Nakorsaatit pillugit inatsisartut peqqussutaanni nr. 1-imi 12. maj 2005-imeersumi § 18, imm. 3, § 24, imm. 4, kiisalu § 25, imm. 2 aamma 3, naapertorlugit aalajangersarneqarput:

 

Atuuffissaa

§ 1. Nalunaarummi matumani malittarisaliuunneqarput uumasut nakorsaasa inuutissarsiutigalugu uumasuutigisanik nakorsaasersuisinnaanerat, tamatumunnga ilanngullugit uninngatitsigallartarnermut piffissaliussanut nakkutilliinermilu iliuusissanut maleruagassat.

 

Nalunaajarneqarneri

§ 2. Nersutaatit imatut paasineqassaaq uumasoq ataaseq imaluunniit uumasoqatigiit ataatsimoortut aalajangersimasumik siunertaqarluni inuussutissarsiornermi atorneqartut, nunap immikkoortuani aalajangersimasumiittut piginnittullillu.
Imm. 2. Uumasunik piginnittoq imaluunniit nersutinik piginnittoq imatut paasineqassaaq inatsisit tunngavigalugit inuttulluunniit uumasuummik nersutaatinilluunniit piginnittutut akisussaasuusoq.

§ 3. Bakterianut akiuussutissaq imatut paasineqassaaq nakorsaatit bakterianut akiuussutissamik akoorutissanillu katsorsaassutaasartunik imaqartut.

§ 4. Uumasunut nakorsaataasiviit imatut paasineqassaaq nakorsaataatit, uumasut nakorsaannit innersuussineq naapertorlugu uumasunut aalajangersimasunut nersutaatinulluunniit atorneqarnissaat siunertaralugu nersutaatinik piginnittumit inummilluunniit allamit toqqortaatigineqartut.

 

Nakorsaatit tigummigallartitsinissamik piffissaliiffiusussat

§ 5. Nakorsaatinik tigummigallartitsinissamik piffissaliiffiusussanik atuinermi uumasuutit taakkunanngalu tunisassiat tigummigallarneqarnissaat pillugit uumasut nakorsaat uumasuutilimmut imaluunniit nersutaatilimmut allakkatigut ilitsersuusiussaaq.
Imm. 2. Tigummigallartitsinissamik nalunaarummi paasissutissat makku takuneqarsinnaassapput:
1)  nappaatip suussusersinera,
2)  uumasut suut, uumasullu qassit katsorsarneqarnersut (paatsoorneqarsinnaanngitsumik sorliussusiliinerit imaluunniit tamanna ajornassappat amerlassutsit, oqimaassusiisa missiliorneri aamma uumasuusiviup immikkoortortaa imaluunniit assingusumik immikkoortiterisimaneq),
3)  uumasut nakorsaata ulloq katsorsaaffia,
4)  nakorsaat atorneqartoq,
5)  nakorsaatip annertussusiliivigineqarnera qanorlu ilillugu nakorsaasersuutigineqarnera, aamma
6)  tigummigallartitsinissaq pillugu nalunaarummi piffissaliussat.
Imm. 3. Uumasunut nakorsaatitut tunisassiaq pillugu allagartami akuerisaasumi annertussusiliussassatut taaneqartumit annertunerusumik nakorsaammik uumasuutinut atuinermi uumasut nakorsaat tigummigallartitsinissamik naleqquttumik sivisunerusumik piffissaliissaaq, nakorsaatit timimi amiakkuusut tigummigallartitsinissamut piffissaliussaq qaangiuppat annertunerpaaffissaattut killiussamik qaangiisimannginnissaat qulakkeerniarlugu.

