Ulluunerani paaqqinnittarfiit, ulluunerani angerlarsimaffimmi paaqqinniffiit il.il. pillugit Inatsisartut peqqussutaanni nr. 7, 21. maj 2002-meersumi, Inatsisartut peqqussutaatigut nr. 4, 12. maj 2005-meersukkut allanngortinneqartumi § 3, imm. 4, aamma § 4, imm. 5 naapertorlugit aalajangersarneqarput:

 

Akit

§ 1. Meeqqat kommunip ulluunerani paaqqinnittarfiutaaniinnerinut kommunillu aaqqissugaanik ulluunerani angerlarsimaffimmi paaqqinniffinniinnerinut akit ukiumi tulliuttumi atuuttussat kommunalbestyrelsip kingusinnerpaamik novembarip qaammataani aalajangersartassavai.
Imm. 2. Akit kommunip ulluunerani paaqqinnittarfiutaasa kommunillu aaqqissugaanik ulluunerani angerlarsimaffimmi paaqqinniffiit ingerlanneqarnerannut aningaasartuutissatut kommunip ukiumoortumik missingersuusiai tunngavigalugit aalajangersarneqartassapput.

§ 2. Kommunalbetyrelsip akit assigiinngitsut meeqqanut arfineq-marluk inorlugit ukiulinnut aammalu meeqqanut arfineq-marluk sinnerlugit ukiulinnut aalajangersartassavai. Kommunalbestyrelsip aamma akit assigiinngitsut naalungiarsunnut inoorlaaniit marluk tikillugit ukiulinnut aammalu meeqqanut pingasuniit arfinillit tikillugit ukiulinnut aalajangersarsinnaavai.
Imm. 2. Kommunalbestyrelsip illoqarfinni nunaqarfinnilu akit assigiinngitsut aalajangersarsinnaavai. Illoqarfimmi nunaqarfimmiluunniit najugarisami paaqqinnittarfikkuutaartumik akinik aalajangersaasoqarsinnaanngilaq.
Imm. 3. Kommunalbestyrelsip kommunip aaqqissugaanik ulluunerani angerlarsimaffimmi paaqqinniffinnut aki immikkut ittoq aalajangersarsinnaavaa.
Imm. 4. Kommunalbestyrelsi meeqqanut nal. akunneri 25-t tikillugit kommunip ulluunerani paaqqinnittarfiutaanniittartunut imaluunniit kommunip aaqqissugaanik angerlarsimaffimmi paaqqinniffinniittartunut akigitinneqartup affaanik akiliuteqartoqartarnissaanik aalajangersaasinnaavoq.

§ 3. Akit kisitsisit alliartuaartut uku malillugit aalajangersarneqartassapput:  

Isertitarisartakkat:	Inissamut ataatsimut ingerlatsinermut aningaasartuutit pct.-iat:
	Pct. minnerp.	Pct. annerp.
99.999 kr.-it tikillugit	0	5
100.000 - 104.999 kr.-inut	6	6
105.000 - 109.999 kr.-inut	7	7
110.000 - 114.999 kr.-inut	8	8
115.000 - 119.999 kr.-inut	9	9

120.000 - 124.999 kr.-inut	10	10
125.000 - 129.999 kr.-inut	10	11
130.000 - 134.999 kr.-inut	10	12
135.000 - 139.999 kr.-inut	10	13
140.000 - 144.999 kr.-inut	10	14
145.000 - 149.999 kr.-inut	10	15
150.000 - 154.999 kr.-inut	10	17
155.000 - 159.999 kr.-inut	10	19
160.000 - 164.999 kr.-inut	10	21
165.000 - 169.999 kr.-inut	10	23
170.000 - 174.999 kr.-inut	10	25
175.000 - 179.999 kr.-inut	10	27
180.000 - 184.999 kr.-inut	10	29
185.000 - 189.999 kr.-inut	10	31
190.000 - 194.999 kr.-inut	10	33
195.000 - 199.999 kr.-inut	10	35
200.000 - 204.999 kr.-inut	10	37
205.000 - 209.999 kr.-inut	10	39
210.000 - 214.999 kr.-inut	10	41
215.000 - 219.999 kr.-inut	10	43
220.000 - 224.999 kr.-inut	10	45
225.000 - 229.999 kr.-inut	10	47
230.000 - 234.999 kr.-inut	10	49
235.000 - 239.999 kr.-inut	10	51
240.000 - 244.999 kr.-inut	10	53
245.000 - taakkulu qaangerlugit	10	55

 

§ 4. Akiliisussaatitaasoq imaluunniit akiliisussaatitaasut, tak. § 5, kommunalbestyrelsip § 1, imm. 1 naapertorlugu aalajangiinerata kinguninngua akit annertussusissaat pillugit ilisimatinneqassapput.

