Meeqqanut suli atualinngitsunut perorsaanikkut inerikkiartuutaasumik ulluunerani neqeroorutinut akiliuteqartarneq pillugu Namminersorlutik Oqartussat nalunaarutaat
Meeqqanut suli atualinngitsunut perorsaanikkut inerikkiartuutaasumik ulluunerani neqeroorutit pillugit Inatsisartut peqqussutaanni nr. 10, 5. december 2008-meersumi § 5, imm. 1, nr. 1 naapertorlugu aalajangersarneqarpoq.
Akit
§ 1. Kommunalbestyrelsip meeqqat meeqqanut suli atualinngitsunut ulluunerani neqeroorutiniinnerinut ukiup tulliani akiliutissat kingusinnerpaamik novemberip qaammataani aalajangersassavaat.
Imm. 2. Akit aalajangersarneqassapput kommunit meeqqanut suli atualinngitsunut ulluunerani neqeroorutinut ukiumut aningaasartuutissatut missingersuusiaat aamma akiliisussaatitaasut aningaasaqarnikkut atugarisaat tunngavigalugit, akiliisussaatitaasullu ukiumut isertitaat naapertorlugit aalajangiunneqassallutik.
§ 2. Kommunalbestyrelsip akit meeqqanut 0-imiik 2-nut aamma 3-niit 6-inut ukiulinnut assigiinngitsut aalajangiussinnaavai.
Imm. 2. Sunngiffimmi sammisaqartitsinerup aaqqissugaanera pillugu Inatsisartut inatsisaata akuersissutigineqarnissaata tungaanut, tak. Meeqqanut suli atualinngitsunut perorsaanikkut inerikkiartuutaasumik ulluunerani neqeroorutit pillugit Inatsisartut peqqussutaanni nr. 10, 5. december 2008-meersumi § 31, imm. 3, meeqqat fritidshjemminiinnerinut akit immikkut aalajangersarneqarsinnaapput.
Imm. 3. Kommunalbestyrelsip kommunimi illoqarfinni nunaqarfinnilu akit assigiinngitsut aalajangiussinnaavai. Taamaattoq illoqarfiup nunaqarfiulluunniit ataatsip iluani meeqqeriviit ataasiakkaarlugit assigiinngitsunik akeqartussanngorlugit aalajangersaasoqarsinnaanngilaq.
Imm. 4. Kommunalbestyrelsip angerlarsimafinni paarsinermut kommunip aaqqissugaanut immikkut akiliuteqartarnissaq aalajangiussinnaavaa.
Imm. 5. Kommunalbestyrelsip meeqqat sapaatip-akunneranut nalunaaquttap-akunneri 25-t tikillugit meeqqanut suli atualinngitsunut ulluunerani neqeroorutiniittartut affaannarmik akeqarnissaat aalajangiussinnaavaa.
§ 3. Akit skala ataaniittoq malillugu aalajangerneqartassapput:
| Isertitarisartakkat: | Inissamut ataatsimut aningaasartuutit %-iat | |
| % minnerpaamik | % annerpaamik | |
| Indtil - 149.999 kr. | 0 | 5 |
| 150.000 – 174.999 kr. | 5 | 6 |
| 175.000 – 199.999 kr. | 5 | 7 |
| 200.000 – 224.999 kr. | 5 | 8 |
| 225.000 – 249.999 kr. | 5 | 10 |
| 250.000 – 274.999 kr. | 5 | 15 |
| 275.000 – 299.999 kr. | 10 | 20 |
| 300.000 – 324.999 kr. | 10 | 22 |
| 325.000 – 349.999 kr. | 10 | 24 |
| 350.000 – 374.999 kr. | 10 | 26 |
| 375.000 – 399.999 kr. | 10 | 28 |
| 400.000 – 424.999 kr. | 10 | 30 |
| 425.000 – 449.999 kr. | 10 | 32 |
| 450.000 – 474.999 kr. | 10 | 34 |
| 475.000 – 499.999 kr. | 10 | 36 |
| 500.000 – 549.999 kr. | 10 | 39 |
| 550.000 – 599.999 kr. | 10 | 42 |
| 600.000 – 649.999 kr. | 10 | 45 |
| 650.000 – 699.999 kr. | 10 | 48 |
| 700.000 – 749.999 kr. | 10 | 51 |
| 750.000 – 799.000 kr. | 10 | 54 |
| 800.000 – og derover | 10 | 57 |
§ 4. Akiliisussaatitaasoq imaluunniit akiliisussaatitaasut , tak. § 5, kommunalbestyrelsip § 1, imm. 1 naapertorlugu akit annertussusissaanut aalajangiinerata kinguninngua, akit annertussusaat pillugu ilisimatinneqassapput.