§ 6. Nakorsaat pineqartoq uumasunik pineqartunik tigummigallartitsinissamut piffissaliiffiusimanngippat uumasunut katsorsarneqartunut neqaannillu tunisassiassanik nerisassiassatulluunniit aalajangiussaasunik tigummigallartitsinissamut uumasut nakorsaat piffissaliissaaq. Tigummigallartitsinissamut piffissaliussaq, taamaattorli tak. imm. 2, sivikinnerpaamik:
1) toqoraanissaq sioqqullugu ullunik 28-nik sivisussuseqassaaq,
2)  immuk tuniniarneqalertinnagu ullut unnuallu 7-t ingerlaqqaassapput,
3) manniit tuniniarneqalertinnagit ullut unnuallu 10-t ingerlaqqaassapput,
4) aalisakkat tuniniarneqalertinnagit ullut kiassusillit 500-t ingerlaqqaassapput, assersuutigalugu ullut 100-t imeq 5°C-mik kiassuseqartillugu.
Imm. 2. Imm. 1-mi tigummigallartitsinissamut piffissaliussat eqqarsaatigalugit taakku nul-umut inissinneqassapput, uumasunut nakorsaatit akiuussutissapajaatut sunniutillit akuutissaat sunniuteqartussat kimittussutsimikkut annerpaamik millionerarterummik annertussuseqarpata.

§ 7. Uumasut tigummigallartitsinissamut piffissaliinermut ilaatinneqartut toqunneqartariaqartullu toqoraavimmut aatsaat tunniunneqarsinnaapput uumasut nakorsaannit toqoraaqqusinermik nalunaarummik ilaqartinneqarpata.

 

Nakorsaatit timimi amiakkuusut aamma tigummigallartitsinissamut piffissaliussat

§ 8. Nakorsaatit annerpaaffissatut killiliussaasimasut qaangerlugit uumasut timaanni amiakkoqartut paasineqarpat, tamatumunnga patsisaasoq paasiniarlugu uumasuni pinngorfiusoq imaluunniit uumasuutini nersutit pinngorfigisimasaanni erseqqinnerusumik misissuineq nakkutilliinerlu uumasut nakorsaanerata aallartissavaa.
Imm. 2. Uumasut uumasuutiniit peerneqarnissaat, piffissamiluunniit erseqqinnerusumik aalajangiussaasumi uumasunit pineqartunit suliffeqarfimmiilluunniit tunisassiat peerneqarnissaat pillugu uumasut nakorsaanerat inerteqqummik nalunaaruteqarsinnaavoq.
Imm. 3. Nerisassiat isumannaatsuunissaat pisariaqartinneqarpat, imm. 1-mi misissuinissaq taaneqartoq tunngavigalugu uumasut nakorsaanerata uumasut pineqartut erseqqinnerusumik taaneqartumik sivisussusilimmik tigummigallarneqarnissaat aalajangiussinnaavaa.

§ 9. Uumasumut nakorsaatip atorneqareernerata kingorna tigummigallartitsinissamut piffissaliussatut aalajangiussaq suli qaangiussimanngitsoq uumasunik toqoraavimmi pasitsaanneqarpat, toqoraanissaq kinguartinneqassaaq tigummigallartitsinissamut piffissaliussap qaangiunissaata tungaanut, takuulli imm. 2.
Imm. 2. Uumasup toqunneqarnissaata kinguartinnissaanut toqoraavik periarfissaqanngippat, imaluunniit uumasup atugarissaarnissaata pisariaqartippagu, tigummigallartitsinissamut piffissaliussap qaangiunnissaa sioqqullugu uumasup toqunneqarnissaa uumasut nakorsaanerata aalajangiussinnaavaa. Taamaattoqartillugu timaa igitassartaalu tigummigallarneqassapput, erseqqinnerusumik misissuisoqareernissaata tungaanut.

 

Nakorsaatinik inatsisitigut akuerisaanngitsunik katsorsaaneq

§ 10. Nakorsaatinik inatsisitigut akuerisaanngitsunik katsorsaasoqartoq paasineqarpat, imaluunniit tamatumunnga tunngavissaqartumik pasinartoqarpat, erseqqinnerusumik misissuinissat pisariaqartut uumasut nakorsaanerata aallartissavai, aamma makku ilanngullugit:
1)  nakorsaatit timimi amiakkoqarnerannut patsisaasut kiisalu nakorsaatit inatsisitigut akuerisaanngitsut katsorsaatigineqarsimasut annertussusigiunnagaat paasiniarlugit uumasuutini aallaaviusuni misissuineq, aamma
2) nakorsaatit pineqartut aallaaviat aallaaviiluunniit pillugit misissueqqissaarneq.
Imm. 2. Misiligutissanik uumasut tigusiffigineqartut erseqqissumik nalunaaqutserneqassapput imaluunniit sorliussusersineqassapput. Qanorluunniit pisoqaraluarpat misissuinermi inernerit tiguneqartinnagit uumasuutinit qimagutsinneqannginnissaat nersutaatinik piginnittup akisussaaffigaa.
Imm. 3.Nakorsaatinik inatsisitigut akuerisaanngitsunik katsorsaasoqarsimasoq paasineqarpat uumasut pineqartut ingerlaannartumik toqunneqassapput uumasullu nakorsaanerata innersuussinera naapertorlugu suujunnaarsinneqassallutik. Uumasup toqunneqarnissaanut suujunnaarsinneqarnissaanullu, aamma toqoraavimmut, ikuallaavimmut assigisaanulluunniit assartorneqarnissaanut akisussaaffik taakkununngalu aningaasartuutit nersutaatinik piginnittup isumagisassarai.

