Sunngiffimmi sammisassaqartitsineq pillugu inatsimmi nr. 584, 29. november 1978-imeersumi §§ 1 aamma 2 naapertorlugit aalajangersarneqarput:

 

Kapitali 1.
Kulturikkut ingerlatsineq sunngiffimmilu sammisassaqartitsineq

§ 1. Peqqussummi matumani kulturikkut ingerlatsineq sunngiffimmilu sammisassaqartitsineq imatut paasineqassapput:
1) Sunngiffimmi atuartitsineq, tak. kapitali 3.
2) Sunngiffimmi sukisaarsartarfiit klubbit, tak. kapitali 4.
3) Meeqqat inuusuttullu suliniaqatigiiffii, tak. kapitali 5.
4) Timersorneq, tak. kapitali 6.
5) Højskolimiinneq, tak. kapitali 7.
6) Kulturikkut ingerlatsineq inunnillu qaammarsaaneq, najukkani katersugaasiveqarneq ilanngullugu, tak. kapitali 8.
7) Tamanut ammasunik atuagaateqarfeqarneq tamatumani malittarisassat qaqugukkulluunniit atuuttut malillugit.

 

Kapitali 2.
Aqutsineq

§ 2. Kommunalbestyrelse kommunimi kulturikkut ingerlatsinermut sunngiffimmilu sammisassaqartitsinermut qullersaalluni akisussaavoq innuttaasullu innuttaaqatigiikkuutaalluunniit kulturikkut sunngiffimmilu sammisassatigut tamakkiisumik neqeroorfiginissaat anguniarlugu anguniagassat tunngavissallu aalajangersassallugit.
Imm. 2. Ukiut tamaasa illoqarfimmi nunaqarfimmiluunniit kulturikkut ingerlatsinissamut sunngiffimmilu sammisassaqartitsinissamut kommunalbestyrelse pilersaarusiortassaaq.
Imm. 3. Kommunalbestyrelsip atorfinitsissavai sulisussat kommunimi kulturikkut sunngiffimmilu sammisassaqartitsinikkut sulinermi ulluinnarni ingerlatsisussat pisariaqartut.

§ 3. Sumiiffinni kommunit aggornerisa avataanniittuni peqqussut manna malillugu kommunalbestyrelsimut ulluinnarni suliassarititaasut Naalakkersuisunit isumagineqassapput.
Imm. 2. Imm. 1 malillugu Naalakkersuisunut isumagisassanngortitaasut kommunimut ataatsimut arlalinnulluunniit kommunalbestyrelse isumaqatigalugu Naalakkersuisut suliarisassanngortissinnaavaat.

 

Kapitali 3.
Sunngiffimmi atuartitsineq

§ 4. Peqqussummi matumani sunngiffimmi atuartitsineq meeqqanut, inuusuttunut inersimasunullu aaqqissuussaq pineqarpoq. Sammisassat qanoq killilerneqarnissaat pillugu Naalakkersuisut malittarisassaliorsinnaapput.
Imm.2. Sunngiffimmi atuartitsineq aaqqissuunneqarsinnaavoq qanoq ukioqqortutigineq apeqqutaatinnagu.
Imm. 3. Sunngiffimmi atuartitsineq imatut aaqqissuunneqarsinnaavoq:
1) Nalinginnaasumik atuartitsineq, tak. § 6.
2) Nipilersornermut ilinniartitsineq, tak. § 7.
3) Inersimasunik højskolertitsineq, tak. § 8.
4) Ilinniagaqarniaqatigiit, tak. § 9.
5) Oqalugiarnerit, tak. § 10.
6) Ilinniagassanik ataasiakkaanik atuartitsineq, tak. § 11.
7) Immikkut ittunut tunngasunik atuartitsineq, tak. § 12.
8) Inuussutissarsiutinut tunngasunut pikkorissarneq, tak. § 13.
9) Ulluinnarni atortariaqakkat pillugit atuartitsineq, tak. § 14.
Imm. 4. Nal. ak. ilai sunngiffimmi atuartitsinermi peqataasunik katerisimaartitsinernut atuartitsinivimmik imaqanngikkaluartunut atorneqarsinnaapput.
Imm. 5. Sunngiffimmi atuartitsineq ingerlanneqarsinnaavoq ulluunerani unnukkulluunniit. Sunngiffimmi atuartitsineq sivikinnerusumik sivisunerusumilluunniit ingerlanneqartussatut aaqqissuunneqarsinnaavoq.

