Akileraaruserinermik ingerlatsineq pillugu Inatsisartut inatsisaanni nr. 11, 2. november 2006-imeersumi § 5, imm. 6 malillugu aalajangersarneqarput:

 

Kapitali 1
Akileraarusiinernik aalajangiisartut aaqqissuussaanerat

Siulittaasup tullianik siullermik aappaanillu qinersineq

§ 1. Akileraarusiinernik aalajangiisartut siulittaasuat aalajangiisartut atuuttuulernerisa kingornagut sapinngisamik piaarnerpaamik inissitsiterluni ataatsimiinnissamut aggeqqusissaaq.
Imm. 2. Inissitsiterluni ataatsimiinnermi aalajangiisartut ilaasortami akornanni siulittaasup tullianik siullermik aappaanillu qinersissapput. Qinikkat qinigaaffik tamakkerlugu atuutissapput.
Imm. 3. Qinersinerit siulittaasumit aqunneqassapput. Qinigaanermut piumasaavoq Akileraarusiinernik aalajangiisartut ilaasortaanit ataatsimiinnermi peqataasunit amerlanerpaanit taaneqarnissaq. Siulittaasup tullissaanut qinersinerni siullermi qinigassanngortittut arlaat amerlanerussuteqartunit taaneqanngippat qinerseqqittoqassaaq. Aappassaanik qinersinermi qinigassanngortittut arlaat amerlanerussuteqartunit taaneqanngippat pingajussaanik qinersisoqassaaq, tassanilu qinigassanngortittunit taaneqarnerpaaq qinigaassalluni. Pingajussaanik qinersinermi qinerneqartut naligiippata qinersineq makitsinikkut aalajangerneqassaaq.
Imm. 4. Siulittaasup tullia siulleq siulittaasup siulittaasutut pisussaaffimminik ingerlatsinissaminut pisinnaanngiffiini siulittaasup inissisimaffiani inissittassaaq. Siulittaasup tullia siulleq pisinnaanngikkaangat siulittaasup tulliata aappaa siulittaasup tulliata inissisimaffiani inissittassaaq.

 

Sinniisussamik aggersaaneq

§ 2. Aalajangiisartunutilaasortaq ataatsimeeqataasinnaanngikkaangat, ilaasortap ataatsimeeqataasinnaanngitsup siulittaasoq tamanna pillugu ilisimatissavaa. Siulittaasup aalajangissavaa sinniisussaq aggersarneqassanersoq. Ilaasortap ataatsimeeqataasinnaanngitsup piumasarippagu sinniisussaq aggersarneqassaaq. Sinniisussaq aamma aggersarneqassaaq ilaasortaq sivikinnerpaamik qaammatit sisamat peqanngissatillugu.
Imm. 2. Ilaasortaq inissitsiterluni ataatsimiinnissami siullerpaami peqataasinnaanngippat, § 1 naapertorlugu sinniisussaq aggersarneqassaaq.
Imm. 3. Siulittaasup tullianut sinniisussatut aggersarneqartoq aalajangiisartut aalajangiinerini ilaasortaannartut peqataassaaq.

 

Allattoqarfimmit ikiorteqarneq

§ 3. Akileraaruseriffiup allattoqarfiata Akileraarusiinernik aalajangiisartunut allattoqarfiat Akileraarusiinernik aalajangiisartut suliassaannik allattoqarnikkut ikiuutissaaq sulianillu saqqummiussissutinik kiisalu aalajangiisartut aalajangiiffigisassaannut siunnersuutinik suliarinnittassalluni.
Imm. 2. Akileraarusiinernik aalajangiisartut allattoqarfiani pisortaq Akileraarusiinernik aalajangiisartut allatsigissavaat aalajangiisartullu ataatsimiinnerini tamani taasisinnaatitaanani peqataasassalluni.

 

Kapitali 2
Suliat piareersarneri

§ 4. Akileraarusiinernik aalajangiisartunut naammagittaalliuut allakkatigoortoq tunngavilersugaasorlu nassiunneqassaaq. Naammagittaalliuummut allaqqaarnerit assilisalluunniit malinnaatinneqartariaqarput:
1) Aalajangiineq naammagittaalliuutigineqartoq.
2) suliap saqqummiunneqarneranik suliaqartoqarsimappat suliap saqqummiunneqarnera naammagittaalliuuteqartumut nassiunneqarsimasoq.
3) Allakkat naammagittaalliuuteqartup uppernarsaatitut atorniagai.