§ 11. Uumasup nakorsaammik inatsisitigut akuerisaanngitsumik katsorsarneqarsimaneranik toqoraavimmi pasitsaassisoqarpat, pasitsaassineq taanna toqoraavimmi pisortat qullersaata uumasut nakorsaanerannut ingerlaannartumik nalunaarutigissavaa, taannalu erseqqinnerusumik iliuusissanik inassuteqassaaq, aamma ilanngullugit immikkut ittumik toqoraasoqassanersoq, uumasup timaanik igitassartaanillu tigummigallartitsisoqassanersoq imaluunniit misissugassanik tigusisoqassanersoq.

 

Uppernarsaaneq

§ 12. Uumasuutinik piginnittoq imaluunniit nersutaatinik piginnittoq nakorsaatinik tigummigallartitsinissamut piffissalersuinertalinnik atuiguni katsorsaanernut tamanut ullut tamaasa nalunaarsuisassaaq:
1)  Uumasut sorliit qanorlu amerlatigisut katsorsarneqarnersut (paatsoorneqarsinnaanngitsumik sorliussusiliinerit imaluunniit tamanna ajornassappat amerlassutsit, oqimaassusiisa missiliorneri aamma uumasuusiviup immikkoortortaa imaluunniit assingusumik immikkoortiterisimaneq).
2)  Katsorsaanerup ulloq aallartiffia naammassineqarfialu.
3)  Katsorsaanermut patsisaasoq.
4)  Nakorsaat suna atorneqarnersoq.
5)  Nakorsaammik annertussusiliineq qanorlu taanna tunniunneqassanersoq.
6)  Katsorsaaneq kimit ingerlanneqarsimanersoq.
Imm. 2. Nalunaarsuinerit imm. 1-mi taaneqartut tamaasa ataatsimoortillugit takoriaannanngorlugillu sivikinnerpaamik ukiuni tallimani uumasuutinik piginnittup nersutaatinilluunniit piginnittup tigummissaavai, kiisalu piumaffigineqarnikkut uumasut nakorsaanut uumasulluunniit nakorsaanerannut takutittussaallugit tunniuttussaallugilluunniit.

 

Misissuinerni aningaasartuutit

§ 13. Uumasunut nakorsaatit atorneqarnissaat pillugit malittarisassanik malinninnginneq misissuinermi paasineqarpat aningaasartuutit tamaasa uumasuuteqartup nersutaateqartulluunniit akilissaavai.

 

Pineqaatissiinerit

§ 14. §§ 7, 9, 10, imm. 2 aamma 3, § 11 aamma § 12, imm. 1, naapertorlugit aalajangersakkanik, imaluunniit § 8 imm. 2-mi inerteqqummik unioqqutitsinerit akiliisitaanissamik pineqaatissinneqaataasinnaapput.

 

Nakkutilliineq

§ 15. Nakorsaatit pillugit peqqussummi § 25, imm. 3, oqaaseqatigiit aappaat naapertorlugu uumasut nakorsaanerat eqqartuussisumit aalajangiinertaqanngitsumik nakorsaataasivinnut, nunaateqarfinnut assigisaannullu isersinnaavoq nakorsaatinik uninngasuutinik nersutaatinillu misissuiartorluni.

 

Atuutilerfia

§ 16. Nalunaarut atuutilerpoq ulloq 1. januar 2006.

Namminersornerullutik Oqartussat, ulloq 14. november 2005

Asii Chemnitz Narup

/

Søren Rendal