Nakorsaatit pillugit inatsisartut peqqussutaanni nr. 1-imi 12. maj 2005-imeersumi § 5, imm. 2, § 13, imm. 2, aamma § 24, imm. 4, naapertorlugit aalajangersarneqarput:

Akuersissut

§ 1. Nakorsaatinik niuertarfinni pisiassanik tuniniaanissamut passussinissamullu akuersissummik peqarnissaq piumasaqaataavoq.

§ 2. Nakorsaatinik pisiassanik tuniniaanissamut passussinissamullu qinnuteqarnikkut Nunatta nakorsaataasivia akuersissuteqarsinnaavoq. Qinnuteqaat Nunatta nakorsaataasivianut nassiunneqassaaq.

§ 3. Akuersissut niuertarfinnik piginnittunut tunniunneqassaaq.

Imm. 2. Akuersissuteqarfigineqarnissaq anguniarlugu pineqartoq

1) 21-nik ukioqalereersimassaaq,

2) nammineersinnaassusiiagaasimassanngilaq nakkutigineqartussanngortitaasimassananiluunniit,

3) akiliisinnaajunnaalersuussanngilaq akilersuisinnaajunnaalersuunaniluunniit, aamma

4) imatut pissusilersorsimassanngilaq suliffeqarfimmik naammaginartumik ingerlatsisinnaanera naatsorsuutigineqarsinnaanani.

§ 4. Piginneqatigiiffinni suliffeqarfinniluunniit pisortat siulersuisunullu ilaasortat nakorsaatinik niuertarfinni pisiassanik tuniniaanissamut akuersissummik pisaarusuttut § 3, imm. 2-mi piumasaqaatinik namminneerlutik eqquutitsisimassapput. Piginneqatigiiffiit aqutsisuini siulersuisuiniluunniit nutaanik ilaasortaqalerpat, taakkuttaaq § 3, imm. 2-mi piumasaqaatinik eqquutitsissapput. Allanngortoqarneraniit kingusinnerpaamik ullut 7 qaangiuppata tamanna Nunatta nakorsaataasivianut nalunaarutigineqassaaq.

Imm. 2. Suliffeqarfinni nakorsaatinik pisiassanik nioqquteqarnissamut akuersissummik peqartuni niuertarfinnik aqutsisut, niuertarfinni naalakkat, immikkoortortani aqutsisut, nunaqarfinni niuertut § 3, imm. 2-mi piumasaqaatinik naammassinnissimassapput kiisalu Nunatta nakorsaataasivianit akuerineqartussaallutik suliffeqarfimmik aqutsilinnginnerminni.

§ 5. Akuersissut tuniniaavimmut aalajangersimasumut tuniniaavinnulluunniit aalajangersimasunut tamanit iserfigineqarsinnaasunut attuumassuteqassaaq.

Imm. 2. Akuersissut niuertarfimmi pisiniartunit takuneqarsinnaasunngorlugu inissinneqassaaq.

§ 6. Akuersissut ukiuni tallimani atuuppoq.

Imm. 2. Akuersissutip assinga Nunatta Nakorsaataasiviata peqqissaaveqarfimmi pineqartumi nakorsaanermut, Peqqissaaveqarfinnik Aqutsivimmut, Peqqissutsimut Pisortaqarfimmut kiisalu Peqqinnissakkut Nakkutilliisoqarfimmut nassiunneqassaaq.

Atorunnaarnera utertinneqarneralu

§ 7. Akuersissut atorunnaassaaq

1) piginnittoq toqukkut qimaguppat

2) nutarternissaanut qinnuteqaat Nunatta nakorsaataasivianut tunniunneqarsimatinnagu akuersissutip atuuffia qaangiuppat.

§ 8. Nuna tamakkerlugu nakorsaasiortup akuersissut utertissinnaavaa

1) akuersissummik piginnittoq § 3, imm. 2-mi piumasaqaatinik eqquutitsisinnaajunnaarpat,

2) nakorsaatinik pisiassanik tuniniaanermi passussinermilu malittarisassat arlaleriarluni ingasattumilluunniit unioqqutinneqarsimappata, imaluunniit

3) akuersissummik piginnittoq nakkutilliinermi inatsisinik tunngaveqartumik peqqussummik pisussaaffiliinermilluunniit malinnikkusunngippat.

Imm. 2. Akuersissut imm. 1, naapertorlugu uterteqquneqarsimappat, ingerlaannartumik taanna Nunatta nakorsaataasivianut utertinneqassaaq.

§ 9. Akuersissut § 8, imm. 1 naapertorlugu uterteqquneqarsimappat imaluunniit § 7, naapertorlugu atorunnaarsimappat, § 6, imm. 2-mi oqartussat taaneqartut Nunatta nakorsaataasiviata ilisimatissavai.

Tuniniaanermi passussinermilu malittarisassat

§ 10. Nakorsaatit allattorsimaffimmi H-mi allassimasut kisimik piniarneqarsinnaapput.

§ 11. Nakorsaatit allattorsimaffimmi H-mi allassimasut (M)-imik nalunaaqutsikkat ikinnerpaaffissalerneqartumik nakorsaataatigineqartussaapput. Akuersissummik piginnittoq ikinnerpaaffissalerneqartunik nakorsaataatigineqartussanik naleqquttumik annertussusilinnik toqqortaateqarnissamik isumannaarinnittussaavoq. Nakorsaatinik pisiassanik ikinnerpaaffissalerneqartunik pisisussanut naleqquttumik annertussusilinnik uninngasuuteqartoqassaaq, tamanna silamit pisunilluunniit siumut naatsorsorneqarsinnaanngitsunit akornuserneqanngippat.

§ 12. Nakorsaatinik tuniniaaneq inuup pisiniartitsineratigut taamaallaat pisinnaavoq.

Pineqaatissiinerit

§ 13. § 1, § 5, imm. 2, § 8, imm. 2, § 10, § 11 aamma § 12 unioqqutikkaanni akiliisitsisoqarsinnaavoq.

Atuutilerfia

§ 14. Nalunaarut atuutilerpoq ulloq 1. februar 2006. Tamanna peqatigalugu atortuujunnaarsinneqarpoq Nakorsaatinik niuertarfinni pisiassanik tuniniaanissamut passussinissamullu akuersissuteqartarneq pillugu Namminersornerullutik Oqartussat nalunaarutaat nr. 24. 14. november 2005-imeersoq.

Namminersornerullutik Oqartussat, ulloq 13. januar 2006

Asii Chemnitz Narup

/

Søren Rendal