§ 5. Suliap piareersarnera Akileraarusiinernik aalajangiisartut allattoqarfiata suliarissavaa.
Imm. 2. Allattoqarfiup akileraaruseriffik qinnuigissavaa suliami aalajangiinermut tunnga-viusut atorsimasat tunniuteqqullugit.

§ 6. Akileraaruseriffiup naammagittaalliuummut atatillugu nalunaarutigippagu aalajangiineq akileraaruserinermik ingerlatsineq pillugu Inatsisartut inatsisaanni § 72 naapertorlugu naammagittaalliuummut tunngaviusoq suliareqqinneqarnissaanut pissutissaqarsinnaasoq, taava Akileraarusiinernik aalajangiisartut naammagittaalliuummik suliarinninniarnertik kinguartikkallarsinnaavaat. Akileraarusiinernik aalajangiisartut tamatumani akileraaruseriffiup suliamut tunngasumik nutaamik aalajangiinissaanut piffissaliisinnaapput.
Imm. 2. Akileraarusiinernik aalajangiisartut nammagittaalliuutip suliarineqarnera unitsikkallarniarlugu aalajangerpata naammagittaalliuuteqartoq suliamik unitsitsigallarneq pillugu allakkatigut ilisimatinneqassaaq.

§ 7. Akileraarusiinernik aalajangiisartut naammagittaalliuummut aalajangiinerat naammagittaalliuuteqartup allallu akornanni inatsiseqartitsinikkut pissutsinik akileraarutinut akitsuutinulluunniit tunngasutigut sunniuteqarsinnaasuunerinik naliliineruppat, inuullu allap tamatumani pineqartup inatsiseqartitsinermi naammagittaalliuteqartup tunngavissaritinniagaanit allaanerusumik naliliinermik kissaateqarsinnaasorineqarpat, Akileraarusiinernik aalajangiisartut aalajangersinnaavaat inuk alla taanna pineqartoq tamanna pillugu allattoqarfimmut allakkatigut oqaasiinnartigulluunniit oqaaseqaateqaqqullugu qinnuigineqassasoq. Akileraa-rusiinernik aalajangiisartut aamma aalajangersinnaavaat, inuk alla taanna pineqartoq Akileraarusiinernik aalajangiisartut ataatsimiinnerini oqaaseqaqqullugu qinnuigineqassasoq.
Imm. 2. Suliami naammagittaalliuuteqartup saniatigut imm. 1 tunngavigalugu allamik peqataatitsinissamik aalajangiineqarpat, naammagittaalliuuteqartoq tamanna pillugu allamut pineqartumut saaffiginninneq pitinnagu allakkatigut ilisimatinneqassaaq. Akileraarusiinernik aalajangiisartut naammagittaalliuuteqartup tamatumunnga oqaaseqarnissaanut piffissamik killiliisinnaapput.

§ 8. Naammagittaalliuuteqartoq Akileraarusiinernik aalajangiisartunut oqaasiinnartigut oqaaseqaateqarnissaminik kissaateqarsimappat, naammagittaalliuuteqartoq sivikinnerpaamik ullunik 14-inik sioqqutsisumik aggersarneqassaaq, sivikinnerusumik piffissaqartitsinissaq naammagittaalliuuteqartumut isumaqatigiissutigineqarsimanngippat. Akileraarusiinernik aalajangiisartut aalajangersinnaavaat oqaasiinnartigut oqaaseqaateqarneq elektronikkimik atortorissaarutitigut attaveqaatit atorlugit ingerlanneqassasoq.
Imm. 2. Akileraarusiinernik aalajangiisartut qaqugu sumilu ataatsimiinnissaq aalajangissavaat.
Imm. 3. Akileraarusiinernik aalajangiisartut akileraaruseriffimmut sinniisuusunik ataatsimiinnissamut aggersaasinnaapput.
Imm. 4. Naammagittaalliuuteqartup oqaasii Akileraarusiinernik aalajangiisartut allattoqarfiata ataatsimiinnermi imaqarniliamut allassavai. Naammagittaalliuuteqartoq Akileraarusiinernik aalajangiisartut ataatsimiinnerinit imaqarniliap assilineqarneranik piumalluni qinnuteqarsinnaavoq.

