Inuussutissarsiutinik ilinniartitsisarnermik Kalaallit Nunaannut inatsimmi nr. 582-imi 29. november 1978-imeersumi § 5 malillugu aalajangersarneqarput makku:

 

Kapitali 1
Atuuffia

§ 1. Ilinniartitaanernut Kalaallit Nunaanni ingerlanneqartunut Namminersornerullutik Oqartussat ilinniagaqarnersiuteqartitsisuupput.
Imm. 2. Ilinniartitaanernut Kalaallit Nunaata avataani ingerlanneqartunut ilinniagaqarnersiuteqartitsisoqarsinnaavoq:
1) ilinniartitaaneq Kalaallit Nunaanni suliffissaqartitsisinnaasutut naatsorsuutigineqarsinnaappat, aammalu
2) ilinniartitaaneq tassunga assingusoq Kalaallit Nunaanni ingerlanneqarsinnaanngippat.
Imm. 3. Immikkut illuinnartumik pissutissaqartillugu imm. 2-mi piumasaqaataasut atuutsinneqannginnissaat Naalakkersuisut immikkut akuersissutigisinnaavaat.
Imm. 4. Misileraalluni aaqqissuussinermut ilagitillugu imm. 2, nr. 2-mi piumasaqaataasut Naalakkersuisut saneqqussinnaavaat.
Imm. 5. Misileraaneq pillugu malittarisassat Naalakkersuisut aalajangersarsinnaavaat.

§ 2. Ilinniagaqarnersiutit ilinniagaqartunut ilinniakkamik ilinniagaqarnersiutisiaqaataasinnaasunik ingerlatsisunut tunniunneqartarput.
Imm. 2. Ilinniakkap ilinniagaqarnersiutisiaqaataasinnaanissaanut piumasaqaatit naammassineqartussat Naalakkersuisunit aalajangersarneqassapput.

§ 3. Ilinniagaqarnersiutit akissarsianut aningaasartuutinut tapiissutitut sulisitsisut makkuninnga atorfinitsitsineranni sulisitsisunut tunniunneqartassapput:
1) Inuussutissarsiutinik ilinniartitsinerit aamma inuussutissarsiutinik ilinniartitsinermi pikkorissaanerit pillugit Inatsisartut peqqussutaat tunngavigalugu inuussutissarsiutinik tunngaviusumik ilinniartitsinermi ilinniartuusunik (lærlinginik).
2) Lærlinginik sulinermik Kalaallit Nunaanni misiliisunik atuarnerminnullu atatillugu Danmarkimi najugaqartunik.

 

Kapitali 2
Ilinniagaqarnersiutit suussusii aningaasartaasalu amerlassusii

§ 4. Ilinniagaqarnersiutit tunniunneqarsinnaapput tapiissutitut (naafferartumik ingerlasut) (stipendium), meeqqanut tapiissutitut, immikkut pisartakkatut, Nunatta Karsianit qularnaveeqqusigaasumik taarsigassarsiatut, imaluunniit aningaaserivinni taarsigassarsianut qularnaveeqqutitut. Ingerlaqqiffiusumik ilinniagaqartunut ilinniagaqarnersiutit qiortartakkatut periuseq malillugu piffissami aalajangersimasumi killilikkami tunniunneqartassapput.
Imm. 2. Naalakkersuisut ilinniagaqartullu kattuffiisa tamanna pillugu sioqqutsisumik isumasioqatigeereernerisigut tapiissutit taarsigassarsiarineqarsinnaasullu amerlassusissaat, ikaarsaariarnermi aaqqissuussinerit aammalu immikkut tunniunneqartarumaartussat aningaasanut inatsimmi aalajangersarneqassapput.
Imm. 3. Naalakkersuisut ilinniagaqartut kattuffiinut tamanna pillugu oqaaseqaammik sioqqutsisumik pissarsiniaqqaarlutik ilinniagaqarnersiutit suussusissaat amerlassusissaallu pillugit malittarisassat aalajangersassavaat, matumani taarsigassarsianut akiligassarsianullu qularnaveqqusiisarneq pillugu malittarisassat ilanngullugit, kiisalu ikaarsaariarnermi aaqqissuussinerit.