§ 5. Sunngiffimmi atuartitsineq kommunalbestyrelsimit akuerineqartassaaq.
Imm. 2. Akuersissut nalunaarutigineqassaaq piumasaasut makkua naammassineqarsimappata
1) atuartitsineq tamanut ammasuussaaq §§ 8-10 kiisalu §§ 12 aamma 13-imi ukioqassutsimut killiliussat, kiisalu §§ 11 aamma 15 malillugit malittarisassat aalajangersakkatigut killiliussat iluanni,
2) atuartitsinermik aqutsisoq ilinniartitsisorlu pisariaqartinneqartunik piginnaassuseqassapput,
3) atuartitsissut ingerlatarluunniit naammattumik qulaajarlugit paasissutissiisoqassaaq,
4) atuakkat atuartitsinermilu atugassat assigisaallu peqataasunut akeqanngitsumik atugassanngortitaassapput,
5) suliaqarnermi atortussat peqataasumit akilerneqassapput, taamaallaat meeqqat inuusuttullu 20-t inorlugit ukiullit pinnagit,
6) peqataasut qanoq amerlatiginissaat immikkullu piumasaasut allat atuartitsinernut ataasiakkaanut tunngasut naammassineqarsimassapput, tak. §§ 6-10 aamma §§ 12-14,
7) ingerlataq ingerlanneqassaaq inini piukkunnartuni pisariaqartunik atortoqartuni.
Imm. 3. Peqataasut qanoq amerlatiginissaannut aalajangersakkat kommunimi pisortat oqartussaasut saneqqussinnaavaat, tak. §§ 6-10 aamma §§ 12-14.

§ 6. Nalinginnaasumik atuartitsinermi pineqarput inunnut inuiaqatigiinnullu tunngasut imaluunniit pinngortitamik ilisimasaqassutsimut sammisanut tunngasut.
Imm. 2. Atuartitsineq aaqqissorneqassaaq pilersaarut malillugu atuartitsinivimmik ingerlatsisoqarnissaa qularnaarlugu.
Imm. 3. Peqataasussat ikinnerpaamik arfineq-pingasut nalunaarsimappata peqatigiinniartut pilersinneqassapput.
Imm. 4. Sapaatit akunnerini tulleriiginnarni sisamani peqataasut agguaqatigiissillugu sisamat inulersimappatigit peqatigiit atorunnaarsitaassapput.

§ 7. Nipilersornermik ilinniarnermiipput nipilersuutit, nipilersoqatigiinnerup, erinarsoqatigiinnerup
isiginnaartitsinerulluunniit ilinniartitsissutaaneri ineriartortinnerilu.
Imm. 2. Atuartitsineq aaqqissorneqassaaq pilersaarut malillugu atuartitsinivimmik ingerlatsisoqarnissaa qularnaarlugu.
Imm. 3. Ikinnerpaamik arfineq-pingasut nipilersoqatigiinniarlutik erinarsoqatigiinniarlutilluunniit nalunaarsimappata, imaluunniit sisamat nipilersuutersorneq isiginnaartitsinerlu siunertaralugit nalunaarsimappata peqatigiinniartut pilersinneqassapput.
Imm. 4. Nipilersoqatigiinnermut erinarsoqatigiinnermullu peqataasut sapaatip akunnerini tulleriiginnarni sisamani sisamanit ikinnerulersimappata ingerlataq unitsinneqassaaq.
Imm. 5. Nipilersuutersornermut isiginnaartitsinermulluunniit peqataasut sapaatit akunnerini tulleriiginnarni sisamani agguaqatigiissillugu marluk inulersimappatigit ingerlataq unitsinneqassaaq.