§ 9. Suliami tunngavissat pigineqalerneranni Akileraarusiinernik aalajangiisartut allattoqarfiata suliamut nassuiaat naammagittaalliuutip aalajangiivigineqarnissaanut tunngavilersukkamik siunnersuutitaqartillugu allaganngorlugu suliarissavaa.

 

Sinniisoqarneq

§ 10. Naammagittaalliuuteqartoq qaqugukkulluunniit inummik allamik suliap ingerlanneqarnerani soqutigisaminik isumaginnittussamik sinniisoqarsinnaavoq. Akileraarusiinernik aalajangiisartullu piginnaatitaasoq naammagittaalliuuteqartoq uppernarsaatitaqartumik sinnerlugu sassarsinnaasutut isigissavaa – naammagittaalliuuteqartup piginnaatitaanerup utertinneranik nalunaarnissaa pitserlugu.
Imm. 2. Imm. 1 apeqqutaatinnagu Akileraarusiinernik aalajangiisartut naammagittaalliuuteqartoq naammagittaalliuuteqartullu sinniisua allakkatigut nalunaarfigissavaat makku pillugit:
1) Akileraarusiinernik aalajangiisartut naammagittaalliuummut aalajangiinerat.
2) Akileraarusiinernik aalajangiisartut suliamik unitsitsineratigut, naammagittaalliuut §17 naapertorlugu unitsiinnarneqarpat.

§ 11. Akileraarusiinernik aalajangiisartuni ilaasortaq tassungaluunniit sinniisussaq suliami Akileraarusiinernik aalajangiisartunit suliarineqartumi naammagittaalliuuteqartumut sinniisuusinnaanngilaq.

 

Kapitali 3
Akileraarusiinernik aalajangiisartut ataatsimiittarneri

§ 12. Akileraarusiinernik aalajangiisartut ataatsimiinnertik Nuummi akileraaruseriffimmi ingerlattassavaat. Siulittaasulli aalajangersinnaavaa ataatsimiinneq allami ingerlanneqassasoq.
Imm. 2. Akileraarusiinernik aalajangiisartut ataatsimiinneri ilaasortat najuunnerisigut ingerlanneqartassapput, siulittaasulli aalajangersinnaavaa ilaasortat ataasiakkaat oqarasuaatikkut imaluunniit atortorissaarutitigut attaveqaatit elektroniskiusut arlaat atorlugit ataatsimee-qataasinnaasut.
Imm. 3. Akileraarusiinernik aalajangiisartut qaqugukkut sumilu ataatsimiinnissaat siulittaasup aalajangertassavaa allatsilu ataatsimiigiaqqusisuusassalluni. Ataatsimiinnerit matoqqasuupput. Ataatsimiigiaqqusissut sapinngisamik ataatsimiinnissaq ullunik 30-nik sioqqullugu allakkatigut nassiunneqartassaaq.
Imm. 4. Suliassat ataatsimiinnermi oqaluuserineqartussat nalilerneqarnissaannut atortussat pisariaqartut pissarsiarineqartarnissaat pissutigalugu – ilaasortanut siusinnerusukkut takutinneqareersimanngippata – ataatsimiinnissaq kingusinnerpaamik ulluinnarnik marlunnik sioqqullugu allattoqarfimmi misissuataagassanngortinneqareersimassapput.
Imm. 5. Ilaasortat ikinnerpaamik pingajorarterutaasa piumasaqaatigippassuk, siuliittaasoq ullut 14-it qaangiutsinnagit ataatsimiigiaqqusissaaq.