§ 5. Sulisitsisunut tapiissutit amerlassusissaat, tak. § 3, aningaasanut inatsimmi aalajangersarneqartassapput. Tapiissutit Nunatta Karsianit aamma inuussutissarsiutitigut ilinniagaqarnermut sulisitsisut akiliutaat pillugit Inatsisartut inatsisaat tunngavigalugu inuussutissarsiutitigut ilinniagaqarnermut sulisitsisut akiuliutaasigut aningaasalersorneqassapput. Aningaasalersuinermi akileeqataassutit amerlassusissaat aningaasanik inatsimmi aalajangersarneqartassapput.
Imm. 2. Tapiissuteqartarnermut siunertat, taakkuninnga aqutsineq, tapiissuteqarnissamut piumasaqaatit kiisalu tapiissutit qanoq annertutigisumik tunniunneqartarnissaat pillugit malittarisassat Naalakkersuisut aalajangersarsinnaavaat.

 

Kapitali 3
Ilinniagaqarnersiuteqarnissamut piumasaqaatit paasissutissiisussaatitaanerlu

§ 6. Ilinniagaqarnersiutisiaqassagaanni danskisut innuttaassuseqarnissaq piumasaqaataavoq.
Imm. 2. Taamaattorli nunani allamiut ilinniagaqarnersiutisiaqarsinnaapput, nunat tamat akornanni isumaqatigiissutit Kalaallit Nunaannut atuuttut tunngavigalugit danskisut innuttaasunut naligititaallutik ilinniagaqarnersiutisiaqarsinnaatitaagunik.

§ 7. Kalaallit Nunaanni ilinniartitaanernut ilinniagaqarnersiutisiaqartitsisoqarsinnaavoq iunnut Kalaallit Nunaanni najugaqavissunut.

§ 8. Kalaallit Nunaata avataani ilinniartitaanernut ilinniagaqarnersiutisiaqartitsisoqarsinnaavoq inunnut
1) qinnuteqarnermik nalaani Kalaallit Nunaanni najugaqavissunut, qinnuteqarnerlu sioqqullugu sivikinnerpaamik ukiuni tallimani najugaqavissimasunut, imaluunniit
2) Kalaallit Nunaanni sivikinnerpaamik ukiuni qulini najugaqavissimasunut Kalaallillu Nunaata avataani sivisunerpaamik ukiuni pingasuni aalajangersimasumik najugaqarsimasunut.
Imm. 2. Imm. 1 naapertorlugu Kalaallit Nunaata avataani najugaqarnertut naatsorsuutigineqanngillat ukuninnga pissuteqartut:
1) ilinniagaqarneq
2) isumaginninneq aallaavigalugu Kalaallit Nunaanni oqartussaasunit peqataaffigineqartumik najugaqarneq.

§ 9. Ilinniagaqartut inuuniarnermi aningaasartuutaasa akilerneqarnissaat siunertaralugu pisortanit ikiorsiissutinik allanik ataavartumik pisartagaqartinneqartut tapiissutisinissamut meeqqanullu tapiissutisinissamut mattunneqarsinnaapput.
Imm. 2. Ilinniagaqartut ilinniarnermik nalaani ilinniagaqarnerminnut atatillugu aningaasarsiaqartut imaluunniit ilinniarnerminnut atatillugu inuuniarnermut matusissutissanik allatut aningaasarsiaqartut tapiissutisiaqarsinnaatitaanngillat.

