlugit qinnuteqartut pisartagaqartulluunniit.

 

Kapitali 2
Iliuusissatut pilersaarutit

§ 2. Kommunalbestyrelsimit pisortanit ikiorsiissutinik qinnuteqartut pisartagaqartulluunniit ilisimatinneqassapput kommunalbestyrelsi peqatigalugu inuttut namminerminnut iliuusissatut pilersaarusiorfigineqarsinnaatitaasut.

 

Kapitali 3
Sulisinnaassuseq il.il.

§ 3. Pisortanit ikiorsiissutinik suliffissaalerinerinnaq pissutigalugu qinnuteqartunut pisartagalinnullu, piumasaqaataavoq, sulisinnaanermut periarfissat imatut suliffissarsiornermi pineqartup nalinginnaasuusut iluani iluaqutiginiarneqarsimassasut. Pineqartumut ilanngullugu kommunalbestyrelsimit piumasaqaataavoq suliffinnut aalajangersimasunut inuttaqanngitsunut qinnuteqassasoq.
Imm. 2. Piumasaqaataavoq, qinnuteqaateqartut pilersorneqarnissamut aamma aalajangersimasunik aningaasartuutinut kiisalu aningaasartuutinut ataasiakkaanut suliffissaaleqinerinnaq pissutigalugu pisortanit ikiorsiissutinik qinnuteqaammut peqatigitillugu suliffissarsiuussisarfimmut nalunaarsimassassut suliffissaqarsinnaanissamut ikiorserneqarsinnaanissaq siunertaralugu.
Imm. 3. Ikiorsiissutinik pissarsisinnaanissamut piumasaqaataavoq, qinnuteqartut pisartagallillu sulilersitaasinnaanissamut naammaginartumik neqeroorutinut akuersaarsimassasut.

§ 4. Pisortanit ikiorsiissutinik suliffissaalerinerinnaq pissutigalugu pilersorneqarnissamut aamma aalajangersimasunik aningaasartuutinut kiisalu aningaasartuutinut ataasiakkaanut qinnuteqartut pisartagaqartulluunniit, ullormik ataatsimik siumoortumik nalunaarfigineqarlutik suliffimmik tigusisinnaassapput sulilersitaasinnaanermillu neqeroorut atorlugu aallartissinnaassallutik.
Imm. 2. Suliffimmik tigusineq aamma sulilersitaaneq aallartinneqarsinnaassapput, qinnuteqartumut pisartagaqartumulluunniit neqeroorutip ingerlateqqinneqarneraniit ullup ataatsip qaangiunnerani ullup suliffiusussap aallartinnerani.
Imm. 3. Qinnuteqartoq pisartagaqartorluunniit kommunimut takkussinnaassaaq, tamatumunnga kommunalbestyrelsimiit aggersarneqarnerup tiguneqarneraniit ulloq ataaseq qaangiuppat.

§ 5. Pisortanit ikiorsiissutinik suliffissaalerinerinnaq pissutigalugu qinnuteqartut pisartagaqartullu pisussaaffeqanngillat sulisinnaanerminnik periarfissanik atuisinnaanissaminnut suliffeqalernissaq sulilersitaanissarlu pillugu neqeroorummit akuersaarinninissamut:
1) Neqeroorut isigineqarsinnaanngippat naammaginartutut neqeroorutitut pissutsit neqeroorutip imarisaanut tunngasut pissutigalugit,
2) Qinnuteqartoq pisartagaqartorluunniit sulisinnaassanngippat napparsimaneq pissutigalugu, imaluunniit manna tikillugu suliffiup ingerlatiinnarneqarnerani peqqissutsip ajorseriarsinnaanissaanut navianaateqarpat.
3) Qinnuteqartoq pisartagaqartorluunniit naartuneq, ernineq qitornarsiartaarnerluunniit pissutigalugit sulinngiffeqarsinnaatitaavoq, naartunermi, erninermi qitornarsiartaarnermilu sulinngiffeqartarneq il.il. pillugit Inatsisartut peqqussutaanni malittarisassat naapertorlugit, suliffeqareersimanissamut piumasaqaataasoq eqqaassanngikkaanni, imaluunniit
4) Qinnuteqartoq pisartagaqartorluunniit § 8 naapertorlugu piffissamut sulinngiffiusussamut ilaatinneqarsimappat.