§ 13. Suliaq Akileraarusiinernik aalajangiisartut ataatsimiinnerini Akileraarusiinernik aalajangiisartut allattaanit imaluunniit allatsimit toqqagaasumit akileraaruseriffimmi sulisumit saqqummiunneqassaaq.
Imm. 2. Ataatsimiinnermi naammagittaalliuuteqartuusoq piumasaqaamminik tamatumunngalu tunngavilersuutiminik nassuiaanissamut periarfissaqartinneqassaaq. Allat Akileraarusiinernik aalajangiisartut ataatsimiinnerinut aggersarneqarsimasut ataatsimiinnermi oqaaseqarnissaminnut periarfissaqartinneqassapput. Suliap nassuiarneqarnerani aalajangiisartuni ilaasortat ataatsimiinnermi najuuttunut apeqquteqarsinnaapput.
Imm. 3. Akileraarusiinernik aalajangiisartut siulittaasuata imaluunniit taassuma najuutinnginnerani siulittaasup tulliata siulliup aappataaluunniit aalajangissavaa qaqugukkut suliami isumaqatigiinniarneq naammassisutut isigineqassanersoq. Ataatsimeeqataasulli tamarmik arlaataluunniit suliap oqaluuserineqarnera ingerlaqqissanersoq taasisitsissutigineqarnissaa piumasarisinnaavaat. Ilaasortap aamma piumasaqaatigisinnaavaa suliap ataasiarluni kinguartinneqarnissaa suliamilu allagaatit suliap suliareqqinnginnerani ilaasortamut piumasaqaateqartumut nassiunneqassasut.
Imm. 4. Aggersarneqarsimasut ataatsimiinneq qimappassuk, ataatsimiinnermi pisimasut tunngavigalugit siunersioqatigiinneq pissaaq. Siulittaasup taassumaluunniit peqannginnerani siulittaasup tulliata siulliup aappaataluunniit taasineqassappat apeqqut apeqqutilluunniit taasissutigineqartussat oqaatigissavai.
Imm. 5. Siulittaasup taassumaluunniit peqannginnerani siulittaasup tulliata siulliup aappaataluunniit suliaq allagarsornikkut suliareqqinneqarnissamut siunersioqatigiinnissamullu unitsikkallarneqassanersoq aalajangersinnaavaa.

§ 14. Akileraarusiinernik aalajangiisartut aalajangiineri ataatsimiinnermit allattaavinnut na-lunaarsorneqassapput. Allattaavinni ersissapput ulloq ataatsimiiffiusoq, nalunaaqutaq ataatsimiinnerup aallartiffia naammassiffialu aammalu ataatsimiinnermi kikkut peqataanersut.
Imm. 2. Taamatuttaaq allattaavinni nalunaarsorneqassapput aalajangiisartuni aalajangiinerit suulluunniit nassaarilertorneqarsinnaannerannut tunngaviusussat naammattut. Taamaalilluni allattaavinni nalinginnaasumik nalunaarsorneqartassapput akileraartussaatitaasup aqqa, kommune akileraarfigisaa, CPR/IIN/SE/CVR-normut aammalu aningaasarsiat akileraaruteqaataasussat akileraaruseriffimmit amerlassusilikkat, allattoqarfiup inassutaa kiisalu Akileraarusiinernik aalajangiisartut pineqartumut tassunga amerlassusiliinerat. Naammagittaalliuut ataatsi-miinnerup ingerlanerani naammagittaalliuuteqartumit oqaasiinnakkut taamaatiinnarneqarpat, tamanna allattaavinni allanneqassaaq, takuuk § 17.
Imm. 3. Allattaavinnut aamma ilanngunneqartassapput oqaaseqaatit allattaavinnut ilanngunneqaqqullugit ilaasortamit piumasaqaatigineqartut.
Imm. 4. Allattaaviit ataatsimiinnermi peqataasunit atsiorneqassapput kingusinnerpaamik tullianik ataatsimiinnerup naammassinerani. Ilaasortat taasisimanerminnut pissutsinullu allanut innersuussillutik allattaavinni atsiorumanngissinnaanngillat.

§ 15. Ilaasortap suliami peqataasinnaaneranut nalorninartoqartillugu Akileraarusiinernik aalajangiisartut nalornissutigineqartoq pillugu aalajangiissapput. Ilaasortaq tamatumani pineqartoq aalajangiinermi peqataassanngilaq.

§ 16.  Naammagittaalliuuteqartoq oqaasiinnartigut allakkatigulluunniit Akileraarusiinernik aalajangiisartunut oqaasiinnartigut oqaaseqaateqarnissamik piumasaqaammik qaquguk-kulluunniit tunuartitsisinnaavoq.