Akiliisussaatitaaneq

§ 5. Akiliisussaatitaapput meeqqap inuusuttulluunniit inuit allattorsimaffiat malillugu najugaqarfigisaa imaluunniit najugaqarfigisai (nalinginnaasumik najugaq), taamaattorli tak. imm. 2 aamma 3 kiisalu § 6.
Imm. 2. Meeraq atuarfimmiinnerminut assigisaaniinnerminulluunniit atatillugu nalinginnaasumik najugarisami avataani najugaqarallarpat, akiliisussaatitaapput meeqqap nalinginnaasumik najugaqarfigisaa imaluunniit najugaqarfigisai. Meeqqap najugaqarallarfeqalernerata ki-ngorna meeqqap nalinginnaasumik najugarisaata sumiinnera nalornissutigineqalerpat akiliisussaatitaasut tassaassapput meeqqap nalinginnaasumik najugarisassaatut ataatsimut naliliineq tunngavigalugu naatsorsuutigisaq imaluunniit naatsorsuutigisat.
Imm. 3. Meeraq ilaqutariinni paarineqarpat paaqqinninnissamullu akuersissuteqartoqarsimappat akiliisussaatitaapput paaqqinninnissamik akuersissummik peqartoq imaluunniit peqartut.

 

Akiliiffiusussaanngitsumik ilaannakortumilluunniit akilimmik inissaq

§ 6. Meeqqanut 15-it inorlugit ukiullit ulloq unnuarlu paaqqinnittarfinni imaluunniit pisortat aaqqissugaannik ilaqutariinni paarineqartussatut inissinneqarsimasut kommunip ulluunerani paaqqinnittarfiutaanni kommunillu aaqqissugaanik ulluunerani angerlarsimaffimmi paaqqinniffinni inissanik akiliiffiusussaanngitsunik ilaannakortumilluunniit akilinnik tunniussisoqartarpoq.

§ 7. Kommunalbestyrelsi suliniutinik aallartitsinissamik, meeqqanik inuusuttunillu ikiorsiisarneq pillugu Inatsisartut peqqussutaat naapertorlugu aalajangiinerminut atatillugu aalajangiisinnaavoq kommunip ulluunerani paaqqinnittarfiutaani kommunilluunniit aaqqissugaanik ulluunerani angerlarsimaffimmi paaqqinniffimmi akiliiffiusussaanngitsumik ilaannakuusumilluunniit akilimmik inissamut aningaasaliissuteqartoqarnissaanik.

 

Qatanngutigiinnut akikillisaat

§ 8. Akiliisussaatitaasoq imaluunniit akiliisussaatitaasut meeqqap 15-it inorlugit ukiullip kommunip ulluunerani paaqqinnittarfiutaaniittartup kommunilluunniit aaqqissugaanik ulluunerani angerlarsimaffimmi paaqqinniffimmiittartup ataatsip saniatigut meeqqanik allanik akiliissutassaqarpata, meeqqamut angajullermut tamakkiisumik akiliisoqartassaaq sinnerinullu meeqqamut ataatsimut affarmik akiliisoqartassalluni.

Naatsorsuinermi tunngavissaq

§ 9. Kommunip ulluunerani paaqqinnittarfiutaaniinnermut kommunilluunniit aaqqissugaanik ulluunerani angerlarsimaffimmi paaqqinniffimmiinnermut akiliutissaq akiliisussaatitaasup imaluunniit akiliisussaatitaasut ukiumi aningaasarsiorfiusumi inaarneqarsimasumi kingullermi aningaasarsiaat akileraaruteqaataasussat tunngavigalugit aalajangersarneqassapput.
Imm. 2. Akiliisussaatitaasup imaluunniit akiliisussaatitaasut aningaasarsiamik akileraaruteqaataasussat imm. 1-imi taaneqartut allannguutaannik kommunalbestyrelsimut ilisimatitsissuteqassapput.