§ 10. Ilinniagaqartut ilinniagaqarnersiuteqarsinnaassagunik ilinniagaqarnersiutisiaqarnissamut paasissutissat imminnut tunngasut pingaaruteqartut tamaasa Naalakkersuisunut nalunaarutigissavaat, kingusinnerusukkullu pissutsit tamakku allannguuteqassappata Naalakkersuisunut ingerlaannaq nalunaarutigissallugit.

§ 11. Ilinniagaqartut kattuffii sioqqutsisumik oqaaseqaateqartereerlugit ilinniagaqarnersiutisiaqassagaanni piumasaqaatit pillugit malittarisassanik amerlanerusunik Naalakkersuisut aalajangersaasinnaapput.

§ 12 . Pisuni immikkut illuinnartuni § 6, imm. 1-imi, § 7-imi aamma § 8, imm. 1-imi piumasaqaatit atuutsinneqannginnissaat Naalakkersuisut immikkut akuersissutigisinnaavaat.

 

Kapitali 4
Ilinniarnermi taarsigassarsiat Nunatta Karsianit aningaasalersorneqartut ernialersugaanerat

§ 13. Ilinniarnermi taarsigassarsiat Nunatta Karsianit aningaasalersorneqartut ilinniagaqarnerup nalaani ernialersorneqassanngillat, taarsigassarsisoq ilinniagaqarnersiutisiaqarnissamut piumasaqaatinik sukkulluunniit aalajangersarneqartunik naammassinnissimatillugu.
Imm. 2. Ilinniagaqarnerup unitsinneqarnerata naammassineqarnerataluunniit kingorna ullormit siullermit aallartittumik pineqartup ilinniagaqarnerminut atatillugu taarsigassarsiaanut sukkulluunniit akiitsorineqartut ernialersorneqalissapput, pisortat sukkulluunniit diskontoat procentimik ataatsimik ilasaq atorlugu. Erniat ukiut tamaasa 31. december imaluunniit ulloq akiitsut akilerneqarfiat killiffigalugu naatsorsuusiorneqartassapput.
Imm. 3. Taarsigassarsisoq Namminersornerullutik Oqartussaniit ilinniagaqarnersiuteqarnissamut pisinnaatitaajunnaarpat ullup taassuma aqaguaniit taarsigassarsiat ernialersorneqalissapput akiitsut annertussusaat aallaavigalugu pisortat sukkulluunniit diskontoat procentimik ataatsimik ilasaq ernialiullugu. Erniat ukiut tamaasa 31. december imaluunniit akiitsut ulloq akilerneqarfiat killiffigalugu naatsorsuusiorneqartassapput.
Imm. 4. Pissutsit immikkut ittut tamanna ajornartinngippassuk imm. 3-p atuutsinneqannginnissaa Naalakkersuisut immikkut akuersissutigisinnaavaat.

§ 14. Ilinniarnermik unitsitsigallarneq suliamik misiliivissaaleqinermik, ilinnianngiffeqarallarnermik, matumani naartunermi erninermilu ilinnianngiffeqarallarneq napparsimanerillu uppernarsaaserneqartut ilanngullugit, patsiseqarpat § 13, imm. 2 malillugu unitsitsinertut isigineqassanngilaq.
Imm. 2. Ilinniarnermik unitsitsigallarneq ukioq ataaseq sinnerlugu sivisussuseqarpat, pineqartup ilinniagaqarnermut atatillugu taarsigassarsiaanut sukkulluunniit akiitsut § 13, imm. 2-mi aalajangersagaq malillugu ernialersorneqalissapput, unitsitsinerup ukiumik ataatsimik sivisussuseqalernerata kingorna ullormit siullermit aallartittumik.