§ 17. Naammagittaalliuuteqartoq naammagittaalliuumminik qaqugukkulluunniit unitsitsiinnarsinnaavoq. Unitsitsineq allakkatigut oqaasiinnartigulluunniit pisinnaavoq. Unitsitsinerni tamani Akileraarusiinernik aalajangiisartut naammagittaalliuuteqartoq allakkatigut nalunaarfigisassavaat naammagittaalliuut Akileraarusiinernik aalajangiisartut unitsinneqartoq naammagittaalliuummik unitsitsinerup kingunerisaanik.
Imm. 2. Naammagittaalliuuteqartup akileraaruserinermik ingerlatsineq pillugu Inatsisartut inatsisaanni § 74, imm. 3 malillugu suliaq Akileraarusiinernik aalajangiisartut aalajangiinissaat utaqqeqqaarnagu eqqartuussiveqarfimmut suliassiissutigippagu, Akileraarusiinernik aalajangiisartunut naammagittaalliuuteqarneq atorunnaartutut isigineqassaaq. Akileraarusiinernik aalajangiisartut naammagittaalliuuteqartoq allakkatigut nalunaarfigissavaat naammagittaalliuut Akileraarusiinernik aalajangiisartuni unitsinneqartoq.

 

Kapitali 4
Aalajangiinerit 

§ 18. Aalajangiineq ullulerneqarsimassaaq. Aalajangiineq tunngavilersugaassaaq, tamatu-mani aamma naammagittaalliuuteqartup pisimasut taakkartugaanut piumasaqaataanullu Akileraasusiinernik aalajangiisartut isummernerat, pisimasut taakkartorneqartut piumasaqaatilluunniit pingaaruteqanngitsutut suliallu aalajangiiffigineqarneranut pingaaruteqanngitsutut isigineqanngippata.
Imm. 2. Pissutsit immikkorluinnaq ittut atuutsillugit Akileraarusiinernik aalajangiisartut aalajangersinnaavaat, aningaasat tungaasigut naatsorsuinertaqanngitsumik taamaallaat naammagittaalliuutigineqartup aalajangiiffigineqarnissaani isummanik tunngaviusussanik aalajangiinerusumik. Tamatumalu kingornatigut Akileraarusiinernik aalajangiisartut inner-suussinerinut naapertuuttumik aalajangiineqarnissaa akileraaruseriffiup isumagissallugu.
Imm. 3. Naammagittaalliuut aalajangiinerup suliareqqinneqarnissaanik qinnuteqaammut itigartitsinermut tunngasuuppat, Akileraarusiinernik aalajangiisartullu isumaqarpata suliareqqiineqarsimasariaqaraluartoq, Akileraarusiinernik aalajangiisartut aalajangiinerminni akileraa-ruseriffik aalajangiinermik suliarinneqqinnissaanik suliassissavaa.

§ 19. Aalajangiineq siulittaasuptaassumaluunniit peqannginnerani siulittaasup tulliata siulliup aappataluunniit oqaasertalersussavaa. Suliani ikinnerussuteqartut allatut isumaqarfigisaanni, aalajangiineq oqaasertalersorneqassaaq ilaasortat allat pisariaqartitsineq naapertorlugu isumasioqatiginerisigut. Taasinermut atatillugu aalajangiinerup suliarineqarnissaa pillugu allaanerusumik aalajangiineqarsinnaavoq.
Imm. 2. Aalajangiinerup assilinera naammagittaalliuuteqartumut attuumassuteqartunullu allanut nassiunneqassaaq. Aalajangiinerup nassiunneqarneranut peqatigitillugu naammagittaalliuuteqartoq suliassiissutiginnissinnaasullu allat aalajangiinerup eqqartuussiveqarfimmut suliassiissutiginissaanut piffissaliussamik ilisimatinneqassapput.

 

Pisinnaatitsineq

§ 20. Akileraarusiinernik aalajangiisartut siulittaasuat aalajangiisartut sinnerlugit aalajangiiffigisassanik nukinginnartunik Akileraarusiinernik aalajangiisartut suleriaasiat naapertorlugu aalajangiisinnaavoq. Siulittaasup aalajangiineri assigisaallu aalajangiisartut ataatsimiinnerini Akileraarusiinernik aalajangiisartunut saqqummiunneqartassapput. Aammattaaq siulittaasoq suliat Akileraarusiinernik aalajangiisartunut saqqummiunneqareersimasut pillugit iliuuseqarsinnaavoq.