§ 6. Kommunalbestyrelsimit, pilersorneqarnissamut, aalajangersimasunik aningaasartuutinut kiisalu aningaasartuutinut ataasiakkaanut pisortanit ikiorsiissutinik qinnuteqartut pisartagaqartulluunniit naliliiffigineqassapput sulisinnaassuseqarnersut, suliffeqarnermi sulisinnaassuseqarnerat qularutigineqassappat.
Imm. 2. Kommunalbestyrelsimit, pilersorneqarnissamut, aalajangersimasunik aningaasartuutinut kiisalu aningaasartuutinut ataasiakkaanut pisortanit ikiorsiissutinik qinnuteqartut pisartagaqartulluunniit naliliiffigineqassapput sulisinnaanerminnut periarfissaminnik iluaqutiginnissinnaanerminni ikiorserneqarnissamut piumasaqaatinik suli eqquutsitsisuunersut, pineqartumit
1) Suliffik innersuunneqartoq itigartinneqassappat
2) Sulilersitaanermik neqeroorummut takkutinngippat
3) Kommunalbestyrelsimit ataatsimeeqateqarnissamut isumaqatigiissutaasimasumut takkutinngippat, imaluunniit
4) Napparsimaneq pissutigalugu kommunalbestyrelsimut sulisitsisumulluunniit, tassani sulilersitaanissaq neqeroorutaasimasumut, pineqartorluunniit sulisitsisuminit sulilersinnaalernissaq pillugu oqaloqatiginnikkiartorluni ataatsimiigiarnissamut nalunaaruteqanngippat.

§ 7. Suliffissaaleqinermi ajornarsiutit qaavisigut ikiorserneqarnissamik qinnuteqartoqarpat pisartagaqartoqarpalluunniit, kommunalbestyrelsimit naliliivigineqassaaq, pissutsini ataasiakkaani § 5-imit taaneqartunit allaanerusunik pissuseqartoqarnersoq, pineqartup sulisinnaanerminut periarfissaminik atuisinnaanerminik pisussaaffeqannginneranut tunngavigineqarsinnaasunik.

§ 8. Pisortanit ikiorsiissutinik pilersorneqarnermut, aalajangersimasumik aningaasartuutinut kiisalu aningaasartuutinut ataasiakkaanut pisartagaqartut piffissami imminnut ataannartuni qaammatini 6-ni, piginnaatitaaffeqarput ulluni 14-ini piffissamut sulinngiffiusussamut peqataatinneqarnissamut.
Imm. 2. Piffissaq sulinngiffiusussaatitaasoq ataatsimortumik sulinngiffiussaaq aamma piginnaatitaaffiup pissarsiarineqarneraniit qaammatit 6-t qaangiutinnginnerini.
Imm. 3. Pissarsisup sivikinnerpaamik ullunik 14-inik siumoortumik nalunaarutigalugu kommunalbestyrelsimut nalunaarutigissavaa kissaatiginerlugu piffissap sulinngiffiusussap atornissaa.
Imm. 4. Kommunalbestyrelsimit anguniarneqassaaq, piffissamik sulinngiffeqarfiusussamik pissarsisoq sapinngisamik isumaqatigiissuteqarfigalugu aalajangersarneqassasoq.

 

Kapitali 4
Sulisinnaassuseqannginneq il.il.

§ 9. Pisortanit ikiorsiissutinik pilersorneqarnermut aamma aalajangersimasumik aningaasartuutinut kiisalu aningaasartuutinut ataasiakkaanut sulisinnaassuseqannginneq pissutigalugu naleqqussarsinnaanikkut ajornartorsiutit imaluunniit peqqissuunnginneq pissutigalugu pissarsisartunut piumasaqaataavoq, qinnuteqartoq kommunalbestyrelsimit naliliivigineqarsimassasoq nalinginnaasumik atugassarititaasut atorlugit suliamik isumaginnissinnaanngitsutut.

§ 10. Pisortanit ikiorsiissutinik sulisinnaassuseqannginneq pissutigalugu naleqqussarsinnaanikkut ajornartorsiutit imaluunniit peqqissuunnginneq pissutigalugu pissarsisartut, aggersarneqareernermi kingorna qaammatit 3 tamaasa kommunimut malinnaavigineqarlutik ataatsimiigiartassapput.
Imm. 2. Malinnaavigineqarnermi aalajangiiffigineqassaaq, pisortanit ikiorsiissutinik pisartagaqartoq pikkorissarnissamik, katsorsartinneqarnissamik, ilinniakkatigut ataasiakkaanik ilinniartitaanermut peqataatinneqarnissamik assigisaannilluunniit neqeroorfigineqassanersoq suliffeqarnermut uteqqissinnaanerani periarfissai pitsanngorsarniarlugit.
Imm. 3. Malinnaavigineqarnermi naliliivigineqassaaq, pineqartoq ikiorsiissutinut allatut ittunut nuutinneqassanersoq.