§ 15. Ilinniagaqartoq ilinniarnerminik unitsitsinermi kingorna ilinniarnerminik aallartitseqqippat pisinnaatitaaffinilu malillugit Namminersornerullutik Oqartussanit ilinniagaqarnersiuteqalerpat pineqartup ilinniagaqarnermi taarsigassarsianut sukkulluunniit akiitsuisa ernialersorneqarnerat unitsinneqassaaq, ilinniarnerup aallarteqqinneqarnera peqatigalugu atuutilersumik.
Imm. 2. Ilinniagaqartoq ilinniarnerup unitsinnerata naammassinerataluunniit kingorna ilinniarnermik ilinniagaqarnersiutisiaqarfiusinnaatitaasumik nutaamik aallartitsippat malittarisassallu malillugit Namminersornerullutik Oqartussanit ilinniagaqarnersiutisisalerpat pineqartup ilinniagaqarnermi taarsigassarsianut sukkulluunniit akiitsuisa ernialersorneqarnerat unitsinneqassaaq, ilinniarnerup aallarteqqinneqarnera peqatigalugu atuutilersumik.
Imm. 3. Ilinniarnerup unitsinneqarnerata naammassineqarnerataluunniit aqaguani atuutilersumik pineqartup ilinniagaqarnermi taarsigassarsianut sukkulluunniit akiitsuisa ernialersorne-qarnerat § 13, imm. 2-mi periaasissatut taaneqartoq malillugu aallarteqqinneqassaaq.
Imm. 4. Pissutsit immikkut ittut tamanna ajornartinngippassuk imm. 3-p atuutinnginnissaa Naalakkersuisut immikkut akuersissutigisinnaavaat.

§ 16. Pissutsit immikkut pisariaqartippassuk Naalakkersuisut taarsigassarsisumut allakkatigut nalunaarutigisinnaavaat:
1) tamakkiisumik ilaannakortumilluunniit ernialiisoqassanngitsoq.
2) ernialiunneqareersut tamakkiisumik ilaannakortumilluunniit isumakkeerneqassasut.
Imm. 2. Ilinniagaqarnermi taarsigassarsiat Nunatta Karsianit aningaasalersorneqartut ernialersorneqarnerat pillugu malittarisassanik amerlanerusunik Naalakkersuisut aalajangersaasinnaapput.

 

Kapitali 5
Ilinniagaqarnermi taarsigassarsiat Nunatta Karsianit aningaasalersorneqartut akilersorneqartarnerat

§ 17. Ilinniagaqarnermi taarsigassarsiat Nunatta Karsianit aningaasalersorneqartut akilersorneqarnerat ilinniarnerup naammassinerata kingorna kingusinnerpaamik ukiup ataatsip qaangiunnerani aallartinneqassaaq. Ilinniarneq unitsinneqarpat akilersuineq unitsitsinermiit kingusinnerpaamik qaammatit pingasut qaangiunneranni aallartinneqassaaq.
Imm. 2. Ilinniarnermik unititsigallarneq suliamik misiliivissaaleqinermik, ilinnianngiffeqarallarnermik, matumani naartunermi erninermilu ilinnianngiffeqarallarneq napparsimanerillu uppernarsaaserneqartut ilanngullugit, patsiseqarpat § 17, imm. 1 malillugu unitsitsinertut isigineqassanngilaq.
Imm. 3. Unitsitsigallarneq ukioq ataaseq sinnerlugu sivisussuseqarpat taarsigassarsianik akilersuineq Naalakkersuisut tamatumunnga piumasaqarnerat malillugu aallartinneqassaaq.
Imm. 4. Ilinniagaqartoq ilinniarnerminik ilinniagaqarnersiutisiaqarfiusinnaatitaasumik nutaamik aallartitsippat imaluunniit ilinniarnerminik unitsitaminik aallartitseqqippat ilinniagaqarnersiuteqarsinnaanermullu piumasaqaatinik eqqortitsippat siornatigut taarsigassarsiaasimasunik akilersuisussaatitaaneq unitsikkallarneqassaaq. Ilinniarnerup naammassineqarnerani unitsinneqarneraniluunniit akilersuisussaatitaaneq imm. 1-imi aalajangersagaq malillugu atuutileqqissaaq.