§ 8. Inersimasut højskolertarneranni pineqarput inunnut inuiaqatigiinnullu imaluunniit ilisimatusaatinut tunngasunik ingerlaqqiffiusumik ilinniartitsinerit.
Imm. 2. Atuartitsineq kikkunnut tamanut ammasuussaaq. Sammisap suunera malillugu qanoq ukioqqortutiginissaq killilerneqarsinnaavoq.
Imm. 3. Atuartitsineq aaqqissorneqassaaq pilersaarut malillugu atuartitsinivimmik ingerlatsisoqarnissaa qularnaarlugu.
Imm. 4. Ikinnerpaamik arfineq-pingasut nalunaarsimappata peqatigiit pilersinneqassapput.
Imm. 5. Sapaatit akunnerisa malittuinnaat sisamat ingerlaneranni peqataasut agguaqatigiissillugu sisamat inulersimappatigit ingerlataq unitsinneqassaaq.

§ 9. Ilinniagaqarniaqatigiit tassaapput inuit arlallit peqataanermikkut inunnut, inuiaqatigiinnut imaluunniit ilisimatusarnermut sammisassamik namminneerlutik qulaajaasut.
Imm. 2. Ilinniagaqarniaqatigiinneq kikkunnut tamanut ammasuussaaq. Sammisap suunera malillugu qanoq ukioqqortutiginissaq killilerneqarsinnaavoq.
Imm.3. Ilinniagaqarniaqatigiinneq aaqqissuunneqassaaq ilinniagaqarnermut atortussat naleqquttut tunngavigalugit.
Imm. 4. Ikinnerpaamik arfineq-pingasut nalunaarsimappata suleqatigiit pilersinneqassapput.
Imm. 5. Sapaatit akunnerisa malittuinnaat sisamat ingerlaneranni peqataasut agguaqatigiissillugu sisamat inulersimappatigit peqatigiit atorunnaarsinneqassapput.

§ 10. Oqalugiarneq tassaavoq oqalugiaatit ataasiakkaat imaluunniit oqalugiaatit nangeqattaartut arlallit atorlugit inunnut, inuiaqatigiinnut ilisimatusarnermullu tunngasunik paasissutissiineq.
Imm. 2. Oqalugiarneq tamanut ammasuussaaq. Sammisap suunera malillugu qanoq ukioqqortutiginissaq killilerneqarsinnaavoq.
Imm. 3. Oqalugiaqattaarnermut peqataaniarlutik nalunaartut ikinnerpaamik 15-iussapput.
Imm. 4. Oqalugiaqattaarnermi peqataasut agguaqatigiissillugu qulit inulerpatigik peqatigiit atorunnaarsinneqassapput.

§ 11. Ilinniagassanut ataasiakkaanut ilinniarnertuunngorniarfimmi atuarsimasutut qaffasitsisigisumik misilitsinnissamik siunertalinnut atuaqatigiinnik pilersitsinissamut malittarisassat Naalakkersuisunit aalajangersarneqassapput.

§ 12. Immikkut ittumik atuartitsineq tassaavoq atuartitsineq inunnut innarluutilinnut neqe-roorutissatut aaqqissugaasoq.
Imm. 2. Atuartitsineq aaqqissugaassaaq atuartussat malillugit inuusuttunullu meeqqat atuarfianni atuartussaajunnaareersunut inersimasunullu tamanut ammasuussalluni.
Imm. 3. Ikinnerpaamik marluk immikkut atuartitaanissamut akuerineqartut nalunaarpata atuartitaaneq pilersinneqassaaq.
Imm. 4. Immikkut pissutissaqartillugu inuit ataasiakkaarlugit atuartinneqarsinnaapput.
Imm. 5. Atuartitsineq aaqqissorneqassaaq pilersaarut malillugu atuartitsinivimmik ingerlatsisoqarnissaa qularnaarlugu.
Imm. 6. Naalakkersuisut immikkut atuartitsinermut malittarisassiussapput, tak. imm. 1.