§ 21. Allattoqarfik Akileraarusiinernik aalajangiisartut sinnerlugit naammagittaalliuutini aningaasarsianik akileraaruteqaataasussanik amerlassusiliinermi appartitsisinnaavoq naammagittaalliuutigineqartoq tamakkiisumik isumaqatigineqartillugu. Suliat taamaattut pillugit allattorsimaffiit Akileraarusiinernik aalajangiisartut ataatsimiinnerisa arlaanni saqqummiunneqartassapput.
Imm. 2. Allattoqarfik Akileraarusiinernik aalajangiisartut sinnerlugit akileraarutit ilaannik pissutsinut naammagittaalliuutigineqartunut attuumassuteqartut tamakkiisumik ilaannakortumilluunniit akilerneqanngikkallarnissaannik nalunaaruteqarsinnaavoq, matumani pissutsit immikkut ittut atuutsillugit.

§ 22. Akileraarusiinernik aalajangiisartut akileraaruseriffiup suliassanut pilersaarutai aningaasaliissutillu mianeralugit akileraaruseriffik qinnuigisinnaavaat suliat aalajangersimasut misissorneqarnissaannut suleriaatsillu naliliiffigineqarnissaanik tunngassuteqartunik Akileraarusiinernik aalajangiisartunut saqqummiunneqarnissaannut peqataaqqullugu.

 

Kapitali 5
Aalajangersakkat allat

Akileraarusiinernik aalajangiisartut aalajangiinerinik tamanut tusarliussineq

§ 23. Inuit amerlanerit soqutigisaannut tunngasunik aalajangiinerit Akileraarusiinernik aalajangiisartut tamanut tusarliuttassavaat. Tamanut tusarliussinerni inuit aqqi inatsisitigulluunniit akisussaasunut paasissutissat, CPR/IIN/SE-normut imaluunniit CVR-normu paasissutis-sallu inunnut imaluunniit suliffeqarfinnut arlaannut atatinneqarsinnaasut, Akileraarusiinernik aalajangiisartut suliamut toqqorsivimmi normorititaat eqqaassanngikkaanni, piiarneqarsimas-sapput, imaluunniit kimulluunniit atasuunngitsumik taaguutinik taarserneqassallutik.
Imm. 2. Akileraarusiinernik aalajangiisartut naliliippata suliap kimut/kikkunnut/sumut atasuuneranik tamakkiisumik ersigunnaarsitsineqarsinnaanngitsoq, taava tamanut tusarliussineq pissanngilaq.

 

Aalajangiisartut ilaasortaannik akissarsiaqartitsineq

§ 24. Akileraarusiinernik aalajangiisartuniilaasortat, tamatumani aamma siulittaasoq, sinniisussallu ilanngullugit, Inatsisartuni Naalakkersuisunilu il.il. ilaasortat aningaasarsiaqartitaanerat il.il. pillugit Inatsisartut inatsisaanni, inatsisartuni ilaasortaanngitsut ataatsimiititaliani, aalajangiisartutut ataatsimiititaliani, sinniisoqarfinni taamaaqataanilu peqataanerinut tunngatillugu malittarisassat malillugit aningaasarsiaqartinneqassapput.
Imm. 2. Akileraarusiinernik aalajangiisartuni ilaasortat, siulittaasoq kisimi pinnani, aningaasaqarnermut naalakkersuisup erseqqinnerusumik aalajangiinera malillugu attaveqaatitigut paasissutissanik nuussissutinut, oqarasuaammut allaffissornermullu aningaasartuutinut uppernarsaatinik tunniussinermi utertitsivigineqarsinnaapput.
Imm. 3. Akileraaruseriffiup Akileraarusiinernik aalajangiisartut siulittaasuannut naleqquttunik attaveqaatinik atugassaqartitsissaaq tamatumunngalu atasumik aningaasartuutit akilissallugit. Tamatuma saniatigut siulittaasoq allaffissornermut assigisaanullu aningaasartuutinut matusissutaasunik taartisianik qaammaammut 200 koruuninik tunineqartassaaq.

 

Atuutilerfik

§ 25. Nalunaarut 1. januar 2007-imi atuutilissaaq.
Imm. 2. Nalunaarutip atuutilerneratigut Skatterådip suleriaasia pillugu aalajangersagaq 11. september 1997-imeersoq atorunnaarsinneqarpoq.

Namminersornerullutik Oqartussat, ulloq 1. december 2006

Josef Motzfeldt

/

Kaare Hagemann