§ 18. Ilinniarnermi taarsigassarsiat Nunatta Karsianit aningaasalersugaasut erniaallu utertitsilluni akilersuisussaatitaanerup aallartinneraniit ukiut 15-it qaangiutsinnagit akilerneqareersimassapput. Akilersuinerli pissaaq qaammammut ikinnerpaamik 500,00 kr.-nik akiliisarnikkut.
Imm. 2. § 17, imm. 4 tunngavigalugu akilersuisussaatitaaneq unitsikkallarneqarpat imm. 1-imi piffissap akilersuiffissap sivisunerpaaffissaa piffissap akilersuinerup unitsinneqarfigisimasaata sivisoqataanik sivitsorneqassaaq.
Imm. 3. Piffissap akilersuisussaatitaaffiusup aallartinnginnerani taarsigassarsisoq ilinniarnermi taarsigassarsiat akilersorneqarnissaat pillugu Naalakkersuisunut isumaqatigiissuteqassalluni pisussaatitaavoq.
Imm. 4. Taarsigassarsisoq Naalakkersuisunit qinnuigineqaraluarluni ilinniarnermi taarsigassarsiaasimasunik akilersuinissamut piffissaagallartillugu isumaqatigiissuteqarsimanngippat Naalakkersuisut killissarititaasut imm. 1-imi taaneqartut iluanni taarsigassarsisumut akilersui-nermik aaqqissuussineq oqinnerpaaq aalajangersassavaat.
Imm. 5. Tamanna pillugu qinnuteqartoqarneratigut akilersuinissamut atugassarititaasunik Naalakkersuisut oqilisaasinnaapput imaluunniit akilersuinissamik kinguartitsisinnaallutik, taarsigassarsisoq suliffissaaleqineq, napparsimaneq, ernineq imaluunniit pissutsit allat immikkut ittut pissutigalugit utertitsilluni akilersuinissamut aaqqissuussinermik malinnissinnaanngippat. Taamaattorli imm. 1 tunngavigalugu sivisunerpaamik ukiuni 15-ini akilersuisussaatitaaneq saneqqunneqarsinnaanngilaq.

§ 19. Taarsigassarsisoq akilersuinissamik isumaqatigiissutaasumik imaluunniit akilersuinissamik aalajangersakkamik malinnissinnaanngippat piumaffiginnereerlutik akiitsut ernialiunneqarsimasut ilanngullugit annaasassaajunnaarlugit ingerlaannartumik Naalakkersuisut akileqqusinnaavaat.

§ 20. Ilinniarnermi taarsigassarsianik Nunatta Karsianit aningaasalersugaasunik akilersuisarneq pillugu malittarisassanik amerlanerusunik Naalakkersuisut aalajangersaasinnaapput.

 

Kapitali 6
Ilinniagaqarnersiutinik tigusassarinagit tigusanik ernialersuineq utertitsillunilu akiliineq

§ 21. Ilinniagaqartoq pissutsit § 10-mi taaneqartut pillugit eqqunngitsunik amigartunilluunniit paasissutissiippat, imaluunniit pissutsit allannguutaasut piaaraluni nalunaarutiginngippagit, imaluunniit ilinniagaqarnersiutinik peqquserlulluni tigusaqartarsimappat ilinniagaqarnersiutit tigusassarinagit tiguneqarsimasut ernialerlugit akilerneqarnissaat Naalakkersuisut piumasaqaatigissavaat.
Imm. 2. Ilinniagaqarnersiutit tigusisup eqqunngitsunik amigartunilluunniit paasissutissiinerup kingunerisaanik tigusimasai piffissamit tigusiffiusumit aallartittumik ernialersorneqassapput.
Imm. 3. Ilinniagaqarnersiutit tigusisup peqquserlulluni tigusimasai piffissamit tigusisup piffissaq ilinniagaqarnersiutit peqquserluttumik tigullugit ilisimaarinnilerfigisimasaatut naatsorsuutigineqartoq aallarnerfigalugu ernialersorneqassapput.
Imm. 4. Imm. 2 aamma imm. 3 malillugit ilinniagaqarnersiutisiaqarsinnaanani ilinniagaqarnersiutit tiguneqartut ukiumoortumik ernialersorneqassapput pisortat sukkulluunniit diskontoat 6 procentimik ilallugu. Akiitsut sukkulluunniit annertussusaat aallaavigalugu ernialersorneqassapput. Erniat ukiut tamaasa 31. december imaluunniit ulloq akiitsut akilerneqarfiat killiffigalugu naatsorsuusiorneqartassapput.