§ 13. Inuussutissarsiutinut tunngasunut pikkorissarneq tassaavoq peqataasut suliamut aalajangersimasumut tunngasumik sunngiffimmi pikkorissartitaanerat. Tamatumanili pineqanngillat inuussutissarsiutinut ilinniartitaanerit inuussutissarsiutinulluunniit pikkorissartitaanerit inatsimmik allamik tunngaveqartut.
Imm. 2. Atuartitsineq kikkunnut tamanut ammasuussaaq. Sammisap suunera malillugu qanoq ukioqqortutiginissaq killilerneqarsinnaavoq.
Imm. 3. Atuartitsineq aaqqissorneqassaaq pikkorissartitsinissamut pilersaarut, kattuffinnut suliamut tunngasunut isumaqatigiinniareernikkut, kommunalbestyrelsimit akuerineqarsimasoq malillugu.
Imm. 4. Ikinnerpaamik arfineq-pingasut nalunaarsimappata atuartitsineq pilersinneqassaaq.
Imm. 5. Sapaatit akunnerini malittuinnarni sisamani peqataasut agguaqatigiissillugu sisamat inulerpatigit ingerlataq unitsinneqassaaq.

§ 14. Ulluinnarni atortariaqakkat pillugit atuartitsineq tassaavoq ulluinnarni atortariaqakkanut ineriartuutissanullu tunngasunik atuartitsineq.
Imm. 2. Atuartitsineq aaqqissorneqassaaq pilersaarut malillugu atuartitsinivimmik ingerlatsisoqarnissaa qularnaarlugu.
Imm. 3. Ikinnerpaamik aqqaneq-marluk nalunaarsimappata atuartitsineq aallartinneqassaaq.
Imm. 4. Sapaatit akunnerisa sisamat malittuinnaat ingerlaneranni peqataasut agguaqatigiissillugu arfineq pingasut inulersimappatigit ingerlataq unitsinneqassaaq.
Imm. 5. Ulluinnarni atortariaqakkat pillugit atuartitsineq Naalakkersuisut malittarisassiuussinnaavaat, tak. imm. 1.

§ 15. Peqataasussat ikinnerusinnaanerat, peqataasussat amerlassusiligaanerisa saneqqunneqarsinnaanerat, qanorlu ukioqqortutiginissaq, atuaqatigiit arlariit pilersinneqarsinnaanerat pillugit Naalakkersuisut malittarisassiorsinnaapput kiisalu nal. ak. atuartitsivissat amerlassusissaat aalajangersaavigisinnaallugu, tak. §§ 6-10 aamma §§ 12-14.

§ 16. Kommunalbestyrelsip sunngiffimmi atuartitsinermi peqataasut akiliisittassavai.
Imm. 2. Akiliutissap imm. 1-imi taaneqartup annertussusissaa, naatsorsorneqartarnera allaffissornikkullu aqunneqarnera pillugit Naalakkersuisut malittarisassiussapput.

 

Kapitali 4.
Sunngiffimmi sukisaarsaartarfiit klubbit

§ 17. Sunngiffimmi sukisaarsaartarfik klubbi tassaavoq meeqqat inuusuttullu sunngiffimminni suliaqarlutik ataatsimooqatigiinniarlutillu katerisimaartarfiat.

§ 18. Kommunini sunngiffimmi sukisaarsaartarfiit klubbit pilersinneqarsinnaapput piumasat makkua tunngavigalugit
1) klubbi meeqqanut inuusuttunullu 6-iniit 21-nut ukiulinnut tamanut ammasuussaaq,
2) klubbip pisortaa suleqataalu pisariaqartunik piginnaasaqassapput,
3) klubbi piukkunnartunik ineqartinneqassaaq,
4) atortussat pisariaqartut akeqanngitsumik atorsinnaatitaassapput,
Imm. 2. Qanoq ukioqqortutigisut piffissani aalajangersimasuni sunngiffimmi sukisaarsaartarfinnik klubbinik atuisinnaanerat pillugu Naalakkersuisut sukumiinnerusunik malittarisassiorsinnaapput.

§ 19. Kommunini sunngiffimmi sukisaarsaartarfiit klubbit akiliisitsisinnaapput imaluunniit katersuiniarsinnaallutik klubbip ingerlatai, pilersaarutai il.il. nukittorsarniarlugit. Taamaattoq sunngiffimmi sukisaarsaartarfimmi klubbimut peqataanermut ilaasortatut akiliutivinnik akiliisitsisoqarsinnaanngilaq.
Imm. 2. Akiliutit annertussusissaannut maleruagassat Naalakkersuisut aalajangersassavaat.