§ 11. Pisortanit ikiorsiissutinik pilersorneqarnermut, aningaasartuutinut aalajangersimasunut kiisalu aningaasartuutinut ataasiakkaanut qinnuteqartoq pissarsiaqartartorluunniit suliffeqarnermi napparsimaneq pissutigalugu sulisinnaassanngippat, kommunalbestyrelsimit napparsimanermut uppernarsaateqartoqarnissaa piumasaqaatigineqarsinnaavoq.
Imm. 2. Kommunalbestyrelsimit napparsimanermut uppernarsaasiinermi aningaasartuutaasinnaasut akilerneqassapput.

 

Kapitali 5
Annertussusiliineq uppernarsaasiinerlu

§ 12. Kommunalbestyrelsimit naliliivigineqassaaq, aningaasartuutit aalajangersimasut sorliit naammaginartutut nalilerneqarsinnaanersut.
Imm. 2. Aningaasartuutit aalajangersimasut naammaginartuunersut nalilerneqarnerini, kommunalbestyrelsimit pingaartinneqassaaq, qinnuteqaateqartoq pisartagaqartorluunniit:
1) siusinnerusukkut nammineq isertitaminik akilersuisarsimanersoq, aamma
2) siunissami naatsorsuutigineqarsinnaassanersoq nammineerluni aningasartuutiminik akiliisarsinnaassanersoq.

§ 13. Ineqarnermut akiliutinut ikiorsiissutit aamma atuinikkut aningaasartuutit akilerneqarnerinut ikiorsiissutit kommunalbestyrelsimit aalajangiiffigineqartassapput aningaasartuutiviit annertussusaat tunngavigalugu aalajangersimasumik missaliuussinikkut.

§ 14. Inuuniarnermut ikiorsiissutit kommunalbestyrelsimit qinnuteqaateqartup pisartagaqartuusullu pilersuisuunermikkut pisussaaffii aalajangersimasumik missaliuussiffigalugit aalajangerneqartassapput aamma inooqateqarnikkut imaluunniit najugaqateqarnikkut pitsaaqutit aallaavigalugit.
Imm. 2. Inuuniarnermut ikiorsiissutit aammattaaq aalajangersarneqartassapput sumiiffinni nunamilu sumiinnermi pissutsit aallaavigalugit, taamaalilluni akit killiffiat, tapertaqarsinnaanikkut periarfissat assingusullu naliliinermut ilanngunneqassallutik.

§ 15. Kommunalbestyrelsi ikiorsiissummik annertussusiliinermini aningaasartuutit annertussusaannut uppernaarsaatinik piumasaqaateqassaaq, takuulli imm. 3.
Imm. 2. Aningaasartuutit annertussusiinut uppernarsaatit akiligassat allagartarisinnaavaat, kontomit anillatitat, PBS atorlugu akilersuutit assigisaalluunniit.
Imm. 3. Inuuniarnermut ikiorsiissutit uppernarsartariaqassanngillat, kommunalbestyrelsimiilli, pisartagaqartuusup inuuniarnermut suut naammaginartutut isigineqarsinnaanersut toqqammavigisaanik qularnaarinniisunik aalajangersimasumik missaliuussineq naapertorlugu aalajangersarneqartassallutik.

 

Kapitali 6
Aningaasanngornagit ikiorsiissutit

§ 16. Aningaasanngornagit ikiorsiissutinut ikiorsiinermi akiliuteqartarneq imaluunniit toqqaannartumik akiligassanngortitsilluni allatsitsisarneq siullermeerlutik saaffiginnissuteqartunut tunniunneqarsinnaanngillat, aatsaalli paasineqarsimatillugu, pineqartumit ikiorsiissutit atornerlunneqartartut, imaluunniit ikiorsiissutinik nammineerluni aqutsisinnaanngitsoq, takuulli imm. 3.
Imm. 2. Kommunalbestyrelsimit aningaasanngornagit ikiorsiissutinut tunniussinermut aalajangiilernermi immikkut isiginiarneqassaaq, qitornaasinnaasut pisariaqartitsinerat eqquutsinneqarnersoq.
Imm. 3. Nammineerluni pissuussutigalugu pissaaleqisoqalersimappat, imaluunniit meeqqat immikkut ittumik isiginiarneqalersillugit, aningaasanngornagit ikiorsiissutinik siullermeertumik saaffiginnissuteqartumut pisortanit ikiorsiissutinik akiliussisoqartassaaq.