§ 22. Ilinniagaqarnersiutit tigusisumit tigusussaanagit peqquserlunnani tiguneqarsimasut ingerlaannartumillu tigusisumik akilerneqarsinnaanngitsut ilinniarnermi taarsigassarsianngortillugit Naalakkersuisunit allanngortinneqassapput. Ilinniagaqarnersiutinik tigusisumit tigusussaanagit peqquserlunnani tiguneqarsimasunik ernialersuineq akilersuinerlu ilinniarnermi taarsigassarsiat pillugit malittarisassat peqqussutip matuma kapitaliini 4-mi aamma 5-imi allassimasut malillugit pisassaaq.

§ 23. Ilinniagaqarnersiutit tigusassarinagit tiguneqartut ernialersorneqarnissaat akilersorneqarnissaallu pillugit malittarisassanik amerlanerusunik Naalakkersuisut aalajangersaasinnaapput.

 

Kapitali 7
Ilinniagaqarnersiutinit ilanngaassisarneq

§ 24. Ilinniagaqarnersiutinit Naalakkersuisut ilanngaatigisinnaavaat makku:
1) Ilinniartut ineqarfiini ineqarfinnilu allani Namminersornerullutik Oqartussanit kommuninilluunniit pigineqartuni ingerlanneqartuniluunniit nerisaqarnermut ineqarnermullu akiliutit.
2) Ilinniartut ineqarfiini ineqarfinnilu allani Namminersornerullutik Oqartussanit kommuninilluunniit akilersorneqartuni nerisaqarnermut ineqarnermullu akiliutit.
3) Ilinniagaqartut kattuffimminnut ilaasortaanerminnut akiliutaat.
Imm. 2. Ilinniagaqartup isumaqatigiissut malillugu imm. 1, nr. 1 aamma 2 tunngavigalugit ineqarnermut nerisaqarnermullu akiliutissai piffissamut isumaqatigiissutaasimasumut ilanngaatigineqarsinnaapput.
Imm. 3. Ilinniagaqartoq kattuffimminut ilaasortaajunnaarpat ilinniagaqartut kattuffiisa tamanna ingerlaannartumik allakkatigut Naalakkersuisunut nalunaarutigissavaat.

§ 25. Ilinniagaqartup ilinniagaqarnersiutitigut pisassarisai akiligassanut allanut matussutissatut arsaarinnissutigineqarsinnaanngillat allatigulluunniit eqqartuussivikkoortumik malersorneqaatinut atorneqarsinnaanatik.
Imm. 2. Ilinniagaqartup nammineq piumassutsiminik allamut akiligassaminik ilinniagaqarnersiutiminik ilanngaatitsittarluni akilersuinissaminik isumaqatigiissutigisimasinnaasaa Naalakkersuisut kisiat malittussaavaat, ilanngaatigineqartartussat qaammammut 500,00 kr.-t sinnersimanngippagit.

§ 26. Ilinniagaqartup ilinniagaqarnersiutitigut pisassarisaanit ilinniagaqarnersiutit amerlanaarlugit tunniunneqarsimasut ilinniagaqartup peqquserluuteqarluni tigusimasai Naalakkersuisut ilanngaatigisinnaavaat.