§ 20. Kommunalbestyrelse sunngiffimmi sukisaarsaartarfinnut klubbinut kommunip ingerlatarinngisaannut tapiissuteqarsinnaavoq.
Imm. 2. Sunngiffimmi sukisaarsaartarfiit klubbit imm. 1 naapertorlugu tapiiffigineqartartut kommunalbestyrelsip akuerissavai nakkutigalugillu.
Imm. 3. Kommunalbestyrelse akuersissappat klubbi malittarisassaqassaaq.
Imm. 4. Sunngiffimmi sukisaarsaartarfiit klubbit kommunimit ingerlanneqanngitsut Naalakkersuisut malittarisassiuutissavaat, tamatumani ilanngullugit klubbip malittarisassai.

 

Kapitali 5.
Meeqqat inuusuttullu suliniaqatigiiffii

§ 21. Meeqqat inuusuttullu suliniaqatigiiffii tassaapput suliniaqatigiiffiit aaqqissuussinernik meeqqanut inuusuttunullu 30-t inorlugit ukiulinnut ingerlatsisartut.

§ 22. Naalakkersuisut meeqqat inuusutullu suliniaqatigiiffiinut nuna tamakkerlugu ingerlanneqartunut tapiissuteqarsinnaapput, tamatumani ilanngullugit nunat tamalaat akornanni aaqqissuussinernut peqataanerit.

§ 23. Kommunalbestyrelse najukkami meeqqat inuusuttullu suliniaqatigiiffiinut tapiissuteqarsinnaavoq.

 

Kapitali 6.
Timersorneq

§ 24. Naalakkersuisut timersoqatigiit nuna tamakkerlugu kattuffiinut tapiissuteqarsinnaapput ataatsimoortumik aningaasaliissuteqarnikkut.

§ 25. Naalakkersuisut piukkunnartunut timersullammannullu kiisalu nunat tamalaat akornanni timersornikkut peqataanernut tapiissuteqarsinnaapput Team Grønlandimut ataatsimoortumik aningaasaliissuteqarnikkut.

§ 26. Kommunalbestyrelse najukkani timersoqatigiit peqatigiiffiinut tapiissuteqarsinnaavoq, tamatumani ilanngullugu ilitsersuisut/sungiusaasut akissarsiaqartitaanerannut.

§ 27. Timersornermut tapiissuteqartarneq kiisalu meeqqat inuusuttullu suliniaqatigiiffiinut sanilliullugu killiliinissaq pillugit Naalakkersuisut malittarisassiussapput.

 

Kapitali 7.
Højskolit

§ 28. Naalakkersuisut Kalaallit Nunaata avataani højskolimiinnernut tapiissuteqarsinnaapput.
Imm. 2. Naalakkersuisut højskolimiinnermut tapiissutinut piumasaasut pillugit malittarisassiorsinnaapput, tak. imm. 1.

 

Kapitali 8.
Kulturikkut ingerlatsineq inunnillu qaammarsaaneq

§ 29. Kulturikkut ingerlatsineq inunnillu qaammarsaaneq tassaapput tamanut ammasumik ataatsimiititsinerit, peqatigiiffilerinerit, atuagassaqartitsineq taamatullu aviisinik aviiseeqqanillu ingerlatsinerit, saqqummersitsinerit, isiginnaartitsinerit, erinarsornerit nipilersornerillu, filminik videunillu ingerlatsinerit, najukkani radiumik fjernsynimillu ingerlatsinerit, sumiiffimmi katersugaasiveqarneq aaqqissuussinerillu allat tamanut nalinginnaasumik kulturikkut ingerlatsinermut inunnillu qaammarsaanermut tunngasunik siunertaqartut.