 

Kapitali 7
Immikkut ittumik pisoqartillugu ikiorsiissutit

Aningaasartuutit ataasiakkaat

§ 17. Aningaasartuutinut ataasiakkaanut ikiorsiissutinik tunniussisoqalinnginnerani kommunalbestyrelsimit qularnaarneqarsimassaaq, qinnuteqartumit aningaasarivimmi taarsigassarsisoqarsinnaannginnersoq qinnuteqartumit siunissami piumasaqaatit akilersinnaassallugit periarfissaqarfigineqartutut isigineqarsinnaasunik.

 

Kalaallit Nunaanni Danmarkimiluunniit napparsimmavinni napparsimasunut kaasarfimmiut

§ 18. Napparsimasut 18-it sinnerlugit ukiullit Kalaallit Nunaanni Danmarkimiluunniit napparsimmavinniittut, uninnganermi nalaani kaasarfimmioqarnissaminnut piginnaatitaaffeqarput, pisortanit ikiorsiissutinik napparsimasumit piumasaqaataasut eqquutsinneqarsimappata.
Imm. 2. Napparsimasut 18-it inorlugit ukiullit Kalaallit Nunaanni Danmarkimiluunniit napparsimmavinniittut, taamaallaat kaasarfimmioqarsinnaanerminnut piginnaatitaaffeqarput, meeqqanut inuusuttunullu ikiorsiisarneq pillugu Inatsisartut peqqussutaanni malittarisassat naapertorlugit angerlarsimaffiup avataanut inissinneqarsimasuugunik.
Imm. 3. Napparsimasut 18-it inorlugit ukiullit, imminnut pilersorsinnaanermut pisussaaffeqalersimasut, napparsimasutut 18-it sinnerlugit ukiulittulli kaasarfimmioqarnissamut piginnaatitaaffeqarput.

§ 19. Kaasarfimmiut akilerneqartassapput napparsimasup kommuniani angerlarsimaffigisaani siumoortumik kommunalbestyrelsimit isumaqatigiissuteqareersimanikkut siumoortumik sapaatip akunneranut ataasiarluni.
Imm. 2. Immikkut ittumik pisuni, tassani kaasarfimmiut akilerneqarnissaannut tassanngaannartumik pisariaqartitsisoqalersillugu, akiliussisoqarsinnaavoq siumoortumik kommunalbestyrelsimit akuersissuteqartitsisoqaqqaarani.

§ 20. Napparsimasunut kaasarfimmiut tunniunneqartarput Ilaqutariinnermut Pisortaqarfimmit ulloq unnuarlu aalajangersimasunik akigititatut aalajangersarneqarsimasut naapertorlugit.
Imm. 2. Kaasarfimmiut tunniunneqartarput ulloq uniffiusoq siulleq aallarnerfigalugu.
Imm. 3. Kaasarfimmiunut akigititaq napparsimasut qanoq ukioqarnerat aallaavigalugu aalajangersarneqartarput tamanullu saqqummiunneqassallutik Ilaqutariinnermut Pisortaqarfiup isumaginninnikkut aningaasanngorlugit tunniuttagaanni atuuttuusuni kaajallaasitaq naapertorlugu.

 

Kapitali 8
Nammagittaalliorsinnaaneq

§ 21. Nalunaarummi malittarisassat naapertorlugit aalajangiinerit, Inunnik Isumaginninnikkut Naammagittaalliuuteqartarfimmut naammagittaalliutigineqarsinnaapput Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni malittarisassat naapertorlugit.

 

Kapitali 9
Atortuulerfia

§ 22. Nalunaarut manna 1. april 2007 atuutilerpoq.
Imm. 2. Tamatumunnga peqatigitillugu, Pisortanit ikiorsiissutit pillugit Isumaginninnermi Pisortaqarfiup kaajallaasitaa nr. 162, Kalaallit Nunaanni Danmarkimiluunniit napparsimmavinni napparsimasunut kaasarfimmiut tunniunneqartarnerat pillugu Isumaginninnermut Suliffeqarnermullu Pisortaqarfiup kaajallaasitaa nr. 214 kiisalu Napparsimasunut Kalaallit Nunaanni napparsimmavinni uninngasunut kaasarfimmioqarsinnaanermik qinnuteqartarneq aamma akiliuteqartarneq pillugit Isumaginninnermut Suliffeqarnermullu Pisortaqarfiup kaajallaasitaa nr. 222, atorunnaarsinneqarput.

Namminersornerullutik Oqartussat ulloq 15. marts 2007

 

Aleqa Hammond

/

Martha Lund Olsen