Akiliisussaatitaaneq
§ 5. Akiliisussaatitaapput meeqqap inuit aqqisa allattorsimaffiat naapertorlugu najugaqarfigisaa imaluunniit najugaqarfigisai, taamaattoq takukkit imm. 2 aamma 3, kiisalu § 6.
Imm. 2. Meeraq ilinniarnermut assigisaanulluunniit atatillugu nalinginnaasumik najugarisami avataani najugaqarallarpat, akiliisussaatitaapput meeqqap nalinginnaasumik najugaqarfigisaa imaluunniit najugaqarfigisai. Meeqqap najugaqarallarfeqalernerata kingorna sumi nalinginnaasumik najugaqarfeqarnera nalornisigineqalissappat, akiliisussaatitaasut tassaassapput ataatsimoortumik naliliisoqareerneratigut meeqqat nalinginnaasumik najugaqarfigisaatut ilimagisariaqartut.
Imm. 3. Meeraq nammineq aaqqissuutamik ilaqutariinni paarineqarpat akiliisussaatitaasut Meeqqanik inuusuttunillu ikiorsiisarneq pillugu Inatsisartut peqqussutaanni § 20, imm. 3 naapertorlugu aalajangerneqassapput.
Akiliiffiusussaanngitsumik ilaannakortumilluunniit akilimmik inissaq
§ 6. Meeqqanut suli atualinngitsunut ulluunerani neqeroorutiniittunut kommunillu paaqqinnittarfiutaanniittunut 15-init inorlugit ukiulinnut inissamik akiliiffiusussaanngitsumik tamakkiisumik tunniussisoqartarpoq meeraq ulloq-unnuarlu paaqqinnittarfinniittunut imaluunniit pisortatigoortumik ilaqutariinni paaqqutarineqartunut.
§ 7. Meeqqanik inuusuttunillu ikiorsiisarneq pillugu Inatsisartut peqqussutaanni § 9 naapertorlugu ikiuiniarluni suliniutinik aallartitsisoqarnissaanik aalajangiinermut atatillugu kommunalbestyrelsi meeqqanut suli atualinngitsunut neqeroorutini inissamik akiliiffiusussaanngitsumik ilaannakortumilluunniit akiliiffiusussamik tunniussinissamik aalajangiisinnaavoq.
Qatanngutigiinnut akikillisaat
§ 8. Akiliisussaatitaasoq imaluunniit akiliisussaatitaasut meeqqap 15-it inorlugit ukiullip meeqqanut suli atualinngitsunut ulluunerani neqeroorutiniittartup aamma fritidshjemmimiittartup ataatsip saniatigut meeqqanik allanik akiliissutassaqarunik meeqqamut angajullermut tamakkiisumik akiliisoqartassaaq, sinnerinullu affarmik akiliisoqartassalluni.
Naatsorsuinermi tunngavissaq
§ 9. Meeqqanut ulluunerani neqeroorutiniittartunut akiliut aalajangerneqassaaq akiliisussaatitaasup imaluunniit akiliisussaatitaasut ukiumi isertitaqarfiusumi kingulliulluni naammassisumi isertitaat akileraaruteqaataasussat aallaavigalugit.
Imm. 2. Akiliisussaatitaasup imaluunniit akiliisussaatitaasut isertitat akileraaruteqaataasussat imm. 1-imi pineqartut allanngorpata kommunalbestyrelsi kalerrissavaat.
Imm. 3. Meeqqanut suli atualinngitsunut ulluunerani neqeroorutinut akiliutit kommunalbestyrelsip allanngortissavai, tak. imm. 1. Taamaattoq taama pisoqannginnerani kommunalbestyrelsi isertitat akileraaruteqaataasussat imm. 1-imi pineqartut allannguutaat pillugit uppernarsaatissanik piniaqqaassaaq. Meeqqanut suli atualinngitsunut ulluunerani neqeroorutiniinnermut akiliutit allanngornerat qaammammik ataatsimik sioqqutsisumik nalunaarutigineqassaaq, qaammatillu aallaqqaataaniit atuutilissalluni.
§ 10. Kommunalbestyrelsip aalajangersinnaavaa, isertitat akiliutinut tunngavigineqartut, tassaassasut maannakkorpiaq isertitat, naleqqiussinikkut ukiumoortumik tamakkiisumik isertitatut naatsorsorneqartut, akiliisussaatitaasoq imaluunniit akiliisussaatitaasut isertitamikkut annertuumik allanngortoqarnera uppernarsarsinnaappassuk.
