Akileraartarnermi ingerlatsineq pillugu Inatsisartut inatsisaat nr. 11, 2. november 2006-imeersumi § 8 naapertorlugu aalajangersarneqarpoq:

Suliassat

§ 1. Akileraaruseriffimmi akileraartarnermut suliaqarnermut tamarmiusumut suliassaqarfimmut innuttaasunit suliffeqarfinniillu ornigulluni saaffiginnissutinut atatillugu paasissutissiinermut ilitsersuinermullu tunngassutillit kommunip suliassaralugit ingerlatarai. Kommunimi saaffiginnissutit allat assigalugit suliassat kommunimi ingerlatsivimmit ingerlanneqarsinnaapput, assersuutigalugu saaffiginnittarfimmit, innuttaasunik kiffartuussivimmit, inuit nalunaarsorsimaffiannit assigisaannilu.
Imm. 2. Kommunimi innuttaasut suliffeqarfiillu nunap immikkoortuani akileraaruseriffimmut attuumassuteqarfigisaannut kommuni innersuussisarlunilu suleqateqarpoq. Saaffiginnissutit kommuninit allanit innuttaasunit suliffeqarfinniillu pisut, kommunip saaffigineqarnermini ikiorsiinermigut suliarisarpai.
Imm. 3. Akileraartarnermut suliaqarnermut tunngatillugu suliap kommunimi sumut inissinneqarnera aamma kommunip akileraarutinut tunngatillugu innuttaasunut kiffartuussiviani kina ulluinnarni akisussaasuunersoq pillugit kommunalbestyrelsip nunap immikkoortuani akileraaruseriffik nalunaarfigisarpaa.

Ilitsersuineq aamma paasissutissiineq kiisalu qarasaasiakkut aaqqiissutit

§ 2. Akileraartarnermi suliaqarfimmi immersugassat, paasissutissiinermut atortussat il.il. kommunip tunniutissavai akileraaruseriffiullu nittartagaaniit atortussat kissaatigineqartut pissarsiarineqarnissai pillugit innuttaasunut suliffeqarfinnullu kommuni ikiuutissalluni.

§ 3. Akileraaruseriffimmut qarasaasiakkut kiffartuussinerit aamma akileraaruseriffimmut attaveqarnermi atortut atornissai pillugit, atugassaritinneqartutut saqqumitinneqarnerani sapinngisaq naapertorlugu kommunip innuttaasut suliffeqarfiillu ilitsersussavai.

Skattekortimik atortunillu allanik allaganngortitsineq

§ 4. Akileraaruseriffiup peqqusineratigut, kommuni skattekortimik atortunillu allanik innuttaasunut aamma suliffeqarfinnut allaganngortitsissaaq.

Apeqquteqaatinik il.il. ingerlatitseqqittarneq

§ 5. Akileraartarnermi suliassaqarfimmut tunngassuteqartunik §§ 1-4-mi suliassat taaneqartut avataaniittut pillugit saaffiginnissutit kommunip akileraarusseriffimmut ingerlateqqissavai.
Imm. 2. Imm. 1 naapertorlugu saaffiginnissutit sapinngisaq naapertorlugu ingerlaannaq ingerlateqqinneqarnissai kommunip neqeroorutigissavaa, taamaalilluni innuttaasoq imaluunniit suliffeqarfik akileraaruseriffimmit erniinnaartumik akissuteqarfigineqarniassammat. Innuttaasoq imaluunniit suliffeqarfik sinnerlugu kommunip akileraaruseriffik aperisinnaavaa imaluunniit innuttaasoq suliffeqarfilluunniit akileraaruseriffimmiit attaveqarfigineqarnissaannik kommuni neqeroorsinnaavoq. Akileraartarnermi suliassaqarfimmut tunngasunik saaffiginnissutit pillugit akileraaruseriffik kommunimut innersuussisinnaanngilaq.