§ 30. Naalakkersuisut kommunalbestyrelsilu makkununnga tapiissuteqarsinnaapput:
1) Tamanut ammasumik ataatsimiititsisarnermut.
2) Najukkami nunaluunniit tamakkerlugu suliniaqatigiiffinnut.
3) Atuagassaqartitsinermut, taamatuttaaq aviisiliornermut aviiseeraliornermullu.
4) Saqqummersitsinernut.
5) Isiginnaartitsinermut,
6) Erinarsornermut nipilersornermullu.
7) Filminik videunillu suliaqarnermut.
8) Najukkami radiukkut fjernsynikkullu aallakaatitsinermut, tamanna pillugu malittarisassat sukkulluunniit atuuttut tunngavigalugit.
9) Najukkami katersugaasiveqarnermut, tamanna pillugu malittarisassat sukkulluunniit atuuttut tunngavigalugit.
10) Najukkami nunaluunniit tamakkerlugu ingerlatanut aaqqissuussinernullu allanut, tamatumani ilanngullugit pikkorissarnerit tamanut nalinginnaasumik kulturimut inunnillu qaammarsaanermut tunngasut.
11) Eqqumiitsuliortunut ataasiakkaanut.
Imm. 2. Naalakkersuisut salliutillugit tapiissuteqarfigisassavaat nuna tamakkerlugu ingerlatat inuussutissarsiutigalugulu ingerlatsineq, kommunillu salliutillugit tapiissuteqarfigisassallugit najukkami ingerlatat.
Imm. 3. Kulturikkut ingerlatsineq inunnillu qaammarsaaneq pillugit sulineq kapitali manna malillugu tapersiivigineqartartoq piviusorsiortuussaaq tamatigoortuullunilu aammalu qaammarsaanermut eqqumiitsuliornermulluunniit tunngasuussalluni.
Imm. 4. Kapitali manna malillugu tapiissuteqarfigineqassanngillat siunertat naalakkersuinikkut ingerlatsinermut, upperisarsiornermut sulisartoqarnermiluunniit peqatigiiffeqarnermut tunngasut.

§ 31. Kulturikkut ingerlatsineq inunnillu qaammarsaaneq pillugit Naalakkersuisut malittarisassisorsinnaapput, tak. § 30, imm. 1, tamatumani ilanngullugit tapiissuteqarfigineqarnissamut piumasaqaatit pillugit malittarisassat.

 

Kapitali 9.
Init silamilu ingerlatsiviit

§ 32. Kommunalbestyrelsip sunngiffimmi atuartitsinermut, tak. kapitali 3, aamma sunngiffimmi sukisaarsaartarfinnut klubbinut akuerisaasunut, tak. kapitali 4, akeqanngitsumik atugassanngortissavai init atortorissaarutillu allat pisariaqartitat, tamatumani ilanngullugit init atuarfiit, silami ingerlatsiviit inissallu tamanut ammasut allat.
Imm. 2. Kommunalbestyrelsip meeqqat inuusuttullu suliniaqatigiiffiinut, tak. kapitali 5, aamma kulturikkut ingerlatsinermut inunnillu qaammarsaanermut, tak. kapitali 8, malittarisassat Naalakkersuisunit aalajangersagaasut malillugit atugassanngortissavaat init atortorissaarutillu allat pisariaqartitat, tamatumani ilanngullugit init atuarfiit, silami ingerlatsiviit inissallu tamanut ammasut allat.

§ 33. Kommunalbestyrelse ininut silamilu ingerlatsivinnut meeqqat inuusuttullu suliniaqatigiiffiinit pigineqartunut attartorneqartunulluunniit ingerlatsinermut tapiissuteqartassaaq.
Imm. 2. Kommunalbestyrelse ininut silamilu ingerlatsivinnut timersoqatigiiffinnit pigineqartunut attartorneqartunulluunniit ingerlatsinermut tapiissuteqarsinnaavoq.
Imm. 3. Kommunalbestyrelse ininut kulturikkut inunnillu qaammarsaanermi atugaasunut ingerlatsinermut tapiissuteqarsinnaavoq, tamatumani ilanngullugit ataatsimiittarfiit katersortarfiillu.

§ 34. Naalakkersuisut init meeqqat inuusuttullu suliniaqatigiiffiinit atugassat pilersinnerinut iluarsarneqarnerinullu tapiissuteqarsinnaapput.
Imm. 2. Naalakkersuisut timersortarfiit sananerannut, iluarsarnerinut aaqqissuunneranullu tapiissuteqarsinnaapput.
Imm. 3. Naalakkersuisut init kulturikkut ingerlatsinermut inunnillu qaammarsaanermut atugassat sananeqarnerannut, iluarsarnerinut aaqqissuunnerannullu tapiissuteqarsinnaapput, tamatumani ilanngullugit ataatsimiittarfiit katersortarfiillu.