Imm. 2. Akileraarusiisarnermi oqartussaasut aningaasarsianik akileraaruteqaataasussanik siusinnerusukkut annertussusiliisimanngippata akiliisarnissaq pisassaaq siumoortumik nalunaarsuineq tunngavigalugu imaluunniit maannakkorpiaq isertitarisartakkat ukioq kaajallallugu isertitarisassatut naatsorsuussanut naleqqussareerlugit.
Isertitat pillugit nalunaarut
§ 11. Meeqqap meeqqanut suli atualinngitsunut ulluunerani neqeroorummut iserneranut atatillugu imaluunniit akiliisussaatitaasup allanngorneranut atatillugu, tak. § 5, akiliisussaatitaasoq imaluunniit akiliisussaatitaasut isertitat pillugit allakkatigut kommunalbestyrelsimut nalunaaruteqassapput.
Imm. 2. Isertitat pillugit nalunaarummut ilaassaaq kommunalbestyrelsimut pisinnaatitsissut, meeqqap meeqqanut ulluunerani neqeroorutiniinnera tamaat kommunalbestyrelsip akileraartarnermi oqartussaasunit akiliisussaatitaasoq imaluunniit akiliisussaatitaasut isertitaat pillugit paasiniaasinnaatinneqarneranik imaqartoq.
Imm. 3. Akiliisussaatitaasup imaluunniit akiliisussaatitaasut imm. 1-imi taaneqartutut nalunaaruteqanngippata, akiliutissaq qaffasinnerpaaq aalajangiunneqassaaq.
Akiligassat akilinngisat aamma ulluunerani neqerooruteqartarnermiikkunnaarsitsisarneq
§ 12. Akiliisussaatitaasoq imaluunniit akiliisussaatitaasut akiligassaminnik akilinngisaqalerpata, pineqartullu akiligassamik akilersornissaat pillugu isumaqatigiissusioqqullugit akiliinissamik eqqaasitsissummik tigusaqareersimappata meeraq pineqartoq perorsaanermik inerikkiartuutaasumik ulluunerani neqeroorutaasumiikkunnaartinneqassaaq, tak. § 13.
Imm. 2. Akiligassat akilinngisat tamarmik, akiliinissamik eqqaasitsissutip ullulerneraniit ullut 14-it qaangiutsinnagit akilerneqarpata, perorsaanermik inerikkiartuutaasumik ulluunerani neqeroorutaasumiikkunnaarsitsinermik aalajangiineq atorunnaassaaq.
Imm. 3. Akiligassanik akilinngisaqarneq pissutigalugu meeqqap perorsaanermik inerikkiartuutaasumik ulluunerani neqeroorutaasumiikkunnaarsittariaqarneranik akiliisussaatitaasumut imaluunniit akiliisussaatitaasunut nalunaaruteqarneq peqatigalugu isumaginninnermik suliaqartut kalerrinneqassapput.
§ 13. Meeqqamik perorsaanermik inerikkiartuutaasumik ulluunerani neqeroorutaasumiikkunnaarsitsinerit tamarmik minnerpaamik qaammammik ataatsimik sioqqutsisumik nalunaarutigineqartassapput qaammatip aallaqqaataani atuutilertussatut.
Atuutilersitsineq
§ 14. Nalunaarut manna 1. januar 2010 atuutilerpoq. Ilutigalugu Meeqqat ulluunerani paaqqinnittarfiutaaniinnerinut kommunillu aaqqissugaanik ulluunerani angerlarsimaffimmi paaqqinniffinniinnerinut akiliuteqartarneq pillugu Namminersornerullutik Oqartussat nalunaarutaat nr. 18, 14. september 2006-imeersoq atorunnaarsinneqarpoq.
Imm. 2. Meeqqanut suli atualinngitsunut perorsaanikkut inerikkiartuutaasumik ulluunerani neqeroorutinut akiliuteqartarnermut kommunalbestyrelsip 2010-mut aalajangiinermini Meeqqat kommunip ulluunerani paaqqinnittarfiutaaniinnerinut kommunillu aaqqissugaanik ulluunerani angerlarsimaffimmi paaqqinniffinniinnerinut akiliuteqartarneq pillugu nalunaarut nr. 18, 14. september 2006-imeersoq najoqqutarissavaa.
Namminersorlutik Oqartussat, ulloq 27. november 2009
Mimi Karlsen
/
Lise Lennert Olsen