Akileraaruseriffimmik suleqateqarneq

§ 6. Illoqarfinni, nunap immikkoortuini akileraaruseriffimmik akileraaruseriffiup pilersitsiffigisimasaani, §§ 1-4-mi taaneqartut suliassat nunap immikkoortuini akileraaruseriffimmit suliarineqartarput. Illoqarfinni taakkunani kommuni innuttaasunik kiffartuussivimmik pilersitsisimappat, §§ 1-4-mi taaneqartut suliassanik suliarinninnissaq siunertaralugu akileraaruseriffik kommunimi inuttaliinermigut sulisoqartitsisinnaavoq.
Imm. 2. Illoqarfinni, nunap immikkoortuini akileraaruseriffimmik pilersitsiffiunngitsuni, akileraaruseriffiup akileraaruseriffimmut innuttaasut suliffeqarfiillu attaveqarnerannut atugassanik attaveqarnermi atortunik, tassunga ilanngullugit qarasaasiakkut atortut akileraaruseriffiup atugassatut saqqumitissavai. Atortut kommunip allaffiani inissinneqassapput.
Imm. 3. Nunaqarfinni nalinginnaasumik attaveqarnermi atortut nunaqarfinni kiffartuussiviit allaffianniittut atorneqartarput.
Imm. 4. Akileraaruseriffiup attaveqarnermi atortuisa qarasaasiakkullu kiffartuussinerit atorneqarnerat pillugit akileraaruseriffiup kommuni ilisimatissavaa.
Imm. 5. Immersugassat, paasissutissiinermi atortut il.il. qarasaasiakkut pissarsiarineqarsinnaanngitsut akileraaruseriffiup kommunimut atugassanngortittarpai.

§ 7. Erseqqinnerusumik isumaqatigiissuteqarnikkut akileraaruseriffiup suliassaanik allanik killilimmik suliaqarneq pillugu akileraaruseriffik kommunimut isumaqatigiissuteqarsinnaavoq.

Aningaasaqarneq

§ 8. Illoqarfinni, nunap immikkoortuini akileraaruseriffimmik pilersitsiffiunngitsuni, attaveqarnermut atortunik, qarasaasianut attaviliinermi assigisaanilu pilersitsinissamut ingerlatsinissamullu aningaasartuutit akileraaruseriffiup akilissavai.
Imm. 2. Immersuiffissanik, paasissutissiinermi atortunik il.il. kommunimut naqiterititsinermi nassiussinermilu aningaasartuutit akileraaruseriffiup akilissavai.
Imm. 3. Kommunini, nunap immikkoortuini akileraaruseriffimmik pilersitsiffiunngitsuni, §§ 1-5-imi taaneqartunik suliassanik suliarinninnermi akileraaruseriffik kommunimut aningaasanik nuussissaaq kingusinnerpaamik ulloq 30. juni. Akileraaruseriffiup aningaasat aalajangersarsinnaavai overassistentip ukiumut aningaasarsiai akissaatit nikerarneri kingulliit naapertorlugu tapeqanngitsut (SIK-mik isumaqatigiissut naapertorlugu) allaffissornermullu aningaasartuutinullu allanut 45,30 procentip annertoqqataanut tapeqartinneqartut tunngavigalugit, agguaariaaseq una naapertorlugu:
1) kommunit 3.000-inik amerlanerusunilluunniit innuttallit 1,00 sulisoq,
2) kommunit 2.500-inik kisianni 3.000-it ataallugit innuttallit 0,90 sulisoq,
3) kommunit 2.000-inik kisianni 2.500-it ataallugit innuttallit 0,80 sulisoq,
4) kommunit 1.500-inik kisianni 2.000-it ataallugit innuttallit 0,70 sulisoq,
5) kommunit 1.000-inik kisianni 1.500-it ataallugit innuttallit 0,60 sulisoq.
6) kommunit 750-inik kisianni 1.000-it ataallugit innuttallit 0,50 sulisoq.
7) kommunit 200-inik kisianni 750-it ataallugit innuttallit 0,25 sulisoq.
8) kommunit 200-it ataallugit innuttallit 0,10 sulisoq.
Imm. 4. § 7-imi taaneqartunik suliaqarnermut akissarsiaq kommunip akileraaruseriffiullu akornanni isumaqatigiissuteqarnikkut aalajangersarneqassaaq. Minnerpaamik akunnerit suliffiusut amerlassusaat 45,30 procentimik tapilerlugit sulisup aningaasarsiaanut kommunip aningaasartuutai naapertorlugit akissarsiaqartitsisoqassaaq.

Atuutilernissaa

§ 9. Nalunaarut ulloq 1. januar 2007-imi atuutilerpoq.

Namminersornerullutik Oqartussat, ulloq 2. november 2006

Josef Motzfeldt

/

Kaare Hagemann