§ 10. Kommunalbestyrelsip pineqartunit isertitarisartakkat annertuutigut allannguuteqarpata allannguuteqassangatinneqarpataluunniit aalajangersinnaavaa isertitarisartakkat akiliutissap aalajangersarneqarnissaanut tunngaviusussat tassaassasut maannakkorpiaq isertitarisartakkat ukioq kaajallallugu tamakkiisumik isertitarisassatut naatsorsuussanut naleqqussariikkat.
Imm. 2. Akileraarusiisarnermi oqartussaasut aningaasarsianik akileraaruteqaataasussanik siusinnerusukkut annertussusiliisimanngippata akiliisarnissaq pisassaaq siumoortumik nalunaarsuineq tunngavigalugu imaluunniit maannakkorpiaq isertitarisartakkat ukioq kaajallallugu isertitarisassatut naatsorsuussanut nalequssareerlugit.

 

Isertitarisartakkat pillugit nalunaarut

§ 11. Meeqqap kommunip ulluunerani paaqqinnittarfiutaaniittalerneranut imaluunniit kommunip aaqqissugaanik ulluunerani angerlarsimaffimmi paaqqinniffimmiittalerneranut atatillugu, imaluunniit kikkut akiliisussaatitaanerisa allannguuteqarnerinut atatillugu, tak. § 5, akiliisussaatitaasoq imaluunniit akiliisussaatitaasut isertitarisartakkatik pillugit allaganngorlugu nalunaarummik kommunalbestyrelsimut tunniussaqartassapput.
Imm. 2. Isertitarisartakkat pillugit nalunaarut kommunalbestyrelsimut piginnaatitsissummik ilaqartinneqassaaq, meeraq kommunip ulluunerani paaqqinnittarfiutaaniittartillugu imaluunniit kommunip aaqqissugaanik ulluunerani angerlarsimaffimmi paaqqinniffimmiittartillugu akiliisussaatitaasup imaluunniit akiliisussaatitaasut aningaasarsiaat pillugit paasissutissanik akileraartarnermut oqartussaasunut paasiniaasarsinnaanermik imaqartumik.
Imm. 3. Akiliisussaatitaasup imaluunniit akiliisussaatitaasut nalunaarut imm. 1-imi taaneqartoq tunniutinngippassuk akiliutissaq akimik qaffasinnerpaamik annertussusilerlugu aalajangersarneqassaaq.

§ 12. Paaqqinnittarfinnut ataasiakkaanut akiliisoqartarpat § 11, imm. 1-imiit 3-mut aalajangersakkat taamatulli atuutissapput.

 

Akiligassat akilinngisat aamma paaqqinnittarfimmiikkunnaartitsisarneq

§ 13. Akiliisussaatitaasoq imaluunniit akiliisussaatitaasut akiligassaminnik akilinngisaqalerpata, pineqartullu akiligassamik akilersornissaat pillugu isumaqatigiissusioqqullugit allakkatigut eqqaasitsissummik tigusaqareersimappata meeraq pineqartoq ulluunerani paaqqinnittarfimmiikkunnaartinneqassaaq imaluunniit ulluunerani angerlarsimaffimmi paaqqinniffimmiikkunnaartinneqassalluni, tak. § 14.
Imm. 2. Akiligassat akilinngisat tamarmik ullut 14-it qaangiutsinnagit akilerneqarpata paaqqinnittarfimmiikkunnaartitsinermik aalajangerneq atorunnaassaaq.
Imm. 3. Akiligassaqarneq pissutigalugu meeqqap paaqqinnittarfimmiikkunnaartittariaqarneranik akiliisussaatitaasumut imaluunnit akiliisussaatitaasunut nalunaaruteqarneq peqatigalugu, kingusinnerunngitsumik, isumaginninnermik suliaqartut kalerrinneqassapput.

§ 14. Meeqqamik kommunet ulluunerani paaqqinnittarfiutaaniit imaluunniit kommunet aqqutigalugit ulluunerani paaqqinnittarfinniititsinerit tamarmik pinngitsooratik minnerpaamik ullunik 14-nik sioqqutsisumik nalunaarutigineqartassapput qaammatip 1.-ani atuutilersussatut.

 

Atortuulersitsineq

§ 15. Nalunaarut una ulloq 1. november 2006 atortuulerpoq. Ilutigalugu meeqqat kommunip ulluunerani paaqqinnittarfiutaaniinnerannut kommunillu aaqqissugaanik ulluunerani angerlarsimaffimmi paaqqinniffimmiinnerannut akiliuteqartarneq pillugu nalunaarut nr. 28, 13. september 1989-imeersoq atorunnaarsinneqarpoq.

Namminersornerullutik Oqartussat, ulloq 14. september 2006

Doris Jakobsen

/

Lise Lennert Olsen