 

Kapitali 8
Aqutsineq naammagittaalliuuteqartarnerlu

§ 27. Ilinniagaqarnersiutit pillugit malittarisassat Naalakkersuisunit aqunneqarput, taamaattorli tak. imm. 2 aamma 3.
Imm. 2. Ilinniagaqarnersiutit pillugit malittarisassat aqunneqarnerat Namminersornerullutik Oqartussat ataanni oqartussaasunut allanut tamakkiisumik ilaannakortumilluunniit Naalakkersuisut tunniussinnaavaat.
Imm. 3. Ilinniagaqarnersiutit pillugit malittarisassanik aqutsineq allakkatigut isumaqatigiissuteqarnikkut suliffeqarfimmut namminersortumut Naalakkersuisut tunniussinnaavaat.
Imm. 4. Ilinniagaqarnersiutit pillugit malittarisassat aqunneqarnerat pillugu malittarisassat erseqqinnerusut Naalakkersuisut aalajangersarsinnaavaat.
Imm. 5. Ilinniagaqarnersiutit ilinniagaqarnersiutisisartup Kalaallit Nunaanni Danmarkimiluunniit aningaaserivimmi kontoanut nakkartinneqartassapput.

§ 28. Oqartussaasut, suliffeqarfiit suliffeqarfiillu namminersortut § 27, imm. 1-3-mi taaneqartut
1) ilinniagaqartoq pillugu paasissutissanik ilinniagaqarnersiutit pillugit malittarisassat aqunneqarnerannut pisariaqartunik pisortani oqartussaasunit, suliffeqarfinnit suliffeqarfinnillu namminersortunit pissarsiniarsinnaapput,
2) ilinniagaqartoq pillugu paasissutissanik ilinniagaqarnersiutit pillugit malittarisassat aqunneqarnerannut pisariaqartunik paarlaateqatigiillutik ingerlatitseqqissinnaapput, paasissutissallu taamaattut imminnut atugassanngorteqatigiissinnaallugit,
3) Kalaallit Nunaanni nunaniluunniit avannarlerni innuttaasunut Namminersornerullutik Oqartussanit ilinniagaqarnersiutisiaqartitsineq pillugu paasissutissanik inuit pineqartut taakku piffissami taannaasumi Kalaallit Nunaannit aamma nunat avannarliit ilaannit ataatsimit ilinniagaqarnersiutinik ataatsikkut tigusisinnaatitaanatik tigusisannginnissaannik nakkutilliinermi pisariaqartunik nunani avannarlerni ilinniagaqarnersiutinik aqutsisoqarfinnut ingerlatitseqqissinnaapput, aamma
4) ilinniagaqartut aqqi najugaallu pillugit paasissutissanik ilinniagaqartunik ilinniarnerup naammassineqarnerani Kalaallit Nunaanni sulisussarsiniarnermi atorneqartussanik aamma ilinniarnerup nalaani sulinermik misiliiffissat ilinniarnerullu nalaani suliffissat pilersinniarne-qarneranni atugassanik Kalaallit Nunaanni pisortani oqartussaasunut suliffeqarfinnullu namminersortunut ingerlatitseqqissinnaapput. Tamanna aatsaat pisinnaavoq ilinniagaqartoq akuersisseqqaarlugu.
Imm. 2. Imm. 1 tunngavigalugu paasissutissanik pissarsiniartarneq ingerlatitseqqittarnerlu pillugit malittarisassat erseqqinnerusut Naalakkersuisut aalajangersarsinnaavaat, matumani paasissutissat qarasaasiakkoortumik pissarsiariniaqquneqarsinnaanerat ingerlateqqeqquneqarsinnaanerallu ilanngullugit.

§ 29. Akiligassat akilerneqartussanngorsimasut akileqqullugit nukingisaarutinik nassiussinermut atatillugu nukingisaarinermut akiliutinik Naalakkersuisut akiliisitsisinnaapput.
Imm. 2. Akiliutissap annertussusaa Aningaasanut Inatsimmi aalajangerneqassaaq.
Imm. 3. Nukingisaarutinik nassiussinerni pingasoriaannarluni nukingisaarinermut akiliuteqartitsisoqarsinnaavoq.