§ 35. Kommunalbestyrelse allalluunniit init timersortarfiilluunniit pilersitaanerannut iluarsarneqarnerannullu tapiissuteqarsimappata Naalakkersuisut tapiissutit ilaat utertillugit akilersinnaavaat.

 

Kapitali 10.
Misileraanerit, naammagittaaliuutit atuutilersitsinerlu

§ 36. Naalakkersuisut peqqussut malillugu isumagisassaminnut paasissutissat piariaqarsorisatik kommunalbestyrelsimit piumasinnaavaat.

§ 37. Aningaasartuutit kulturikkut ingerlatsinermut inunnillu qaammarsaanermut atorneqartut kommunit tamakkerlugit akiligassaraat, aningaasartuutit tamakkerlugit ilaannaaluunniit Namminersornerullutik Oqartussanit allanilluunniit akilerneqassasut inatsisitigut erseqqissumik tunngavissiisoqarsimanngippat. Namminersornerullutik Oqartussat kommunillu suliassat peqqussummi suliassiissutaasut suliarinissaannut akiliuteqarlutik isumaqatigiissuteqarsinnaapput.
Imm. 2. Sumiiffinni kommunit aggornerisa avataanniittuni aningaasartuutit, tak. imm. 1, Naalakkersuisunit akilerneqassapput.

§ 38. Peqqussut manna malillugu tapiissutinut qanorlu allaffissornikkut aqunneqarnissaannut Naalakkersuisut malittarisassiorsinnaapput.

§ 39. Naalakkersuisut pissutsini immikkut ittuni aaqqissuussigallarnertut peqqussummi aalajangersakkat saneqqussinnaavaat peqqussutip iluani misileraaneq siuarsarumallugu tamanna pisariaqartutut isigineqarpat.
Imm. 2. Naalakkersuisut imm. 1 naapertorlugu misileraanernut tapiissuteqarsinnaapput.

§ 40. Peqqussut manna naapertorlugu kommunalbestyrelsit aalajangigaat pisortanut oqartussaasunut allanut suliassanngortinneqarsinnaanngillat. Sulianut Naalakkersuisut isumaqatigineratigut kommunalbestyrelsimut tunniunneqartunut tunngatillugu kommunalbestyrelsip aalajangigai aalajangiinermiit sapaatit akunneri sisamat qaangiutsinnagit Naalakkersuisunut suliassiissutigineqarsinnaapput.

§ 41. Inatsisartut peqqussutaat ulloq 1. juli 2002 atuutilerpoq.

§ 42. Kulturimut atuartitsinermullu tunngasut siulersorneqarnerat pillugu Inatsisartut peqqussutaat nr. 8, 7. maj 1988-imeersoq kiisalu sunngiffimmi sammisassaqartitsineq pillugu Inatsisartut peqqussutaat nr. 5, 9. april 1992-imeersoq 1. juli 2002-miit atuutilersumik atorunnaarsinneqarput.
Imm. 2. Taamaattorli sunngiffimmi ingerlatsineq pillugu Inatsisartut peqqussutaanni nr. 5-imi, 9. april 1992-imeersumi § 9 aamma § 10 atuutiinnassapput.
Imm. 3. Sunngiffimmi sammisassaqartitsinermut ataatsimiititalianik qinersisarneq pillugu nalunaarut nr. 8, 5. april 1993-imeersoq 1. juli 2002-miit atorunnaassaaq. Malittarisassat allat Inatsisartut peqqussutaanni taaneqartuni imm. 1-imi taaneqartut naapertorlugit aalajangigaasut atuutiinnassapput inatsisartut peqqussutaat manna allalluunniit tunngavigalugit malittarisassatigut aalajangersarneqartutigut allanngortinneqarnissartik atorunnaarsinneqarnissartilluunniit tikillugu.

Namminersornerullutik Oqartussat, ulloq 21. maj 2002

Jonathan Motzfeldt

/

Karl Kristian Olsen