§ 30. Ilinniagaqarnersiuteqalersinnaanermik aalajangiinerit ullup aalajangiiffiup kingorna sapaatit akunneri arfinillit qaangiutsinnagit allakkatigut Naalakkersuisunut naammagittaalliuutigineqarsinnaapput.
Imm. 2. Piffissarititaasoq imm. 1-imi taaneqartoq Naalakkersuisut malinngitsoorsinnaavaat.
Imm. 3. Naammagittaalliornissamut periarfissaq pillugu malittarisassat Naalakkersuisut aalajangersarsinnaavaat, matumani naammagittaalliuutit pillugit suleriaaseq ilanngullugu.

 

Kapitali 9
Atortuulersitsineq, atorunnaarsitsineq ikaarsaariarnerlu pillugit aalajangersakkat

§ 31. Peqqussut manna 1. august 2005-imi atuutilerpoq, ilinniagaqarnersiutinullu ullormit tassannga tunniunneqartartussanut sunniuteqarluni, taamaattorli tak. imm. 2.
Imm. 2. § 30 1. januar 2005-imi atuutilerpoq.

§ 32. Ilinniagaqarnersiutit pillugit Inatsisartut peqqussutaat nr. 3, 2. maj 1996-imeersoq 1. august 2005 aallarnerfigalugu atorunnaarsinneqarpoq, taamaattorli Inatsisartut peqqussutaanni nr. 3, 2. maj 1996-imeersumi § 26 1. januar 2005 aallarnerfigalugu atorunnaarsinneqarpoq.
Imm. 2. Naammagittaalliuutit 1. januar 2005 sioqqullugu Ilinniagaqarnersiuteqartitsinermi Naammagittaalliuuteqartarfimmut tunniunneqarsimasut Naammagittaalliuuteqartarfiup inaarlugit suliarissavai Inatsisartut peqqussutaat nr. 3, 2. maj 1996-imeersumi aalajangersarneqarsimasut tunngavigalugit.

§ 33. Aqutsinikkut aalajangersakkat Inatsisartut peqqussutaat nr. 3, 2. maj 1996-imeersoq tunngavigalugu aalajangersarneqarsimasut peqqussummut matumunnga assortuuttuunngikkunik atuutiinnassapput, allanngortinneqarnissamik imaluunniit aalajangersakkanit peqqussut manna naapertorlugu aalajangersarneqarsimasunit atorunnaarsinneqarnissamik tungaanut.

§ 34. § 8 ilinniagaqartunut 1. januar 1994 sioqqullugu ilinniartussatut tiguneqarsimasunut atuutinngilaq.

§ 35. Ilinniagaqarnermi taarsigassarsiat naalagaaffimmit aamma Nunatta Karsianit aningaasalersugaasut 1. august 2005 sioqullugu tunniunneqarsimasut tamanna pillugu malittarisassat malillugit ernialersorneqassapput.

§ 36. Ilinniagaqarnersiutit tigusassarinagit 1. august 2005 sioqqullugu tiguneqarsimasut taamanikkut malittarisassat atuuttut malillugit ernialersorneqassapput. Ilinniagaqarnersiutit tamatuma kingornatigut tigusassarinagit tiguneqarsimasut § 21-mi aamma § 22-mi malittarisassat malillugit ernialersorneqalissapput.

§ 37. Taarsigassarsiat 1. august 2005-imi akilerneqarnissaannut aalajangiiffigineqareersimasunut imaluunniit isumaqatigiissusiorfigineqareersimasunut § 18, imm. 1 aamma § 18, imm. 5 sunniuteqanngillat.

Namminersornerullutik Oqartussat, 14. november 2004

Hans Enoksen

/

Henriette Rasmussen